1 ዮኣሽ ካተትያ ዎደ፥ ላይꬃይ አዉ ላፑና፤ እ የሩሳላመን ኦይታሙ ላይꬃ ካተቴዳ። አ ዳይ ሱንꬃይ ጺብያ፤ አ በርሳበሀ ካታማፐ ዬዳ አሳ። 2 ቄሲ ዮዳሄ ደኤዳ ላይꬃ ኡባን ዮኣሽ መꬍና ጎዳ ስንꬃን ሱረባ ኦꬄዳ። 3 ዮዳሄ ዮኣሻዉ ላኡ ማጫዋንታ እሜዳ፤ ኡንቱንቱ አዉ አቱማ ናናነ ማጫ ናና የሌድኖ።

4 ሄዋፐ ጉይያን፥ ዮኣሽ መꬍና ጎዳ ጌሻ ጎልያ ኦራꬃናዉ ቆፔዳ። 5 ዮኣሽ ቄሳቱ ዋነ ሌዋቱዋ ሺሺደ፥ “ይሁዳ ካታማቱዋ ቢደ፥ ህንተንቱ ጾሳ ጌሻ ጎልያ ላይꬃን ላይꬃን ኦራꬃናዉ እስራኤልያ ኡባፐ ሻሉዋ ሺሽተ፤ ሀ የዉዋ ኤለካ ኦꬅተ” ያጌዳ። ሽን ሌዋቱ ኤለካ ኦꬅበይክኖ። 6 ሄዋ ድራዉ፥ ካቲ ቄሰ ኡባቱዋ ካፑዋ ዮዳሀ ጼሲደ፥ “የሩሳላመ አሳፐነ ይሁዳ አሳፐ ጊራ ሺሻናዉ አያዉ ሌዋቱዋ ኪታበይኪ? መꬍና ጎዳ አሽካሪ ሙሴነ እስራኤልያ አሳይ ጾሳ ዱንካንያ ኦሶ ጊራይ ሺቃናዳን በን ማይ ኡቴድኖ። ከሳ 30:11-16 7 ሄ ኢታ ምሽራቶ አታሎ ካልያ አሳቱ ጾሳ ጌሻ ጎልያ ባይዝድጌድኖ፤ ኡንቱንቱ ጾሳ ጌሻ ጎልያን ደእያ ጌሻ ሻሉዋ ኡባ አኪደ፥ ባኣላዉ ጎይናናዉ ጎኤቴድኖ” ያጌዳ።

8 ሄዋ ድራዉ፥ ካቲ ሌዋቱዋ አዛዝና፥ ኡንቱንቱ ሳጽንያ ጊግሲደ፥ መꬍና ጎዳ ጌሻ ጎልያ ፐንግያፐ ካረ ባጋና ዎꬄድኖ። 9 ጾሳ ቆማይ ሙሴ መላ ቢታን ደኢደ፥ እስራኤልያ አሳፐ ሺሻናዳን አዛዜዳ ጊራ መꬍና ጎዳዉ አሀና ማላ፥ ይሁዳንነ የሩሳላመን ሌዋቱ አዋዬድኖ። 10 ካፓቱነ አሳይ ኡባይ ናሸቲደ፥ ጊራይ ሳጽንያ ኩማና ጋካናዉ፥ አን የጌድኖ። 11 ሳጽኒ ሌዋቱ ባጋና ካትያ ኦሳንቻቱዋኮ ጋክና፥ ሳጽንያ ግዱዋን ዳሮ ሚሻይ ዳጋቴዳዋ ኡንቱንቱ በኤዳ ዎደ ኡባን፥ ካትያ ጻፊነ ቄሰ ኡባቱዋ ካፑ ሱንꬄዳ ብታኒ ዪኖ፤ ሳጽንያፐ ሚሻ ከሲኖ፤ ሳጽንያ ሳኣን ዛር ዎꬅኖ። ኡንቱንቱ ኡባ ጋላስ ሄዋዳን ኦꬂደ፥ ዳሮ ሻሉዋ ዳጋዬድኖ።

12 ሄ ሚሻ ካቲነ ዮዳሄ መꬍና ጎዳ ጌሻ ጎልያ ኪታ ዎቻናዉ ሱንቴዳ አሳቶ እሚኖ። ኡንቱንቱ መꬍና ጎዳ ጌሻ ጎልያ ኦራꬃናዉ ሹቻ ማስያዋንታነ አናጸቱዋ፥ ቃይ ጾሳ ጌሻ ጎልያ ኦራꬃናዉ ብራታነ ናሃስያ ኦሳንቻቱዋ ቃጻሬድኖ። 13 ኦሳንቻቱ ጾሳ ጌሻ ጎሊ ባዬዳዋ ምን ኦꬂደ፥ ባረንቱ ኩሽያን ካሰዋዳን ኦራጽሴድኖ። 14 ኦሳንቻቱ ጌሻ ጎልያ ኦራጽሱዋ ፖሌዳ ዎደ፥ ፓላሄዳ ዎርቃነ ብራ ካትያኮነ ዮዳሄኮ አሄድኖ። ያትና ኡንቱንቱ ሄ ዎርቃንነ ብራን መꬍና ጎዳ ጌሻ ጎልያ ግዶ ኦሶ ማድያ ሚሻቱዋ፥ ጹግያ ያርሾ ሀንያ ሳነቱዋነ ሀራ ዱማ ዱማ ሚሻቱዋ ኦስሴድኖ።

ዮዳሄ ደኤዳ ላይꬃን መꬍና ጎዳ ጌሻ ጎልያን ጹግያ ያርሹዋ ኡባ ዎደ ኡንቱንቱ ያርሺኖ።

15 ዮዳሄ ሎይꬅ ጭሚደ ሀይቄዳ፤ እ ሀይቂያ ዎደ አ ላይꬃይ ጼታነ ሀታማ። 16 ዮዳሄ እስራኤላን ጾሳዉነ ጾሳ ጌሻ ጎልያዉ ሎኦባ ኦꬄዳ ድራዉ፥ ዳዊታ ካታማን ካተቱዋ ማካናን አ ሞጌድኖ።

17 ዮዳሄ ሀይቄዳዋፐ ጉይያን፥ ይሁዳ ካፓቱ ዪደ፥ ጉፋኔድኖ። ያትና፥ ካቲ ኡንቱንቱ ዞርያ ስሴዳ። 18 ኡንቱንቱ መꬍና ጎዳ ባረንቱ ማይዛ አዎቱዋ ጾሳ ጌሻ ጎልያ አጊደ፥ አሼር ምስለቶነ ኤቃቶ ጎይኔድኖ። ኡንቱንቱ ኦꬄዳ ባላ ድራዉ፥ ይሁዳ ቦላነ የሩሳላመ ቦላ ጾሳ ሀንቁ ዎꬌዳ። 19 አሳይ ባረኮ ስማናዳን መꬍና ጎዳይ ትምቢትያ ኦድያዋንታ ኡንቱንቱኮ ኪቴዳ፤ ትምቢትያ ኦድያዋንቱ ኡንቱንቱ ቦላ ማርካቴድኖ፤ ሽን ኡንቱንቱ ስሰናን እጼድኖ።

20 ሄዋፐ ጉይያን፥ ቄስያ ዮዳሄ ናኣ ዛካራሳ ቦላ ጾሳ አያናይ ዎꬌዳ፤ ዛካራስ አሳ ስንꬃን ኤቂደ፥ “ጾሳይ ሀዋዳን ያጌ፤ ‘ህንተ መꬍና ጎዳ አዛዙዋ ፖልያዋ አያዉ እጺቴ? ሄዌ ህንተንቶ ኢታ። ህንተንቱ መꬍና ጎዳ አጌዳ ድራዉ፥ እካ ህንተንታ አጌዳ’ ያጌ” ያጌዳ። ማቶሳ 23:35፤ ሉቃሳ 11:51 21 ሄዋፐ ጉየ አሳይ አ ቦላ ማቀቴዳ። ካቲ ኡንቱንቱ አዛዝና፥ መꬍና ጎዳ ጌሻ ጎልያ ዳባባን አ ሹቻን ጫዲደ ዎꬌድኖ። 22 ካቲ ዮኣሽ ዛካራሳ አዉ ዮዳሄ ባረዉ ኦꬄዳ ኬካተꬃ ሀሳየናን አጊደ፥ አ ናኣ ዛካራሳ ዎꬍሴዳ። ዛካራስ ሀይቂደ፥ “መꬍና ጎዳይ ሀዋ በኢደ፥ ሀሉዋ ከሶ” ያጌዳ።

23 ሄ ላይꬃይ ላመትያ ዎደ፥ ሶርያ ኦላንቻቱ ዮኣሻ ኦላናዉ ዬድኖ። ይሁዳ ቦላነ የሩሳላመ ቦላ ማዪደ፥ አሳ ካፓቱዋ ኡባ ዎꬊደ፥ ኡንቱቱፐ ኦሞዴዳዋ ኡባ ዳማስቆን ደእያ ባረንቱ ካትያዉ የዴድኖ። 24 ሶርያ ኦላንቻቱ ፓይዱዋን ጉꬃ፤ ሽን ይሁዳ አሳይ መꬍና ጎዳ ባረንቱ አዎቱዋ ጾሳ አጌዳ ድራዉ፥ መꬍና ጎዳይ ሎይꬅ ዳሮ ግዴዳ ኡንቱንቱ ኦላንቻቱዋ ሶርያ ኦላንቻቱ ኩሽያን አꬂደ እሜዳ። ኡንቱንቱ ሀዋዳን ኦꬂደ፥ ዮኣሻ ሙሬድኖ።

25 ሶርያ ኦላንቻቱ አፐ ሻከትያ ዎደ፥ ዮኣሽ ሎይꬅ ማዱንጽ ኡቴዳ። ቄስያ ዮዳሄ ናኣ ሱꬃ ድራዉ፥ አ ኦሳንቻቱ አ ቦላ ማቀቲደ፥ እ ባረ ግሱዋን ግስ ደእሽን ዎꬌድኖ። እ ሀይቂና፥ ዳዊታ ካታማን አ ሞጌድኖ፤ ሽን ካተቱዋ ማካናን አ ሞግበይክኖ። 26 ዮኣሻ ቦላ ማቀቴዳዋንቱ አሞኒ ሽምኣት ናኣ ዛባዳነ ሞኣበ ሺምሪት ናኣ ይሆዛባዳ። 27 ዮኣሻ ናናቱዋባይ፥ አ ቦላ ትምቢትያ ኦዴዳ ዳሮባይነ ጾሳ ጌሻ ጎልያ እ ኦራጽሴዳባይ ካተቱ ታርክያ ማጻፋን ጻፈት ኡቴዳ። ዮኣሽ ሀይቂና፥ አ ሳኣን አ ናአይ አመስያስ ካተቴዳ።