1 ሳኦላ ናአይ ያቡስተ አባኔር ከብሮናን ሀይቄዳዋ ስሴዳ ዎደ፥ አ ዎዛናይ ያዬዳ፤ እስራኤልያ አሳይ ኡባይካ ዳጋሜዳ። 2 ሳኦላ ናኣ ያቡስተዉ ጩጉዋ ካለꬅያ ላኡ ካፓቱ ደኢኖ፤ እቱዋ ሱንꬃይ ባኣና፤ የንኩዋ ሱንꬃይ ረካባ፤ ኡንቱንቱ ቢንያማ ዛርያ ግዴዳ ባኤሮትያ ርሞና ናና። ባኤሮታ ካታማይ ቢንያማ ባጋዳን ፓይደቴ፤ 3 አያዉ ጎፐ፥ ባኤሮታን ደኤዳ አሳቱ ግታይማ ጋድያ ባቃቲደ፥ ሄደፐ ሀቼ ጋካናዉ በትያዳን ያን ደኤድኖ።

4 ሳኦላ ናኣ ዮናታናዉ ላኡ ገዲ ስሌዳ ናአይ ደኤ፤ ሳኦላነ ዮናታና ዎሪ እዝራኤልያፐ ጋኬዳ ዎደ፥ እ እቼሹ ላይꬃ ናኣ፤ ሄ ናኣ ድችያና አ አካደ ባቃታዱ፤ ሽን አ ባቃታናዉ ድርቢሽን፥ ናአይ ኩንዲደ ስላ ከሴዳ፤ ሄ ናኣ ሱንꬃይ ማንፍቦሼታ። 2 ሳሜላ 9:3

5 ባኤሮትያ ርሞና ናናይ ረካብነ ባኣን ያቡስተ ሶ ባናዉ ከሴድኖ፤ ኡንቱንቱ ቢደ ሴታ ጋላስ ጋኬድኖ፤ እ አዋፐ ሸምፔ። 6 ኡንቱንቱ ሶይ ገሊደ ዛርጋ አክያዋ ማላቲደ ያቡስታ ኡሉዋን ጫድና ሀይቄዳ። ረካብነ አ እሻ ባኣን ሌላን ገሌድኖ።

7 ኡንቱንቱ ሶይ ገልያ ዎደ፥ ያቡስተ ቆልኦን አርሳን ግሴዳዋ ደሚደ፥ አ ኡሉዋ ጫዲደ ዎꬌድኖ፤ አ ቆꬍያፐ ሙጬድኖ፤ ሙጬዳ ሁጲያ አኪደ፥ አራባ ጋራራ አፍያ ኦግያ ኦይቂደ፥ ቃማ ኡባ ሀመቴድኖ። 8 ያቡስተ ሁጲያ ከብሮናን ደእያ ዳዊተዉ አሂደ ካትያ፥ “ኔና ዎꬋናዉ ኮዬዳ ነ ሞርክያ ሳኦላ ናኣ ያቡስተ ሁጲያ ሀዋ በአ፤ ሳኦላ ቦላንነ አ ናኣ ቦላን ካትያ ኑ ጎዳ ሀሉዋ መꬍና ጎዳይ ሀቼ ከሴዳ” ያጌድኖ።

9 ሽን ባኤሮትያ ርሞና ናና ረካባነ አ እሻ ባኣና ዳዊተ ሀዋዳን ያጌዳ፤ “መቱዋ ኡባፐ ታና አሼዳ መꬍና ጎዳይ ኤሮ! 10 እት ብታኒ ታኮ ዪደ፥ ምሽራቹዋ ኦድያዋዳን፥ ‘ሳኦል ሀይቄዳ’ ያጊደ ታዉ ኦድና፥ ታን አ ጽቅላጋን ኦይቃደ ዎꬍሳድ፤ ታን አ ምሽራቾ እሜዳ ጋቲ ሄዋ። 2 ሳሜላ 1:1-16 11 ባረ ሶን ባረ አርሳን ግሴዳ ጽሎ ብታንያ ዎꬌዳ ኢታ አሳቶ አ ሀሉዋ ከስያዌ አይ ኬሻ ኢታንዴሻ! አ ሱꬃ ታን ህንተንቱ ኩሽያፐ ሀእ አቻና፤ ህንተንታ ታን ቢታ ቦላፐ ꬋይሳና!” ያጌዳ።

12 ረካባነ ባኣና ዎꬋናዳን ዳዊተ ባረ ኦላንቻቱዋ አዛዜዳ፤ ኦላንቻቱ ኡንቱንታ ዎꬌድኖ፤ ኡንቱንቱ ኩሽያነ ገድያ ቃንጽ ድጊደ፥ ዳልባንꬃ ሃꬃ ማታን ከብሮነ ካታማን ካቄድኖ። ያቡስተ ሁጲያ አኪደ አፊደ፥ አባኔራ ዱፉዋን ከብሮናን ሞጌድኖ።