1 እዮስያሰ ካተትያ ዎደ፥ ላይꬃይ አዉ ሆስፑና፤ እ የሩሳላመን ሀታማነ እት ላይꬃ ካተቴዳ። አ ዳይ ሱንꬃይ ይዲዶ፤ እዛ ቦጽቃታ ግያ ካታማን ደእያ አዳያ ናቶ። ኤር. 3:6 2 እዮስያሰ መꬍና ጎዳ ስንꬃን ሱረባ ኦꬄዳ፤ ኡሸቻ ሀድርሳ ጌናን ባረ ማይዛ አዉዋ ዳዊታ ኦግያን ኡባን ሀመቴዳ።

3 ካቲ እዮስያሰ ባረ ካተቴዳ ታማነ ሆስፑንꬃ ላይꬃን፥ ማሹላማ ናኣ ናኣ፥ አጻልያ ናኣ፥ ዋና ጻፍያ ሳፋና መꬍና ጎዳ ጌሻ ጎልያ ሀዋዳን ያጊደ ኪቴዳ፤ 4 “አሳይ መꬍና ጎዳ ጌሻ ጎልያ አህና፥ ጌሻ ጎልያ ፐንግያ ናግያዋንቱ አሳፐ ሺሼዳ ሻሉዋ ፓይዳናዳን፥ ቄሳቱዋ ኡባቱዋ ካፑዋ ህልቂያኮ ባ። 5 ቄስያ ኡባቱዋ ካፑ ሚሻ መꬍና ጎዳ ጌሻ ጎልያ ኦራꬅስያ ካፓቶ እማና ማላ ኦዳ። ኡንቱንቱካ ጌሻ ጎልያ ኦራꬅያ ኦሳንቻቶ፥ 6 አናጸቶ ግምቢያዋንቶነ ሹቻ ማስያዋንቶ ጭግኖ። ቃይ ጌሻ ጎልያ ኦራꬃናዉ፥ ምꬃነ ቆኤቴዳ ሹቻ ሻምያዋንቶ ጭግኖ። 7 ሄ ኪታ ዎችያዋንቱ አማነትያ አሳ ግድያ ድራዉ፥ ኡንቱንቱ ኩሽያን ገሌዳ ሚሻን አያ አያ ኦꬄደንቶ፥ ኡንቱንታ ኦቻናዉ ኮሸና” ያጌዳ። 2 ካታ. 12:15

8 ሄዋፐ ጉይያን፥ ቄሳቱዋ ኡባቱዋ ካፑ ህልቂ ዋና ጻፍያ ሳፋና፥ “ህግያ ማጻፋ መꬍና ጎዳ ጌሻ ጎልያን ደማድ” ያጌዳ። ማጻፋ ሳፋናዉ እሜዳ፤ ሳፋን አኪደ ናባቤዳ።

9 ዋና ጻፊ ሳፋን ካትያኮ ስም ቢደ፥ “መꬍና ጎዳ ጌሻ ጎልያን ደእያ ሻሉዋ ነ ኦሳንቻቱ ዉርስ አኪደ፥ ጌሻ ጎልያ ኦራꬅስያ ካፓቶ እሜድኖ” ያጊደ ኦዴዳ። 10 ቃይካ ዋና ጻፊ ሳፋን ካትያ፥ “ቄሲ ህልቂ ታዉ ማጻፋ እሜዳ” ያጊደ ካትያ ስንꬃን ሄ ማጻፋ ናባቤዳ።

11 ካቲ ህግያ ማጻፋን ደእያ ቃላ ስሴዳ ዎደ፥ ካዮቲደ ባረ ማዩዋ ፔꬌዳ። 12 ሄዋፐ ጉይያን፥ ካቲ ቄስያ ህልቂያ፥ ሳፋና ናኣ አህቃማ፥ ምካያ ናኣ አክቦራ፥ ዋና ጻፍያ ሳፋናነ ካትያ ኦሳንቻ አሳያ ሀዋዳን ያጊደ አዛዜዳ፤ 13 “ቢተ፤ ታ ድራዉ፥ ሀ አሳ ድራውነ ይሁዳ ኡባ ድራዉ፥ ሀ በቴዳ ማጻፋ ቃላዋ አነ መꬍና ጎዳ ኦችተ። አያዉ ጎፐ፥ ኑዉ ጻፈቴዳ ኡባባ ኦꬃናዉ፥ ኑ ማይዛ አዎቱ ሀ ማጻፋ ቃላዉ አዛዘትቤና ድራዉ፥ ኑ ቦላ ሱሌዳ መꬍና ጎዳ ሀንቁ ሎይꬅ ዳራ” ያጌዳ።

14 ቄሲ ህልቂ፥ አህቃም፥ አክቦር፥ ሳፋንነ አሳይ ትምቢትያ ኦድያ ሁልዶ ግያ ምሽራቶ ኦቻናዉ ቤድኖ። ሁልዳ ሀርሃሳ ናኣ ቲቅዋ ናኣ፥ ጌሻ ጎልያ ማዩዋ ናግያ ሻሉማ ምሽራቶ። አ የሩሳላመን ላኤንꬆ ሹቻን ደአዉ። ሄ ቤዳ አሳቱ እዝና ሃሳዬድኖ።

15 ሁልዳ ኡንቱንታ፥ “መꬍና ጎዳይ እስራኤልያ ጾሳይ፥ ‘ህንተና ታኮ ኪቴዳ ብታንያዉ ኦድተ ያጌ።’ 16 መꬍና ጎዳይ ሀዋዳን ያጌ፤ ‘በእተ፥ ይሁዳ ካቲ ናባቤዳ ማጻፋን ጻፈቴዳ ኢታ ቃላ ኡባ ታን ሀ ሳኣ ቦላነ ሀ ሳኣን ደእያ አሳ ቦላ አሀና ሀናይ። 17 ኡንቱንቱ ታና አጊደ፥ ሀራ ጾሳቶ እጻና ጩዋዬድኖ፤ ያቲደ ኡንቱንቱ ባረንቱ ኩሽያን ኦꬄዳዋን ኡባን ታና ሀንቀꬄድኖ። ሄዋ ድራዉ፥ ታ ሀንቁ ሀ ሳኣ ቦላ ኤጽ ከሴዳ፤ ቶአናዉ ዳንዳየና’ ያጌ።

18 “መꬍና ጎዳ ኦቻናዉ ህንተንታ ኪቴዳ ካትያ ሀዋዳን ያግተ፤ ‘መꬍና ጎዳይ እስራኤልያ ጾሳይ ኔን ስሴዳ ቃላ ሀዋዳን ያጌ፤’ 19 ታን ሀ ሳኣ ቦላነ ሀ ሳኣን ደእያ አሳ ቦላ፥ ‘ታን ህንተንታ ꬋይሳናነ ባይዛ ከሳና’ ጋደ ሃሳዬዳዋ ኔን ስሴዳ ዎደ፥ ነ ዎዛናይ ሹግና፥ መꬍና ጎዳ ስንꬃን ነ ሁጲያ ካዉሼዳ ድራዉነ ነ ማዩዋ ፔꬋደ፥ ታ ስንꬃን ዬኬዳ ድራዉ፥ ታን ነ ዎሳ ስሳድ ያጌ መꬍና ጎዳይ። 20 ሄዋ ድራዉ፥ ታን ኔና ሳሩዋን ነ ማይዛን ጋꬃና፤ ኔን ሳሮ ሞገታና። ታን ሀ ሳኣ ቦላነ ሀ ሳኣን ደእያ አሳ ቦላ አሀና ኢታባ ነ አይፊ በኤና ያጌ ያግተ” ያጋዱ። ሄዋፐ ጉየ ኡንቱንቱ ቢደ፥ ሀ ሃሳየቴዳባ ካትያዉ ኦዴድኖ።