1 አካዝያሳ ናአይ፥ ይሁዳ ካቲ እዮኣስ ካተቴዳ ላታማነ ሄዘንꬆ ላይꬃን፥ ኢዩ ናአይ እዮአካዝ ሳማርያ ካታማን እስራኤልያ ቦላ ካተቴዳ፤ እ ታማነ ላፑን ላይꬃ ካተቴዳ። 2 ናባጻ ናአይ እዮርባም እስራኤልያ አሳ ኦስሴዳ ናጋራ ካሊደ፥ እዮአካዝ መꬍና ጎዳ ስንꬃን ኢታባ ኦꬄዳ፤ እ ሄ ናጋራ ኦꬅያዋ አግቤና። 3 ሄዋ ድራዉ፥ መꬍና ጎዳ ሀንቁ እስራኤልያ ቦላ ፐንቴዳ፤ መꬍና ጎዳይ ኡንቱንቱ ዳሮ ዎድያዉ ሶርያ ካትያ ሀዛኤላዉነ አ ናኣ በንሀዳዳዉ ዛር ዛሪደ አꬅ እሜዳ።

4 ሄዋፐ ጉይያን፥ እዮአካዝ መꬍና ጎዳ ዎሴዳ። መꬍና ጎዳይ አዉ ስሴዳ፤ አያዉ ጎፐ፥ ሶርያ ካቲ እስራኤልያ አያ ማላ ኢታ ኡቁና ኡቁኔደንቶ መꬍና ጎዳይ በኤዳ። 5 መꬍና ጎዳይ እስራኤልያ አሳ አሽያዋ እሜዳ፤ ኡንቱንቱ ሶርያ አሳቱዋ ኩሽያፐ ከስ አኬድኖ። ያቲደ እስራኤልያ አሳይ ካሰዋዳንካ ባረ ሶን ሳሩዋን ደኤዳ። 6 ግዶፐካ እስራኤልያ አሳይ እዮርባማ ሶይ አሳይ ኦስሴዳ ናጋራፐ ስምቤና፤ ኡንቱንቱ ሄ ናጋራ ኦꬅያዋ አግበይክኖ። ቃይ አሼሮ ግያ ጾሳቱ ምስሊ ሳማርያን ኤቆ ሳኣን አቴዳ። 7 እዮአካዛዉ እሻታሙ ፓራ አሳቱዋፐ ታሙ ጋረቱዋፐነ፥ ታሙ ሻአ ገድያ ኦላንቻቱዋፐ አትና፥ ሀራ ኦላንቻይ አትቤና። አያዉ ጎፐ፥ ሶርያ ካቲ ኡንቱንታ ꬋይሴዳ፤ እ ኡንቱንታ ኡዱማን ደእያ ሱላዳን ኦꬄዳ።

8 እዮአካዝ ሀኔዳ ሀራባይ፥ እ ኦꬄዳባይ ኡባይነ አ ምኖተꬃ እስራኤልያ ካተቱዋ ታርክያ ማጻፋን ጻፈት ኡቴዳ። 9 እዮአካዝ ሀይቂደ፥ ባረ ማይዛን ጋከቴዳ፤ አ ሳኣን አ ናአይ እዮኣስ ካተቴዳ።

10 ይሁዳ ካቲ እዮኣስ ካተቴዳ ሀታማነ ላፑንꬃ ላይꬃን፥ እዮሳካዛ ናአይ እዮኣስ ሳማርያን እስራኤልያ ቦላ ካተቴዳ፤ እ ታማነ ኡሱፑን ላይꬃ ካተቴዳ። 11 እዮኣስ መꬍና ጎዳ ስንꬃን ኢታባ ኦꬄዳ። ናባጻ ናአይ እዮርባም እስራኤልያ አሳ ኦስሴዳ ናጋራፐ እቱዋነ አሸናን ኦꬄዳ፤ እ ሄ ናጋራ ኦꬅያዋ አግቤና።

12 እዮኣስ ሀኔዳ ሀራባይ፥ እ ኦꬄዳባይ ኡባይነ ይሁዳ ካትያ አመስያሳና ኦለቴዳ ምኖተꬃ እስራኤልያ ካተቱዋ ታርክያ ማጻፋን ጻፈት ኡቴዳ። 13 እዮኣስ ሀይቂደ፥ ባረ ማይዛን ጋከቴዳ፤ ሳማርያን እስራኤልያ ካተቱዋና ሞገቴዳ። አ ሳኣን አ ናአይ እዮርባም ካተቴዳ።

14 ኤልሳእ ባረና ዎꬍያ ሀርግያ ሀርግያ ዎደ፥ እስራኤልያ ካቲ እዮኣስ አ በአናዉ ቢደ፥ “ታ አዎ፤ ታ አዎ! ኔን እስራኤልያ አሳዉ ዎልቃነ ጎንዳለ!” ያጊደ ዬኬዳ። 2 ካታ. 2:12

15 ኤልሳእ፥ “ዎንዳፍያነ ፖꬃቱዋ አካ ያ” ያጌዳ፤ አስ አሄዳ።

16 ሄዋፐ ጉይያን፥ ኤልሳእ እስራኤልያ ካትያ፥ “ዎንዳፍያ ጊግሳ ኦይቃ” ያጌዳ፤ ዎንዳፍያን እ ጊግስ ኦይቂ ደእሽን፥ ኤልሳእ ባረ ኩሽያ ካትያ ኩሽያ ቦላ ዎꬄዳ።

17 “አዋይ ዶልያ ባጋ ማስኮትያ ዶያ” ያግና ዶዬዳ። ኤልሳእ፥ “ፖꬃ ዎንዳፍያን ዱካ” ያጌዳ፤ እካ ዱኬዳ። ኤልሳእ፥ “ሀዌ መꬍና ጎዳ ፖꬃ! ሀዌ ሶርያ አሳቱዋ ጾንያ ፖꬃ! ኔን ሶርያ አሳቱዋ አፌቃ ካታማን ጾናና ጋካናዉ ኦላና” ያጌዳ።

18 ሄዋፐ ጉይያን ኤልሳእ ካትያ፥ “ፖꬃቱዋ አካ” ያግና አኬዳ። ኤልሳእ፥ “ኡንቱንቱን ቢታ ጫዳ” ያጌዳ። ሄዙ ገደ ቢታ ጫዲደ አግ ባሼዳ። 19 ያትና ጾሳ አሳይ ካትያ ሀንቀቲደ፥ “እቼሹ ገደ ዎይ ኡሱፑን ገደ ቢታ ጫዴዳዋ ግድንቶ፥ ኔን ሶርያ አሳቱዋ ጾናደ ኡባ ባይዛናዋ ሽን! ኔን ሀእ ኡንቱንታ ሄዙ ገደ ጻላላ ጾናና” ያጌዳ።

20 ኤልሳእ ሀይቂና አሃዉ ጊጌዳ ጎንጎሉዋን ዎꬌዳ።

ሞኣበ ጋድያፐ ኦላንቻቱ እስራኤልያ ቢታ ቦላ ላይꬃን ላይꬃን ዶዲኖ። 21 እት ጋላስ አማሬዳ እስራኤልያ አሳቱ እት ብታንያ አሃ ሞጊደ፥ ሞኣበ ቢታ ጭታ በኤድኖ። ብታንያ አሃ ኤልሳአ ሞጉዋ ጎንጎሉዋ ግዶ ኦሊደ ባቃቴድኖ። ያትና አሃይ ኤልሳአ መቀꬃ ቦላ ዎꬌዳ፤ ሄ ማንእያን ፓጽነ ደንድ ኤቄዳ።

22 እዮአካዝ ካተቴዳ ላይꬃን ኡባን ሶርያ ካቲ አዛኤል እስራኤልያ ኡቁኔዳ። 23 ሽን መꬍና ጎዳይ አብራሃመና፥ ይሳቃናነ ያቆባና ጫቀቴዳ ቃላ ጫቁዋ ድራዉ፥ ኡንቱንቶ ኬኬዳ፥ ቃረቴዳነ ቆፔዳ። ሀቼ ጋካናዉካ እ ኡንቱንታ ꬋይስቤና ዎይ ባረ ስንꬃፐ ድግቤና።

24 ሶርያ ካቲ አዛኤል ሀይቂና፥ አ ሳኣን አ ናአይ በንሀዳድ ካተቴዳ። 25 ሄዋፐ ጉይያን፥ አዛኤል አ አዉዋ እዮአካዘፐ ኦላን ኦይቄዳ ካታማቱዋ ዮአካዛ ናአይ ዮኣስ አዛኤላ ናኣ በንሀዳዳፐ ዎꬅ አኬዳ። እዮኣስ አ ሄዙ ገደ ጾኒደ፥ እስራኤልያ ካታማቱዋ ዛሬዳ።