1 ሶርያ ካትያ ኦላ ጋዳዉ ንእማነ ባረ ጎዳን ዳሮፐ ዶሰቴዳነ ቦንቼቴዳ አሳ። አያዉ ጎፐ፥ አ ባጋና መꬍና ጎዳይ ሶርያ ኦላንቻቶ ጾኑዋ እሜዳ። ንእማነ ቶራዉ ቃራ አሳ፤ ግዶፐነ ዎልቃማ ኦሉዋ ሀርጊ አ ኦይቂ ኡቴዳ። ሉቃሳ 4:27

2 እት ዎደ ሶርያ ቢታፐ ኦሞድያዋንቱ እስራኤልያ ጋድያ ቤዳዋን፥ እት ጉꬃ ናቶ እስራኤልያፐ ኦሞዴድኖ። ሄ ናታ ንእማና ማቻትዉ ቆማ ግዳዱ። 3 ሄ ናታ ባረ ጎዳቶ፥ “ታ ጎዳይ ሳማርያን ደእያ ትምቢትያ ኦድያዋና ጋከቴዳባ ግዴረኔ! ያትንቶ እ አ ፓꬃና ሽን” ያጋዱ።

4 ንእማነ ባረ ጎዳኮ ቢደ፥ እስራኤልያፐ ዬዳ ናታ ጌዳዋ አዉ ኦዴዳ። 5 ሶርያ ካቲ ንእማና፥ “ባ፥ ታን እስራኤልያ ካትያዉ ዳብዳቢያካ ኪታና” ያጊደ ዛሬዳ። ያትና ንእማነ ሀታሙ ሻአ ጻጋራ ብራ፥ ኡሱፑን ሻአ ዎርቃ ሳንትምያነ ታሙ ኩመንꬃ ማዩዋ አኪደ ቤዳ። 6 እስራኤልያ ካትያዉ እ አኪደ አፌዳ ዳብዳቢ፥ “ሀ ዎልቃማ ኦሉዋ ሀርግያፐ ኔን ታ ቆማ ንእማና ፓꬃና ማላ፥ ሀ ዳብዳቢያና ታን አ ኔኮ ኪታድ” ያግያዋ።

7 እስራኤልያ ካቲ ዳብዳቢያ ናባቤዳ፤ ኤለካ ዳጋሚደ፥ ባረ ማዩዋ ፔꬊደ፥ ሀዋዳን ያጌዳ፥ “ታን አ ዎꬋናዉነ ፓꬃናዉነ ጾሴየ? ታን እት አሳ አ ዎልቃማ ኦሉዋ ሀርግያፐ ፓꬃና ማላ፥ ሀ ብታኒ ታኮ አያዉ ኪቲ? እ ታናና ዋላቀታናዉ ጋሱዋ ኮይያዋ በእተ” ያጌዳ።

8 ጾሳ አሳ ግድያ ኤልሳእ እስራኤልያ ካቲ ባረ ማዩዋ ፔꬌዳዋ ስሴዳ ዎደ፥ አኮ አሳ ኪቲደ፥ “ነ ማዩዋ አያዉ ፔꬋዲ? አ ሃ ታኮ የዳ፤ እስራኤልያን ትምቢትያ ኦድያዌ ደእያዋ ታን አ ኤርሳና” ያጌዳ።

9 ንእማነ ባረ ፓራቱዋነ ፓራ ጋረቱዋ አኪደ ቤዳ፤ ኤልሳአ ካረን ኤቄዳ። 10 ኤልሳእ አኮ አሳ ኪቲደ፥ “ባ፥ ዮርዳኖሳ ሻፋን ላፑ ገደ ሙከታ፤ ነ ሀርግያፐ ኔን ፓጻናነ ጌያናነ” ያጊደ አዛዜዳ።

11 ሽን ንእማነ ሀንቀት ደንዲደ፥ “በእተ፥ ታን፥ ቱሙካ እ ታኮ ይ ኤቂደ፥ መꬍና ጎዳ ባረ ጾሳ ሱንꬃ ጼሲደ፥ ቃይ ባረ ኩሽያ ሄ ጸለቁዋ ቦላን ቃꬂደ፥ ታና ሀ ዎልቃማ ኦሉዋ ሀርግያፐ ፓꬄ ያጋደ ቆፓድ። 12 ዳማስቆ ሻፋቱ፥ አባንነ ፓርፋር እስራኤልያን ደእያ ሻፋ ኡባፐ ኬክክኖየ? ያትና ታን ኡንቱንቱን ሙከታደ ጌያ ክችክታ?” ያጌዳ። ሀንቀቲደ፥ ጉየ ስሜዳ።

13 አ ካልያዋንቱ አኮ ሺቂደ፥ “ኑ አዎ፥ ትምቢትያ ኦድያዌ ኔን ግታባ ኦꬃናዳን ነዉ ኦድንቶ፥ ዎን ኔን ኦꬅኪየ? ያትና እ ኔና፥ ‘ባደ ሙከታደ ጌያ’ ያጌዳባይ አያ ዴጺ?” ያጌድኖ። 14 ያትና እ ዱገ ዎꬊደ፥ ጾሳ ብታኒ አዉ ኦዴዳዋዳን ዮርዳኖሳ ሻፋን ላፑ ገደ ሙከቲደ ጌዬዳ። አ ቦላይ ቄር ናኣ ቦላዳን ሀኒደ ፓጼዳ፤ ጌዬዳ።

15 ሄዋፐ ጉይያን፥ ንእማንነ አናና ዬዳ አሳይ ኡባይ ኤልሳአኮ ጉየ ቤዳ። ንእማነ አ ስንꬃን ኤቂደ፥ “እስራኤልያ ቢታናፐ አትና፥ ሳኣ ኡባን ጾስ ባይናዋ ታን ሀእ ኤራድ። ሀያና ሀእ ታን ነ ቆማይ እምያ እሙዋ አካ!” ያጌዳ።

16 ኤልሳእ፥ “ታን አዉ ኦꬅያ መꬍና ጎዳይ ኤሮ! ታን ኔፐ አያነ አክከ” ያጌዳ። ኤልሳእ እሙዋ አካናዳን ናእማነ ዎስናካ፥ እጼዳ።

17 ሄዋፐ ጉይያን ንእማነ፥ “አካና ꬋይያዋ ግዶፐ፥ ኔን ታዉ ላኡ ባቁሉዋ ጫና ቢታ እማናዳን ታን ኔና ዎሳይ። አያዉ ጎፐ፥ ታን ነ ቆማይ ሀቼፐ ህን ባጋን ጹግያ ያርሹዋ መꬍና ጎዳዉ ያርሻናፐ አትና፥ ሀራ ጾሳቶ ያርሽከ። 18 ሽን መꬍና ጎዳይ ታዉ ነ ቆማዉ እትባ አቶ ጎ። ታ ካቲ ርሞና ግያ ኤቃዉ ጎይናናዉ ገልያ ዎደ፥ ታንካ አ አጃባደ ገላደ ጎይናናዉ ኮሼ። መꬍና ጎዳይ ታዉ ነ ቆማዉ ሄዋ አቶ ጎ” ያጌዳ።

19 ኤልሳእ፥ “ሳሩዋን ጋካ!” ያጌዳ። ንእማነ ደንዲደ ቤዳ።

እ ላፋ ዛርዳኢደ ቢሽን፥ 20 ጾሳ አሳ ግዴዳ ኤልሳአ ቆማይ ግያዝ፥ “ታ ጎዳይ ኤልሳእ ሶሪ ንእማነ አሄዳዋፐ አያካ አከናን ጮ የዴዳ። መꬍና ጎዳይ ኤሮ! ታን አ ጌዱዋ ዎጻደ፥ አፐ እትባ አካና” ያጊደ ቆፔዳ። 21 ሄዋ ድራዉ፥ ግያዝ ናእማና ካሌዳ። ባረ ጌዱዋ ዎጽያዋ ንእማነ በኢደ፥ አናና ጋከታናዉ ፓራ ጋርያፐ ዎꬊደ፥ “አዬሻ፥ ሳራ ግደኔ?” ያጊደ ኦቼዳ።

22 ግያዝ፥ “አየነ ባዋ፤ ሳራ! ሽን ታና ታ ጎዳይ፥ ‘ “ኤፍሬማ ገዝያፐ ትምቢትያ ኦድያዋንቱ ዛታ ግድያ ላኡ ዎዳላቱ ሀእ ታኮ ዬድኖ። ሀያና ኡንቱንቶ ሄዙ ሻአ ጻጋራ ብራነ ላኡ ኩመንꬃ ማዩዋነ እማ” ጋደ አ ኦቻ’ ያጊደ ኪቴዳ” ያጌዳ።

23 ንእማነ ግያዛ፥ “ያቶፐ ሀያና ኡሱፑን ሻአ ጻጋራ ብራ አካ” ያጌዳ። ንእማነ ግያዛ ሾቢደ፥ ሄ ብራ ላኡ ቃርጪታን የጊደ፥ ላኡ ኩመንꬃ ማዩዋና ላኡ ቆማቱዋ ቶሲደ፥ ግያዛፐ ስንꬃዉ የዴዳ። 24 ግያዝ ደእያ ደርያ ኡንቱንቱ ጋክና፥ ብራነ ማዩዋነ ኡንቱንቱፐ አኪደ፥ ሶ ገልሴዳ። ያቲደ ኡንቱንታ ሞይዝና፥ ኡንቱንቱ ቤድኖ።

25 ሄዋፐ ጉይያን፥ ሶ ገሊደ፥ ባረ ጎዳ ኤልሳአ ስንꬃን ኤቄዳ። ኤልሳእ ግያዛ፥ “ሀቃ ባድ?” ያጊደ ኦቼዳ።

ግያዝ፥ “ታን ነ ቆማይ ሀቃነ ባበይከ” ያጊደ ዛሬዳ።

26 ሽን ኤልሳእ ዛሪደ፥ “ብታኒ ኔናና ጋከታናዉ ፓራ ጋርያፐ ዎꬍያ ዎደ፥ ታ አያናይ ኔናና ደኤ ግደኔ? ሀዌ ሚሻነ ማዩዋ፥ ዎይ ዎጋራነ ዎይንያ ቱራ ሳኣ፥ ዎይ ዶርሳ ዉድያነ ሚዛ ዉድያ፥ ዎይ አቱማ ቆማነ ማጫ ቆማ አክያ ዎዴየ? 27 ሄዋ ድራዉ፥ ንእማና ኦይቀዳ ዎልቃማ ኦሉዋ ሀርጊ ኔናነ ነ ዘረꬃ ኡባ መꬍ መꬍናዉ ኦይቃናዋ” ያጌዳ። ግያዝ ኤልሳአ ስንꬃፐ ከሲደ ቢሽን፥ ሄ ሀርጊ አ ኦይቂና፥ አ ጋልባይ ሻቻዳን ቦጽ ባሼዳ።