20
ካቲ ህዝቂያሰ ሀርጊደ ፓጼዳ
(2 ኦዱዋ 32:24-26፤ ኢሳ. 38:1-8፣ 21-22)
1 ሄ ዎደ ካቲ ህዝቂያሰ ሀርጊደ፥ ሀያና ማቴዳ። ያን ደእሽን አሞጻ ናአይ ትምቢትያ ኦድያ እሳያሰ አኮ ቢደ፥ “መꬍና ጎዳይ ኔና፥ ‘ኔን ሀይቃሳፐ አትና ፓጻካ፤ ሄዋ ድራዉ፥ ነ ጎልያ ጊግሳ’ ያጌ” ያጌዳ።
2 ህዝቂያሰ ጎዳኮ ስም ግሲደ፥ መꬍና ጎዳ ዎሲደ፥ 3 “አቤት መꬍና ጎዳዉ፥ ታን ነ ስንꬃን ቱማተꬃንነ ኩመንꬃ ዎዛናን ሀመቴዳዋነ ቃይ ኔና ናሸችያዋ ኦꬄዳዋ ታዉ ኔን ሀሳያና ማላ፥ ታን ኔና ዎሳይ” ያጊደ ዎሴዳ። ህዝቂያሰ ሎይꬅ ሴለቲደ ዬኬዳ።
4 እሳያሰ ካትያ ስንꬃፐ ከሴዳ፤ ካትያ ጎልያ ዳባባፐ አꬊደ ብ ክቼናን ደእሽን፥ መꬍና ጎዳ ቃላይ ሀዋዳን ያጊደ፥ አኮ ዬዳ፥ 5 “ጉየ ስማደ ባደ ታ አሳ ካለꬅያ ህዝቂያሳዉ ሀዋዳን ያጋደ ኦዳ፤ ‘መꬍና ጎዳይ፥ ነ ማይዛ አዉዋ ዳዊታ ጾሳይ ሀዋዳን ያጌ፡ “ታን ነ ዎሳ ስሳድ፤ ነ አፎꬃካ በኣድ። ታን ኔና ፓꬃና፤ ሄዙ ጋላሳፐ ጉይያን፥ ኔን ፑደ መꬍና ጎዳ ጌሻ ጎልያ ባና። 6 ነ ላይꬃ ቦላ ታን ነዉ ታማነ እቼሹ ላይꬃ ጉጃና። ታን ኔናነ ሀ ካታማነ አሶረ ቢታ ካትያ ኩሽያፐ አሻና። ታን ታ ቦንቹዋ ድራዉነ ታ ቆማ ዳዊታ ድራዉ፥ ሀ ካታማዉ ኦለታደ አሻና” ያጌ’ ያጋ” ያጌዳ።
7 ሄዋፐ ጉይያን እሳያሰ፥ “ባላስያ ቴራ ዳጺደ፥ አ ጋፉዋ ቦላ ዎꬅተ። ያቶፐ እ ፓጻናዋ” ያጌዳ።
8 ህዝቂያሰ ኢስያሳ፥ “መꬍና ጎዳይ ታና ፓꬃናዎነ ታን ሄዘንꬆ ጋላስ መꬍና ጎዳ ጌሻ ጎልያ ፑደ ባናዎ ማላታይ አዬ?” ያጊደ ኦቼዳ።
9 እሳያሰ፥ “መꬍና ጎዳይ ባረ ጌዳ ቃላ ፖላናዉ ነዉ መꬍና ጎዳይ ማላታ እማና። ስም ኔን ሀዋፐ ሀቃዋ ዶራይ? ሀዌ ኩዋይ ታሙ ታንጉዋ ስንꬃዉ ባናዋ ዶራይየ፥ ታሙ ታንጉዋ ሀዋፐ ጉየ ስማናዋ ዶራይ?” ያጊደ ኦቼዳ።
10 ያትና ህዝቂያሰ አ፥ “ኩዋይ ስንꬃዉ ባናዌ መተና፤ ሄዋፐ ኩዋይ ጉየ ስማናዳን ኪተታ” ያጌዳ። 11 ሄዋፐ ጉይያን፥ ትምቢትያ ኦድያ እሳያሰ መꬍና ጎዳ ዎሴዳ፤ መꬍና ጎዳይ ካቲ አካዝ ግምቢሲደ ደꬃቱዋ ኩዋዬዳ ኩዋ ታሙ ደꬃቱዋ ሄ ሳፐ ጉየ ዛሬዳ።
ባብሎነፐ ኪተቲደ ዬዳ አሳቱዋ
(ኢሳ. 39:1-8)
12 ሄ ዎደ ባላዳና ናአይ፥ ባብሎነ ካቲ፥ ማሮዳክ ባላዳን ህዝቂያሰ ሀርጌዳዋ ስሴዳ ድራዉ፥ ዳብዳቢያነ እሞታ ህዝቂያሳዉ የዴዳ። 13 ህዝቂያሰ ኪተቲደ ዬዳ አሳቱዋ ሞኬዳ። ያቲደ ባረ ሚሻ ምንጅያ ጎለን ደእያ ብራ፥ ዎርቃ፥ ሳዉዋ፥ አልኦ ዛይትያ፥ ባረ ኦላ ሚሻነ ባረ ሚሻ ምንጅያ ጎለን ደእያዋ ኡባ ኡንቱንታ በሴዳ። ባረ ሶን ዎይ ባረ ካዉተꬃ ግዶን ደእያዋ ኡባፐ ህዝቂያሰ ኡንቱንታ በሰናን አጌዳባይ አያይነ ባዋ።
14 ሄዋፐ ጉይያን፥ ትምቢትያ ኦድያ እሳያሰ ካትያ ህዝቂያሳኮ ዪደ፥ “ሀ አሳቱ ዋጌድኖ? ኡንቱንቱ ሀቃፐ ዬድኖ?” ያጊደ ኦቼዳ።
ህዝቂያሰ፥ “ኡንቱንቱ ታኮ ሃኮ ጋድያፐ፥ ባብሎነፐ ዬድኖ” ያጌዳ።
15 እሳያሰ ቃይካ፥ “ኡንቱንቱ ነ ሶን አያ አያ በኤድኖ?” ያጌዳ።
ህዝቂያሰ፥ “ኡንቱንቱ ታ ሶን ደእያ ኡባባ በኤድኖ፤ ታ ሚሻ ምንጅያ ጎለን ደእያባፐ ታን ኡንቱንታ በሳቤናባይ አያይነ ባዋ” ያጌዳ።
16 ሄዋፐ ጉይያን፥ እሳያሰ ህዝቂያሳ፥ “መꬍና ጎዳይ ግያዋ ስሳ። 17 መꬍና ጎዳይ ሀዋዳን ያጌ፡ ‘ነ ካትያ ጎለን ደእያባይ ኡባባይነ ነ ማይዛ አዎቱ ሀቼ ጋካናዉ ሺሼዳባይ ኡባባይ ሙለ ኦሞደቲደ፥ ባብሎነ ጋድያ ባና ጋላሳቱ ያና፤ አፐ አያይነ አተና። 2 ካታ. 24:13፤ 2 ኦዱዋ 36:10 18 ቃይ ነዉ የለታናዋ፥ ነ አሾነ ሱꬃነ ግድያ ነ አቱማ ዛራቱዋፐካ ኦሞደቲደ ባና፤ ባብሎነ ካትያ ጎለን ጎይረቲደ ኦꬃና’ ያጌ” ያጌዳ። 2 ካታ. 24:14-15፤ ዳኔላ 1:1-7
19 ህዝቂያሰ ዛሪደ፥ “ኔን ኦዴዳ መꬍና ጎዳ ቃላይ ሎአ” ያጌዳ። አያዉ ጎፐ፥ ህዝቂያሰ፥ “ታን ደኤዳ ላይꬃን ሳሩነ ዎፓይ ደአናዋ ግደኔ” ያጊደ ቆፔዳ።
ህዝቂያሳ ሀይቁዋ
(2 ኦዱዋ 32:32-33)
20 ህዝቂያሰ ሀኔዳ ሀራባይ፥ አ ምኖተꬃይነ ሃꬃ ዜሪደ፥ ቢታ ግዱዋና ዋሩዋን ካታማ እ ገልሴዳባይ ይሁዳ ካተቱዋ ታርክያ ማጻፋን ጻፈት ኡቴዳ። 21 ህዝቂያሰ ሀይቂደ፥ ባረ ማይዛን ጋከቴዳ፤ አ ኮሽያን አ ናአይ ምናሰ ካተቴዳ።