1 ሀዌ ታዉ ህንተኮ ዩሳይ ሄዘንꬆ ዎደ። አይ ሞቱካ ላኡ ዎይ ሄዙ ማርካይ ማርካትና ፕርደታናዉ ኮሼ። ዛረ. 17:6፤ 19:15 2 ታን ላኤንꬁዋ ህንተናና ጋከቴዳ ዎደ፥ ህንተና ናገትተ ጋድ፤ ሀእካ ሃኩዋን ደኦፐካ፥ ህንተና ናገትተ ጋይ። ታን ቃይካ ህንተኮ ብያ ዎደ፥ ናጋራ ካሰ ኦꬄዳዋንታካ ቃይ ሀራቱዋ ኡባቱዋካ ሙረናን አግከ።

3 አያዉ ጎፐ፥ ክርስቶስ ታ ባጋና ሃሳይያዋ ኤርስያዋ ህንተ ኮዪታ። እ ህንተናና ሃሳይያ ዎደ አ ዎልቃፐ አትን ቤትያዌ አ ዳቡራ ግደና። 4 አያዉ ጎፐ፥ ክርስቶስ ማስቃልያ ቦላ ምስማርያን ꬍሸቲደ፥ ዳቡራን ካቀቴዳ፤ ሽን ጾሳ ዎልቃን ፓጻ ደኤ። አያዉ ጎፐ፥ እ ዳቡራንቻ ግዴዳዋዳን፥ ኑንካ ዳቡራንቻ፤ ሽን ህንተናና ሃሳይያዋን ኑን ጾሳ ዎልቃን አናና ደአና።

5 አማኑዋን ህንተ ምን ደእንቶ አነ ህንተና ፓጭተ፤ ህንተና ብድተ። ክርስቶስ ህንተናን ደእያዋ ህንተ ኤርክቴ? ሄዌ ꬋዮፐ ፓጭያን ኩንዴድታ ጉሳ። 6 ኑን ፓጭያን ኩንድቤናዋ ህንተ ኤርያዋ አማናይ።

7 ህንተ ኢታባ ሙለካ ኦና ማላ፥ ኑን ጾሳ ዎሴቶ። ኑን ፓጭያ ዳንዳይያዋንታ ግዲደ ቤታናሳ ግደና፤ ሽን ኑን ፓጭያ ዳንዳየናዋንታ ማላቲደ ቤቶፐካ፥ ሎኦባ ህንተ ኦꬃናሳ። 8 አያዉ ጎፐ፥ ኑን ቱሙዋ ጻላላዉ ኦꬃናፐ አትን፥ ቱሙዋፐ ሀራ አይነ ኦꬃናዉ ዳንዳዮኮ፤ 9 ኑን ዳቡራንቻ ሽን ህንተ ዎልቃማ ግዶደ ናሸቴቶ። ህንተ ፖሎ ግዳና ማላ ኑን ጾሳ ዎሴቶ።

10 ታን ህንተፐ ሃኩዋን ደኣደ ጻፌዳዌ ሄዋ ድራሳ፤ ታን ህንተኮ ብያ ዎደ፥ ጎዳይ ታዉ እሜዳ ማታን ዘምፓደ፥ ህንተና መቶꬃናዉ ታና ዋዪ ኮሻና። ሄ ማታይ ታን ህንተና ኬጻናዉ ታዉ እመቴዳዋፐ አትን፥ ህንተና ኮላናዉ እመትቤና።

11 ዉርሰꬃን ታናዳን ጾሳ ካልያዋንቶ፥ ሳሮ ደእተ፤ ባል ባይናን ደእተ፤ ታ ዞርያ ስስተ፤ እት ዎዛና ግዲደ ደእተ፤ ሳሮተꬃን ደእተ። ሲቁዋነ ሳሮተꬃ ጾሳይ፥ ህንተናና እትፐ ደአና።

12 እቱ እቱዋና ጌሻ የረታ የረቲደ ሳሮተትተ። 13 ጾሳ አሳ ኡባቱ ህንተና ሳሮ ሳሮ ጊኖ።

14 ጎዳ የሱስ ክርስቶሳ አꬎ ኬካተꬃይ፥ ጾሳ ሲቁ፥ ጌሻ አያና እትፐተꬃይ ህንተናና ኡባና ግዶ። አመንእ።