እስራኤልያ ኡባ ቦላ ዳዊተ ካተቱሳ
5
(5:1—24:25፤ 1 ኦዱዋ 11:1-9፤ 14:1-7)
ኮይሮ ላይꬃቱዋ
(5:1—10:19)
1 እስራኤልያ ዛርያ ኡባቱ ዳዊታኮ ከብሮነ ካታማ ዪደ፥ “ኑን ነ አሾነ ነ ሱꬃ። 2 ካሰ ሳኦል ኑዉ ካትያ ግዲደ ደእያ ዎደካ፥ እስራኤልያ አሳ ኦላዉ ካለꬄዳዌ ኔና። መꬍና ጎዳይ ኔና፥ ‘ኔን ታ አሳ እስራኤልያ ሄማና፤ ኔን ኡንቱንቱ ቦላ ካተታና’ ያግ ዎꬄዳ” ያጌድኖ። 3 ሄዋ ድራዉ፥ እስራኤልያ ጭማቱ ኡባይ ዳዊታኮ ከብሮነ ካታማ ዬድኖ፤ እ ኡንቱንቱና ከብሮናን መꬍና ጎዳይ ስንꬃን ቃላ ጫቁዋ ጫቀቴዳ፤ እስራኤልያ ቦላ ካተታናዳን ዳዊታ ኡንቱንቱ ኦኬድኖ።
4 ዳዊተ ካተትያ ዎደ አዉ ሀታሙ ላይꬃ፤ ኦይታሙ ላይꬃ እ ካተቴዳ። 1 ካታ. 2:11፤ 1 ኦዱዋ 3:4፤ 29:27 5 ከብሮነ ካታማን ይሁዳ ቦላ ላፑን ላይꬃነ ኡሱፑን አግና እ ካተቴዳ፤ የሩሳላመን እስራኤልያ ኡባቱዋ ቦላነ ይሁዳ ቦላ ሀታማነ ሄዙ ላይꬃ ካተቴዳ።
ዳዊተ የሩሳላማ ጾኔዳ
6 የሩሳላመን ደእያ ያቡሳ አሳቱዋ ኦላናዉ ዳዊተነ ዳዊታ አሳይ ቤድኖ፤ ያቡሳ አሳቱ፥ “ዳዊተ ሀ ካታማ ገላናዉ ዳንዳየና” ጊደ ቆፔድኖ። ያቲደ ኡንቱንቱ አ፥ “ኔን ሀ ሳኣ ገላካ፤ ሀራይ አቶ ሽን፥ ቆቀቱዋነ ዎባቱ ኔና ተአናዉ ዳንዳዪኖ” ያጌድኖ። ኢያሳ 15:63፤ ዳና. 1:21 7 ግዶፐነ፥ ዳዊተ ጽዮነን ደእያ ኡንቱንቱ ጌሱዋ ኦይቄዳ፤ ጽዮነ ዳዊታ ካታማ ጌተቴዳ።
8 ሄ ጋላስ ዳዊተ ባረ አሳ፥ “ያቡሳ አሳቱዋ ጾንያ አሳይ ኦንነ ዳዊታ ሞርከቱ፥ ሄ ‘ዎባቱነ ቆቃቱ’ ደእያ ሳኣ ጋካናዉ፥ ሃꬃይ ጎጊደ ከስያ ጾእያና ገላናዉ ኮሼ” ያጌዳ። ሄዋ ድራዉ፥ “ቆቀቱነ ዎባቱ ካትያ ጎልያ ገልክኖ” ጌተቴዳ። 9 ዳዊተ ሄ ጌሱዋ ኦይቂደ፥ ያን ደኤዳ፤ ሄ ጌሱዋ ዳዊታ ካታማ ያጊደ ሱንꬄዳ። ዳዊተ ሚሎፐ ዶሚደ፥ ሄ ካታማ ዩሽ አꬂደ ግምቢሴዳ። 10 ኡባፐ ዎልቃማ መꬍና ጎዳ ጾሳይ አናና ደእያ ድራዉ፥ ዳዊተ ምን ምኒደ ቤዳ።
11 ጺሮሳ ካቲ ኪራም ዳዊታዉ አሳ ኪቴዳ። ዝጋ ሙደꬃ፥ አናጸቱዋነ ሹቻ ማስያዋንታ አዉ የዴዳ፤ አሳቱ ዳዊታዉ ጎልያ ኬጼድኖ። 12 መꬍና ጎዳይ እስራኤልያ ቦላ አ ካትያ ኦꬂደ ኤሴዳዋነ ባረ አሳ እስራኤልያ ድራዉ አ ካዉተꬃ ꬎቁ ኦꬂደ ቦንቼዳዋ ዳዊተ ኤሬዳ።
13 ዳዊተ ከብሮናፐ የሩሳላመ ዬዳዋፐ ጉይያን፥ ሀራ ጋራዳቱዋነ ሀራ ማቼቱዋ ጉጂደ አኬዳ። ሀራ ማጫ ናናይነ አቱማ ናናይ አዉ የለቴድኖ። 14 ያን አዉ የለቴዳ አቱማ ናና ሱንꬃይ ሻሙአ፥ ሾባባ፥ ናታና፥ ሶሎሞና፥ 15 ይብሃራ፥ ኤልሹአ፥ ነፌጋ፥ ያፍአ፥ 16 ኤልሻማአ፥ ኤልያዳአነ ኤልፈሌጻ።
ዳዊተ ፕልስጼማ አሳቱዋ ጾኔዳ
(1 ኦዱዋ 14:8-17)
17 ዳዊተ እስራኤልያ ቦላ ካትያ ግዲደ ኦከቴዳዋ ፕልስጼማ አሳቱ ስሴዳ ዎደ፥ ኡንቱንቱ ኡባይ ዳዊታ ኮያናዉ ከሴድኖ፤ ሽን ዳዊተ ሄዋ ስሲደ፥ ዱገ ግምቢያ ግዶ ቤዳ። 18 ፕልስጼማቱ ቃይካ ቢደ፥ ራፋይማ ዎምባን ላለቲደ ኡቴድኖ። 19 ሄዋ ድራዉ፥ ዳዊተ መꬍና ጎዳዉ፥ “ታን ባደ ፕልስጼማቱዋ ኦሎ? ኔን ኡንቱንታ ታዉ አꬃ እማኒ?” ያጊደ ኦቼዳ።
መꬍና ጎዳይ ዳዊታ፥ “ኤ ኦላ። ታን ኡንቱንታ ነዉ አꬃ እማና” ያጌዳ።
20 ዳዊተ ባኣል-ፓራጺማ ግያ ሳኣ ቢደ፥ ያን ኡንቱንታ ጾኔዳ። ያቲደ ዳዊተ፥ “ሃꬃ ድኡ ꬉስ አꬍያዋዳን መꬍና ጎዳይ ታ ሞርከቱዋ ግዱዋና ታና አꬄዳ” ያጌዳ። ሄዋ ድራዉ፥ ሄ ሳኣ ሱንꬃይ ባኣል-ፓራጺማ ጌተቴዳ። *ባኣል-ፓራጺማ፦ ሀ ሱንꬃ ብለꬃይ “ꬉሲደ ገሌዳ ጎዳ” ግያዋ። 21 ፕልስጼማቱ ባረንቱ ኤቃቱዋ ሄ ሳኣን የጊደ ቤድኖ። ያትና ዳዊተነ አ አሳይ ሄ ኤቃቱዋ አኪደ አፌድኖ።
22 ፕልስጼማቱ ጉየ ስሚደ ቢደ፥ ላኤንꬁዋ ራፋይማ ዎምባን ላለት ኡቴድኖ። 23 ዳዊተ መꬍና ጎዳ ላኤንꬁዋካ ኦችና፥ ጾሳይ አ፥ “ስት ጋደ ፑደ ኡንቱንቱ ቦላ ቦፓ፤ ኡንቱንቱ ጉየና ዩያ አꬋ፥ ቦእያ ምꬃፐ ስንꬃ ባጋና ኦላናዉ ጊጋ። 24 ቦእያ ሁጲያን ኦላ ኮሻ ኔን ስስያ ዎደ ኤሌላ። አያዉ ጎፐ፥ ሄዌ ፕልስጼማ ኦላንቻቱዋ ሾጫናዉ መꬍና ጎዳይ ኔፐ ስንꬃዉ አꬌዳ ግያዋ” ያጌዳ። 25 ዳዊተ መꬍና ጎዳይ አዛዜዳዋዳን ኦꬄዳ፤ ገባአፐ ቢደ ገዜራ ጋካናዉ፥ ፕልስጼማ ኦላንቻቱዋ ዳዊተ ዎꬌዳ።