15
ይሁዳ ካትያ ኦዝያና
(2 ኦዱዋ 26:1-23)
1 እስራኤልያ ካቲ እዮርባም ካተቴዳ ላታማነ ላፑንꬃ ላይꬃን፥ ይሁዳ ካትያ አመስያሳ ናአይ ኦዝያን ካተቴዳ። *ኦዝያነ፦ እብራዌꬁዋን ካቲ ኦዝያነ ሀ ሸምፑዋን አዛርያ ጌተቴ። 2 እ ካተቴዳ ዎደ፥ ላይꬃይ አዉ ታማነ ኡሱፑና፤ እ የሩሳላመን እሻታማነ ላኡ ላይꬃ ካተቴዳ። አ አት ሱንꬃይ ይኮሎ፤ እዛ የሩሳላመ አሳ። 3 አ አዉ አመስያስ ኦꬄዳዋዳን፥ እካ መꬍና ጎዳ ስንꬃን ሱረባ ኦꬄዳ። 4 ግዶፐነ አሳይ ጎይንያ ꬎቃ ሳኣ ꬋይስቤና፤ ሄ ድራዉ ያርሹዋ ያርሽያዋነ እጻና ጩዋይያዋ አግቤና። 5 መꬍና ጎዳይ ኦዝያና ዎልቃማ ኦሉዋ ሀርግያን ኦይꬄዳ፤ ሀይቃና ጋካናስካ ሄ ሀርጊ አ የድቤና ድራዉ፥ ዱማ ጎለን ባረካ ደኤዳ። ሄ ዎደ ካትያ ናአይ እዮኣታመ ካትያ ጎለን ደኢደ፥ ሄ ቢታ አሳ ሞዴዳ።
6 ኦዝያነ ሀኔዳ ሀራባይነ እ ኦꬄዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ። 7 ኦዝያነ ሀይቂደ፥ ባረ ማይዛን ጋከቴዳ፤ ዳዊታ ካታማን ባረ ማይዛ አዎቱዋና ሞገቴዳ። አ ኮታን አ ናአይ ዮኣታመ ካተቴዳ። ኢሳ. 6:1
እስራኤልያ ካትያ ዛካራሳ
8 ይሁዳ ካቲ ኦዝያነ ካተቴዳ ሀታማነ ሆስፑንꬃ ላይꬃን፥ እዮርባማ ናአይ ዛካራስ እስራኤልያ አሳ ቦላ ሳማርያ ካታማን ካተቴዳ፤ እ ኡሱፑን አግና ካተቴዳ። 9 አ ማይዛ አዎቱ ኦꬄዳዋዳን፥ እካ መꬍና ጎዳ ስንꬃን ኢታባ ኦꬄዳ፤ ናባጻ ናአይ እዮርባም እስራኤልያ አሳ ኦስሴዳ ናጋራ ኦꬅያዋ አግቤና። 10 ሄዋፐ ጉይያን፥ ያቤሻ ናአይ ሻሉም ዛካራሳ ቦላ ማቀት ደንዲደ፥ ይብላኣማ ግያ ሳን ዎꬊደ አ ኮታን ባረዉ ካተቴዳ።
11 ዛካራስ ሀኔዳ ሀራባይነ እ ኦꬄዳባይ ኡባይ እስራኤልያ ካተቱዋ ታርክያ ማጻፋን ጻፈት ኡቴዳ።
12 ሀዋዳን ሀኒደ፥ መꬍና ጎዳይ ኢዩዉ፥ “ነ ዛሪ ኦይደንꬆ የለታ ጋካናዉ፥ እስራኤልያ ካዉተꬃ አራታን ኡታናዋ” ያጊደ ኦዴዳ ቃላይ ፖለቴዳ። 2 ካታ. 10:30
እስራኤልያ ካትያ ሻሉማ
13 ይሁዳ ካቲ ኦዝያነ ካተቴዳ ሀታማነ ኡዱፑንꬃ ላይꬃን፥ ያቤሻ ናአይ ሻሉም ካተቴዳ፤ እ ሳማርያን እት አግና ካተቴዳ። 14 ሄዋፐ ጉይያን፥ ጋደ ናአይ ምናሄም ትርጻ ግያ ካታማፐ ሳማርያ ቤዳ። ሳማርያን ደእያ ያቤሻ ናኣ ሻሉማ ዎꬊደ አ ኮታን ባረዉ ካተቴዳ።
15 ሻሉም ሀኔዳ ሀራባይነ እ ማቀቴዳ ማቁ እስራኤልያ ካተቱዋ ታርክያ ማጻፋን ጻፈት ኡቴዳ። 16 ሄ ዎደ ምናሄም ትርጻ ካታማፐ ደንዲደ፥ ትፍሳሀ ግያ ካታማ፥ ካታማን ደእያ አሳነ ካታማ ሄራን ደእያ ቢታቱዋ ኡባ ኦሌዳ። ኡንቱንቱ ባረንቱ ካታማ ድርሳ ፐንግያ አዉ ዶየናን እጼዳ ድራዉ፥ ትፍሳሀ ካታማ ኦለቲደ ባይዜዳ፤ ቃይ ሄ ካታማን ደእያ ሻሃራ ማጫ አሳ ኡሉዋ ኡባ ጳልቂ የጌዳ።
እስራኤልያ ካትያ ምናሄማ
17 ይሁዳ ካቲ ኦዝያነ ካተቴዳ ሀታማነ ኡዱፑንꬃ ላይꬃን፥ ጋደ ናአይ ምናሄም እስራኤልያ ቦላ ካተቴዳ፤ እ ሳማርያን ታሙ ላይꬃ ካተቴዳ። 18 እ መꬍና ጎዳ ስንꬃን ኢታባ ኦꬄዳ፤ ናባጻ ናአይ እዮርባም እስራኤልያ አሳ ኦስሴዳ ናጋራ ኦꬅያዋ አግቤና።
19 ሄዋፐ ጉይያን፥ አሶረ ጋድያ ካቲ ትግላት-ፓለሴር እስራኤልያ ቢታን ዶዴዳ። ምናሄመ ካዉተꬃን ባረና ምንሳና ማላነ ማዳና ማላ፥ ትግላት-ፓለሴራዉ ሀታማነ ኦይዱ ሻአ ኪሎ ግራመ ጻጋራ ብራ እሜዳ። 20 ምናሄም ሄ ሚሻ እስራኤልያ አሳ ዎልቃን ጭግሴዳ፤ አሶረ ቢታ ካትያዉ እማናዉ ዱረ አሳ ኡባይ እቱ እቱ እሻታሙ ጻጋራ ብራ ፔꬌድኖ። ሄዋዳን ኦꬅና፥ አሶረ ካቲ እስራኤልያ ቢታ አጊደ፥ ባረ ጋድያ ስሜዳ።
21 ምናሄም ሀኔዳ ሀራባይነ እ ኦꬄዳባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ። 22 ምናሄም ሀይቂደ፥ ባረ ማይዛን ጋከቴዳ፤ አ ኮታን አ ናአይ ፓቃህ ካተቴዳ።
እስራኤልያ ካትያ ፓቃሀ
23 ይሁዳ ካቲ ኦዝያነ ካተቴዳ እሻታማንꬃ ላይꬃን፥ ምናሄማ ናአይ ፓቃህ እስራኤልያ ቦላ ሳማርያን ካተቴዳ፤ እ ላኡ ላይꬃ ካተቴዳ። 24 ፓቃህ መꬍና ጎዳ ስንꬃን ኢታባ ኦꬄዳ፤ ናባጻ ናአይ እዮርባም እስራኤልያ አሳ ኦስሴዳ ናጋራ ኦꬅያዋ አግቤና። 25 አ ኦላ ጋዳዋቱዋፐ እቱ፥ ራማልያ ናአይ ፓቁሀ ግያዌ አ ቦላ ማቀቲደ ደንዴዳ። ጋላኣደ አሳፐ እሻታሙ አቱማ አሳ ባረናና አክ ቢደ፥ ሳማርያ ካታማን ካትያ ጎለን ደእያ ጌሱዋ ገሌዳ። ፓቁህ ፓቃሀ አርጎባራካ ሃርያናካ እትፐ ዎꬊደ አ ኮታን ባረዉ ካተቴዳ።
26 ፓቃህ ሀኔዳ ሀራባይነ እ ኦꬄዳባይ ኡባይ እስራኤልያ ካተቱዋ ታርክያ ማጻፋን ጻፈት ኡቴዳ።
እስራኤልያ ካትያ ፓቁሀ
27 ይሁዳ ካቲ ኦዝያነ ካተቴዳ እሻታማነ ላኤንꬆ ላይꬃን፥ ራማልያ ናአይ ፓቁህ እስራኤልያ ቦላ ሳማርያን ካተቴዳ፤ እ ላታሙ ላይꬃ ካተቴዳ። 28 ፓቁህ መꬍና ጎዳ ስንꬃን ኢታባ ኦꬄዳ፤ ናባጻ ናአይ እዮርባም እስራኤልያ አሳ ኦስሴዳ ናጋራ ኦꬅያዋ አግቤና።
29 እስራኤልያ ካትያ ፓቁሀ ዎድያን አሶረ ካቲ ትግላት-ፓለሴር ዪደ አይኖ፥ አቤል-ቤትማእካ፥ ያኖሀ፥ ቀዴሻነ ሀጾራ ጌተትያ ካታማቱዋ ኦለቲደ ኦይቄዳ፤ ቃይካ ጋላኣደ፥ ጋሊላነ ንፍታሌማ ቢታቱዋ ኡባ ኦለቲደ፥ አሳ አሶረ ጋድያ ኦሞዲደ አፌዳ።
30 ኦዝያና ናአይ ዮኣታመ ካተቴዳ ላታማንꬃ ላይꬃን፥ ኤልያ ናአይ ሆሼእ ራማልያ ናኣ ፓቁሀ ቦላ ማቀት ዎꬊደ አ ሳኣን ባረዉ ካተቴዳ።
31 ፓቁህ ሀኔዳ ሀራባይነ እ ኦꬄዳባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ።
ይሁዳ ካትያ እዮኣታማ
(2 ኦዱዋ 27:1-9)
32 ራማልያ ናአይ፥ እስራኤልያ ካቲ ፓቁህ ካተቴዳ ላኤንꬆ ላይꬃን፥ ይሁዳ ካትያ ኦዝያና ናአይ እዮኣታመ ካተቴዳ። 33 እዮኣታመ ካተትያ ዎደ አዉ ላይꬃይ ላታማነ እቼሻ፤ እ የሩሳላመን ታማነ ኡሱፑን ላይꬃ ካተቴዳ። አ አት ሱንꬃይ ያሩሾ፤ ያሩሻ ጻዶቃ ናቶ። 34 ባረ አዉ ኦዝያነ ኦꬄዳዋዳን፥ እዮኣታምካ መꬍና ጎዳ ስንꬃን ሱረባ ኦꬄዳ። 35 ግዶፐነ አሳይ ጎይንያ ꬎቃ ሳኣ ꬋይስቤና፤ ሄ ድራዉ ያርሹዋ ያርሽያዋነ እጻና ጩዋይያዋ አግቤና። እዮኣታመ መꬍና ጎዳ ጌሻ ጎልያ ገልያ ቆሞ ባጋ ፐንግያ ዛረꬂደ ኦꬄዳ።
36 እዮኣታመ ሀኔዳ ሀራባይነ እ ኦꬄዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ። 37 ሄ ዎድያን መꬍና ጎዳይ ሶርያ ካትያ ራጺናነ ራማልያ ናኣ፥ እስራኤልያ ካትያ ፓቁሀ ይሁዳ ቢታ ኦልሳናዉ ዶሜዳ። 38 እዮኣታመ ሀይቂደ፥ ባረ ማይዛን ጋከቴዳ፤ ባረ ማይዛ አዉዋ ዳዊታ ካታማን ባረ ማይዛ አዎቱዋና ሞገቴዳ። አ ሳኣን አ ናአይ አካዝ ካተቴዳ።