33
ይሁዳ ካትያ ምናሳ
(2 ካታ. 21:1-9)
1 ምናሰ ካተትያ ዎደ፥ ላይꬃይ አዉ ታማነ ላኣ፤ እ የሩሳላመን እሻታማነ እቼሹ ላይꬃ ካተቴዳ። 2 መꬍና ጎዳይ እስራኤልያ አሳ ስንꬃፐ ላጊደ ከሴዳ አሳቱዋፐ ደኡዋ ዎጋ፥ ሄ ሸነይያዋ ቁሊደ፥ እካ መꬍና ጎዳ ስንꬃን ኢታባ ኦꬄዳ።ኤር. 15:4 3 ምናሰ ባረ አዉ ህዝቂያሰ ላሌዳ፥ ጎይንያ ꬎቃ ሳኣ ዛረꬂደ ኬጼዳ፤ ባኣላዉ ያርሽያ ሳአቱዋነ አሼሮ ጌተትያ ጾሳት ምስለቱዋ መꬌዳ። ቃይ ሳሉዋ ጾልንተቱዋ ኡባቶካ ጎይኔዳነ ኡንቱንቶ ኦꬄዳ። 4 መꬍና ጎዳይ ካሰ፥ “ታ ሱንꬃይ መꬍናዉ የሩሳላመን ደአናዋ” ያግ ዎꬄዳ መꬍና ጎዳ ጌሻ ጎልያን ምናሰ ሀራ ጾሳቶ ያርሽያ ሳኣ ጊግሴዳ። 2 ኦዱዋ 6:6 5 መꬍና ጎዳ ጌሻ ጎልያን ደእያ ላኡ ዳባባቱዋን ሳሉዋ ጾልንተቶ ኡባዉ ያርሽያ ሳኣ ጊግሴዳ። 6 ህኖማ ዛንጋራን ባረ አቱማ ናና ታማን ጹጊደ ያርሼዳ። እ ባረ ሁጲያዉካ ብትያዋነ ሙሩንያዋ ግዲደ፥ ሻሬቾቱዋነ ሞይትልያ ሃሳይስያዋንታ ዞርያ ኦቼዳ። መꬍና ጎዳ ስንꬃን እ ዳሮ ኢታባ ኦꬂደ፥ አ ሀንቀꬄዳ።
7 ሄዋፐ ጉይያን፥ ባረ መꬌዳ ኤቃ ምስልያ ጾሳ ጌሻ ጎልያ ግዶን ኤሴዳ። ሄ ጌሻ ጎሊ፥ ጾሳይ ዳዊተዉነ አ ናኣ ሶሎሞናዉ፥ “እስራኤልያ ዛርያ ኡባ ግዶፐ ታን ዶሬዳ ሀ ጌሻ ጎልያንነ የሩሳላመን ታን ታ ሱንꬃ መꬍናዉ ጼስሳና። 1 ካታ. 9:3-5፤ 2 ኦዱዋ 7:12-18 8 ታን እስራኤልያ አሳ አዛዜዳ አዛዙዋ ኡባነ ሙሴ ባጋና እመቴዳ ህግያ፥ ዎጋነ ፕርዳ ኡባ ኡንቱንቱ ናጊደ ኦꬆፐ፥ ታን ኡንቱንቱ ማይዛ አዋቶ እሜዳ ጋድያፐ ኡንቱንቱ ቃታማ ሾድስከ” ያግ ዎꬄዳ ጌሻ ጎልያ። 9 ሽን ምናሰ ይሁዳ አሳነ የሩሳላመ አሳ ባለꬄዳ፤ ያትና፥ ኡንቱንቱ መꬍና ጎዳይ እስራኤልያ አሳ ስንꬃፐ ꬋይሴዳ ደሪ አሳዋፐ አꬍያ ኢታ ኦꬄድኖ።
ምናሰ ባረ ናጋራፐ ስሜዳ
10 መꬍና ጎዳይ ምናሰዉነ አ አሳዉ ሃሳዬዳ፤ ሽን ኡንቱንቱ አ ሃሳያ ስሰናን እጼድኖ። 11 ሄዋ ድራዉ፥ መꬍና ጎዳይ አሶረ ካትያ ኦላ ጋዳዎቱዋ ኡንቱንቱ ቦላ ደንꬄዳ፤ ኡንቱንቱ ምናሰ ሲꬍያን ዳፉዋ አꬂደ ኦይቄድኖ፤ ናሃስያ ሳንሳላታን ቃቺደ፥ ባብሎነ ጋድያ አፌድኖ። 12 ምናሰ ቱጋቴዳ ዎደ፥ መꬍና ጎዳ ባረ ጾሳ ማዱዋ ዎሴዳ፤ ባረ አዎቱዋ ጾሳ ስንꬃን ባረናተꬃ ሎይꬅ ካዉሼዳ። 13 ምናሰ ጾሳ ዎሴዳ ዎደ፥ መꬍና ጎዳይ አዉ ዎሰቴዳ፤ አ ዋትዋቱዋካ ስሴዳ። የሩሳላመን አ ካዉተꬃን ዛረꬅ ዎꬄዳ። መꬍና ጎዳይ ጾሳ ግድያዋ ምናሰ ሄዋን ኤሬዳ።
14 ሄዋፐ ጉይያን፥ ምናሰ ግዮነ ፑልቱዋ ኤለካ ደኢያሳፐ ዶሚደ፥ ኦፌላ ጌተትያ ሳኣና አꬊደ ቢደ፥ ሞልያ ፐንግያ ጌተትያ ፐንግያ ጋካናዉ፥ ካሰዋፐ ካረ ባጋና ሀራ ድርሳ ግምቢያ ግምቤዳ። ሄ ግምቢ ዳዊታ ካታማፐ አዋይ ዉልያ ባጋና ደእያ ዛንጋራን ደኤ። ይሁዳ ካታማቱዋ ኡባን ኦላ ጋዳዎቱዋ ዎꬄዳ።
15 አላጋ ጾሳቱዋነ ኤቃ ምስልያ መꬍና ጎዳ ጌሻ ጎልያፐ ድጌዳ፤ ጌሻ ጎሊ ደእያ ደርያ ቦላነ የሩሳላመን እ ኦꬄዳ ያርሽያ ሳኣ ኡባ ኮሊደ፥ ሄ ካታማፐ ካረ ከሲደ ኦሌዳ። 16 ምናሰ ቃይ መꬍና ጎዳዉ ያርሽያ ሳኣ ኦራጽሲደ፥ እትፐተꬃ ያርሹዋነ ጋላታ ያርሹዋ አን ያርሼዳ። ይሁዳ አሳካ መꬍና ጎዳዉ እስራኤልያ ጾሳዉ ጎይናናዳን አዛዜዳ። 17 አሳይ ጎይንያ ꬎቃ ግሹዋን ያርሹዋ ያርሽያዋ አጋና ꬋዮፐካ፥ ኡንቱንቱ ያርሽያዌ መꬍና ጎዳ ባረንቱ ጾሳ ጻላላሳ።
ምናሰ ሀይቁዋ
(2 ካታ. 21:17-18)
18 ምናሰ ሀኔዳ ሀራባይ፥ እ ባረ ጾሳ ዎሴዳ ዎሳይነ መꬍና ጎዳ እስራኤልያ ጾሳ ሱንꬃን ትምቢትያ ኦድያዋንቱ አዉ ኦዴዳባይ እስራኤልያ ካተቱ ታርክያ ማጻፋን ጻፈት ኡቴዳ። 19 ቃይ አ ዎሳይነ ጾሳይ አዉ ዎሰቴዳባይ፥ እ ኦꬄዳ ናጋራይነ ናቁ ኡባይ፥ ምናሰ ባረና ካዉሻናፐ ካሰ ኦꬄዳ ጎይንያ ꬎቃ ሳአቱነ አሼር ምስለቱዋነ ባረ ጎይንያ ኤቃቱዋ እ ኤሴዳ ሳአቱ ኡባይ ትምቢትያ ኦድያዋንቱ ታርክያ ማጻፋን ጻፈት ኡቴድኖ። 20 ምናሰ ሀይቂደ፥ ባረ ማይዛን ጋከቴዳ፤ ያትና፥ ምናሳ አ ካትያ ጎለን ሞጌድኖ። አ ኮታን አ ናአይ አሞነ ካተቴዳ።
ይሁዳ ካትያ አሞና
(2 ካታ. 21:19-26)
21 አሞነ ካተትያ ዎደ፥ ላይꬃይ አዉ ላታማነ ላኣ፤ እ የሩሳላመን ላኡ ላይꬃ ካተቴዳ። 22 አ አዉ ምናሰ ኦꬄዳዋዳን፥ እካ መꬍና ጎዳ ስንꬃን ኢታባ ኦꬄዳ። አ አዉ ምናሰ ኦስሴዳ ምስለቱ ኡባዉ ያርሼዳነ ኡንቱንቶ ኦꬄዳ። 23 ሽን አ አዉ ምናሰ ባረናተꬃ ካዉሼዳዋዳን፥ እ ባረናተꬃ መꬍና ጎዳ ስንꬃን ካዉሽቤና፤ አሞነ ናቁዋ ያ ያ ዳርሴ።
24 አሞና ኦሳንቻቱ አ ቦላ ማቀቲደ፥ አ ካትያ ጎለን አ ዎꬌድኖ። 25 ሄዋፐ ጉይያን፥ ይሁዳ አሳቱ ካትያ አሞና ቦላ ማቀቴዳ ኡባቱዋ ዎꬌድኖ። አሞና ሳኣን አ ናኣ ዮስያሳ ካተዬድኖ።