23
አታሊ ቦላ ማካሊደ ደንዴድኖ
(2 ካታ. 11:4-16)
1 ላፑንꬃ ላይꬃን ዮዳሄ ምኒደ፥ ጼቱዋ ካፓቱዋ ይሮሃማ ናኣ አዛርያሳ፥ ያሆሀናና ናኣ እስማኤላ፥ ዮቤዳ ናኣ አዛርያሳ፥ አዳያ ናኣ ማእሴያነ ዚክራ ናኣ ኤልሻፋጻ ሺሺደ፥ ኡንቱንቱና ቃላ ጫቁዋ ጫቀቴዳ። 2 ኡንቱንቱ ይሁዳ ቢታ ኡባ ዩዪደ፥ ይሁዳ ካታማቱዋን ደእያ ሌዋቱዋነ እስራኤልያ ያራቱ ካፓቱዋ ኡባ አኪደ፥ የሩሳላመ ዬድኖ።
3 ሄዋፐ ጉይያን፥ ሄ ሺቄዳ አሳይ ኡባይ ጾሳ ጌሻ ጎልያን ካትያና ቃላ ጫቁዋ ጫቄድኖ። ዮዳሄ ሄ አሳ፥ “ካትያ ናኣ ሀዋ በእተ! መꬍና ጎዳይ ካሰ ዳዊታ ዘረꬃባ ሃሳዬዳዋዳን እ ካተቶ። 2 ሳሜላ 7:12 4 ህንተንቱ ኦꬃናዉ በስያባይ ሀዋ: ሳምባታ ጋላሳን ሀ ጌሻ ጎልያ ገልያ ቄሳቱ ዋፐነ ሌዋቱዋፐ ሄዙ ኩሽያፐ እት ኩሺ ፐንግያ ናግተ፤ 5 ቃይ ሄዙ ኩሽያፐ እት ኩሺ ካትያ ጎለን ደእተ፤ ሄዙ ኩሽያፐ እት ኩሺ ቃይ ባሱዋ ፐንግያን ደእተ። አሳይ ኡባይ መꬍና ጎዳ ጌሻ ጎልያ ዳባባ ሺቆ። 6 ቄሳቱ ዋፐነ ኦꬅያ ሌዋቱዋፐ አትና፥ ኦንነ መꬍና ጎዳ ጌሻ ጎልያ ገሎፖ። ኡንቱንቱ ጌሻ ግድያ ድራዉ፥ ገልኖ፤ ሽን ሀራ አሳይ ኡባይ መꬍና ጎዳ አዛዙዋ ናጊደ፥ ጌሻ ጎልያፐ ካረና ደእኖ።
7 “ሌዋቱ ኡባይ ባረንቱ ኦላ ሚሻ ባረንቱ ኩሽያን ኩሽያን ኦይቂደ፥ ካትያ ግዶዪደ፥ ካቲ ከስያ ዎደነ ገልያ ዎደ ኡባን አናና እትፐ ደእኖ። ጌሻ ጎልያ ገልያ ኦናነ ዎꬍተ” ያጌዳ።
8 ሌዋቱነ ይሁዳ አሳይ ኡባይ ቄሲ ዮዳሄ አዛዜዳዋ ኡባ ኦꬄድኖ። ቄሲ ዮዳሄ ሳምባታን ኦሱዋፐ ከሳናዉ በስያ ሌዋቱዋ ከሲደ የድቤና። ሄዋ ድራዉ፥ ናጉዋ ካላይ ጋኬዳዋንቱካ ናጉዋ ካላን ፖሌዳዋንቱካ ኡባይ ያን ደኢኖ። ሄዋን ካፓቶ አካናዉ ግድያ አሳይ ደኤ። 9 ሄዋፐ ጉይያን፥ ቄሲ ዮዳሄ ጾሳ ጌሻ ጎልያን ደእያ፥ በን ካትያ ዳዊታ ቶራቱዋ፥ ዎጋ ጎንዳለቱዋነ ቄር ጎንዳለቱዋ ካፓቶ እሜዳ። 10 አሳይ ኡባይ ኦላ ሚሻ ባረ ኩሽያን ባረ ኩሽያን ኦይቂደ፥ ጌሻ ጎልያዉ ኡሸቻ ባጋፐ ሀድርሳ ባጋ ጋካናዉ፥ ያርሽያ ሳኣ ማታንነ ጌሻ ጎልያ ማታን ካትያ ዩሹዋን ኤቃናዳን ቄሲ ዮዳሄ ኦꬄዳ። 11 ሄዋፐ ጉይያን፥ ዮዳሄ ካትያ ናኣ ዮኣሻ ካረ ከሲደ፥ አ ሁጲያን ካላቻ ዎꬄዳ፤ ካዉታ ህግያ ማጻፋ አዉ እሚደ ካተዬዳ። ዮዳሄነ አ ናናይ ዮኣሻ ኦኪደ፥ “ካቲ ሸምፑዋ ጋምኦ!” ያጌድኖ።
12 አሳይ ዎጺደነ ካትያ ሳቢደ ሆምቦጭያዋ አታላ ስሴዳ ዎደ፥ አሳኮ መꬍና ጎዳ ጌሻ ጎልያ ባዱ። 13 ካቲ ፐንግያን ባረ ቱሳ ማታን ኤቄዳዋ በኣዱ። ካፓቱነ ጹሩምባ ፑንያዋንቱ ካትያ ማታን ደኢኖ፤ ይሁዳ አሳይ ኡባይ ናሸቲደ፥ ጹሩምባ ፑኒኖ፤ ማዝሙርያ የጽያዋንቱካ ስንꬃዉ አꬊደ፥ ባረንቶ ደእያ የꬃ ሚሻን ጋላቲኖ። አታላ ባረ ማዩዋ ፔꬋደ፥ “ሀዌ ማካላ! ሀዌ ማካላ!” ያጋደ ዋሳዱ።
14 ቄሲ ዮዳሄ ኦላንቻቱ ካፓቱዋ፥ “አታሎ መꬍና ጎዳ ጌሻ ጎልያን ዎꬎፕተ! ኦ ያናነ ሃና ሳልፒደ ሳልፐቱዋ ግዱዋን ዎꬂደ፥ ካረ ከስተ፤ እዞ አሻናዉ ካጄልያ አሳይ ደኦፐ ዎꬍተ!” ያጌዳ። 15 ሄዋ ድራዉ፥ ኡንቱንቱ እዞ ኦይቂደ፥ ካትያ ጎልያ አፌድኖ፤ ፓራ ፐንግያን እዞ ዎꬌድኖ።
ዮዳሄ ቃላ ጫቁዋ ኦራꬄዳ
(2 ካታ. 11:17-20)
16 ሄዋፐ ጉይያን፥ ዮዳሄ እ ባረ ሁጲያዉ፥ አሳይ ኡባይነ ካቲ መꬍና ጎዳ አሳ ግዳናዳን ቃላ ጫቁዋ ዎꬄዳ። 17 ሄ ዎደ አሳይ ኡባይ ባኣላ ኤቃ ጎልያ ቢደ፥ ሄ ጎልያ ክንቼዳ፤ ያርሽያ ሳአቱዋነ ምስለቱዋ ክንቼሬꬄዳ። ቃይ ማታና ግያ ባኣላ ቄስያ ያርሽያ ሳአቱ ስንꬃን ዎꬌድኖ።
18 ዮዳሄ ቄሳቱ ዋነ ሌዋቱዋ መꬍና ጎዳ ጌሻ ጎልያ ኦሶ ካፑዋ ኦꬂደ ሱንꬄዳ። ኡንቱንቱ ኪታይ ሙሴ ህግያን ጻፈቴዳዋዳን መꬍና ጎዳዉ ጹግያ ያርሹዋ ያርሽያዋነ ካቲ ዳዊተ ኦዴዳዋዳን ማዝሙርያ የጽያዋነ ባላ ቦንችስያዋ። 19 ህግያን ጻፈቴዳዋዳን ቱና አሳይ እቱነ ገለናዳን ዮዳሄ መꬍና ጎዳ ጌሻ ጎልያ ፐንግያን ናግያዋንታ ዎꬄዳ።
20 ዮዳሄ ጼቱዋ ካፓቱዋ፥ ዎልቃማ አሳቱ፥ ደርያ ሞድያዋንታነ ሄ ቢታ አሳ ኡባ ባረናና አኪደ፥ ካትያ መꬍና ጎዳ ጌሻ ጎልያፐ ዱገ ዎꬄዳ። ቆሞ ባጋ ፐንግያና ካትያ ጎልያ ገሌድኖ፤ ካትያ ካዉተꬃ አራታን ኡትሴድኖ። 21 ያትና ይሁዳ አሳይ ኡባይ ናሸቴዳ። አታላ ካትያ ጎለን ማሻን ሀይቄዳዋፐ ጉይያን፥ ካታማይ ዎፑ ጌዳ።