1 ካቲ ህዝቂያሰ ጾሳዉ አማነቲደ ኦꬄዳ ሀ ኦሱዋፐ ጉይያን፥ አሶረ ካቲ ሳናክሬበ ይሁዳ ጋድያ ቦላ ዶዴዳ፤ ባረዉ ኦይቃናዉ ቆፒደ፥ ግምበቱ ኡቴዳ ካታማቱዋ ዶዴዳ።

2 ሳናክሬበ የሩሳላመን ኦላናዉ ዬዳዋ ህዝቂያሰ በኤዳ ዎደ፥ 3 ካታማፐ ካረና ጎግያ ፑልቱዋ ሃꬃ ዜራናዉ ባረ ኦሳንቻቱዋነ ባረ ምኖ አሳቱዋ ዞረታ በሴዳ፤ ኡንቱንቱ አ ማዴድኖ። 4 ሄዋ ድራዉ፥ ኡንቱንቱ ዳሮ አሳ ሺሺደ፥ ሄዋ ሄራን ደእያ ፑልቶቱዋ ኡባነ ጎግያ ሻፋ ባሬድኖ። “አሶረ ካተቱ ዪደ፥ አያ ሃꬃነ ደሞፕኖ” ያጌድኖ።

5 ሄዋፐ ጉይያን፥ ህዝቂያሰ ምን ኦꬂደ፥ ላለቴዳ ድርሳ ግምቢያ ኡባ ዛረꬂደ ግምቤዳ፤ ያቲደ አ ቦላ አዱሳ ግምቢያ ግምቤዳ። ሄ ድርሳ ግምቢያፐ ካረ ባጋና ሀራ ድርሳ ግምቢያ ግምቤዳ፤ ቃይ ዳዊታ ካታማን ደእያ ሚሎ ግያ ሳኣ ምንሴዳ። ዳሮ ኦላ ሚሻካ ጎንዳልያካ መꬌዳ።

6 ያቲደ ኦላንቻቱ ካፓቱዋ አሳ ቦላ ሱንꬄዳ፤ ኡንቱንቱ ኡባ ካታማ ፐንግያ ኤለካ ደእያ ጉታራን ሺሺደ፥ 7 “ሀያና ምንተ! አሶረ ካትያና ደእያዋፐ ኑናና ደእያዌ አꬌ። ሄዋ ድራዉ፥ አሶረ ካትያዉነ አናና ደእያ ዳሮ ኦላንቻቶ ያዮፕተ! ዳጋሞፕተ! 8 አናና አሳ ዎልቃይ ደኤ፤ ሽን ኑናና መꬍና ጎዳይ ኑ ጾሳይ ኑና ማዳናዉነ ኑዉ ኦለታናዉ ደኤ” ያጊደ ኡንቱንታ ምንꬄዳ። ይሁዳ ካቲ ህዝቂያሰ ሃሳዬዳባን አሳይ ምነቴዳ።

9 ሄዋፐ ጉይያን፥ አሶረ ካቲ ሳናክሬበ ባረ ኦላንቻቱ ኡባና እትፐ ላክሻ ካታማ ዶድሽን፥ ይሁዳ ካትያ ህዝቂያሳኮነ የሩሳላመን ደእያ ይሁዳ አሳ ኡባኮ፥ ኦሳንቻቱዋ ኪቴዳ። 10 ሄዌኔ፥ “አሶረ ካቲ ሳናክሬበ፥ ‘ህንተኖ፥ ሀ ዶደት ኡቴዳ የሩሳላመ ካታማን ደእያ አሳቶ፥ ኦናን አማነቴድቴ? 11 ህዝቂያሰ ህንተንታ፥ “አሶረ ካትያ ኩሽያፐ መꬍና ጎዳይ ኑ ጾሳይ ኑና አሻናዋ” ያጌ፤ ሽን እ ህንተንታ ሄዋዳን ባለꬂደ፥ ኮሻንነ ሳሙዋን ዎꬋናዉ ሀኔ። 12 ሀ ጾሳቶ ጎይንያ ꬎቃ ሳአቱዋነ ያርሽያ ሳኣ ድጊደ፥ ይሁዳነ የሩሳላመ አሳ፥ “ህንተንቱ እት ያርሽያ ሳኣ ስንꬃን ጎይንተ፤ ቃይ ህንተንቱ ያርሹዋካ አ ቦላ ጹግተ” ያግያዌ ሀ ህዝቂያሳ ግደኔ?

13 “ ‘ታንነ ታ አዎቱ ሀራ ካዉተꬃቱ አሳ ኡባ ቦላ ኦꬄዳዋ ህንተንቱ ኤርበይክተ? ሄ ካዉተꬃቱ ጾሳቱ ባረንቱ ጋድያ ታ ኩሽያፐ አሻናዉ ዳንዳዬድኖ? 14 ታ አዎቱ ꬋይሴዳ ሀ ካዉተꬃቱ ጾሳቱዋ ኡባ ግዶን ባረ አሳ ታ ኩሽያፐ አሻናዉ ዳንዳዬዳዌ ኦኔ? ያትና፥ ህንተንቱ ጾሳይ ህንተንታ ታ ኩሽያፐ ዎት አሻናዉ ዳንዳዪ? 15 ሄዋ ድራዉ፥ ሀእካ፥ ህዝቂያሰ ህንተንታ ባለꬆፖ ዎይ ሀዋዳን ጭሞፖ። ህንተንቱ ህዝቂያሳ አማኖፕተ። አያዉ ጎፐ፥ አ አሳ ታ ኩሽያፐ ዎይ ታ አዎቱዋ ኩሽያፐ፥ ጋደ አሳ ጾሳቱ ዎይ ካዉተꬃ ጾሳቱ አሻናዉ ዳንዳይበይክኖ። ያትና፥ ሄዌ ህንተንቱ ጾሳይ ህንተንታ ታ ኩሽያፐ አሻናዉ ዋን ዳንዳዪ?’ ያጌ” ያጌድኖ።

16 ሳናክሬባ ኦሳንቻቱ መታ ኡባ ጎዳ ቦላነ አ ቆማ ህዝቂያሳ ቦላ ሀራ ጮራባካ ሃሳዬድኖ። 17 ሳናክሬበ ቃይካ መꬍና ጎዳ እስራኤልያ ጾሳ ቅሊጫናዉነ አ ቦላ ሃሳያናዉ ዳብዳቢያ ጻፊደ፥ “ሳኣ ቦላን ደእያ ካዉተꬃቱ ጾሳቱ ባረንቱ አሳ ታ ኩሽያፐ አሽቤናዋዳን፥ ህዝቂያሳ ጾሳይካ ባረ አሳ ታ ኩሽያፐ አሸና” ያጊደ ጻፌዳ። 18 ሳናክሬባ ኦሳንቻቱ ካታማ ኦሞዳናዉ ኮዪደ፥ ድርሳ ግምቢያ ቦላ ኡቴዳ የሩሳላመ አሳ ያሽሳናዉነ ዳጋንꬃናዉ ባረንቱ ቃላ ꬎቁ ኦꬂደ፥ እብራዌꬁዋን ኡንቱንቱ ቦላ ዋሴድኖ። 19 አሳ ኩሽያን ኦሰቴዳ፥ ሀ ሳኣን ደእያ ሀራ አሳቱዋፐ ጾሳቱዋ ቦላ ሃሳይያዋዳን፥ የሩሳላመ ጾሳ ቦላካ ሃሳዬድኖ።

20 ሄዋፐ ጉይያን፥ ካቲ ህዝቂያስነ አሞጻ ናአይ፥ ትምቢትያ ኦድያ እሳያሰ ሀዋ ድራዉ፥ ጾሳ ዎሴድኖ፤ ኡንቱንቱ ሳሉዋ ፑደ ዋሴድኖ። 21 አሶረ ካቲ ዱንካኔዳ ሳኣን ደእያ ኦላንቻቱዋ ኡባቱዋ፥ ጋዳዋቱዋነ ካፓቱዋ ꬋይስያ ኪታንቻ መꬍና ጎዳይ ኪቴዳ። ሄዋ ድራዉ፥ አሶረ ካቲ ካዉሺደ፥ ባረ ጋድያ ስሜዳ። ስሚደ፥ ባረ ጾሳ ጎልያ ገሌዳ ዎደ፥ አ ናናይ አ ሄ ሳኣን ማሻን ዎꬌድኖ።

22 ሄዋዳን ኦꬂደ፥ መꬍና ጎዳይ ህዝቂያሳነ የሩሳላመን ደእያ አሳ አሶረ ካትያ ሳናክሬባ ኩሽያፐነ ሀራ ሞርከቱዋ ኡባቱዋ ኩሽያፐ አሼዳ፤ ኡንቱንቱ ሾሮ ቢታቱዋ ኡባባፐ ኡንቱንቱ ሸምፕሴዳ። 23 ዳሮ አሳቱ መꬍና ጎዳዉ እሞታ እሜድኖ፤ ይሁዳ ካትያ ህዝቂያሳዉካ አልኦ ሚሻ አሄድኖ። ሄ ዎድያፐ ዶሚደ፥ ካዉተꬃ ኡባይ ህዝቂያሳ ሎይꬅ ቦንቼዳ።

24 ሄ ዎደ ህዝቂያሰ ሀርጊደ፥ ሀይቃና ማቴዳ፤ ያቲደ መꬍና ጎዳ ዎሴዳ። ጾሳይ አዉ ዎሰቴዳ፤ አ ፓꬃናዉ ማላታ እሜዳ። 25 ሽን ህዝቂያሰ ኦቶረቴዳ ድራዉ፥ ጾሳይ አዉ ኬኬዳ ኬካተꬃዉ አ ጋላትቤና። ሄዋ ድራዉ፥ አ ቦላ፥ ይሁዳ ቦላነ የሩሳላመ ቦላ መꬍና ጎዳ ሀንቁ ዎꬌዳ። 26 ግዶፐነ፥ ዉርሰꬃን ህዝቂያሰ ባረ ኦቶሩዋ አጊደ፥ የሩሳላመ አሳቱዋና እትፐ ባረናተꬃ ካዉሼዳ። ሄዋ ድራዉ፥ ህዝቂያሳ ዎድያን መꬍና ጎዳ ሀንቁ ኡንቱንቱ ቦላ ዎꬍቤና።

27 ህዝቂያሳዉ ሎይꬅ ዳሮ ዱረተꬃይነ ቦንቹ ደኤዳ፤ ህዝቂያሰ ባረ ብራዉ፥ ዎርቃዉ፥ አልኦ ሹቻዉ፥ ሳዎ፥ ጎንዳልያዉነ ሀራ አልኦ ሚሻ ኡባዉ ሚሻ ምንጅያ ሳኣ ኬጼዳ። 28 ካꬃ፥ ዎይንያ ኤሳነ ዛይትያ ዎꬅያ ሳአቱዋካ ኬጼዳ። ዱማ ዱማ መሂ ኤቂያ አቆቱዋነ ዶርሳ ዉዲ ኤቂያ አቁዋ ኦꬄዳ። 29 ጾሳይ አዉ ሎይꬅ ዳሮ ዱረታ እሜዳ ድራዉ፥ ባረዉ ካታማቱዋ ኬጼዳ፤ ዶርሳ ዉድያነ መህያ ዉድያ ዳሩዋ ሺሼዳ። 30 ሀ ህዝቂያስካ ቆሞ ባጋና ደእያ ግዮነ ሃꬃ ፑልትያ ዜሪደ፥ ዳዊታ ካታማዉ አዋይ ዉልያ ባጋ ዛሪደ፥ ሃꬃ የዴዳ። ህዝቂያሰ ኦꬄዳባይ ኡባይ ሎኦ ፖለቴዳ። 31 ሽን ይሁዳ ቢታን ሀኔዳ ማላልስያ ማላታባ ኦቻናዉ ባብሎነ ሞድያዋንቱ ኪቴዳ አሳቱ ህዝቂያሳኮ ዬዳ ዎደ፥ ጾሳይ አ ፓጫናዉነ አ ዎዛናን ደእያዋ ኡባ ኤራናዉ አ የድ በሴዳ።

32 ህዝቂያሰ ሀኔዳ ሀራባይነ ጾሳዉ እ ኦꬄዳ ሎኦ ኦሱዋባይ አሞጻ ናኣ፥ ትምቢትያ ኦድያ ኢስያሳ ሳፃ ማጻፋንነ ይሁዳ ካተቱነ እስራኤልያ ካተቱ ታርክያ ማጻፋን ጻፈት ኡቴዳ። 33 ህዝቂያሰ ሀይቂደ፥ ባረ ማይዛን ጋከቴዳ፤ ቆሞ ባጋና ደእያ ዳዊታ ዘረꬃቱዋ ማካናን አ ሞጌድኖ። እ ሀይቂና፥ ይሁዳ አሳይ ኡባይነ የሩሳላመን ደእያ አሳይ አ ቦንቼድኖ። አ ኮታን አ ናአይ ምናሰ ካተቴዳ።