1 ኢዩ እስራኤልያ ቢታን ካተቴዳ ላፑንꬃ ላይꬃን፥ እዮኣስ ይሁዳን ካተቴዳ፤ እ የሩሳላመን ኦይታሙ ላይꬃ ካተቴዳ። አ አት ሱንꬃይ ጺብያ፤ አ በርሳበሀ ካታማፐ ዬዳ አሳ። 2 ቄሲ ዮዳሄ አ ታማርሴዳነ ዞሬዳ ድራዉ፥ እ ደኤዳ ላይꬃ ኡባን እዮኣስ መꬍና ጎዳ ስንꬃን ሱረባ ኦꬄዳ። 3 ግዶፐነ አሳይ ጎይንያ ꬎቃ ሳኣ ꬋይስቤና፤ አሳይካ ሄ ግሹዋን ያርሹዋ ያርሽያዋነ እጻና ጩዋይያዋ አግቤና።

4 እዮኣስ ቄሳቱ ዋ ጼሲደ፥ “መꬍና ጎዳ ጌሻ ጎልያ ይያ ጌሻ ሚሻ ኡባ ሺሽተ። ሄዌካ ሁጲያ ፓይዱዋ ዎደ እመትያ ሚሻነ አሳይ ባረ ሸንያን ጌሻ ጎልያዉ አህያ ሚሻ። ከሳ 30:11-16 5 ያቶፐ ቄሳቱ ኡባይ ሄ ሚሻ አህያ እት እት አሳቱዋፐ ባረንቶ አኪደ፥ ጌሻ ጎልያ ግዶን ኮለቴዳ ሳኣ ኡባ ኦራꬅኖ” ያጌዳ።

6 ሽን ካቲ እዮኣስ ካተቴዳ ላታማነ ሄዘንꬆ ላይꬅ ጋካናዉ፥ ቄሳቱ መꬍና ጎዳ ጌሻ ጎልያ ኦራꬅበይክኖ። 7 ሄዋ ድራዉ፥ ካትያ እዮኣስ ቄስያ ዮዳሀነ ሀራ ቄሳቱ ዋነ ጼሲደ፥ “ጌሻ ጎልያ ግዶን ኮለቴዳ ሳኣ አያዉ ኦራꬅክቴ? ሚሻ ጌሻ ጎልያ ኦራꬃናዉ እምተፐ አትና፥ ህንተንቶ እመትያ ሻሉዋ ኦይቆፕተ” ያጌዳ።

8 ቄሳቱ፥ “አሳፐ ሀራ ሚሻ አኮኮ፤ ጌሻ ጎልያ ግዶን ኮለቴዳ ሳአቱዋካ ኦራꬆኮ” ያጊደ ጊጌድኖ።

9 ሄዋፐ ጉይያን፥ ቄስያ ዮዳሄ ሳጽነ እቱዋ አኪደ፥ አ ቁምእያን ጾእያ ሉኬዳ፤ ያርሽያ ሳኣ ማታን መꬍና ጎዳ ጌሻ ጎልያ ገልያሳን ኡሸቻ ባጋና ዎꬄዳ። ገልያ ሳኣ ናግያ ቄሳቱ መꬍና ጎዳ ጌሻ ጎልያ ዬዳ ሚሻ ኡባ ሳጽንያ ግዶን የጊኖ። 10 ሳጽንያ ግዶን ዳሮ ሚሻይ ዳጋቴዳዋ ኡንቱንቱ በኤዳ ዎደ ኡባን፥ ካትያ ጻፊነ ቄሳቱዋ ኡባቱዋ ካፑ ዪኖ፤ መꬍና ጎዳ ጌሻ ጎልያ ዬዳ ሚሻ ፓይዲደ፥ ቃርጪታቱዋን ቆሊኖ።

11 ፓይደቴዳ ሚሻ ልክያ ኤሬዳዋፐ ጉይያን፥ ጌሻ ጎልያ ኦሱዋ ዎቻናዉ ሱንቴዳ አሳቶ እሚኖ። ኡንቱንቱ ሚሻ አኪደ፥ መꬍና ጎዳ ጌሻ ጎልያን አናጸቶነ ግምቢያዋንቶ እሚኖ። 12 ቃይ ሹቻ ማስያዋንቶነ ሹቻ ቆእያዋንቶ ቃንጺኖ። ቃይካ መꬍና ጎዳ ጌሻ ጎልያ ኦራꬃናዉ ሳንቃነ ሹቻነ ኮሽያ ሀራባቱዋ ሻሚኖ። 13 ሽን ጌሻ ጎልያ ዬዳ ሚሻፐ መꬍና ጎዳ ጌሻ ጎልያዉ ብራ ቡርጩቆቱዋ፥ ኦይቂያዋ፥ ከረቱዋነ ጹሩምባቱዋ ዎይ ዎርቃፐነ ብራፐነ መትያ ሀራ ጌሻ ሚሻቱዋ ኦꬃናዉ ከስበይክኖ። 14 ሄ ሚሻ ኡባይ ጌሻ ጎልያ ኦራꬅያ አሳዉ ጭገቲኖ። 15 ጌሻ ጎልያ ኦሱዋ ዎቻናዉ ሱንቴዳ አሳቱዋ ኦንነ፥ “ሚሻን አያ አያ ኦꬄድቴ?” ጊደ ኦችቤና፤ አያዉ ጎፐ፥ አሳቱ አማንꬅያዋንታ።2 ካታ. 22:7 16 ባይዙዋ ድራዉነ ናጋራ ድራዉ ያርሽያ ያርሾ ጭገትያ ሚሻይ ቄሳቶ ገሌፐ አትና፥ መꬍና ጎዳ ጌሻ ጎልያ ኦራꬅያ ሚሻ ሳጽንያን ገለና። ዎጋ 7:7

17 ሄ ዎደ ሶርያ ካቲ አዛኤል ቢደ፥ ጋተ ካታማ ኦለቲደ ኦይቄዳ። ያቲደ የሩሳላመ ኦላናዉ ስሜዳ። 18 ሽን ይሁዳ ካቲ እዮኣስ አፐ ካሰ ካተቴዳ ይሁዳ ካተቱ ዮሳፌጸ፥ ዮራምነ አካዝያስ መꬍና ጎዳዉ ዱማይ ዎꬄዳ ሚሻቱዋ፥ ቃይ እ ባረ ሁጲያዉ እሜዳ እሞታነ መꬍና ጎዳ ጌሻ ጎልያነ ካትያ ጎልያ ሚሻ ምንጅያሳን ደእያ ዎርቃ ኡባ አኬዳ። ሶርያ ካትያዉ አዛኤላዉ የዴዳ፤ አዛኤል የሩሳላመ ኦላናዋ አግ ባሼዳ።

19 ካቲ እዮኣስ ሀኔዳ ሀራባይነ እ ኦꬄዳባይ ኡባይ ይሁዳ ካተቱ ታርክያ ማጻፋን ጻፈት ኡቴዳ። 20 ሄዋፐ ጉይያን፥ አ ኦሳንቻቱ አ ቦላ ማቀቲደ፥ ሲላ ግያ ሳኣ አፍያ ኦግያን ሚሎ ግያ ሳን ደእያ ጎለን ዎꬌድኖ። 21 አ ኦሳንቻቱ ሽምኣታ ናኣ ዮዛካራነ ሾሜራ ናኣ ይሆዛባዳ። እዮኣስ ዳዊታ ካታማን ባረ ማይዛ አዎቱዋ ዱፉዋን ሞገቴዳ፤ አ ሳኣን አ ናአይ አመስያስ ካተቴዳ።