1 አካባዉ ሳማርያ ካታማን ላፑን ታሙ አቱማ ናናይ ደኢኖ። ሄዋ ድራዉ ኢዩ ዳብዳቢያ ጻፊደ፥ ሄ ካታማ ካፓቶ፥ ጭማቶነ አካባ ዘረꬃ ድችያዋንቶ ሳማርያ ካታማ ኪቴዳ። ሄ ዳብዳቢያን እ፥ 2 “ስም ህንተንቱ ጎዳ ዛራቱ ህንተናና ደእያ ድራዉ፥ ቃይ ፓራቱነ ፓራ ጋረቱ፥ ዩሹ ግምበቴዳ ካታማቱነ ኦላ ሚሻቱ ህንተንቶ ደእያ ድራዉ፥ ሀ ዳብዳቢ ህንተንታ ጋኮ ኤለካ፥ 3 ህንተንቱ ጎዳ ናናቱዋፐ እት ፓጻተꬃ ዳርያዋ ዶሪደ፥ አ አዉዋ ካዉተꬃ አራታን ኡትስተ። ያቲደ ህንተንቱ ጎዳ ጎለዉ ኦለትተ” ያጌዳ።

4 ሽን ኡንቱንቱ ዳሮፐ ያዪደ፥ “በእተ፥ ላኡ ካተቱ አ ስንꬃን ኤቃናዉ ዳንዳይበይክኖ! ያትና ኑን ዋን ኤቃኔ?” ያጌድኖ። 5 ሄዋ ድራዉ፥ ካትያ ጎለዉ አዎትያዌ፥ ካታማ ካፑ፥ ጭማቱነ አካባ ዘረꬃ ድችያዋንቱ ኢዩዉ ሀዋዳን ያጊደ ኪቴድኖ፤ “ኑን ነ ቆማቱዋ፤ ኔን ግያዋ ኡባ ኑን ኦꬃና። ኑ ቦላ ኦናነ ካተዮኮ። ኔና ሎኤዳባ አያነ ኦꬃ” ያጊደ ኪቴድኖ።

6 ኢዩ ኡንቱንቶ ላኤንꬆ ዳብዳቢያ ጻፊደ፥ “ህንተንቱ ታ ባጋ ግዲደ፥ ታዉ አዛዘታናዉ ጊጌዳዋ ግዶፐ፥ ህንተንቱ ጎዳ ናና ቆꬍያ ሙጭተ፤ ኡንቱንቱ ጉግያ አኪደ፥ ዎንት ሀኖደ እዝራኤላ ካታማ ዪተ” ያጌዳ።

ካትያ ዛራቱ ላፑን ታማቱካ ባረና ድችያ፥ ሄ ካታማን ኤረቴዳ አሳቱዋና ደኢኖ። 7 ሄ ካትያ ዘረꬃ ድችያ አሳቱዋኮ ዳብዳቢ ጋኬዳ ዎደ፥ ካትያ ዘረꬃ ላፑን ታማቱዋካ ዎꬌድኖ። ኡንቱንቱ ቆꬍያ ሙጪደ፥ ኡንቱንቱ ጉግያ ቁንኣን ቆስ አꬂደ፥ እዝራኤላ ካታማን ደእያ ኢዩዉ የዴድኖ።

8 ኪተቴዳ አሳቱ፥ “ኡንቱንቱ ካትያ ዛራቱዋ ጉገቱዋ አኪደ ዬድኖ” ያጊደ ኢዩዉ ኦዴዳ።

ኢዩ፥ “ዎንታ ጉራ ጋካናዉ፥ ካታማ ገልያ ፐንግያን ኡንቱንታ ላኡሳን ዶሪደ ዎꬅተ” ያጊደ አዛዜዳ።

9 ዎንተꬃ ጋላስ ጉራ ኢዩ ካረ ከሲደ፥ አሳ ኡባ ስንꬃን ኤቂደ፥ “ህንተንቱ ጽላ። ታ ጎዳ ቦላ ማቀታደ ዎꬌዳዌ ታና። ሽን ሀዋንታ ኡባ ዎꬌዳዌ ኦኔ? 10 ያቶፐ ስም መꬍና ጎዳይ አካባ ዛራቱዋ ቦላ ኦዴዳዋፐ እት ቃላይነ ሳኣን ዎናዋ ህንተዉ ኤርተ። አያዉ ጎፐ፥ መꬍና ጎዳይ ባረ ቆማ ኤላሳ ባጋና ኦዴዳዋ ፖሌዳ” ያጌዳ። 11 ሄዋ ድራዉ፥ ኢዩ እዝራኤላን አቴዳ አካባ ዘረꬃ፥ አ ዎልቃማ አሳቱዋ፥ አ ላገꬃቱዋነ አ ቄሳቱ ዋ ኡባ፥ አዉ አያነ አሸናን ዎꬍ ዉርሴዳ። ሆሰ 1:4

12 ሄዋፐ ጉይያን፥ ኢዩ ደንዲደ፥ ሳማርያ ቤዳ። ሄንꬃንቻቱ ሞꬃ ግያ ሳኣ ጋኪደ፥ 13 ይሁዳ ካትያ አካዝያሳ ዳቦቱዋና ጋከቴዳ። ኢ፥ “ህንተንቱ ኦኔ?” ያጊደ ኦቼዳ።

ኡንቱንቱ፥ “ኑን አካዝያሳ ዳቦቱዋ፤ ኑን ካትያ ዛራቱዋነ ካታት ኤልዛቤል ናናነ ሳሮታናዉ ቤቶ” ያጌድኖ።

14 ኢዩ ባረ አሳቱዋ፥ “ኡንቱንቱ ፓጻ ኦይቂተ” ያጊደ አዛዜዳ። ኡንቱንታ ፓጻ ኦይቂደ፥ ሄንꬃንቻቱ ሞꬃን ደእያ ሃꬃ ኦላ ማታን ኡንቱንታ ኦይታማነ ላአቱዋካ ዎꬌድኖ፤ እ ኡንቱንቱፐ እቱዋነ አሽቤና።

15 ኢዩ ሄ ሳኣፐ ደንድ ዪደ፥ ረካባ ናኣ ዮናዳባና ጋከቴዳ። አ ሳሮꬂደ፥ “ታ ቆፋይነ ነ ቆፋይ እቱዋ። ያትና ታ ባጋ ግዳኒ?” ያጌዳ።

ዮናዳብ፥ “ኤ ግዳና” ያጊደ ዛሬዳ።

እ “አነ ታ ኩሽያ ኦይቃ” ያጌዳ። አ ኩሽያ ኦይቄዳዋ ፑደ ጋርያ ቦላ ከሲደ፥ 16 “ታናና ደንዳ። ታን መꬍና ጎዳዉ ምሸትያዋ በአ” ያጌዳ። አ ባረ ጋርያን ኡትሴዳ። 17 ኢዩ ሳማርያ ዬዳ ዎደ፥ አካባ ዛርያፐ አቴዳ ኡባ ዎꬌዳ፤ መꬍና ጎዳይ ኤላሳዉ ኦዴዳ ቃላዳን ኡንቱንታ ꬋይሴዳ።

18 ሄዋፐ ጉይያን፥ ኢዩ አሳ ኡባ እትፐ ሺሺደ፥ “አካብ ባኣላዉ ጉꬃ ኬሻ ጎይኔዳ፤ ሽን ታን አፐ ዳሮ ጎይናና። 19 ሀእ ስም ባኣላ ሱንꬃን ትምቢትያ ኦድያ ኡባቱዋ፥ አዉ ጎይንያዋንታ ኡባቱዋነ አ ቄሳቱ ዋ ኡባቱዋ ታዉ ጼሲደ ሺሽተ። ኡንቱንቱፐ እት አሳይነ ፓጨናዳን ጼልተ። አያዉ ጎፐ፥ ታን ባኣላዉ ዳሮ ያርሹዋ ያርሻናዉ ሀናይ። ሄ ሳኣ ዬናን አግያ አሳይ ፓጻ ደኤና” ያጌዳ። ሽን ኢዩ ባኣላዉ ጎይንያዋንታ ጭሚደ ꬋይሳናዉ ሄዋ ኦꬄዳ።

20 ኢዩ፥ “ባኣላዉ ጎይናና ጋላሳ አዋይተ” ያጌዳ። ኡንቱንቱ አዋዬድኖ። 21 ሄዋፐ ጉይያን፥ ኢዩ እስራኤልያ ቢታ ኡባ ኪትና፥ ባኣላዉ ጎይንያዋንቱፐ እት አሳይነ አተናን ኡባቱ ዬድኖ፤ ኡባይካ ባኣላ ኤቃ ጎልያ ሀ ጋጻፐ ያ ጋጻ ጋካናዉ፥ ቅልጽ ጊደ ኩሜድኖ።

22 ኢዩ ጎይንያዋንቱ ማዮ አዎትያ እት ብታንያ፥ “ባኣላዉ ጎይንያዋንቱ ኡባዉ ማዩዋ አሃ” ያጌዳ። ብታኒ ኡንቱንቶ ማዩዋ አሄዳ።

23 ሄዋፐ ጉይያን፥ ኢዩነ ረካባ ናአይ ዮናዳብነ ባኣላ ኤቃ ጎልያ ገሌድኖ። ኢዩ ባኣላዉ ጎይንያዋንታ፥ “ባኣላዉ ጎይንያዋንቱፐ አትና፥ መꬍና ጎዳ ቆማቱዋፐ እት አሳይነ ህንተንቱ ግዶን ደኦፐ ጼልተ” ያጌዳ። 24 ሄዋፐ ጉይያን፥ ኡንቱንቱ ጹግያ ያርሾቱዋነ ሀራ ያርሾቱዋነ ያርሻናዉ ግዶ ገሌድኖ።

ኢዩ ባኣላ ኤቃ ጎልያፐ ካረና ሆስፑን ታሙ አሳቱዋ ጊግስ ዎꬄዳ። ያቲደ፥ “ህንተፐ እት ኡራይ ታን ህንተንቱ ኩሽያን ዎꬅያ አሳቱዋፐ እቱዋ የዶፐ፥ አ ሸምፑ ሄ ኡራ ሸምፖ ግዴ” ያጌዳ።

25 ኢዩ ጹግያ ያርሹዋ ያርሽያዋ ፖሎሳና፥ ናግያዋንታነ ካፓቱዋነ፥ “ግዶ ገሊደ፥ ኡንቱንታ ዎꬍተ። ኡንቱንቱፐ እት አሳይነ ከስ አኮፖ” ያጊደ አዛዜዳ። ኡንቱንታ ማሻን ሱፑ ኦꬅ ዉርሴድኖ። ያቲደ ናግያዋንቱነ ካፓቱነ ኡንቱንቱ አሃ ካረ ኦሌድኖ። ሄዋፐ ጉይያን፥ ባኣላ ኤቃ ጎልያ ቆልኦ ገሌድኖ። 26 ባኣላ ኤቃ ጎልያፐ ኤቃ ቱሳቱዋ ከሲደ ጹጌድኖ። 27 ቃይካ ባኣላዉ ጎይንያ ኤቃ ሹቻ ክንቼሬꬄድኖ፤ ባኣላ ኤቃ ጎልያካ ኮሌድኖ። ያቲደ ሄ ሳኣ ሼሻ ጎልያ ከሴድኖ፤ ሀቼ ጋካናስካ ሄ ሳአይ ሼሻ ጎልያ ግዲደ አቴዳ።

28 ሄዋዳን ኦꬂደ፥ ኢዩ ባኣላ እስራኤልያፐ ꬋይሴዳ። 29 ግዶፐነ ናባጻ ናአይ እዮርባም እስራኤልያ አሳ ኦስሴዳ ናጋራ ኦꬅያዋ እ አግቤና። ቤቴለንነ ዳናን እዮርባም ኤሴዳ ዎርቃ ማራቱዋ ምስለቶ እ ባረ ሁጲያዉ ጎይኔዳ። 1 ካታ. 12:28-30

30 ሄዋፐ ስምና፥ መꬍና ጎዳይ እያ፥ “ኔን ታ ስንꬃን ልከ ግዴዳዋ ኦꬃደ ፖሌዳ ግሻዉነ ታ ቆፋን ደእያዋ ኡባ ኔን አካባ ዛራቱዋ ቦላ ኦꬄዳ ድራዉ፥ ነ ዛራቱ ኦይደንꬆ የለታ ጋካናዉ፥ እስራኤልያ ካዉተꬃ አራታን ኡታናዋንታ” ያጌዳ። 31 ሄዋ ጊድ ኡትናካ፥ ኢዩ መꬍና ጎዳ እስራኤልያ ጾሳ ህግያ ባረ ኩመንꬃ ዎዛናፐ ምንሲደ ናግቤና፤ ቃይ እዮርባም እስራኤልያ ናና ኦስሴዳ ናጋራ ኦꬅያዋ አግቤና።

32 ሄ ዎድያን መꬍና ጎዳይ እስራኤልያ ቢታ ጹንꬃናዉ ዶሜዳ። ሶርያ ካቲ አዛኤል እስራኤልያ ጋድያፐ ዳሮ ሳኣ ጾኔዳ። 33 ዮርዳኖሳ ሻፋፐ አዋይ ዶልያ ባጋና ደእያ ጋላኣደነ ባሳነ ቢታ ኡባ ኦይቄዳ። ሄ ቢታቱ አርኖና ሻፋ ማታን ደእያ አሮኤራ ካታማፐ ዶሚደ፥ ሮቤላ ጋድያ፥ ጋደ ጋድያነ ምናሰ ጋድያ ጋኪኖ።

34 ኢዩ ሀኔዳ ሀራባይ፥ እ ኦꬄዳባይ ኡባይነ አ ምኖተꬃ ኡባይ እስራኤልያ ካተቱ ታርክያ ማጻፋን ጻፈት ኡቴዳ። 35 ሄዋፐ ጉይያን፥ ኢዩ ሀይቂደ፥ ባረ ማይዛን ጋከቴዳ፤ እ ሳማርያን ሞገቴዳ። አ ሳኣን አ ናአይ ዮአካዝ ካተቴዳ። 36 ኢዩ ሳማርያ ካታማን እስራኤልያ ጋድያ ቦላ ላታማነ ሆስፑን ላይꬃ ካተቴዳ።