8
ሱኔማ ካታማፐ በቴዳ ማጫ ምሽራታ ስማዱ
1 ኤልሳእ እ ናኣ ሀይቄዳዋ ፓꬄዳ ምሽራቶ እት ዎደ፥ “ነ ሶይ አሳ አካደ ሀዋፐ ባ፤ ኔን ዳንዳይያ ሳኣን ሀቃንነ ጋምአሻ። አያዉ ጎፐ፥ መꬍና ጎዳይ ላፑን ላይꬃ ጋምእያ ኮሻ ሀ ጋድያ ቦላ አዋይ ድጌዳ” ያጌዳ። 2 ካታ. 4:8-37 2 ምሽራታ ኤልሳእ ኦዴዳዋዳን ባረ ሶይ አሳና ባደ፥ ፕልስጼማ ቢታን ላፑን ላይꬃ ደኣዱ። 3 ላፑንꬃ ላይꬃ ዉርሰꬃን ምሽራታ ፕልስጼማ ጋድያፐ ስማዱ። ባረ ኬꬃነ ባረ ጋድያነ ኦቻናዉ ካትያኮ ባዱ።
4 ሄ ዎደ ካቲ ጾሳ አሳ ኤልሳአ ቆማ ግያዛና ሃሳዪደ፥ “ኤልሳእ ኦꬄዳ ዎልቃማ ኦሱዋ ኡባ ታዉ አነ ኦዳ” ያጌዳ። 5 ኤልሳእ ሀይቄዳ ናኣ ዋቲደ ፓꬄደንቶ፥ ግያዝ ካትያዉ ኦድሽን፥ ኤልሳእ ናኣ ፓꬄዳ ምሽራታ ባረ ኬꬃነ ባረ ጋድያነ ኦቻናዉ ያዱ።
ግያዝ፥ “ታ ጎዳዉ፥ ካትያዉ፥ ምሽራታካ ሀኖ፤ ኤልሳእ ሀይቁዋፐ ፓꬄዳ እ ናአይካ ሀዋ” ያጌዳ። 6 ካቲ ምሽራቶ አባ ኦችና፥ አዉ ኦዳዱ።
ሄዋ ድራዉ፥ ካቲ ካፑዋ ጼሲደ፥ “ሀ ምሽራትዋ ግዴዳ ኡባባነ ቃይ ኢዛ አጋ ቤዳ ዎድያፐ ሀቼ ጋካናዉ፥ እ ጋደን ዶልያ ኡባባ እዝዉ ዛራ” ያጊደ አዛዜዳ።
ሀዛኤል በንሀዳዳ ዎꬌዳ
7 ኤልሳእ ዳማስቆ ካታማ ቤዳ፤ ጋክያ ዎደ፥ ሶርያ ካቲ በንሀዳድ ሀርግያዎ፥ “ጾሳ አሳይ ሀዋ ዬዳ” ያጊደ ኦዴድኖ።
8 ካቲ ሀዛኤላ፥ “እምያዋ ኦይቃደ፥ ጾሳ አሳና ጋከታናዉ ባ። አ ባጋና፥ ‘ታን ሀ ሀርግያፐ ፓጻኔ?’ ያጋደ መꬍና ጎዳ ኦቻ” ያጌዳ።
9 ሄዋ ድራዉ፥ ሀዛኤል ዳማስቆን ደእያ ዱማ ዱማ ቆሞ ሙሩታባፐ ኦይታሙ ጋሉዋን ጫን አኪደ፥ ኤልሳኤና ጋከታናዉ ቤዳ። ኤልሳአ ስንꬃን ኤቂደ፥ “ነ ናአይ ሶርያ ካቲ በንሀዳድ፥ ‘ታን ሀ ሀርግያፐ ፓጻኔ?’ ያጊደ፥ ኔና ኦቻናዳን ታና ኔኮ ኪቴዳ” ያጌዳ።
10 ኤልሳእ ሀዛኤላዉ፥ “ኔን ባደ አዉ፥ ‘ቱማ ኔን ፓጻና’ ያጋ። ሽን እ ቱማ ሀይቃናዋ ታና መꬍና ጎዳይ በሴዳ” ያጌዳ። 11 ሄዋፐ ጉይያን፥ ሀዛኤል ዬላታና ጋካናዉ፥ ኤልሳእ አ ትሽ ኦꬂደ ጼሊደ ዬኬዳ።
12 ሀዛኤል፥ “ታ ጎዳይ አያዉ ዬኪ?” ያጊደ ኦቼዳ።
ኤልሳእ፥ “ኔን እስራኤልያ አሳ ቦላ ኦꬃና ኢታባ ታን ኤርያ ድራዉ ዬካይ። ኡንቱንቱ ካታማቱዋ ኔን ታማን ጹጋና፤ ኡንቱንቱ ዎዳላቱዋ ኔን ማሻን ዎꬋና። ቃይ ኡንቱንቱ ቄር ናናቱዋካ ኔን ሹቻን መንሬꬃና፤ ኡንቱንቱ ሻሃራ ማጫዋንቱ ኡሉዋካ ኔን ዳካና” ያጊደ ዛሬዳ።
13 ሀዛኤል ዛሪደ፥ “ታን ነ ቆማይ፥ ፓና ላፋ፥ ሀዋ ማላ ዎልቃማባ ኦꬃናዉ ዋታደ ዳንዳያይታ?” ያጌዳ። 1 ካታ. 19:15
ኤልሳእ ዛሪደ፥ “ኔን ሶርያ ቢታን ካተታናዋ ታና መꬍና ጎዳይ በሴዳ” ያጌዳ።
14 ሄዋፐ ጉይያን፥ ሀዛኤል ኤልሳኤፐ ሻከቲደ፥ ባረ ጎዳኮ ስሚደ ቤዳ። በንሀዳድ አ፥ “ኤልሳእ ኔና ዋጌዴ?” ያጊደ ኦቼዳ።
ሀዛኤል፥ “ኔን ቱሙፐ ፓጻና ያጊደ ታዉ ኦዴዳ” ያጌዳ።
15 ሽን ዎንተꬃ ጋላስ ሀዛኤል ቡሉኩዋ አኪደ፥ ሃꬃን ያካክሲደ፥ ካትያ አን ቱጬዳ፤ ካቲ ሀይቄዳ። ሀዛኤል አ ሳኣን ባረዉ ካተቴዳ።
ይሁዳነ እስራኤልያ ካተቱዋ
(8:16—17:4)
16 አካባ ናአይ፥ እስራኤልያ ካቲ ዮራመ ካተቴዳ እቼሻንꬆ ላይꬃን፥ ይሁዳ ካትያ ዮሳፌጻ ናአይ የሆራመ ይሁዳን ካተቴዳ። 17 የሆራመ ካተትያ ዎደ ላይꬃይ አዉ ሀታማነ ላአ፤ እ የሩሳላመን ሆስፑን ላይꬃ ካተቴዳ። 18 የሆራመ አካባ ናቶ ማቻቶ አኬዳ ድራዉ፥ አካባ ሶይ አሳይ ሀመቴዳዋዳንካ ካሰ እስራኤልያ ካተቱዋ ኦግያን እ ሀመቴዳ፤ መꬍና ጎዳ ስንꬃንካ ኢታባ ኦꬄዳ። 19 ግዶፐነ ባረ ቆማ ዳዊታ ድራዉ፥ መꬍና ጎዳይ ይሁዳ ꬋይሳናዉ ኮይቤና፤ ዳዊታ ዘረꬃይ መꬍናዉ ካተታናዉ ጾሳይ ሂዶታ እም ዎꬄዳ።1 ካታ. 11:36
20 የሆራመ ካተቴዳ ዎደ፥ ኤዶማ አሳይ ይሁዳ ካትያ ቦላ ማካሊደ፥ ባረንቶ ካትያ ካተዬድኖ። ዶመꬃ 27:40 21 ሄዋ ድራዉ፥ የሆራመ ባረ ፓራ ጋረቱዋ ኡባና ጻኢራ ግያ ሳኣ ቤዳ። ኤዶማ አሳቱ አነ አ ፓራ ጋረቱዋ ካፓቱዋነ ዶዴድኖ፤ ሽን የሆራመ ቃማ ደንዲደ፥ ዶዳ ዱሰረꬂደ አꬌዳ። አ ኦላንቻቱካ ባቃቲደ፥ ጉየ ሶ ስሜድኖ። 22 ሄ ዎድያፐ ዶሚደ ሀቼ ጋካናዉ፥ ኤዶማ አሳይ ይሁዳ አሳዉ ሞደትቤና። ሊብና አሳይ ቃይ ሄ ዎደ ማካሌዳ።
23 የሆራመ ሀኔዳ ሀራባይነ እ ኦꬄዳባይ ኡባይ ይሁዳ ካተቱ ታርክያ ማጻፋን ጻፈት ኡቴዳ። 24 የሆራመ ሀይቂደ፥ ባረ ማይዛን ጋከቴዳ። ማይዛ አዎቱዋና ዳዊታ ካታማን ሞገቴዳ። አ ሳኣን አ ናአይ አካዝያስ ካተቴዳ።
ይሁዳ ካትያ አካዝያሳ
(2 ኦዱዋ 22:1-6)
25 አካባ ናአይ፥ እስራኤልያ ካቲ ዮራመ ካተቴዳ ታማነ ላኤንꬆ ላይꬃን፥ ይሁዳ ካትያ የሆራማ ናአይ አካዝያስ ይሁዳን ካተቴዳ። 26 አካዝያስ ካተቴዳ ዎደ፥ ላይꬃይ አዉ ላታማነ ላአ፤ እ የሩሳላመን እት ላይꬃ ካተቴዳ። አ አት ሱንꬃይ አታሎ፤ አ እስራኤልያ ካትያ ኦምራዉ ናኣ ናቶ። 27 አካባ ሶይ አሳ ኦግያ እ ሀመቴዳ፤ አካባ ሶይ አሳይ ኦꬄዳዋዳን፥ መꬍና ጎዳ ስንꬃን ኢታባ ኦꬄዳ። እ ሄዋ ሀኔዳዌ ኡንቱንቶ ቦሉዋ ግዴዳ ግሻሳ።
28 አካዝያስ ሶርያ ካትያ ሀዛኤላን ደእያ ራሞታ-ጋላኣደ ግያ ካታማን ኦለታናዉ ቢደ፥ አካባ ናኣ ዮራማና እትፐ ቤዳ። ሶርያ አሳቱ ዮራማ ጫዴድኖ። 29 ዮራመ ሶርያ ካትያ ሀዛኤላና ኦለትያ ዎደ፥ ሶርያ አሳቱ ጫዴዳ ጫቻ ፓꬅ አካናዉ እዝራኤላ ካታማ ስሜዳ። ሄዋፐ ጉይያን፥ ዮራማ ናአይ፥ ይሁዳ ካቲ አካዝያስ አካባ ናኣ ዮራመ ጫደቴዳዋ ኦቻናዉ ዱገ እዝራኤላ ካታማ ቤዳ።