1 ሀዌ ኡባይ ፖለቴዳ ዎደ፥ ሄ ሳኣን ደእያ እስራኤልያ ኡባቱ ይሁዳ ካታማቱዋ ቢደ፥ ደእያዋ ኡባ ꬋይሳና ጋካናዉ፥ ኤቃ ቱሳቱዋ ክንቼሬꬄድኖ፤ አሼሮ ግያ ጾሳት ምስልያ ቃንጽ ኦሌድኖ፤ ይሁዳ ቢታንነ ቢንያማ ጋድያን ኡባን፥ ቃይ ኤፍሬማ ቢታንነ ምናሰ ቢታን ደእያ ጎይንያ ꬎቃ ሳአቱዋነ ያርሽያ ሳኣ ላሌድኖ። ኡንቱንቱ ሄዋንታ ኡባ ꬋይሴዳዋፐ ጉይያን፥ እስራኤልያ አሳይ ኡባይ ባረንቱ ካታማ ካታማነ ባረንቱ ሶ ሶ ስሜድኖ።

2 ህዝቂያሰ ቄሳቱ ዋነ ሌዋቱዋ ኡንቱንቱ ኦሱዋ ማራን ጩጉዋን ጩጉዋን ሻክ ኤሴዳ። ኡንቱንቱ ኪታይ ጹግያ ያርሹዋነ እትፐተꬃ ያርሹዋ ጾሳዉ ያርሽያዋነ ጌሻ ጎልያ ፐንግያን መꬍና ጎዳ ጋላትያዋነ ሳቢያዋ። 3 መꬍና ጎዳ ህግያን ጻፈቴዳዋዳን ጉራነ ኦማርስ፥ ሳምባታን፥ አግናይ ጼርያ ዎድያንነ ባላ ጋላሳቱዋን ያርሽያ፥ ጹግያ ያርሾ ኮሽያ መሄቱዋ ካቲ ባረፐ እሜዳ።

4 መꬍና ጎዳ ህግያን ጻፈቴዳዋዳን፥ ቄሳቱ ነ ሌዋቱ ጾሳ ኪታ ኦꬃና ማላ፥ ኡንቱንቶ በስያዋ እማናዳን የሩሳላመን ደእያ አሳ ካቲ አዛዜዳ። 5 ህዝቂያሰ ሄዋ አዛዞ ሳናካ፥ እስራኤልያ አሳይ ካꬃፐ፥ ዎይንያ ኤሳፐ፥ ዛይትያፐ፥ ማꬃ ኤሳፐነ ጎሻን ሞኬዳባፐ ጼራ ጾሳዉ ዳርሲደ እሜድኖ፤ ባረንቶ ደእያ ኡባባፐካ አስራታ መꬍና ጎዳዉ ከሴድኖ። 6 ይሁዳ ካታማቱዋን ደእያ እስራኤልያ አሳይነ ይሁዳ አሳይ ቦራፐነ ዶርሳፐ አስራታነ መꬍና ጎዳዉ፥ ባረንቱ ጾሳዉ፥ ዱማይ ዎꬄዳዋ አሂደ ዶሬድኖ። 7 ኡንቱንቱ ሄዘንꬆ አግናን ዶረꬃ ዶሚደ፥ ላፑንꬃ አግናን ፖሌድኖ። 8 ህዝቂያስነ ካፓቱ ዶረቴዳዋ በኤዳ ዎደ፥ ኡንቱንቱ መꬍና ጎዳነ ጾሳ አሳ እስራኤልያ ጋላቴድኖ።

9 ሄዋፐ ጉይያን፥ ህዝቂያሰ ዶሪደ ዎꬄዳ እሙዋባ ቄሳቱ ዋነ ሌዋቱዋ ኦቼዳ።

10 ጻዶቃ ያራ ግድያ ቄሰ ኡባቱዋ ካፑ አዛርያስ ህዝቂያሳ፥ “አሳይ ባረንቱ እሙዋ መꬍና ጎዳ ጌሻ ጎልያ አህያዋ ዶምና፥ ኑን ሚደ ካሌዶ። መꬍና ጎዳይ ባረ አሳ አንጄዳ ድራዉ፥ ሀዌ ሎይꬅ ዳሩ አቴዳ” ያጌዳ።

11 ሄዋፐ ጉይያን፥ ህዝቂያሰ መꬍና ጎዳ ጌሻ ጎልያን አየንቶ ምንጅያ ክፍለቱዋ ጊግሳናዳን አሳ አዛዝና አሳይ ጊግሴዳ። 12 አሳይ እሙዋ፥ ባረዉ ደእያዋፐ አስራታነ ጾሳዉ ዱማይ ዎꬄዳዋ አማነት እሚደ፥ ሄ ክፍለቱዋ ገልሴድኖ። ሌዊ ኮናኒ ኡንቱንቱ ቦላ ሱንቴዳ፤ አ እሻይ ሽምእ አ ካሊደ ሱንቴዳ። 13 ካቲ ህዝቂያስነ ጾሳ ጌሻ ጎልያን ካፖትያ አዛርያስ አዛዝና፥ ይህኤል፥ አዛዚ፥ ናሃት፥ አሳሄል፥ ያርሞት፥ ዮዛባድ፥ ኤልኤል፥ ይስማከ፥ ማሃትነ ባናይ ሱንቴድኖ፤ ኡንቱንቱ ኮናንያነ አ እሻ ሽምአ አዎተꬃፐ ጋርሳና ኦꬃናዉ ሱንቴድኖ። 14 ሌዊያ ይምና ናአይ ቆሪ፥ አዋይ ዶልያ ባጋ ፐንግያ ናግያዌ፥ አሳይ መꬍና ጎዳዉ ባረ ሸንያን ጮ አሄዳ እሙዋነ ዱማይ ዎꬄዳዋ አካናዉነ ሻክ ሻክ እማናዉ ሱንቴዳ። 15 ቄሳቱ ደእያ ካታማቱዋን ዎጋፐ ላፋ ጋካናዉ ደእያ ባረንቱ እሻቶ አማነቲደ፥ ኡንቱንቱ ኦሱዋዳን ኦሱዋዳን ሻክ ሻክ እማናዳን ኤደን፥ ምንያምን፥ ኢያሱ፥ ሻማኤ፥ አማረነ ሻካነ ቆረፐ ጋርሳና ሱንቴድኖ። 16 ባረንቱ ጩጉዋን ጩጉዋን ባረንቱ ኪታ ጋላስ ጋላስ መꬍና ጎዳ ጌሻ ጎልያን ኦꬅያዋንቶ፥ ላይꬃይ ሄዙዋ ጋኬዳነ ሄዙዋፐ ቦላ ግዴዳ አቱማ አሳ ኡባዉ ኡንቱንቱ ጋክያዋ ጋክያዋ ሻክ እሜድኖ። 17 ባረንቱ አዎቱዋ ጎለን ጎለን ፓይደት ኡቴዳ ቄሳቶካ እሜድኖ። ቃይ ላይꬃይ ላታሙ ጋኬዳነ ላታሙዋፐ ቦላ ግዴዳ ሌዋቶ ባረንቱ ኦሱዋዳን ኦሱዋዳን ባረንቱ ጩጉዋን ጩጉዋን ሻክተ ፓይደቴዳዋንቱ ኡንቱንቱ ጋክያዋ ሻክ እሜድኖ። 18 ቄሳቱ ነ ሌዋቱ ባረንቱ የለታዳን የለታዳን ፓይደትያ ዎደ፥ ኡንቱንቱ ባረንቱ ጉꬃ ናናቱዋና፥ ባረንቱ ማጫ አሳቱዋና፥ ባረንቱ ማጫ ናናነ ባረንቱ አቱማ ናናቱዋና እትፐ ጻፈቴድኖ፤ አያዉ ጎፐ፥ ኡንቱንቱ አማነቲደ፥ ባረንቱ ሁጲያዉ ጌዬድኖ። 19 ቃይ ባረንቱ ካታማቱዋ ዩሹዋን ደእያ ሄንꬃ ጋደቱዋን ዎይ ሀራ ካታማቱዋን ደእያ አሮና ያራ ግዴዳ ቄሳቶ፥ ቄሳቱዋ ዛርያ ግድያ አቱማ አሳቱዋፐ ኡባዉነ ባረንቱ የለታዳን ፓይደቴዳ ሌዋቱ ኡባዉ ኡንቱንቱ ጋክያ ቁማ ሻካናዉ አሳቱ ሱንቴድኖ።

20 ካቲ ህዝቂያሰ መꬍና ጎዳ ባረ ጾሳ ስንꬃን ሎኦ ሱረነ ቱማ ግዴዳዋ ይሁዳ ጋድያ ኡባን ኦꬄዳ። 21 ህዝቂያሰ ጾሳ ጌሻ ጎልያዉ ኦꬄዳ ኦሱዋ ኡባን፥ ህግያንነ አዛዙዋን ጻፈቴዳዋዳን ጾሳ ባረ ኩመንꬃ ዎዛናፐ ኮዮዋ ድራዉ፥ አዉ ኡባባይ እንጀቴዳ።