1 ራማልያ ናአይ ፓቁህ ካተቴዳ ታማነ ላፑንꬃ ላይꬃን፥ እዮኣታማ ናአይ አካዝ ይሁዳን ካተቴዳ። 2 እ ካተትያ ዎደ ላይꬃይ አዉ ላታማ፤ የሩሳላመን እ ታማነ ኡሱፑን ላይꬃ ካተቴዳ። አ ማይዛ አዉ ዳዊተ ሱረባ ኦꬄዳዋዳን፥ መꬍና ጎዳ ባረ ጾሳ ስንꬃን እ ሱረባ ኦꬅቤና። 3 እ ካሰ ደኤዳ እስራኤልያ ካተቱዋ ኦግያን ሀመቴዳ። ቃይ መꬍና ጎዳይ እስራኤልያ አሳ ስንꬃፐ ላጊደ ከሴዳ አሳቱ ደኡዋ ዎጋ፥ ሄ ሸነይያዋ ቁሊደ፥ ባረ የሌዳ ናኣ አዳ ታማን ጹጊደ፥ ኤቃዉ ያርሼዳ። ዛረ. 12:31 4 አካዝ አሳይ ጎይንያ ꬎቃ ድራዉነ፥ ደረቱዋ ሁጲያንነ ዳሻ ምꬃ ኡባ ጋርሳን ያርሹዋ ያርሼዳነ እጻና ጩዋዬዳ።

5 ሄዋፐ ጉይያን፥ ሶርያ ካቲ ራጺንነ ራማልያ ናአይ፥ እስራኤልያ ካቲ ፓቁህ የሩሳላመ ኦላናዉ ዪደ ዶዴድኖ፤ ሽን አካዛ ጾናናዉ ዳንዳይበይክኖ። 6 ሄ ዎደ ሶርያ ካቲ ራጺን ኤላታ ግያ ካታማ ዛሪደ አኪደ፥ ይሁዳ አሳ ላጊደ ከሴዳ። ያትና ኤዶማ አሳቱ ኤላታ ካታማ ዪደ፥ ሀቼ ጋካናዉ ያን ደኢኖ።

7 ሄዋ ድራዉ፥ አካዝ አሶረ ካትያ ትግላት-ፓለሴራዉ ኪታ የዲደ፥ “ታን ነ ናኣነ ነ ቆማ። ሀያና ሃያ፤ ታና ኦልያ ሶርያ ካትያ ኩሽያፐነ እስራኤልያ ካትያ ኩሽያፐ ታና አሻ” ያጌዳ። 8 ቃይ አካዝ መꬍና ጎዳ ጌሻ ጎልያንነ ካትያ ጎልያ ሚሻ ምንጅያሳን ደእያ ብራነ ዎርቃ አኪደ፥ አሶረ ካትያዉ እሞ ኦꬂደ የዴዳ። 9 አካዝ ጌዳዋ አሶረ ካቲ ማዪደ፥ ዳማስቆ ካታማ ኦለቲደ ኦይቄዳ። አሳ ኦሞዲደ፥ ቂራ ግያ ሳኣ አፌዳ፤ ካትያ ራጺናካ ዎꬌዳ።

10 ሄዋፐ ጉይያን፥ ካቲ አካዝ አሶረ ካትያ ትግላት-ፓለሴራና ጋከታናዉ ዳማስቆ ቤዳ። ዳማስቆን ደእያ ያርሽያ ሳኣ በኢደ አ ማላትያ ያርሽያ ሳኣ ኬጻና ማላ፥ ሄ ያርሽያ ሳኣ ምስልያነ ኬጽያ ሀኖታ ቄስያ ኦርዮናዉ ኪቴዳ። 11 ሄዋ ድራዉ፥ ካቲ አካዝ ዳማስቆፐ ስሚደ ያናዉ፥ ቄስያ ኦርዮን ሄ ሌምሱዋ ማላትያ ያርሽያ ሳኣ ጊግሴዳ።

12 ካቲ ዳማስቆፐ ስሜዳ ዎደ፥ ያርሽያ ሳአይ ኦሰቲደ ፖለቴዳዋ በእ ያርሽያ ሳኮ ሺቂደ፥ 13 ባረ ጹግያ ያርሹዋነ ባረ ካꬃ ያርሹዋ ያርሼዳ። ቃይ ባረ ኡሻ ያርሹዋ ጉሴዳ፤ ባረ እትፐተꬃ ያርሹዋ ሱꬃካ ያርሽያ ሳኣ ቦላ ጫጫፌዳ። 14 ናሃስያ ግያ ብራታፐ ኦꬂደ፥ መꬍና ጎዳዉ ዱማይ ዎꬄዳ ያርሽያ ሳአይ ኦራꬃ ያርሽያ ሳፐነ ጌሻ ጎልያፐ ግዱዋን ደኤ። ያትና አካዝ ሄ ኤጫ ያርሽያ ሳኣ ደንꬂደ፥ ባረ ኦስሴዳ ኦራꬃ ያርሽያ ሳፐ ሁጲሳ ባጋና ዎꬄዳ።ከሳ 27:1-2፤ 2 ኦዱዋ 4:1

15 ሄዋፐ ጉይያን፥ ካቲ አካዝ ቄስያ ኦርዮና ሀዋዳን ያጊደ አዛዜዳ፤ “ሀ ዎጋ ኦራꬃ ያርሽያ ሳኣ ዎንታ ጹግያ ያርሹዋ፥ ኦማርስ ሺሽያ ካꬃ ያርሹዋ፥ ካቲ ሺሽያ ጹግያ ያርሹዋነ ካꬃ ያርሹዋ፥ አሳይ ኡባይ ሺሽያ ጹግያ ያርሹዋ፥ ኡንቱንታ ካꬃ ያርሹዋነ ኡንቱንታ ኡሻ ያርሹዋ ያርሽያ ሳኣ ኦꬃ። የንኮ ናሃስያፐ መቴዳ ያርሽያ ሳኣ ታን ታዉ ኦችያ ሳኣ ከሳና” ያጌዳ። 16 ቄስያ ኦርዮን ካቲ አካዝ አዛዜዳዋዳን መꬌዳ።

17 ካቲ አካዝ ጌሻ ጎልያ ግዶን ጎኤትያ፥ ናሃስያ ብራታፐ መቴዳ ጋረቱዋ ሎቻ ብራታ ቃንጺደ፥ ምይያፐ ድጊደ ሜጨትያ ከረቱዋ ጋረቱዋ ቦላፐ ደንꬄዳ። ቃይ አባ ሳኒያ፥ አ ዘምፕሴዳ ናሃስያ ቦራቱዋ ምስለቱዋ ቦላፐ ደንꬂደ፥ ሹቻ ባሱዋ ቦላ ዎꬄዳ።1 ካታ. 7:23-39፤ 2 ኦዱዋ 4:2-6 18 አሶረ ካትያ ድራዉ፥ አካዝ ባረ ካዉተꬃ አራታ ካሰ ዎꬅያ ሳፐ ድጌዳ። ቃይ አፐ ካሰ ደኤዳ ካተቱዋ መꬍና ጎዳ ጌሻ ጎልያ ገልያ ፐንግያ ጎርዴዳ።

19 ካቲ አካዝ ሀኔዳ ሀራባይነ እ ኦꬄዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ። 20 አካዝ ሀይቂደ፥ ባረ ማይዛን ጋከቴዳ፤ ዳዊታ ካታማን ባረ ማይዛ አዎቱዋና ሞገቴዳ። አ ኮታን አ ናአይ ህዝቂያሰ ካተቴዳ። ኢሳ. 14:28