35
ዮስያሰ ፓስጋ ባላ ቦንቼዳ
(2 ካታ. 23:21-23)
1 ሄዋፐ ጉይያን፥ ዮስያሰ የሩሳላመን መꬍና ጎዳዉ ፓስጋ ባላ ቦንቼዳ። ኮይሮ አግናን ታማነ ኦይደንꬆ ጋላስ ፓስጋ ዶርሳ ማራ ሹኬድኖ። 2 ዮስያሰ ቄሳቱ ዋ ኡንቱንታ ኪታን ኪታን ሱንꬄዳ፤ ኡንቱንቱ መꬍና ጎዳ ጌሻ ጎልያ ኪታን ምንꬄዳ። 3 መꬍና ጎዳዉ ጌሻ ግዲደ፥ እስራኤልያ ኡባ ታማርስያ ሌዋቱዋ እ ሀዋዳን ያጌዳ፤ “ጌሻ ታቦታ ዳዊታ ናአይ፥ እስራኤልያ ካቲ ሶሎሞነ ኬጽሴዳ ጌሻ ጎልያን ዎꬅተ። ሀዋፐ ስንꬃን ታቦታ ህንተንቱ ሀሽያን ቶካናዉ ኮሸና። ሀእካ ጾሳዉ፥ ህንተንቱ መꬍና ጎዳዉነ፥ አ አሳ እስራኤልያዉ ኦꬅተ። 4 እስራኤልያ ካቲ ዳዊተነ አ ናአይ ሶሎሞነ ጻፎዋዳን፥ ህንተንቱ ጩጉዋን ጩጉዋንነ ህንተንቱ አዎቱዋ ጎለን ጎለን ህንተንታ ጊግስተ። 2 ኦዱዋ 8:14
5 “ህንተንቱ ሌዋቱ ህንተንቱ ዳቦቱዋ፥ እስራኤልያ ዛራቱዋ ያራቱዋ ማዳና ማላ፥ ህንተንቱ ያራን ያራን ሻከቲደ፥ ጌሻ ጎልያ ግዱዋን ኤቂተ፤ 6 ፓስጋ ዶርሳ ማራቱዋካ ሹክተ። ህንተንቱ ሁጲያዉካ ጌይተ፤ መꬍና ጎዳይ ሙሴ ባጋና ሃሳዬዳ ቃላ ኡንቱንቱ ኦꬃናዳን ህንተንቱ ዳቦቶ ዶርሳ ማራቱዋ ጊግስተ” ያጌዳ።
7 ዮስያሰ ፓስጋ ያርሾ ሀናናዳን ሄ ሳኣን ደእያ አሳዉ ሀታሙ ሻአ ዶርሳ ማራቱዋነ ዴሻ ማራቱዋ እሜዳ፤ ቃይ ሄዙ ሻአ ኮሩማቱዋካ እሜዳ። ሀዋንታ ኡባ ካቲ ባረ ዉድያፐ እሜዳ። 8 ካቲ ሱንꬄዳ ካፓቱካ አሳዉ፥ ቄሳቱ ዉነ ሌዋቶ ባረንቱባ ባረንቱ ሸንያን እሜድኖ። ጾሳ ጌሻ ጎልያ ካፓቱ ህልቂ፥ ዛካራስነ ይህኤል ፓስጋ ያርሾ ሀንያ ላኡ ሻአነ ኡሱፑን ጼቱ ዶርሳ ማራቱዋነ ዴሻ ማራቱዋ ቄሳቶ እሜድኖ፤ ቃይ ሄዙ ጼቱ ኮሩማቱዋካ እሜድኖ። 9 ሌዋቱ ካፓቱ ኮናኒነ አ እሻቱ ሻማኤነ ናታንኤል፥ ቃይ ሀሻቢ፥ ይእኤልነ ዮዛባድ ፓስጋ ያርሾ ሀንያ እቼሹ ሻአ ዶርሳ ማራቱዋነ ዴሻ ማራቱዋ ሌዋቶ እሜድኖ፤ ቃይ እቼሹ ጼቱ ኮሩማቱዋካ እሜድኖ።
10 ፓስጋ ባላዉ ኡባባይ ጊጌዳ፤ ካትያ አዛዙዋዳን ቄሳቱ ባረንቱ ሳኣን ሳኣን፥ ሌዋቱካ ባረንቱ ጩጉዋን ጩጉዋን ኤቄድኖ። 11 ፓስጋ ዶርሳ ማራቱ ሹከትያ ዎደ፥ ሌዋቱ ጋልባ ቃርሽን፥ ቄሳቱ ሱꬃ አኪደ፥ ያርሽያ ሳኣ ቦላ ጫጫፌድኖ። 12 ሄዋፐ ጉይያን፥ ጹግያ ያርሾ ጊጌዳ ዶርሳቱዋ አሹዋ ሌዋቱ ባረ ጎልያ አሳን አሳን ሻከት ኡቴዳ እስራኤልያ ዛራቱዋ ያራቶ እሜድኖ። ሌዋቱ ሄዋ እሜዳዌ ሙሴ ማጻፋን ጻፈቴዳዋዳን አሳይ መꬍና ጎዳዉ ያርሻናሳ። ኡንቱንቱ ኮሩማቱዋካ ሄዋዳን ኦꬄድኖ። 13 ሌዋቱ ዎጋይ አዛዝያዋዳን ሹከቴዳ ፓስጋ ዶርሳ ማራቱዋ አሹዋ ታማን ጺጼድኖ፤ ጌሻ ያርሾቱዋ ጻሩዋን፥ ኦቱዋንነ ድስትያን ዶይሴድኖ። ያቲደ ካኤዳዋ እስራኤልያ ዛራቱዋ ያራቱ ኡባዉ ኤለካ ሻክ ሻክ እሜድኖ። ከሳ 12:8-9
14 ሄዋፐ ጉይያን፥ ሌዋቱ ባረንቱዉነ አሮና ዘረꬃ ግድያ ቄሳቶ ፓስጋ ያርሹዋ ጊግሴድኖ። አያዉ ጎፐ፥ ሄ ቄሳቱ ጹግያ ያርሹዋነ ሞꬉዋ ያርሹዋ ያርሺደ፥ ቃማ ጋካናዉ ኦꬅኖ። 15 ዳዊተ፥ አሳፈ፥ ሄማንነ ካትያዉ ትምቢትያ ኦድያ ይዱቱን ካሰ አዛዜዳዋዳን፥ አሳፋ ያራቱ፥ ማዝሙርያ የጽያዋንቱ ባረንቱ ሳኣን ደኢኖ። ፐንግያ ናግያዋንቱካ ባረንቱ ናግያ ፐንግያ ፐንግያ ናጊኖ። ኡንቱንቱ ዳቦቱ፥ ሌዋቱ ኡንቱንቶ ጊግሴዳ ድራዉ፥ ኡንቱንቱ ባረንቱ ኪታ አግበይክኖ። 1 ኦዱዋ 25:1
16 መꬍና ጎዳዉ ኦꬅያ ኪታይ ኡባይ፥ ፓስጋ ባላ ቦንችያዌነ ጹግያ ያርሹዋ መꬍና ጎዳዉ ያርሽያ ሳኣ ቦላ ያርሽያዌ፥ ካቲ ዮስያሰ አዛዜዳዋዳን ሀኒደ፥ ሄ ጋላስ ጊጌዳ። 17 ሄዋን ሺቄዳ እስራኤልያ አሳይ ሄ ጋላስ ፓስጋ ባላ ቦንቼዳ፤ ኡንቱንቱ እርሹ ገልቤና ኡክꬃ ባላካ ላፑን ጋላስ ቦንቼድኖ። ከሳ 12:1-20 18 ትምቢትያ ኦድያ ሳመላ ዎድያፐ ዶምና፥ ሄዋ ማላ ፓስጋ ባላይ እስራኤላን ቦንቼት ኤረና። ዮስያሰ፥ ቄሳቱ ነ ሌዋቱ፥ ሄ ኮሽያን ሺቄዳ ይሁዳ አሳይ፥ እስራኤልያ አሳይ ኡባይነ የሩሳላመን ደእያ አሳይ ቦንቼዳዋ ማላ ፓስጋ ባላ ካሰ እስራኤልያ ካተቱዋፐ ቦንቼዳዌ እቱነ ባዋ። 19 ሀ ፓስጋ ባላይ ዮስያሰ ካተቴዳ ታማነ ሆስፑንꬃ ላይꬃን ቦንቼቴዳ።
ዮስያሳ ካዉታ ዉርሰꬃ
(2 ካታ. 23:28-30)
20 ሀ ኡባፐ ጉይያን፥ ዮስያሰ ጌሻ ጎልያ ጊግሴዳ ዎደ፥ ግብጼ ካቲ ናኮይ ኤፍራጺሳ ሻፋ ኤለካ ደእያ ካርካሚሻ ግያ ካታማን ኦለታናዉ ቤዳ። ዮስያሰ አ ተአናዉ ከሴዳ። 21 ሽን ናኮይ ዮስያሳኮ አሳ ኪቲደ፥ “ይሁዳ ካትያዉ፥ ታናነ ኔና ዋላስያዌ አዬ? ታን ዬዳዌ ታ ሞርከቱዋ ኦላናሳፐ አትና፥ ኔና ኦላናሳ ግደና። ታ ሞርከቱዋ ታን ኤለካ ኦላናዳን ጾሳይ ታና አዛዜዳ። ጾሳይ ኔና ꬋይሰናዳን፥ ታናና ደእያ ጾሳና ጋዳትያዋ አጋ” ያጌዳ።
22 ግዶፐነ፥ ዮስያሰ ጾሳይ ናኮ ባጋና ኦዴዳዋ ስሰናንነ ጉየ ስመናን እጼዳ። ሞርከቱ ባረና ኤረና ማላ፥ ባረ ካዉተꬃ ማዩዋ ላሜዳ፤ ማግዶ ደምባ ኦለታናዉ ገሌዳ።
23 ዎንዳፍያ አሳቱ ካትያ ዮስያሳ ዱኪደ ጫዴድኖ። ካቲ ባረ ቆማቶ፥ “ታን ሎይꬅ ጫደታድ፤ ታና ኦላ ግዶፐ ከስተ” ያጌዳ። 24 ቆማቱ ዮስያሳ ፓራ ጋርያፐ ደንꬂደ፥ አዉ ደእያ ላኤንꬆ ፓራ ጋርያን ዎꬂደ፥ አ የሩሳላመ አሄድኖ። እ ያን ሀይቄዳ፤ ባረ ማይዛ አዎቱዋ ማካናን ሞገቴዳ። ይሁዳ አሳይነ የሩሳላመ አሳይ ኡባይ አዉ ዬኬዳ።
25 ኤርማስ ዮስያሳዉ ዝላልያ ዝላሳ ከሲደ ጻፌዳ፤ ዬኩዋ ዬክያ ማጫ አሳቱነ አቱማ አሳቱ ዮስያሳ ቆፕ ቆፒደ ዬክያ ዎደ፥ ሀ ኤርማስ ከሴዳ ዝላሳ ዝላልያዌ እስራኤልያ ቢታን ዎጋ ግዴዳ። ሄ ዝላሳይ እስራኤላቱ ዬኩዋ ዝላሳ ማጻፋን ጻፈት ኡቴዳ።
26 ዮስያሰ ሀኔዳ ሀራባይ፥ መꬍና ጎዳ ህግያን ጻፈቴዳዋዳን እ ኦꬄዳ ሎኦ ኦሱዋባይነ 27 ኮይሮፐ ዉርሰꬃ ጋካናዉ እ ፖሌዳባይ ኡባይ እስራኤልያ ካተቱነ ይሁዳ ካተቱ ታርክያ ማጻፋን ጻፈት ኡቴዳ።