1 አካዝያሳ አታ አታላ ባረ ናአይ ሀይቄዳዋ በኤዳ ዎደ፥ ደንዳደ ካትያ ዛርያ ኡባ ꬋይሳዱ። 2 ሽን ካትያ ዮራማ ናታ፥ አካዝያሳ ምቻታ ይሆሸባአ፥ ሀይቃናዉ ደእያ ካትያ ናናቱዋ ግዶፐ አካዝያሳ ናኣ ዮኣሻ ዉኣደ አካዱ። አነ አ ꬋንꬅያኖነ ሂጻ ጎለን ቆሳደ፥ አታላ ዎናዳን አሻዱ። 3 አታላ ጋድያ ሞድያ ዎደ ኡባን፥ ናአይ ይሆሸባእ ማታን መꬍና ጎዳ ጌሻ ጎልያን ኡሱፑን ላይꬃ ቆሰቲደ ደኤዳ።

4 ላፑንꬃ ላይꬃን ዮዳሄ ካትያ ናግያዋንቱነ ካትያ ጎልያ ናግያዋንቱ ካፓቶ ኪቲደ፥ ባረኮ መꬍና ጎዳ ጌሻ ጎልያ አህሴዳ። ኡንቱንቱና ቃላ ጫቁዋ ጫቀቲደ፥ ኡንቱንቱ መꬍና ጎዳ ጌሻ ጎልያን ጫቂሴዳ። ሄዋፐ ጉይያን፥ ኡንቱንቱ ካትያ ናኣ ዮኣሻ በሴዳ። 5 እ ኡንቱንታ፥ “ህንተንቱ ኦꬃናባይ ሀዋ። ሳምባታን ናጎ ገልያ ካላይ ጋኬዳ ህንተንቱ ሄዙ ጭታፐ እት ጭታይ ካትያ ጎልያ ናጎ፤ 6 እት ጭታይ ሱር ግያ ፐንግያ ናጎ፤ ቃይ እት ጭታይ ናግያዋንቱፐ ጉየ ባጋና ደእያ ፐንግያ ናጎ። 7 ቃይካ ሳምባታን ናጉዋፐ ሃ ከስያ የንኮ ላኡ ጩጎቱዋ ኩመንꬃቱ ካትያዉ ጌሻ ጎልያ ናግኖ። 8 ኦላ ሚሻ ኦይቂደ፥ ካትያ ግዶዪደ፥ ካቲ ከስያ ዎደነ ገልያ ዎደ ኡባን አናና እትፐ ደእኖ። ህንተኮ ሺቅያ ኦናካ ዎꬍተ” ያጌዳ።

9 ሄ ካፓቱ ቄሲ ዮዳሄ አዛዜዳዋ ኡባ ኦꬄድኖ። ኡንቱንቱ ኡባይካ ሳምባታ ጋላሳን ናጉዋ ካላይ ጋኬዳዋንታካ ናጉዋ ካላን ፖሌዳዋንታካ አኪደ፥ ቄስያ ዮዳሄኮ ዬድኖ። 10 ቄሲ መꬍና ጎዳ ጌሻ ጎልያን ደእያ፥ በን ካትያ ዳዊታ ጎንዳለቱዋነ ቶራቱዋነ ኡባ ካፓቶ እሜዳ። 11 ናግያዋንቱ እቱ እቱ ኦላ ሚሻቱዋ ባረንቱ ኩሽያን ኦይቂደ፥ ጌሻ ጎልያፐ ሀድርሳ ባጋፐ ዶሚደ፥ ኡሸቻ ባጋ ጋካናዉ፥ ያርሽያ ሳኣ ማታንነ ጌሻ ጎልያ ማታን ካትያ ዩሹዋን ኤቄድኖ። 12 ሄዋፐ ጉይያን፥ ዮዳሄ ካትያ ናኣ ካረ ከሲደ፥ አ ሁጲያን ካላቻ ዎꬄዳ። ካዉተꬃ ካለꬅያ ህግያ ማጻፋፐ ዱቂደ እቱዋ አዉ እሚደ፥ ኦኪደ ካተዬዳ። ካዉነ አሳይ ኩሽያ ባቂደ፥ ባረ ቃላ ꬎቁ ኦꬂደ፥ “ካቲ ሸምፑ ጋምኦ!” ያጌዳ።

13 ካታታ አታላ ናግያዋንቱ ጫቡዋነ አሳ ጫቡዋነ ስሴዳ ዎደ፥ አሳኮ መꬍና ጎዳ ጌሻ ጎልያ ባዱ። 14 ካቲ ካሰ ካተቱ ሀንያዋዳን ቱሳ ማታን ኤቄዳዋ በኣዱ። ካፓቱነ ጹሩምባ ፑንያዋንቱ ካትያ ማታን ደኢኖ፤ ሄ ቢታ አሳይ ኡባይ ናሸቲደ፥ ጹሩምባ ፑኔ። አታላ ባረ ማዩዋ ፔꬋደ፥ “ሀዌ ማካላ! ሀዌ ማካላ!” ያጋደ ዋሳዱ። 2 ካታ. 23:3

15 ቄሲ ዮዳሄ ኦላንቻቱ ካፓቱዋ፥ “አታሎ መꬍና ጎዳ ጌሻ ጎልያን ዎꬎፕተ! እዞ ያናነ ሃናነ ሳልፒደ ሳልፐቱዋ ግዱዋን ዎꬂደ፥ ካረ ከስተ። እዞ አሻናዉ ካጄልያ አሳይ ደኦፐ ዎꬍተ!” ያጌዳ። 16 ሄዋ ድራዉ፥ ኡንቱንቱ እዞ ኦይቂደ፥ ካትያ ጎልያ አፌድኖ፤ ፓራ ፐንግያን እዞ ዎꬌድኖ።

17 ሄዋፐ ጉይያን፥ አሳይ መꬍና ጎዳ አሳ ግዳና ማላ፥ ዮዳሄ ካቲነ አሳይ መꬍና ጎዳና ቃላ ጫቁዋ ገላና ማላ ኦꬄዳ። ቃይ ካትያፐነ አሳፐነ ግዱዋንካ ቃላ ጫቁዋ ገልሴዳ። 18 ሄ ዎደ ይሁዳ አሳይ ኡባይ ባኣላ ኤቃ ጎልያ ቢደ፥ ሄ ጎልያ ክንቼዳ፤ ያርሽያ ሳአቱዋነ አ ምስለቱዋ ክንቼሬꬄዳ። ቃይ ማታና ግያ ባኣላ ቄስያ ያርሽያ ሳአቱ ስንꬃን ዎꬌድኖ።

ሄዋፐ ስምና፥ ቄስያ ዮዳሄ መꬍና ጎዳ ጌሻ ጎልያን ናግያዋንታ ዎꬄዳ። 19 ባረናና ጋዳዋቱዋ፥ ካትያ ናግያዋንታ፥ ካትያ ጎልያ ናግያዋንታነ ይሁዳ አሳ ኡባ አክና፥ ኡንቱንቱ ካትያ መꬍና ጎዳ ጌሻ ጎልያፐ ዱገ አሂደ፥ ናግያዋንቱ ፐንግያ ግያ ፐንግያ ባጋና ካትያ ጎለ እትፐ ገሌድኖ። ካቲ ባረ ካዉተꬃ አራታን ኡቴዳ። 20 ያትና ይሁዳ አሳይ ኡባይ ናሸቴዳ። አታላ ካትያ ጎለን ማሻን ሀይቄዳዋፐ ጉይያን፥ ካታማይካ ዎፑ ጌዳ።

21 ዮኣሽ ካተትያ ዎደ ላፑን ላይꬃ ናኣ።