14
ይሁዳ ካትያ አመስያሳ
(2 ኦዱዋ 25:1-24)
1 እዮአካዛ ናአይ፥ እስራኤልያ ካቲ እዮኣስ ካተቴዳ ላኤንꬆ ላይꬃን፥ ይሁዳ ካትያ ዮኣሻ ናአይ አመስያስ ካተቴዳ። 2 እ ካተትያ ዎደ ላይꬃይ አዉ ላታማነ እቼሻ፤ እ የሩሳላመን ላታማነ ኡዱፑን ላይꬃ ካተቴዳ። አ አት ሱንꬃይ ይሆኣድኖ፤ እዛ የሩሳላመ አሳ። 3 አመስያስ መꬍና ጎዳይ ስንꬃን ሱረባ ኦꬄዳ፤ ሽን አ ማይዛ አዉ ዳዊተ ኦꬄዳዋዳን ኦꬅቤና። ኡባባካ እ ባረ አዉዋ እዮኣሳ ቁሌዳ። 4 አሳይ ጎይንያ ꬎቃ ሳኣ ꬋይስቤና፤ አሳይካ ሄ ግሹዋን ያርሹዋ ያርሽያዋነ እጻና ጩዋይያዋ አግቤና።
5 አመስያስ ካዉተꬃ ባረ ኩሽያን ሎይꬅ ኦይቄዳ ሳናካ፥ ካሰ ካትያ ባረ አዉዋ ዮኣሻ ዎꬌዳ ኦሳንቻቱዋ ዎꬌዳ። 6 ሙሴ ህግያ ማጻፋን ጻፈቴዳዋዳን፥ መꬍና ጎዳይ፥ “ናናቱ ኦꬄዳ ናጋራ ድራዉ፥ አዎቱዋ ዎꬋናዉ በሰና፤ ቃይ አዎቱ ኦꬄዳ ናጋራ ድራዉካ፥ ናና ዎꬋናዉ በሰና። አሳይ ኡባይ ባረ ኦꬄዳ ናጋራን ናጋራን ሀይቃናዉ በሰ ያጊደ አዛዜዳዋዳንካ፥ ዎꬌዳዋንቱ ናና ዎꬍቤና።”ዛረ. 24:16
7 አመስያስ ማጽነ ዛንጋራ ግያ ሳኣን ታሙ ሻአ ኤዶማ ቢታ አሳ ዎꬊደ ሰላአ ግያ ካታማካ ኦላን ኦይቄዳ። ዮቅትኤላ ያጊደ ሱንꬄዳ፤ ሀቼ ጋካናዉ ሀ ሱንꬃን ጼሰቴ።
8 ሄዋፐ ጉይያን፥ አመስያስ ኢዩ ናኣ ናኣ፥ እዮአካዛ ናኣ፥ እስራኤልያ ካትያ እዮኣሳዉ አሳ ኪቲደ፥ “ሃያ፤ አነ ላኡ ኦላ ጋከቴቶ” ያጊደ ናሴዳ።
9 ሽን እስራኤልያ ካቲ ዮኣሽ ይሁዳ ካትያ አመስያሳ ሀዋዳን ያጌዳ፤ “ሊባኖሳን ደእያ ክንድቹ ሊባኖሳን ደእያ ዝጋዉ ኪቲደ፥ ‘ነ ናቶ ታ ናአዉ እማ’ ያጌዳ። ሽን ሊባኖሳን ደእያ እት ዶአይ ሄዋና አꬊደ፥ ሄ ካሽያ የꬌዳ። 10 ኤ፥ ኔን ቱሙካ ኤዶማ ቢታ አሳ ጾናዳ፤ ሄዋን ሀእ ኦቶረታሳ። ኔን ነ ጾኑዋን ናሸታደ፥ ነ ሶን ዎፑ ጋደ ኡታ አጋ። ነ ቦላነ ነ ቢታ ይሁዳ ቦላ መቱዋነ ባሻነ አህያዋ አያዉ ደንꬃይ?” ያጊደ ዛሬዳ።
11 ሽን አመስያስ ስሳ እጼዳ። ሄዋ ድራዉ፥ እስራኤልያ ካቲ ዮኣሽ ኦላናዉ ከስና፥ እነ ይሁዳ ካቲ አመስያስነ ይሁዳን ደእያ ቤት-ሸመሻ ግያ ካታማን ኦላ ጋከቴድኖ። 12 እስራኤልያ አሳይ ይሁዳ አሳ ጾኔዳ፤ ይሁዳ አሳይ ኡባይ ባቃቲደ፥ ባረ ሶ ባረ ሶ ቤዳ። 13 እስራኤልያ ካቲ እዮኣስ አካዝያሳ ናኣ ናኣ፥ እዮኣሳ ናኣ፥ ይሁዳ ካትያ አመስያሳ ቤት-ሸመሻ ካታማን ኦሞዴዳ። ሄዋፐ ጉይያን፥ ዮኣሽ የሩሳላመ ቢደ፥ የሩሳላመ ድርሳ ግምቢያ፥ ኤፍሬማ ፐንግያፐ ቢደ፥ ዞዝያ ፐንግያ ጋካናዉ ደእያ ኦይዱ ጼቱ ዋꬋ ግዴዳ፥ ሳኣ ላሌዳ። 14 መꬍና ጎዳ ጌሻ ጎልያንነ ካትያ ጎልያ ሚሻ ምንጅያሳን ደእያ ዎርቃ፥ ብራነ ሻሉዋ ኡባ አኬዳ፤ ቃይ ዋብያዉ ኦይቀቴዳ አሳቱዋካ አኪደ፥ ሳማርያ ስሜዳ።
15 እዮኣስ ሀኔዳ ሀራባይ፥ እ ኦꬄዳባይ፥ አ ምኖተꬃይነ ይሁዳ ካትያ አመስያሳና እ ኦለቴዳባይ እስራኤልያ ካተቱዋ ታርክያ ማጻፋን ጻፈት ኡቴዳ። 16 እዮኣስ ሀይቂደ፥ ባረ ማይዛን ጋከቴዳ፤ እ ሳማርያ ካታማን እስራኤልያ ካተቱዋና ሞገቴዳ። አ ሳኣን አ ናአይ እዮርባም ካተቴዳ።
ይሁዳ ካትያ አመስያሳ ሀይቁዋ
(2 ኦዱዋ 25:25-28)
17 እዮአካዛ ናአይ፥ እስራኤልያ ካቲ እዮኣስ ሀይቄዳዋፐ ጉይያን፥ እዮኣሳ ናአይ፥ ይሁዳ ካቲ አመስያስ ታማነ እቼሹ ላይꬃ ደኤዳ። 18 አመስያስ ሀኔዳ ሀራባይ ይሁዳ ካተቱዋ ታርክያ ማጻፋን ጻፈት ኡቴዳ።
19 አመስያሳ ዎꬋናዉ አሳይ የሩሳላመን ማቀቴዳ፤ ያትና እ ላክሻ ግያ ካታማ ባቃቴዳ። ሽን ኡንቱንቱ አ ጌዱዋ ላክሻ ካታማ አሳ ኪትና፥ አ ያን ዎꬌድኖ። 20 አ አሃ ፓራን ጫን አሂደ፥ ዳዊታ ካታማን የሩሳላመን አ ማይዛ አዎቱዋና ሞጌድኖ። 21 ሄዋፐ ጉይያን፥ ይሁዳ አሳይ ኡባይ ታማነ ኡሱፑን ላይꬃ ናኣ ኦዝያና አ አዉዋ አመስያሳ ሳኣን ካተዬዳ። 22 አ አዉ አመስያስ ሀይቄዳዋፐ ጉይያን፥ እ ኦዝያነ ኤላታ ግያ ካታማ ዛረꬅ ኬጺደ፥ ይሁዳን ኦራꬄዳ።
እስራኤልያ ካትያ ላኤንꬆ እዮርባማ
23 ዮኣሻ ናአይ፥ ይሁዳ ካቲ አመስያስ ካተቴዳ ታማነ እቼሻንꬆ ላይꬃን፥ እስራኤልያ ካትያ ዮኣሻ ናአይ እዮርባም ሳማርያን ካተቴዳ፤ እ ኦይታማነ እት ላይꬃ ካተቴዳ። 24 እዮርባም መꬍና ጎዳ ስንꬃን ኢታባ ኦꬄዳ፤ ናባጻ ናአይ እዮርባም እስራኤልያ አሳ ኦስሴዳ ናጋራ ኡባ ኦꬅያዋ አግቤና። 25 ጋተ-ሄፌርያ አሚታያ ናኣ ትምቢትያ ኦድያ ባረ ቆማ ዮናሳ ባጋና መꬍና ጎዳይ እስራኤልያ ጾሳይ ባረ ቃላን ሃሳዬዳዋዳን፥ ሀማታ ፕኑዋ ግያ ሳፐ ዶሚደ፥ ማጽንያ አባ ጋካናዉ ደእያ እስራኤልያ ዛዋ ዮኣሻ ናአይ እዮርባም ጾኒደ ዛሬዳ። ዮናሳ 1:1 26 አያዉ ጎፐ፥ እስራኤላን ደእያ አሳይ ኡባይ አይልያ ግድና፥ ዎማኑዋ ግድና፥ አያ ኬሻ ቱጋ ቱጋቴደንቶ፥ መꬍና ጎዳይ በኤዳ፤ ኡንቱንታ ማድያባይ ኦንነ ባዋ። 27 መꬍና ጎዳይ እስራኤልያ አሳ ሱንꬃ ሳሉዋፐ ጋርሳን ꬋይሳና ያግቤና። ሄዋ ድራዉ፥ መꬍና ጎዳይ ኡንቱንታ እዮኣሳ ናኣ እዮርባማ ባጋና አሼዳ።
28 እዮርባም ሀኔዳ ሀራባይ፥ እ ኦꬄዳባይ ኡባይ፥ እ ኦለቴዳዌነ ይሁዳ ባጋ ግዴዳ ዳማስቆ ካታማነ ሀማታ ካታማ እስራኤልያዉ ዛሬዳባይ እስራኤልያ ካተቱ ታርክያ ማጻፋን ጻፈት ኡቴዳ። 29 እዮርባም ሀይቂደ፥ ባረ ማይዛ አዎቱዋን እስራኤልያ ካተቱዋን ጋከቴዳ፤ አ ሳኣን አ ናአይ ዛካራስ ካተቴዳ።