34
ይሁዳ ካትያ ዮስያሳ
(2 ካታ. 22:1-2)
1 ዮስያሰ ካተትያ ዎደ፥ ላይꬃይ አዉ ሆስፑና፤ እ የሩሳላመን ሀታማነ እት ላይꬃ ካተቴዳ። ኤር. 3:6 2 ዮስያሰ መꬍና ጎዳ ስንꬃን ሱረባ ኦꬄዳ፤ ኡሸቻ ሀድርሳ ጌናን፥ ባረ ማይዛ አዉዋ ዳዊታ ኦግያን ሀመቴዳ።
ዮስያሰ ኤቃዉ ጎይንያ ሳአቱዋ ꬋይሴዳ
3 እ ካተቴዳ ሆስፑንꬃ ላይꬃን ብሮ ያላጋ ደኢደ፥ ባረ ማይዛ አዉዋ ዳዊታ ጾሳዉ ጎይናናዉ ዶሜዳ፤ ቃይካ እ ካተቴዳ ታማነ ላኤንꬆ ላይꬃን ይሁዳንነ የሩሳላመን ደእያ ጎይንያ ꬎቃ ሳአቱዋነ አሼሮ ግያ ጾሳት ምስለቱዋነ ማስ ጊግሴዳነ ሲልሴዳ መꬌዳ ምስለቱዋ ꬋይስያዋ ዶሜዳ። 4 እ ኤቂደ አዛዝና፥ ባኣላዉ ያርሽያ ሳኣ ላሌድኖ፤ ኡንቱቱፐ ቦላና ደእያ እጻና ጩዋይያዋንታካ ቃንጸሬꬄድኖ። አሼር ምስለቱዋ፥ ማስ ጊግሴዳ ኤቃቱዋነ ሲልሴዳ መꬌዳ ምስለቱዋ ክንቼሬꬅ ሊቅሲደ፥ ꬊለ ከሴድኖ፤ ያቲደ ሄ ꬊልያ ኡንቱንቶ ጎይንያ አሳቱዋ ዱፉዋን ላሌድኖ። 2 ካታ. 21:3፤ 2 ኦዱዋ 33:3 5 ቃይ ዮስያሰ ኡንቱንቱ ቄሳቱዋ መቀꬃ ሄ ያርሽያ ሳአቱ ቦላን ጹጌዳ፤ ያቲደ ይሁዳነ የሩሳላመ ጌሼዳ። 1 ካታ. 13:2
6 ምናሰ ቢታን፥ ኤፍሬማ ቢታንነ ስሞና ቢታን፥ ቢደ ንፍታሌማ ጋድያ ጋካናዉ ደእያ ካታማቱዋነ ባዬዳ ሳኣ ኡባ ሄዋዳን ኦꬂደ ጌሼዳ። 7 ዮስያሰ ያርሽያ ሳኣ ላሌዳ፤ አሼር ምስለቱዋካ ሀራ ኤቃ ምስለቱዋካ ክንቼሬꬂደ ሊቅሴዳ። እስራኤልያ ቢታን ኡባን እጻና ጩዋይያባቱዋ ኡባ ቃንጸሬꬄዳ። ሄዋፐ ጉይያን፥ ዮስያሰ የሩሳላመ ስሜዳ።
ጾሳ ህግያ ማጻፋይ ቤቴዳ
(2 ካታ. 22:3-20)
8 ዮስያሰ ካተቴዳ ታማነ ሆስፑንꬃ ላይꬃን፥ ጋድያነ ጌሻ ጎልያ ጌሼዳዋፐ ጉይያን፥ መꬍና ጎዳ ባረ ጾሳ ጌሻ ጎልያ ኦራጽሳና ማላ፥ አጻልያ ናኣ ሳፋና፥ የሩሳላመ ካታማ ሞድያ ማእሴያነ ዮአካዛ ናኣ፥ ዋና ጻፍያ ዮኣሀ ኪቴዳ።
9 ኪተቴዳዋንቱ ቄሰ ኡባቱዋ ካፑዋ ህልቂያኮ ዬድኖ። ፐንግያ ናግያ ሌዋቱ ምናሰፐ፥ ኤፍሬማፐ፥ አቴዳ እስራኤልያ አሳ ኡባፐ፥ ይሁዳፐ፥ ቢንያመፐነ የሩሳላመን ደእያዋንቱፐ ካሰ ሺሺደ፥ ጾሳ ጌሻ ጎልያ አሄዳ ሚሻ ህልቂያዉ እሜድኖ። 10 ሄዋፐ ጉይያን፥ ኡንቱንቱ መꬍና ጎዳ ጌሻ ጎልያ ኦራꬅስያ ካፓቶ እሜድኖ። ኡንቱንቱ ጌሻ ጎልያ ኦራጽሳናዳንነ ዎꬅ የጊደ ኬጻናዳን ኦሳንቻቶ እሜድኖ። 11 ቃይ ይሁዳ ካተቱ ባይዝሴዳ ጌሻ ጎልያ ሎይꬅሳናዉ ሄ ሻሉዋን አናጸቱነ ግምቢያዋንታ ምꬃነ ሹቻ ሻማናዳን እሜድኖ።
12 ኦሱዋ ኦꬅያ አሳቱ አማነቴዳዋንታ። ኡንቱንቱ ቦላ ሱንቴዳ ኦይዱ ሌዋቱ፥ ማራራ ያራፐ ያሃታነ ኦባድያነ፥ ቃሃታ ያራፐ ማሹላማነ ዛካራሳ። የꬃ ሚሻ ኤርያ ሌዋቱ ኡባይ 13 ቶክያ አሳቱዋ ቦላነ ዱማ ዱማ ኪታ ኦꬅያዋንቱ ቦላ ሱንቴድኖ። ቃይ ሀራ ሌዋቱ ጻፈቱዋ፥ ካፓቱዋነ ፐንግያ ናግያዋንታ ግዴድኖ።
14 ኡንቱንቱ መꬍና ጎዳ ጌሻ ጎልያ ዬዳ ሻሉዋ ከስያ ዎደ፥ ቄሲ ህልቂ መꬍና ጎዳይ ሙሴ ባጋና እሜዳ ህግያ ማጻፋ ደሜዳ። 15 ህልቂ ዋና ጻፍያ ሳፋና፥ “ታን መꬍና ጎዳ ጌሻ ጎልያፐ ህግያ ማጻፋ ደማድ” ያጌዳ። ሄ ማጻፋ ሳፋናዉ እሜዳ።
16 ሳፋን ሄ ማጻፋ ካትያኮ አሂደ፥ “ነ ኦሳንቻቱ አዛዘቴዳ አዛዙዋ ኡባ ኦꬅኖ። 17 መꬍና ጎዳ ጌሻ ጎልያን ደእያ ሻሉዋ ዉርስ አኪደ፥ ኦራꬅስያ ካፓቶነ ኦራꬅያ ኦሳንቻቶ እሜድኖ” ያጊደ ኦዴዳ። 18 ቃይካ ዋና ጻፊ ሳፋን ካትያ፥ “ቄሲ ህልቂ ታዉ ማጻፋ እሜዳ” ያጌዳ፤ ሳፋን ማጻፋ ካትያ ስንꬃን ናባቤዳ።
19 ካቲ ህግያ ቃላ ስሴዳ ዎደ፥ ካዮቲደ ባረ ማዩዋ ፔꬌዳ። 20 ሄዋፐ ጉይያን፥ ካቲ ህልቂያ፥ ሳፋና ናኣ አህቃማ፥ ምካያ ናኣ አብዶና፥ ዋና ጻፍያ ሳፋናነ ካትያ ኦሳንቻ አሳያ ሀዋዳን ያጊደ አዛዜዳ፤ 21 “ቢተ፤ ቢደ ታ ድራዉነ እስራኤልያንነ ይሁዳን አቴዳዋንቱ ድራዉ፥ ሀ ቤቴዳ ማጻፋ ቃላዋ አነ መꬍና ጎዳ ኦችተ። አያዉ ጎፐ፥ ሀ ማጻፋን ጻፈቴዳ ኡባባ ኦꬃናዉ፥ ኑ ማይዛ አዎቱ መꬍና ጎዳ ቃላ ናግቤና ድራዉ፥ ኑ ቦላ ትገቴዳ መꬍና ጎዳ ሀንቁ ሎይꬅ ዳሮ” ያጌዳ።
22 ህልቂነ ካቲ ኪቴዳ አሳቱ ትምቢትያ ኦድያ ሁልድኮ ቤድኖ። ሁልዳ ሀርሃሳ ናኣ ቲቅዋ ናኣ፥ ጌሻ ጎልያ ማዩዋ ናግያ ሻሉማ ማቻቶ። አ የሩሳላመን ላኤንꬆ ሹቻን ደኣዱ። ሄ ቤዳ አሳቱ እዝዉ ሀ የዉዋ ኦዴድኖ። *ሻሉማ፦ እብራዌꬁዋን ሻሉም ሀስራሀ ናኣ ቶቃታ ናኣ ጌተቴዳ። 2 ካት። 22:14 ጼላ።
23 ሁልዳ ኡንቱንታ፥ “መꬍና ጎዳይ እስራኤልያ ጾሳይ፥ ‘ህንተና ታኮ ኪቴዳ ብታንያዉ ኦድተ’ ያጌ። 24 መꬍና ጎዳይ ሀዋዳን ያጌ፤ ‘በእተ፥ ይሁዳ ካትያ ስንꬃን ናባበቴዳ ማጻፋን ጻፈቴዳ ኢታ ሸቃ ኡባ፥ ሀ ሳኣ ቦላነ ሀ ሳኣን ደእያ አሳ ቦላ አሀና ሀናይ። 25 ኡንቱንቱ ታና አጊደ፥ ሀራ ጾሳቶ እጻና ጩዋዬድኖ፤ ያቲደ ኡንቱንቱ ባረንቱ ኩሽያን ኦꬄዳዋን ኡባን ታና ሀንቀꬄድኖ። ሄዋ ድራዉ፥ ታ ሀንቁ ሀ ሳኣ ቦላ ትገታና፤ እ ኡባካ ተኤተና’ ያጌ።
26 “መꬍና ጎዳ ኦቻናዉ ህንተንታ ኪቴዳ ይሁዳ ካትያ ሀዋዳን ያግተ፤ ‘መꬍና ጎዳይ እስራኤልያ ጾሳይ ኔን ስሴዳ ቃላዋ ሀዋዳን ያጌ፤ 27 “ሀ ሳኣ ቦላነ ሀ ሳኣን ደእያ አሳ ቦላ መꬍና ጎዳይ ሃሳዬዳዋ ኔን ስሴዳ ዎደ፥ ነ ዎዛናይ ሹግና፥ ታ ስንꬃን ነ ሁጲያ ካዉሼዳ ድራዉነ ነ ማዩዋ ፔꬋደ፥ ታ ስንꬃን ዬኬዳ ድራዉ፥ ታን ነ ዎሳ ስሳድ። 28 ሄዋ ድራዉ፥ ታን ኔና ነ ማይዛን ጋꬃና፤ ኔን ሳሮ ሞገታና። ታን ሀ ሳኣ ቦላነ ሀ ሳኣን ደእያ አሳ ቦላ አሀና ኢታባ ነ አይፊ በኤና” ያጌ’ ያግተ” ያጋዱ።
ሄዋፐ ጉየ ኡንቱንቱ ቢደ፥ ሀ ሃሳየቴዳባ ካትያዉ ኦዴድኖ።
ዮስያሰ ጾሳዉ አዛዘታናዉ ገፔዳ
(2 ካታ. 23:1-20)
29 ሄዋፐ ጉይያን፥ ካቲ ዮስያሰ ኪቲደ፥ ይሁዳ ጭማቱዋነ የሩሳላመ ጭማቱዋ ኡባ ሺሼዳ። 30 ካቲ መꬍና ጎዳዉ ጌሻ ጎልያ ፑደ ከሴዳ፤ ይሁዳ አሳይ ኡባይ፥ የሩሳላመን ደእያ አሳይ፥ ቄሳቱ ነ ሌዋቱ፥ ጉꬃፐ ዳሩዋ ጋካናዉ ደእያ አሳይ ኡባይ አናና እትፐ ፑደ ከሴድኖ። መꬍና ጎዳ ጌሻ ጎልያፐ ቤቴዳ ቃላ ጫቁዋ ማጻፋ ቃላ ኡባ ካቲ ኡንቱንቱ ስስሽን ናባቤዳ። 31 ሄዋፐ ጉይያን፥ ካቲ ባረ ሳኣን ኤቂደ፥ መꬍና ጎዳ ኦግያን ሀመታናዉነ መꬍና ጎዳ ህግያ፥ አ ዎጋነ አ አዛዙዋ ባረ ኩመንꬃ ዎዛናንነ ባረ ኩመንꬃ ሸምፑዋን ናጋናዉ፥ ቃይ ሀ ማጻፋን ጻፈቴዳ ጫቁዋዳን ኦꬃናዉ ጾሳ ስንꬃን ገፔዳ። 32 የሩሳላመንነ ቢንያማን ደእያ አሳ ኡባ ሄ ቃላ ጫቁዋ ናጋናዳን ገፍሴዳ፤ የሩሳላመን ደእያ አሳይ ጾሳ፥ ባረንቱ ማይዛ አዎቱዋ ጾሳ ጫቁ ግያዋዳን ኦꬄድኖ።
33 ዮስያሰ እስራኤልያ አሳዉ ደእያ ጋድያፐ ቱናባ ኡባ ድጌዳ። ያን ደእያ ኡባቱ መꬍና ጎዳዉ፥ ባረንቱ ጾሳዉ፥ ኦꬃናዳን ኦꬄዳ። ዮስያሰ ደኤዳ ላይꬃ ኡባን፥ ኡንቱንቱ መꬍና ጎዳ ባረንቱ ማይዛ አዎቱዋ ጾሳ ካልያዋ አግበይክኖ።