1 ሄዋፐ ጉየ ኤልሳእ፥ “መꬍና ጎዳ ቃላ ስሳ! መꬍና ጎዳይ ሀዋዳን ያጌ፥ ዎንት ሀኖደ ሄዙ ኪሎ ግራመ ዛርጋ ꬊሊ ዎይ ኡሱፑን ኪሎ ግራመ ባንጋይ ሳማርያ ካታማ ፐንግያን እት ጻጋራ ብራን ዛልኤታና ያጌ” ያጌዳ።

2 ካትያዉ ማታትያ ካፑ ጾሳ አሳዉ፥ “በአ፥ መꬍና ጎዳይ ሳሎቱዋ ማስኮትያ ዶይንቶነ ሄዌ ሀነና” ያጌዳ።

ኤልሳእ ዛሪደ፥ “ኔን ሄዋ ነ አይፍያን በአና፤ ሽን አፐ አይነ ማካ” ያጌዳ።

3 ካታማ ገልያ ፐንግያን ዎልቃማ ኦሉዋ ሀርጊ ኦይቄዳ ኦይዱ አሳቱ ደኢኖ። ኡንቱንቱ እቱ እቱዋ፥ “ኑን ሀይቃና ጋካናዉ፥ ሀዋን አያዉ ጋምኤቶ? 4 ኑን ካታማ ገላና ጎፐ፥ ኮሻይ ደእያ ድራዉ፥ ኑን ያን ሀይቃና። ቃይ ሀዋን ጋምኦፐካ ሀይቃና። ሄዋ ድራዉ፥ ሶረቱዋ ጌሱዋ አነ ቦይተ። ኡንቱንቱ ኑና አሾፐ አታና፤ ኡንቱንቱ ዎꬎፐ ሀይቃና” ያጌድኖ።

5 ሳአይ ቃሜዳ ዎደ ደንዲደ፥ ሶረቱዋ ጌሱዋ ቤድኖ። ኡንቱንቱ ቢደ ጌሱዋ ጋክያ ዎደ፥ እት አሳይነ ያን ባዋ! 6 አያዉ ጎፐ፥ ጾሳይ ፓራ ጋረቱዋነ ፓራቱዋ ጉራባነ ዳሮ ኦላንቻቱ ኮሻ ሶርያ አሳቱ ስሴዳ። ያትና ኡንቱንቱ እቱ እቱዋ፥ “ስስተ፥ እስራኤልያ ካቲ ኑና ኦልሳናዉ፥ ሂተቱዋነ ግብጼቱዋ ካተቱዋ ደርያ ቃንጺደ አሄዳ” ያጌድኖ። 7 ሄዋ ድራዉ፥ ኡንቱንቱ ደንዲደ፥ ባረንቱ ጌሱዋ፥ ባረንቱ ዱንካንያ፥ ባረንቱ ፓራቱዋነ ባረንቱ ሀረቱዋነ ኡባ የግ ባሺደ፥ ሳአይ ቃሜዳዋን ባረንቱ ሸምፑዋ አሻናዉ ባቃቴድኖ።

8 ሄ ዎልቃማ ኦሉዋ ሀርጊ ኦይቄዳ አሳቱ ሶረቱዋ ጌሱዋ ጋኪደ፥ ኡንቱንቱ ዱንካነቱዋፐ እቱዋ ገሌድኖ። ሜድኖነ ኡሼድኖነ፤ ቃይ ብራ፥ ዎርቃነ ማዩዋ አክ አፊደ ቆሴድኖ። ላኤንꬁዋ ስሚደ፥ ሀራ ዱንካንያ ገሌድኖ፤ አፐ አኬዳዋካ ቆሴድኖ።

9 ሄዋፐ ጉይያን፥ ኡንቱንቱ እቱ እቱዋ፥ “ኑን ሎኦባ ኦꬅበይኮ። ሀቼ ምሽራቹዋ ጋላሳ፤ ሽን ኑን ጮኡ ጌዶ። ሳአይ ዎንታና ጋካናዉ፥ ጮኡ ጊደ ኡቶፐ፥ ኑን ሙረታና። አነ ሀእ ኤለካ ቢደ፥ ካትያ ሶይ አሳዉ ኦዴቶ” ያጌድኖ። 10 ሄዋ ድራዉ፥ ኡንቱንቱ ቢደ፥ ካታማ ፐንግያ ናግያዋንታ ጼሲደ፥ ሀዋዳን ያጌድኖ፤ “ኑን ሶረቱዋ ጌሱዋ ቤዶ፤ ሽን እት አሳይ ዎይ አሳ ኮሻይነ ሄ ሳኣን ባዋ። ቃሸት ኡቴዳ ፓራቱዋ ጻላላይነ ሀረቱነ ደኢኖ፤ ቃይ ኡንቱንቱ አጊደ ቤዳ ዱንካነቱካ ደኢኖ” ያጌድኖ። 11 ፐንግያ ናግያዋንቱ ጼሲደ፥ ካትያ ሶይ አሳዉ ኦዴድኖ።

12 ካቲ ቃማ ደንዲደ ባረ ካፓቶ፥ “ሶረቱ ኑና ኦꬄዳዋ ታን ህንተንቶ ኦዳና። ኑን ኮሻትያዋ ኡንቱንቱ ኤሪኖ። ሄዋ ድራዉ፥ ባረንቱ ጌሱዋፐ ከሲደ፥ ጋጻርያን ቆሰቲደ፥ ኡንቱንቱ ካታማፐ ካረ ከስና፥ ኑን ኡንቱንታ ሸምፑዋና ኦይቂደ፥ ካታማ ገላና ያጊደ ቆፔድኖ” ያጌዳ።

13 ካትያ ካፓቱዋፐ እቱ፥ ሀዋዳን ያጌዳ፤ “ሀ ካታማን አቴዳ አሳይ ካሰ ሀይቄዳ አሳካ ማላ፤ ሀይቁዋፐ አተና። ሄዋ ድራዉ፥ ሀኔዳባ ኤራናዉ አነ አሳ ዶሮይተ። አቴዳ እቼሹ ፓራቱዋና አነ ኡንቱንቱ ሶረቱ ዱንካኔዳሳ የዶይተ” ያጌዳ።

14 ሄዋ ድራዉ፥ ኡንቱንቱ ፓራይ ጎችያ ላኡ ጋረቱዋነ ኡንቱንቱ ፓራቱዋነ ዶሬድኖ። ካቲ ኡንቱንታ ሶርያ ኦላንቻቱ ጌዱዋ የዴዳ። ካቲ ቶግያዋንታ፥ “ቢደ ሀኔዳባ በእተ” ያጊደ አዛዜዳ። 15 ኡንቱንቱ ሶረቱዋ ጌዱዋ ካሊደ፥ ዮርዳኖሳ ሻፋ ጋካናዉ ቤድኖ። ሶርያ አሳቱ ባቃቲደ ኦሌዳ ማዩነ ኦላ ሚሻይነ ኦግያን ኩሜዳ። ኪተት ቤዳ አሳቱ ጉየ ስሚደ፥ ካትያዉ ኦዴድኖ።

16 ሄዋፐ ጉይያን፥ አሳይ ቢደ፥ ሶረቱዋ ጌሱዋ ቦንቄዳ። መꬍና ጎዳይ ጌዳዋዳን ሄዙ ኪሎ ግራመ ዛርጋ ꬊሊ ዎይ ኡሱፑን ኪሎ ግራመ ባንጋይ እት ጻጋራ ብራን ዛልኤቴዳ። 17 ካቲ ባረዉ ማታትያ ካፑዋ ፐንግያ ናግያዋንቱ ካፑዋ ከሲደ ሱንꬄዳ፤ ሽን አሳይ አ ፐንግያን ድርጼዳ። ካቲ ኤልሳአኮ ቤዳ ዎደ፥ ኤልሳእ ሀ ካፑዋ ቦላ ኦዴዳዋዳን፥ ብታኒ ሀይቄዳ። 18 አያዉ ጎፐ፥ ጾሳ አሳይ ኤልሳእ ካሰ ካትያዉ፥ “ዎንታ ሀኖደ ሄዙ ኪሎ ግራመ ዛርጋ ꬊሊ ዎይ ኡሱፑን ኪሎ ግራመ ባንጋይ ሳማርያ ካታማን እት ጻጋራ ብራን ዛልኤታናዋ” ያጌዳ።

19 ሄ ዎደ ሄ ካፑ ኤልሳኤዉ፥ “በአ፥ መꬍና ጎዳይ ሳሎቱዋ ማስኮትያ ዶይንቶነ ሄዌ ሀነና” ያጊደ ዛሬዳ። ኤልሳእ፥ “ኔን ሄዋ ነ አይፍያን በአና፤ ሽን አፐ አይነ ማካ” ያጊደ ዛሬዳ። 20 ያትና ኤልሳእ ኦዴዳዋዳን፥ ሄ ብታኒ አሳይ ፐንግያን ድርጽና ሀይቄዳ።