1 ፓርሰ ካቲ ቂሮስ ካተቴዳ ኮይሮ ላይꬃን፥ ትምቢትያ ኦድያ ኤርማሳ ባጋና መꬍና ጎዳይ ሃሳዬዳዋ ፖሌዳ። ፓርሰ ካቲ ቂሮስ ባረ ካዉተꬃ ግዶን ኡባ ሳን ሀዋዳን ያጊደ አዋያናዳንነ ጻፊደ ዎꬃናዳን መꬍና ጎዳይ አ አያና ደንꬄዳ፤ኤር. 25:11፤ 29:10 2 “ፓርሰ ካቲ ቂሮስ ሀዋዳን ያጌ፤ ‘መꬍና ጎዳይ ሳሉዋ ጾሳይ ሳኣ ካዉተꬃቱዋ ኡባ ታዉ እሜዳ፤ ቃይ ይሁዳን ደእያ የሩሳላመን ታን አዉ ጌሻ ጎልያ ኬጻናዳን ታና ሱንꬄዳ።ኢሳ. 44:28 3 ጾሳ አሳ ግዴዳ ኦንነ ያ ቦ። አ ጾሳይ አናና ግዶ! ህንተንቱ ይሁዳን ደእያ የሩሳላመ ቢደ፥ ያን የሩሳላመን ደእያ መꬍና ጎዳ፥ እስራኤልያ ጾሳ ጌሻ ጎልያ ዛረꬂደ ኬጽተ። 4 ዱማ ዱማ ቢታን ደእያ አሳይ ኡባይ አይሁዳቱዋፐ አቴዳዋንቱ ብራ፥ ዎርቃ፥ ዱማ ዱማ ሚሻቱዋነ መህያ እሚደ ማድኖ፤ ቃይ የሩሳላመን ደእያ ጾሳ ጎለውካ ባረንቱ ሸንያን እምያ እሞታ እምኖ’ ያጌዳ” ያጌ።

5 ሄዋፐ ጉይያን፥ ይሁዳ ዛራቱነ ቢንያማ ዛራቱዋ ካፓቱ፥ ቄሳቱ ነ ሌዋቱ፥ ቃይ ጾሳይ ኡንቱንቱ ዎዛና ደንꬄዳ ኡባቱ የሩሳላመን መꬍና ጎዳ ጎልያ ኬጻናዉ ባናዉ ደንዴድኖ። 6 ቃይ ኡንቱንቱ ሾሩዋን ደእያዋንቱካ ባረንቱ ሸንያን እሜዳዋ ቦላ ጉጂደ፥ ብራ ሚሻነ ዎርቃ ሻሉዋ፥ ሀራ ዱማ ዱማ ሚሻቱዋነ መህያ እሚደ፥ ኡንቱንታ ማዴድኖ። 7 ሄዋ ቦላካ ቃይ ካቲ ቂሮስ ናቡካዳናጾረ የሩሳላመፐ አፊደ ባረ ጾሳቱዋ ጎለን ዎꬄዳ መꬍና ጎዳ ጎልያ ሚሻቱዋ እሜዳ። 8 ፓርሰ ካቲ ቂሮስ ሚሻቱዋ ዎꬅያ ጎልያ ካፑዋ ምትረዳታን ከስሲድነ ፓይድሲደ፥ ይሁዳ ሞድያ ሸሽባጻራ ኩሽያን ሼዳ። 9 ስሜዳ ሚሻ ፓይዱ ሀዋ: ሀታሙ ዎርቃ ሳነቱዋ፥ እት ሻአ ብራ ሳነቱዋ፥ ላታማነ ኡዱፑን ጎሎዶቱዋ፥ 10 ዎርቃፐ ኦሰቴዳ ሀታሙ ሚሻቱዋ፥ ብራፐ ኦሰቴዳ ኦይዱ ጼታነ ታሙ ሚሻቱዋነ እት ሻአ ሀራ ዱማ ዱማ ሚሻቱዋ። 11 ዎርቃ ሚሻቱነ ብራ ሚሻ ፓይዱ ኡባና እቼሹ ሻአነ ኦይዱ ጼታ፤ ሀ ሚሻቱዋ ኡባ ኦሞዱዋን ቤዳ አሳይ ባብሎነፐ የሩሳላመ ስምያ ዎደ ሸሽባጻር አኪደ ዬዳ።