1 ሄዋፐ ጉይያን፥ ሄ ቢታ አሳይ ዮስያሳ ናኣ ዮአካዛ ዶሬድኖ፤ አ አዉዋ ሳኣን የሩሳላመን ካተዬድኖ። 2 ዮአካዝ ካተትያ ዎደ፥ ላይꬃይ አዉ ላታማነ ሄዛ፤ እ የሩሳላመን ሄዙ አግና ካተቴዳ። 3 ሄዋፐ ጉይያን፥ ግብጼ ካቲ ዮአካዛ የሩሳላመ ካተተꬃፐ ዎꬄዳ፤ ሄዙ ሻአነ ኦይዱ ጼቱ ኪሎ ግራመ ዴጽያ ጻጋራ ብራነ ሀታማነ ኦይዱ ኪሎ ግራመ ዴጽያ ዎርቃ ይሁዳ አሳ ጊርሴዳ። 4 ግብጼ ካቲ ዮአካዛ እሻ ኤልያቅማ ይሁዳ ቦላነ የሩሳላመ ቦላ ካተዬዳ፤ አ ሱንꬃ ዮኣቄማ ያጊደ ላሜዳ። ያቲደ ዮኣቄማ እሻ ዮአካዛ ግብጼ አፌዳ። ኤር. 22:11-12

5 ዮኣቄም ካተትያ ዎደ፥ ላይꬃይ አዉ ላታማነ እቼሻ፤ እ የሩሳላመን ታማነ እት ላይꬃ ካተቴዳ። መꬍና ጎዳ ባረ ጾሳ ስንꬃን ኢታባ ኦꬄዳ።ኤር. 22:18-19፤ 26:1-6፤ 35:1-19 6 ባብሎነ ካቲ ናቡካዳናጾረ አ ኦለቲደ፥ ባብሎነ አፋናዉ ናሃስያ ሳንሳላታን ቃቼዳ። ኤር. 25:1-38፤ 36:1-32፤ 45:1-5፤ ዳኔላ 1:1-2 7 ናቡካዳናጾረ ቃይ መꬍና ጎዳ ጌሽሳ ጎልያፐ ሻሉዋ አኪደ፥ ባብሎነ አፊደ፥ ባረ ካትያ ጎለን ዎꬄዳ።

8 ዮኣቄም ሀኔዳ ሀራባይ፥ እ ኦꬄዳ ቱናባይነ እ ኦꬄዳ ኢታባይ ኡባይ እስራኤልያ ካተቱነ ይሁዳ ካተቱ ታርክያ ማጻፋን ጻፈት ኡቴዳ። እ ሀይቂና፥ አ ኮታን አ ናአይ ዮኣኪነ ካተቴዳ።

9 ዮኣኪነ ካተትያ ዎደ፥ ላይꬃይ አዉ ሆስፑና፤ እ የሩሳላመን ሄዙ አግናነ ታሙ ጋላሳ ካተቴዳ። መꬍና ጎዳ ስንꬃን እ ኢታባ ኦꬄዳ።*ሆስፑና፦ ላይꬃይ አዉ ሆስፑና ዎይ ታማነ ሆስፑና። 2 ካት። 24:8 ጼላ። 10 ላይꬃይ ላመትያ ዎደ ካቲ ናቡካዳናጾረ አሳ ኪቲደ፥ ዮኣኪናነ መꬍና ጎዳ ጌሻ ጎልያን ደእያ አልኦ ሚሻቱዋ አናና እትፐ ባብሎነ አህሴዳ። ያቲደ አ አዉዋ እሻ ሰደቅያሳ ይሁዳ ቦላነ የሩሳላመ ቦላ ካተዬዳ። ኤር. 22:24-30፤ 24:1-10፤ 29:1-2፤ 37:1፤ ህዝ. 17:12፣ 13

11 ሰደቅያስ ካተትያ ዎደ፥ ላይꬃይ አዉ ላታማነ እታ፤ እ የሩሳላመን ታማነ እት ላይꬃ ካተቴዳ። ኤር. 27:1-22፤ 28:1-17 12 መꬍና ጎዳ ባረ ጾሳ ስንꬃን እ ኢታባ ኦꬄዳ፤ ቃይ መꬍና ጎዳ ሱንꬃን ትምቢትያ ኦድያ ኤርማሳ ስንꬃን ባረና ካዉሽቤና።

13 ሰደቅያስ አማነታናዳን ባረና ጾሳ ሱንꬃን ጫቀꬄዳ ናቡካዳናጾራ ቦላ ማካሌዳ። መꬍና ጎዳኮ እስራኤልያ ጾሳኮ ስምያዋ አጊደ፥ ባረ ሞርግያ ዞዝሴዳ፤ ባረ ዎዛናካ ሙምሴዳ። ህዝ. 17:15 14 ቃይ ይሁዳ አሳይነ ኡንቱንታ ካለꬅያ ቄሳቱ፥ ኡባካ አማነተናዋንታ ግዴድኖ። ኡንቱንቱ ሀራ ካዉተꬃ አሳይ ኦꬅያ ሸነይያ ኦሳቱዋ ቁሊደ፥ መꬍና ጎዳይ የሩሳላመን ጌሼዳ አ ጌሻ ጎልያካ ቱንሴድኖ።

15 መꬍና ጎዳይ፥ ኡንቱንቱ ማይዛ አዎቱዋ ጾሳይ ባረ አሳዉነ ባረ ጌሻ ጎልያዉ ቃረትያ ድራዉ፥ ባረ ትምቢትያ ኦድያዋንታ ኡንቱንቶ ዛር ዛሪደ ኪቴዳ። 16 ሽን መꬍና ጎዳ ሀንቁ ኡንቱንቱ ቦላ ዎꬋናዋ ጋካናዉነ ኡንቱንቶ ከስ አክያ ሳአይ ꬋያና ጋካናዉ፥ ኡንቱንቱ ጾሳይ ኪቴዳዋንቱ ቦላ ቅሊጬድኖ፥ አ ቃላ ካꬌድኖነ ትምቢትያ ኦድያዋንቱ ቦላ ሚጬድኖ።

17 ሄዋ ድራዉ፥ ጾሳይ ባብሎነ ካትያ ኡንቱንቱ ቦላ ደንꬂደ አሄዳ። ያትና ኡንቱንቱ ያላጋ አቱማ አሳ ጌሻ ጎልያ ግዶን ማሻን ዎꬌዳ፤ ያላጋ አቱማ አሳቶ፥ ዎይ ጌላዮቶ፥ ዎይ ጭማቶ፥ ቃረተናን፥ ጾሳይ ኡንቱንታ ኡባ ናቡካዳናጾራ ኩሽያን አꬂደ እሜዳ። ኤር. 21:1-10፤ 34:1-5 18 ባብሎነ ካቲ ጾሳ ጌሻ ጎልያን ደእያ ሚሻቱዋ ኡባ፥ ዳሩዋነ ላፋ፥ መꬍና ጎዳ ጌሻ ጎልያን ደእያ ሚሻ፥ ካትያ ሚሻነ አ ኦሳንቻቱ ሚሻ ኡባ አኪደ፥ ባብሎነ አፌዳ። 19 ሄዋፐ ጉይያን፥ ባብሎነ ኦላንቻቱ ጾሳ ጌሻ ጎልያ ታማን ጹጊደ፥ የሩሳላመ ድርሳ ግምቢያካ ላሌድኖ። ካትያ ጎልያ ኡባ ታማን ጹጊደ፥ ያን ደእያ አልኦ ሻሉዋ ኡባ ꬋይሴድኖ።

20 ካቲ ማሻፐ ፓላሂደ አቴዳዋንታ ኦሞዲደ ባብሎነ አፌዳ። ፓርሰ ካዉተꬃይ ዎልቃማና ጋካናዉ፥ ኡንቱንቱ አዉነ አ ናናዉ ቆማ ግዴድኖ። 21 ሄዋን መꬍና ጎዳይ ትምቢትያ ኦድያ ኤርማሳ ባጋና ኦዴዳ ቃላይ ፖለቴዳ። ዉርሰꬃን ቢታይ ላፑን ታሙ ላይꬃ ኩመንꬃ አሳይ ባይና ሳኣ ግዲደ ሸምፔዳ፤ ሄዌነ፥ ላፑንꬃ ላፑንꬃ ላይꬃ ሳምባታ ኦꬂደ፥ ጋድያ ሸምፕስያዋ አሳይ አጌዳ ግሻሳ። ኤር. 25:11፤ 29:10

22 ፓርሰ ካቲ ቂሮስ ካተቴዳ ኮይሮ ላይꬃን፥ ትምቢትያ ኦድያ ኤርማሳ ባጋና መꬍና ጎዳይ ሃሳዬዳዋ ፖሌዳ። ፓርሰ ካቲ ቂሮስ ባረ ካዉተꬃ ግዶን ኡባ ሳን ሀዋዳን ያጊደ አዋያናዳንነ ጻፊደ ዎꬃናዳን መꬍና ጎዳይ አ አያና ደንꬄዳ፤ 23 “ፓርሰ ካቲ ቂሮስ ሀዋዳን ያጌ፤ ‘መꬍና ጎዳይ፥ ሳሉዋ ጾሳይ ሀ ሳኣ ካዉተꬃቱዋ ኡባ ታዉ እሜዳ፤ ቃይ ይሁዳን ደእያ የሩሳላመን ታን አዉ ጌሻ ጎልያ ኬጻናዳን ታና ሱንꬄዳ። መꬍና ጎዳ አሳ ግዴዳ ኦንነ ያ ቦ። መꬍና ጎዳይ አ ጾሳይ አናና ግዶ!’ ያጌ” ያጌዳ። ኢሳ. 44:28