1 አራባቱ ዪደ ዮራማዉ ባይራ ናና ኡባቱዋ ዎꬌዳ ድራዉ፥ የሩሳላመ አሳይ ዮራማ ናኣ ኡባፐ ቴፋ አካዝያሳ አ ኮታን ካተዬድኖ። ሄዋ ድራዉ፥ ዮራማ ናአይ አካዝያስ ካዉተꬃ ዶሜዳ። 2 አካዝያስ ካተትያ ዎደ፥ ላይꬃይ አዉ ኦይታማነ ላኣ፤ እ የሩሳላመን እት ላይꬃ ካተቴዳ። አ አት ሱንꬃይ አታሎ፤ አ ኦምራዉ ናኣ ናቶ። *ኦይታማነ ላኡዋ፦ አዉ ላይꬃይ ላታማነ ላኡዋ ዎይ ኦይታማነ ላኡዋ። 2 ካት። 8:26 ጼላ።

3 አካዝያስ ኢታተꬃን ባናዳን አ አታ አ ዞሬዳ ድራዉ፥ እካ አካባ ሶይ አሳ ኦግያን ሀመቴዳ። 4 አ አዉ ሀይቄዳዋፐ ጉይያን፥ አካባ ሶይ አሳይካ አ ዞርያ ድራዉ፥ አካባ ሶይ አሳዳን እካ መꬍና ጎዳ ስንꬃን ኢታባ ኦꬄዳ። ያቲደ አ ꬋዮ ጋሶ ግዴድኖ። 5 አካዝያስ አካባ ሶይ አሳ ዞርያ ካሊደ፥ አካባ ናኣ እስራኤልያ ካትያ ዮራማና እትፐ፥ ሶርያ ካትያ ሀዛኤላ ኦላናዉ ጋላኣደን ደእያ ራሞታ ጌተትያ ካታማ ቤዳ። ሶርያ አሳቱ ዮራማ ጫዴድኖ። 6 ሶርያ ካትያ ሀዛኤላና እ ኦለትያ ዎደ፥ ሶርያ አሳቱ አ ራሞታን ጫዴዳ ጫቻ ፓꬅ አካናዉ እዝራኤላ ካታማ ስሜዳ። ሄዋፐ ጉይያን፥ ዮራማ ናአይ፥ ይሁዳ ካቲ አካዝያስ አካባ ናኣ ዮራማ ጫደቴዳዋ ኦቻናዉ ዱገ እዝራኤላ ካታማ ቤዳ።

7 አካዝያስ ዮራማኮ ቤዳዌ አካዝያሳዉ ሀይቆ ግዳናዳን መꬍና ጎዳይ ኦꬄዳ። አካዝያስ ዮራማ በእሽን፥ አካባ ዛርያ ꬋይሳናዳን መꬍና ጎዳይ ዶሬዳ ንምሻ ናኣ ዬሀ ሞካናዉ ላኡ እትፐ ከሴድኖ። 8 ዬሁ አካባ ዛርያ ቦላ ፕርድያዋ ፖሌዳ ዎደ፥ ይሁዳ ካፓቱዋነ አካዝያሳ ማድያ አ እሻቱዋ ናና ደሚደ ዎꬌዳ። 9 ቃይ ዬሁ አካዝያሳ ኮዬዳ፤ ሳማርያን ቆሰት ኡቴዳዋ አ አሳቱ ደሜድኖ፤ ዬሁኮ አሂደ ዎꬊደ፥ “ባረ ኩመንꬃ ዎዛናፐ መꬍና ጎዳ ኮዬዳ ዮሳፌጻ ናኣ” ያጊደ ሞጌድኖ።

ሄዋ ድራዉ፥ አካዝያሳ ሶ አሳፐ ካዉተꬃ ኦይቃናዉ ዳንዳይያዌ ኦንነ ባዋ።

10 አካዝያሳ ዳያ አታላ ባረ ናአይ ሀይቄዳዋ በኤዳ ዎደ፥ ደንዳደ ይሁዳ ካትያ ዛርያ ኡባ ꬋይሳዱ። 11 ሽን ካትያ ናታ ይሆሸባአ፥ ሀይቃናዉ ደእያ ካትያ ናና ግዶፐ አካዝያሳ ናኣ ዮኣሻ ዉኣደ አካዱ። አነ አ ꬋንꬅያኖ ሂጻ ጎለን ቆሳዱ። ሄዋዳን ኦꬃደ፥ አታላ ናኣ ዎናዳን፥ ካትያ ዮራማ ናታ፥ አካዝያሳ ምቻታ፥ ቄስያ ዮዳሄ ማቻታ፥ ይሆሸባአ አ ቆሳዱ። 12 አታላ ቢታ ሞድያ ዎደ ኡባን፥ ናአይ ኡንቱንቱ ማታን ጾሳ ጌሻ ጎልያን ኡሱፑን ላይꬃ ቆሰቲደ ኡቴዳ።