21
ይሁዳ ካትያ ምናሳ
(2 ኦዱዋ 33:1-20)
1 ምናሰ ካተትያ ዎደ ላይꬃይ አዉ ታማነ ላኣ፤ እ የሩሳላመን እሻታማነ እቼሹ ላይꬃ ካተቴዳ። አ አት ሱንꬃይ ሄፍጺቦ።
2 መꬍና ጎዳይ እስራኤልያ አሳ ስንꬃፐ ላጊደ ከሴዳ አሳቱዋ ደኡዋ ዎጋ፥ ሄ ሸነይያዋ ቁሊደ፥ ምናሰ መꬍና ጎዳ ስንꬃን ኢታባ ኦꬄዳ።ኤር. 15:4 3 አ አዉ ህዝቂያሰ ላሌዳ፥ ጎይንያ ꬎቃ ሳኣ እ ዛረꬂደ ኬጼዳ፤ እስራኤልያ ካቲ አካብ ኦꬄዳዋዳን፥ ባኣላ ግያ ጾሳዉ ያርሽያ ሳአቱዋነ አሼሮ ግያ ጾሳት ምስለቱዋ መꬌዳ። ቃይ ሳሉዋ ጾልንተቶ ኡባዉካ ጎይኔዳነ ኡንቱንቶ ኦꬄዳ። 4 መꬍና ጎዳይ ካሰ፥ “ታን ታ ሱንꬃ የሩሳላመን ጼስሳና” ያግ ዎꬄዳ መꬍና ጎዳ ጌሻ ጎልያን ሀራ ጾሳቶ ያርሽያ ሳኣ ጊግሴዳ። 2 ሳሜላ 7:13 5 መꬍና ጎዳ ጌሻ ጎልያን ደእያ ላኡ ዳባባቱዋን ሳሉዋ ጾልንተቶ ኡባዉ ያርሽያ ሳኣ ጊግሴዳ። 6 ባረ የሌዳ ናኣ ታማን ጹጊደ ያርሼዳ። እ ባረ ሁጲያዉካ ብትያዋነ ሙሩንያዋ ግዲደ፥ ሻሬቾቱዋነ ሞይትልያ ሃሳይስያዋንታ ዞርያ ኦቼዳ። መꬍና ጎዳ ስንꬃን ዳሮ ኢታባ ኦꬂደ፥ አ ሀንቀꬄዳ።
7 አሼሮ ግያ ጾሳት ምስልያ፥ ማሰት ከሴዳዋ አሂደ፥ መꬍና ጎዳ ጌሻ ጎልያ ግዶን ኤሴዳ። ሄ ጌሻ ጎሊ፥ መꬍና ጎዳይ ዳዊታነ አ ናኣ ሶሎሞና፥ “እስራኤልያ ዛርያ ኡባ ግዶፐ ታን ዶሬዳ ሀ ጌሻ ጎልያንነ የሩሳላመን ታን ታ ሱንꬃ መꬍናዉ ጼስሳና። 1 ካታ. 9:3-5፤ 2 ኦዱዋ 7:12-18 8 እስራኤልያ አሳ ታን አዛዜዳ አዛዙዋ ኡባነ ታ ቆማይ ሙሴ ኡንቱንቶ እሜዳ ህግያ ኡባ ናጊደ ኦꬆፐ፥ ታን ኡንቱንቱ ማይዛ አዋቶ እሜዳ ጋድያፐ ኡንቱንታ ደንꬃደ ቶይላይከ” ያጌዳ። 9 ሽን አሳይ ስሰናን እጼዳ። መꬍና ጎዳ እስራኤልያ አሳ ስንꬃፐ ꬋይሴዳ ጋደ አሳዋፐካ አꬍያ ኢታ ኦꬃና ማላ፥ ምናሰ ኡንቱንታ ባለꬄዳ።
10 መꬍና ጎዳይ ትምቢትያ ኦድያ ባረ ቆማቱዋ ባጋና ሀዋዳን ያጌዳ፤ 11 “ይሁዳ ካቲ ምናሰ ሀ ቱና ኪታ ኦꬄዳ፤ ባረፐ ካሰ ደኤዳ አሞረ አሳ ኡባ ናጋራፐካ አꬍያ ኢታ ኦꬄዳ፤ ይሁዳ አሳ ባረ መꬌዳ ኤቃ ምስልያዉ ጎይንሲደ፥ ናጋራ ኦስሴዳ። እ ሄዋ ኦꬄዳ ድራዉ፥ 12 ታን መꬍና ጎዳይ እስራኤልያ ጾሳይ ሀዋዳን ያጋይ፤ ‘ስስያ አሳ ኡባ ሀይꬃዉ ኢትያ ባሻ ታን የሩሳላመ ቦላነ ይሁዳ ቦላ አሀና ሀናይ። 13 ታን ሳማርያ ቦላ ጎቼዳ ዎዶሩዋ፥ የሩሳላመ ቦላ ጎቻና፤ አካባ ሶይ አሳ ቦላ የዴዳ ቱምቢያካ፥ የሩሳላመ ቦላ የዳና። እት አሳይ ከርያ ቁጭ ጉፋንꬂደ መልስያዋዳን፥ ታን የሩሳላመ ቁጫደ ጉፋንꬃና። 14 ታ ላታቱዋፐ አቴዳዉንታ ታን ኦላና፤ ታን ኡንቱንታ ኡንቱንቱ ሞርከቱዋ ኩሽያን አꬃደ እማና። ኡንቱንቱ ሞርከቱ ኡባይ ኡንቱንታ ኦይቃናነ ቦንቃና። 15 ኡንቱንቱ ማይዛ አዎቱ ግብጼፐ ከሶደፐ ዶም፥ ሀቼ ጋካናዉ፥ ኡንቱንቱ ታ ስንꬃን ኢታባ ኦꬄዳ ድራዉነ ታና ሀንቀꬄዳ ድራዉ፥ ታን ሀዋዳን ኦꬃና’ ያጋይ” ያጌዳ።
16 ምናሰ ይሁዳ አሳ መꬍና ጎዳ ስንꬃን ናጋራ ኦስሴዳዋ ቦላካ ጉጂደ፥ ጽሎ አሳ ዎꬌዳ፤ የሩሳላመን ሀ ጋጻፐ ያ ጋጻ ጋካናዉ፥ ሱꬃ ኩንꬄዳ።
17 ምናሰ ሀኔዳ ሀራባይ፥ እ ኦꬄዳባይ ኡባይነ እ ኦꬄዳ ናጋራባይ ይሁዳ ካተቱ ታርክያ ማጻፋን ጻፈት ኡቴዳ። 18 ምናሰ ሀይቂደ፥ ባረ ማይዛን ጋከቴዳ፤ ያቲደ ባረ ጎልያ ማታን ደእያ ኡዛ አታክልትያ ሳኣ ግያ ሳኣን ሞገቴዳ። አ ኮታን አ ናአይ አሞነ ካተቴዳ።
ይሁዳ ካትያ አሞና
(2 ኦዱዋ 33:21-25)
19 አሞነ ካተትያ ዎደ፥ ላይꬃይ አዉ ላታማነ ላኣ፤ እ የሩሳላመን ላኡ ላይꬃ ካተቴዳ። አ ዳይ ሱንꬃይ ማሹለሜቶ፤ እዛ ያጽባ ካታማን ደእያ ሀሩጻ ናቶ። 20 አ አዉ ምናሰ ኦꬄዳዋዳን፥ አሞንካ መꬍና ጎዳ ስንꬃን ኢታባ ኦꬄዳ። 21 እ ባረ አዉ ሀመቴዳ ኦግያን ኡባን ሀመቴዳ፤ ባረ አዉ ኦꬄዳ ኤቃቶ እካ ኦꬄዳነ ኡንቱንቶ ጎይኔዳ። 22 መꬍና ጎዳ፥ ባረ ማይዛ አዎቱዋ መꬍና ጎዳ አግ ባሼዳ፤ መꬍና ጎዳ ኦግያንካ እ ሀመትቤና።
23 አሞና ኦሳንቻቱ አ ቦላ ማቀቲደ፥ አ ካትያ ጎለን አ ዎꬌድኖ። 24 ሄዋፐ ጉይያን፥ ይሁዳ አሳቱ ካትያ አሞና ቦላ ማቀቴዳ ኡባቱዋ ዎꬌድኖ። አሞና ኮታን አ ናኣ ዮስያሳ ካተዬድኖ።
25 አሞነ ሀኔዳ ሀራባይነ እ ኦꬄዳባይ ኡባይ ይሁዳ ካተቱ ታርክያ ማጻፋን ጻፈት ኡቴዳ። 26 አሞነ ኡዛ አታክልትያ ሳኣ ግያ ሳኣን ደእያ ባረ ዱፉዋን ሞገቴዳ፤ አ ኮታን አ ናአይ ኢዮስያሰ ካተቴዳ።