1 ትምቢትያ ኦድያዋንቱ ጭታይ ኤልሳአ፥ “ሀዋ በአ! ኑን ደእያ ሳአይ ኑና ዳሮፐ ኡንኤ። 2 ኑን ኡባቱካ ምꬃ ቃንጻናዉ ዮርዳኖሳ ሻፋ አነ ቦይተ። ያን ኑዉ ደእያ ሳኣ አነ ኬጾይተ” ያጌድኖ።

ኤልሳእ፥ “ቢተ” ያጌዳ።

3 ትምቢትያ ኦድያዋንቱፐ እቱ፥ “ሀያና ኔንካ ነ ቆማቱዋና ኑናና ደንዳርኪ?” ያጌዳ።

ኤልሳእ፥ “ኤኖ ባና” ያጊደ ዛሬዳ፤ 4 ያቲደ ኡንቱንቱና እትፐ ቤዳ።

ኡንቱንቱ ዮርዳኖሳ ጋኬዳ ዎደ፥ ምꬃ ቃንጹዋ ዶሜድኖ። 5 ሽን ኡንቱንቱፐ እቱ ምꬃ ቃንጽሺና፥ ቤጽያ አይፊ ከስ አኪደ፥ ሃꬃ ግዶን ገሌዳ። ሄ ብታኒ፥ “ሀይ ታ ጎዳዉ፥ ታን ጋርጻ አኬዳዋ፤ ሽን ዋኖሻ!” ያጊደ ዋሴዳ።

6 ጾሳ ብታኒ፥ “ሀቃን ገሌዴ?” ያጊደ ኦቼዳ፤ ብታኒ ገሌዳ ሳኣ በሴዳ። ኤልሳእ ጋትማ ቃንጺደ፥ ሃꬃን ኦሌዳ፤ ቤጽያ አይፊ ሃꬃ ቦላ ከሴዳ። 7 ሄዋፐ ጉይያን፥ ኤልሳእ ብታንያ፥ “ከሳደ አካ” ያጌዳ። ብታኒ ባረ ኩሽያ የዲደ አኬዳ።

8 ሶርያ ቢታ ካቲ እስራኤላቱዋና ኦለቲደ ደኤ። ያቴዳዌ ባረ ኦላ ጋዳዋቱዋና ዞረቲደ፥ “ታን ህቃሳን፥ ህቃሳን ጌሱዋ መꬋና” ያጌዳ።

9 ጾሳ አሳይ ኤልሳእ እስራኤልያ ካትያኮ አሳ ኪቲደ፥ “ሶርያ አሳቱ ሄ ሳኣ ዱገ ዎꬍያ ድራዉ፥ ሄ ሳኣና አꬎፓ” ያጌዳ። 10 ሄዋ ድራዉ፥ እስራኤልያ ካቲ ጾሳ ብታኒ ማላቴዳ ሳኣ ኪቲደ፥ ያን ደእያ አሳይ ናገታናዳን ሀሳይሴዳ። ካትያ ናገታና ማላ፥ ኤልሳእ ዎድያን ዎድያን ሀሳይሴዳ።

11 ሀ የዉ ሶርያ ካትያ ሎይꬅ ሀንቀꬄዳ፤ ያትና እ ባረ ኦላ ጋዳዋቱዋ ጼሲደ፥ “ኑ ግዶን እስራኤልያ ካትያ ባጋ ግዴዳዌ ኦነንቶ አነ ታዉ ኦድተ” ያጊደ ኦቼዳ።

12 አ ኦላ ጋዳዋቱዋፐ እቱ፥ “ታ ጎዳዉ፥ ካትያዉ፥ ኑ ግዶን ሄዋ ኦꬅያዌ ኦንነ ባዋ። ሽን ነ ሲርጻን ደኣደ ኔን ሃሳይያዋ ኡባ እስራኤላን ደእያ ትምቢትያ ኦድያ ኤልሳእ እስራኤልያ ካትያዉ ኦዴዳ” ያጌዳ።

13 ካቲ፥ “ታን አሳ ኪታደ አ ኦሞዳናዳን፥ ቢደ ሀቃን ደእንቶነ ኮይተ” ያጌዳ።

ጉየፐ ኡንቱንቱ፥ “እ ዶታና ጌተትያ ካታማን ደኤ” ያጊደ ኦዴድኖ።

14 ካቲ ዳሮ ኦላንቻቱዋ ፓራቱዋናነ ፓራ ጋረቱዋና ያ የዴዳ። ሄ የዴዳዋንቱ ቃማ ዪደ፥ ካታማ ዶዴድኖ። 15 ጾሳ አሳ ኤልሳአ ቆማይ ዎንተꬃ ጋላስ ጉራና ደንዲደ፥ ካረ ከስያ ዎደ፥ ኦላንቻቱ ፓራቱዋናነ ፓራ ጋረቱዋና ካታማ ዶድ ዎꬄድኖ። ሄ ቆማይ፥ “አየ አና ኑኖ! ታ ጎዳዉ፥ ኑን ዋናኔ?” ያጊደ ኦቼዳ።

16 እ፥ “ያዮፓ! ኑናና ደእያዋንቱ ኡንቱንቱና ደእያዋንቱፐ ዳሪኖ” ያጊደ ዛሬዳ።

17 ሄዋፐ ጉይያን ኤልሳእ፥ “አቤት መꬍና ጎዳዉ፥ እ በአናዳን አ አይፍያ ዶያ” ያጊደ ዎሴዳ። መꬍና ጎዳይ ኤልሳአ ቆማ አይፍያ ዶይና፥ ኤልሳአ ዩሹዋ ኡባን ደእያ ታማ ፓራቱነ ፓራ ጋረቱነ ደርያ ማዬዳዋንታ በኤዳ።

18 ሶረቱ አ ቦላ ዬዳ ዎደ ኤልሳእ፥ “ሀ አሳ አይፍያ ቆቅሳርኪ” ያጊደ መꬍና ጎዳ ዎሴዳ። ኤልሳእ ዎሴዳዋዳን መꬍና ጎዳይ ኡንቱንቱ አይፍያ ቆቅሴዳ። 19 ሄዋፐ ጉይያን፥ ኤልሳእ ኡንቱንታ፥ “ኦጊ ሀዋ ግደና፤ ካታማይካ ሀዋ ግደና። ህንተንቱ ኮይያ አሳ ታን ህንተንታ በሳና፤ ታና ካልተ” ያጌዳ። ኡንቱንታ ካለꬂደ፥ ሳማርያ ካታማ አፌዳ።

20 ኡንቱንቱ ሳማርያ ካታማ ገሎሳናካ ኤልሳእ፥ “አቤት መꬍና ጎዳዉ፥ ሀ አሳቱ ጼላናዳን ኡንቱንቱ አይፍያ ዶያ” ያጌዳ። መꬍና ጎዳይ ኡንቱንቱ አይፍያ ዶይና፥ ኡንቱንቱ ሳማርያ ግዶን ደእያዋ በኤድኖ። 21 እስራኤልያ ካቲ ኡንቱንታ በኤዳ ዎደ ኤልሳአ፥ “ታ አዎ፥ ታን ኡንቱንታ ዎꬎ? ታን ኡንቱንታ ዎꬎ?” ያጊደ ኦቼዳ።

22 ኤልሳእ፥ “ቱይት ዎꬎፓ! ሀዋንቱ አትና፥ ኔን ነ ማሻንነ ነ ዎንዳፍያን ኦሞዴዳዋንታካ ዎꬋናዉ በሰና። ኡንቱንቱ ሚደ ኡሺደ ባረንቱ ጎዳኮ ባናዳን፥ ኡክꬃነ ሃꬃነ ኡንቱንቱ ስንꬃ አꬃ” ያጌዳ። 23 ሄዋ ድራዉ፥ እስራኤልያ ካቲ ኡንቱንቶ ባላ ጊግሴዳ። ኡንቱንቱ ሜዳዋፐነ ኡሼዳዋፐነ ጉይያን፥ እ ኡንቱንታ የድና፥ ባረንቱ ጎዳኮ ስሜድኖ። ሄ ዎድያፐ ዶምና፥ ሶረቱ እስራኤላቱ ቦላን ይያዋ አግ ባሼድኖ።

24 ሄዋፐ ጉይያን፥ ሶርያ ካቲ በንሀዳድ ባረ ኦላንቻቱዋ ኡባ ሺሽ፥ ቢደ ሳማርያ ካታማ ዶዴዳ። 25 ኡንቱንቱ ዶዴዳ ጋሱዋን ሳማርያ ካታማን ዎልቃማ ኮሻይ ገሌዳ፤ እት ሀርያ ሁጲ ሆስፑን ታሙ ጻጋራ ብራን፥ ላኡ ጼቱ ግራመ ግድያ ሀራጰቱዋ ሽአይ እቼሹ ጻጋራ ብራን ዛልኤቴዳ።

26 እስራኤልያ ካቲ ካታማ ድርሳ ግምቢያ ቦላና አꬍሽን፥ እት ምሽራታ፥ “ታ ጎዳዉ፥ ካትያዉ፥ ታና ማዳርኪ” ያጋደ ዋሳዱ።

27 ካቲ እዞ፥ “ኔና መꬍና ጎዳይ ማደናን እጾፐ፥ ታን ነዉ ማዱዋ ሀቃፐ ደማናዉ ዳንዳያይታ? ካꬃ ቡክያ ኡዱማፔየ፥ ዎይንያ አይፍያ ጉምእያ ሳኣፔ?” ያጌዳ። 28 ቃይ እ እዞ፥ “ኔን ዋናዲ?” ያጊደ ኦቼዳ።

ምሽራታ ዛራደ፥ “ሀ ምሽራታ ታና፥ ‘ሀች ነ ናኣ ማናዉ አካደ ያ፤ ቃይ ዎንት ኑን ታ ናኣ ማና’ ያጋዱ። 29 ሄዋ ድራዉ፥ ታ ናኣ ዶይሲደ ሜዶ፤ ዎንተꬃ ጋላስ ታን እዞ፥ ‘ኑን ማናዉ ነ ናኣ አካደ ያ’ ያጋድ። ሽን አ ባረ ናኣ ቆሳዱ” ያጋዱ። ዛረ. 28:57፤ ሴላ 4:10

30 ካቲ ምሽራታ ኦዴዳዋ ስሲደ፥ ባረ ማዩዋ ፖሽ ኦሌዳ። ያቲደ እ ግምቢያ ቦላና አꬍሽን፥ ጋርሳ ባጋና እ ማዬዳ ዋሩዋ አሳይ በኤዳ። 31 ሄዋፐ ጉየ ካቲ፥ “ሻፋጻ ናኣ ኤልሳአ ጉግ አ ቦላ ሀቼ ፔሾፐ፥ ጾስ ታና ዎꬎ!” ያጌዳ።

32 ሄ ዎደ ኤልሳእ ባረ ሶን ኡቴዳ፤ ጭማቱካ አናና እትፐ ደኢኖ። ካቲ ባረፐ ስንꬃዉ አሳ ኪቴዳ፤ ሽን ሄ ብታኒ ጋካናዉ፥ ኤልሳእ ጭማቱዋ፥ “ሀ ሸምፑዋ ዎꬍያዌ ታ ቆꬍያ ሙጭሳናዉ አሳ ኪቴዳዋ ህንተንቱ በኢቴ? ሄ ኪተቴዳዌ ዬዳ ዎደ፥ እፍꬃ ጎርዲደ ገልሶፕተ። አ ጎዳይካ አ ካሊደ ዪደ ደኤ” ያጌዳ።

33 እ ጭማቱዋና ሃሳይሽን፥ ኪተቴዳዌ አኮ ዬዳ። ካቲካ ዪደ፥ “ሀ መቱ መꬍና ጎዳፐ ዬዳ። ያትና ታን ሀዋፐ ዳሩዋ መꬍና ጎዳ አያዉ ናጋይታ?” ያጌዳ።