25
ይሁዳ ካትያ አመስያሳ
(2 ካታ. 14:2-6)
1 አመስያስ ካተትያ ዎደ፥ ላይꬃይ አዉ ላታማነ እቼሻ፤ እ የሩሳላመን ላታማነ ኡዱፑን ላይꬃ ካተቴዳ። አ ዳይ ሱንꬃይ ይሆኣድኖ፤ አ የሩሳላመ አሳ። 2 አመስያስ መꬍና ጎዳ ስንꬃን ሱረባ ኦꬄዳ፤ ሽን ኩመንꬃ ዎዛናፐ ግደና። 3 አመስያስ ካዉተꬃ ሎይꬅ ኦይቄዳ ሳና፥ ባረ አዉዋ ዎꬌዳ ኦሳንቻቱዋ ዎꬌዳ። 4 ሙሴ ህግያ ማጻፋን ጻፈቴዳዋዳን፥ መꬍና ጎዳይ፥ “ናናቱ ኦꬄዳ ናጋራ ድራዉ፥ አዎቱዋ ዎꬋናዉ በሰና፤ ቃይ አዎቱ ኦꬄዳ ናጋራ ድራዉካ፥ ናና ዎꬋናዉ በሰና። አሳይ ኡባይ ባረ ኦꬄዳ ናጋራን ናጋራን ሀይቃናዉ በሰ” ያጊደ አዛዜዳዋዳን፥ ዎꬌዳዋንቱ ናና ዎꬍቤና።ዛረ. 24:16
ኤዶማ ቦላ ደንዴዳ ኦላ
(2 ካታ. 14:7)
5 አመስያስ ይሁዳ አሳ ሺሺደ፥ ባረንቱ አዎቱዋ ጎለን ጎለን ሻኣ ካፓቱዋነ ጼቱዋ ካፓቱ ሱንꬃተꬃ ግዶን ዎꬄዳ። እ ላታሙ ላይꬃነ ላታሙ ላይꬃፐ ቦላና ደእያ ይሁዳ ዛራቱዋነ ቢንያማ ዘረꬃ ኡባ ፓይዴዳ፤ ጎንዳልያነ ቶራ ኦይቂደ፥ ኦላዉ ጊጌዳ ሄዙ ጼቱ ሻአ ዶረቴዳ አሳቱዋ ደሜዳ። 6 ቃይ እስራኤልያፐ ጼቱ ሻአ ምኖ አሳቱዋ ሄዙ ሻአነ ኦይዱ ጼቱ ኪሎ ግራመ ዴጽያ ብራን አመስያስ ቃጻሬዳ። 7 ሽን ጾሳ አሳ ጌተትያ እት ብታኒ አመስያሳኮ ዪደ፥ “ካትያዉ፥ መꬍና ጎዳይ እስራኤልያናነ ኤፍሬማ አሳና ባዋ ድራዉ፥ እስራኤልያ ኦላንቻቱ ኔናና ቦፕኖ። 8 ኔን፥ ኡንቱንቱ ታና ምንሳና ጋደ ቆፖፐ፥ ጾሳይ ኔና ነ ሞርከቱዋ ስንꬃን ካዉሻና። አያዉ ጎፐ፥ ኤቃናዉ ዎይ ካዉሻናዉ ጾሳዉ ዎልቃይ ደኤ” ያጌዳ።
9 አመስያስ ጾሳ አሳ፥ “ታን እስራኤልያ ኦላንቻቶ ጭጌዳ ሄ ብራይ ኡባይ ዋናኔ?” ያጌዳ።
ጾሳ አሳይ፥ “መꬍና ጎዳይ ነዉ ሄዋፐ አꬂደ እማናዉ ዳንዳዬ” ያጌዳ። 10 ሄዋ ድራዉ፥ አመስያስ ኤፍሬማፐ ባረኮ ዬዶ ኦላንቻቱ ባረንቱ ሶ ሶ ባናዳን ሞይዜዳ። ኡንቱንቱ ይሁዳ አሳ ቦላ ሎይꬅ ሀንቀቲደ፥ ባረንቱ ሶ ሶ ስሜድኖ።
11 ሄዋፐ ጉይያን፥ አመስያስ ባረና ምንሲደ፥ ባረ ኦላንቻቱዋ ካለꬂደ፥ ማጽነ ዎምባ ቤዳ፤ አ ኦላንቻቱ ኤዶማ አሳፐ ታሙ ሻኣ ዎꬌድኖ። 12 ቃይ ኡንቱንቱ ታሙ ሻአ ኦላንቻቱዋ ፓጻ ኦሞዴድኖ፤ ኡንቱንታ አፉዋ ዶናዉ አፌድኖ፤ ሄ አፉዋን ዱገ ኦልና፥ ህርክን ደእያ ሹቻን አሳቱ ኡባይ መኤረቲደ ዉሬድኖ። 13 ሽን ሄ ዎደ አመስያስ ባረናና ኦላዉ ቤናዳን ጉየ የዴዳ እስራኤልያ ኦላንቻቱ ሳማርያፐ ቢደ፥ ቤት-ሆሮና ጋካናዉ ደእያ ይሁዳ ካታማቱዋ ኦሌድኖ። ኡንቱንቱ ይሁዳ አሳፐ ሄዙ ሻኣ ዎꬊደ፥ ዳሮ ኦሞዱዋ አኬድኖ።
14 አመስያስ ኤዶማ አሳቱዋ ዎꬍ ስሚደ፥ ኤዶማ አሳ ጾሳቱዋ ምስለቱዋ አኪደ ዬዳ። ሄ ምስለቱ ባረዋንታ ግዳናዳን ኤሲደ፥ ኡንቱንቶ ጎይኔዳነ እጻና ጩዋዬዳ። 15 ሄዋ ድራዉ፥ መꬍና ጎዳ ሀንቁ አመስያሳ ቦላ ኤጽ ከሴዳ፤ ያትና፥ ጾሳይ እት ትምቢትያ ኦድያዋ አመስያሳኮ ኪቴዳ። ቢደ፥ “ባረንቱ አሳ ነ ኩሽያፐ አሻናዉ ዳንዳይቤና ጾሳቶ ኔን አያዉ ጎይናዲ?” ያጌዳ።
16 ትምቢትያ ኦድያዌ ሃሳይሽን፥ ካቲ፥ “ኔን ካትያና ዞረታናዳን ኑን ኔና ሱንꬄዶየ? አጋ! ኔን አያዉ ሀይቃናዉ ኮያይ?” ያጌዳ።
ትምቢትያ ኦድያዌ አግ አኪደ፥ “ኔን ሀዋ ኦꬄዳ ድራዉነ ታን ኔና ዞሬዳዋ ስሳቤና ድራዉ፥ ጾሳይ ኔና ꬋይሳናዉ ቃቼዳዋ ሀእ ታን ኤራድ” ያጌዳ።
እስራኤልያ ቦላ ደንዴዳ ኦላ
(2 ካታ. 14:8-20)
17 ሄዋፐ ጉይያን፥ ይሁዳ ካቲ አመስያስ ባረና ዞርያ አሳቱዋና ዞረቲደ፥ እስራኤልያ ካትያ ዬሁ ናኣ ናኣ፥ ዮአካዛ ናኣ፥ ዮኣሻዉ አሳ ኪቲደ፥ “ሃያ፤ አነ ላኡ ኦላ ጋከቶይተ” ያጊደ ናሴዳ።
18 እስራኤልያ ካቲ ዮኣሽ ይሁዳ ካትያ አመስያሳ ሀዋዳን ያጌዳ፤ “ሊባኖሳን ደእያ ክንድቹ ሊባኖሳን ደእያ ዝጋዉ ኪቲደ፥ ‘ነ ናቶ ታ ናአዉ እማ’ ያጌዳ። ሽን ሊባኖሳን ደእያ እት ዶአይ ሄዋና አꬊደ፥ ሄ ካሽያ የꬌዳ። 19 ኔንካ፥ ‘በአ፥ ኤዶማ ቢታ አሳ ጾናድ’ ያጋደ ነ ዎዛናን ኦቶሩዋን ኩማዳ። ሽን ሀእ ኔን ነ ሶን ዎፑ ጋደ ኡታ አጋ። ነ ቦላነ ነ ጋድያ ይሁዳ ቦላ መቱዋነ ባሻ አህያዋ አያዉ ደንꬃይ?” ያጊደ ዛሬዳ።
20 ሽን አመስያስ ስሳ እጼዳ። ኡንቱንቱ ኤዶማ ጾሳቶ ጎይኔዳ ድራዉ፥ ጾሳይ ኡንቱንታ ኡንቱንቱ ሞርከቱዋ ኩሽያን አꬂደ እማናዉ ኮዬዳ። 21 ሄዋ ድራዉ፥ እስራኤልያ ካትያ ዮኣሽ ኦላናዉ ከስና፥ እነ ይሁዳ ካቲ አመስያስ ይሁዳን ደእያ ቤት-ሸመሻ ጌተትያ ካታማን ኦላ ጋከቴድኖ። 22 እስራኤልያ አሳይ ይሁዳ አሳ ጾኔዳ፤ ይሁዳ አሳይ ኡባይ ባቃቲደ፥ ባረ ሶ ባረ ሶ ቤዳ። 23 ሄዋፐ ጉይያን፥ እስራኤልያ ካቲ ዮኣሽ አካዝያሳ ናኣ ናኣ፥ ዮኣሻ ናኣ፥ ይሁዳ ካትያ አመስያሳ ቤት-ሸመሻን ኦሞዲደ፥ የሩሳላመ አሄዳ። ያቲደ የሩሳላመ ድርሳ ግምቢያ፥ ኤፍሬማ ፐንግያፐ ቢደ ዞዝያ ፐንግያ ጋካናዉ ደእያ፥ ኦይዱ ጼቱ ዋꬋ ግድያ ሳኣ ላሌዳ። 24 ላሊደ ጾሳ ጌሻ ጎልያን ደእያ ዎርቃነ ብራ ኡባ፥ ኦቤድ-ኤዶማ ዘረꬃይ ናግያ ሚሻነ ካትያ ጎለን ደእያ ሻሉዋ ኡባ አኬዳ፤ ቃይ ዋብያዉ ኦይቀቴዳ አሳቱዋካ አኪደ፥ ሳማርያ ስሜዳ።
25 ዮአካዛ ናአይ፥ እስራኤልያ ካቲ ዮኣሽ ሀይቄዳዋፐ ጉይያን፥ ዮኣሻ ናአይ ይሁዳ ካቲ አመስያስ ታማነ እቼሹ ላይꬃ ደኤዳ። 26 አመስያስ ኦꬄዳባይ ኡባይ፥ ኮይሮፐ ዉርሰꬃ ጋካናዉ፥ ይሁዳ ካተቱዋነ እስራኤልያ ካተቱዋ ታርክያ ማጻፋን ጻፈት ኡቴዳ። 27 አመስያስ መꬍና ጎዳ ካልያዋ አጌዳዋፐ ጉይያን፥ ኡንቱንቱ አ ቦላ የሩሳላመን ማቀቴድኖ። እ ላክሻ ካታማ ባቃቴዳ። ሽን ኡንቱንቱ አ ጌዱዋ ላክሻ አሳ ኪትና፥ አ ያን ዎꬌድኖ። 28 አ አሃ ፓራን ጫን አሂደ፥ ዳዊታ ካታማን አ ማይዛ አዎቱዋና ሞጌድኖ።