1 እስራኤልያ ግዶፐ ዶረቴዳ ሀታሙ ሻአ አሳቱዋ ዳዊተ ላኤንꬁዋ ጼሲደ ሺሼዳ። 2 እነ አ አሳይ ኡባይ ይሁዳን ደእያ ባኣላ (ቅርያትይ-አርም) ጌተትያ ካታማፐ ደንዲደ፥ ክሩበቱዋፐ ግዱዋን ባረ ካዉተꬃ አራታ ቦላ ኡቴዳ ኡባፐ ዎልቃማ መꬍና ጎዳ ሱንꬃን ጼሰቴዳ ጾሳ ታቦታ ያፐ አሀናዉ ቤድኖ። ከሳ 25:22 3 ኡንቱንቱ ጾሳ ታቦታ ኦራꬃ ጋርያን ዎꬂደ፥ ዞዝያ ሁጲያን ደእያ አብናዳባ ሶፐ አሄድኖ፤ አብናዳባ ናናይ ኡዝነ አህዮይ ኦራꬃ ጋርያ ካለꬅኖ።1 ሳሜላ 7:1-2 4 ያፐ ጾሳ ታቦታ አህያ ዎደ፥ አህዮ ታቦታፐ ስንꬃና ሀመቴ። 5 ዳዊተነ እስራኤልያ አሳይ ኡባይ ዲꬃነ ማስንቁዋ ዲጺደ፥ ካባሩዋ ባቂደነ ዳዋላነ ሻሾራ ቃꬂደ፥ ባረንቶ ኩመንꬃ ዎልቃን መꬍና ጎዳ ስንꬃን ናሸቲደ ቦንቼድኖ።

6 ናኮና ካꬃ ቡክያ ኡዱማ ጋክያ ዎደ፥ ቦራቱ ꬉበትና፥ ኡዝ ባረ ኩሽያ የዲደ፥ ጾሳ ታቦታ ኦይቄዳ። 7 ኡዝ ታቦታ ቦቼዳ ድራዉ፥ መꬍና ጎዳ ሀንቁ ኡዛ ቦላ ኤጽ ከሴዳ። ጾሳይ አ ሾጭና፥ ሄ ሳኣን ጾሳ ታቦታ ምይያን ኤለካ እ ሀይቂ አጌዳ። 8 ጾሳ ሀንቁ ኡዛ ሾጬዳ ድራዉ፥ ዳዊተ ይሎቴዳ። ሄ ሳአይ ሀቼ ጋካናዉ፥ ፐሬዝ-ኡዛ (ኡዝ መኤዳ ሳኣ) ጌተቴ።

9 ሄ ጋላስ ዳዊተ መꬍና ጎዳዉ ያዪደ፥ “መꬍና ጎዳ ታቦታይ ታኮ ስም ዋን ያኔ?” ያጌዳ። 10 ሄዋ ድራዉ፥ ዳዊተ ጾሳ ታቦታ ባረናና ዳዊታ ካታማ አሀናዉ ኮይቤና፤ ሄዋ አጊደ ግታትያ ኦቤድ-ኤዶማ ግያ ብታንያ ሶ አፌዳ። 11 መꬍና ጎዳ ታቦታይ ግታትያ ኦቤድ-ኤዶማ ሶን ሄዙ አግና ጋምኤዳ፤ መꬍና ጎዳይ አነ አ ሶ አሳ ኡባ አንጄዳ። 1 ኦዱዋ 26:4-5

12 ሄዋፐ ስሚደ፥ “ጾሳ ታቦታ ድራዉ፥ መꬍና ጎዳይ ኦቤድ-ኤዶማ ሶ አሳነ አዉ ደእያ ኡባባ አንጄዳ” ያግያዋ ካቲ ዳዊተ ስሴዳ፤ ሄዋ ድራዉ፥ ዳዊተ ኦቤድ-ኤዶማ ሶ ቢደ፥ ጾሳ ታቦታ ዳዊታ ካታማ ናሸቻን አሄዳ። 13 መꬍና ጎዳ ታቦታ ቶኬዳ አሳቱ ኡሱፑኑዋ ታንጌዳ ፓይዱዋን ፓይዱዋን ኡንቱንታ ኤሲደ፥ እት ኮሩማነ እት ቦልትቦልታ ማራ ዳዊተ ያርሼዳ። 14 ዳዊተ ሱፍያ ግያ ቃጭናፐ ዳደቴዳ ኤፉድያ ማዪደ፥ ባረዉ ደእያ ዎልቃ ኡባን መꬍና ጎዳ ስንꬃን ዱሬዳ። 15 እነ እስራኤልያ አሳቱ ኡባቱ ናሸቻን ሆምቦጪድነ ኡልቱዋ ፑኒደ መꬍና ጎዳ ታቦታ ዳዊታ ካታማ አሄድኖ።

16 መꬍና ጎዳ ታቦታይ ዳዊታ ካታማ ገልያ ዎደ፥ ሳኦላ ናታ መልኮላ ማስኮትያና ጼላደ፥ ካቲ ዳዊተ መꬍና ጎዳ ስንꬃን ጉፕሺንነ ዱርሽና በኣዱ፤ ዳዊታ ባረ ዎዛናን ካꬋዱ።

17 ዳዊተ መꬍና ጎዳ ታቦታ ዎꬃናዉ ꬎጌዳ ዱንካንያ ግዶን ታቦታ አሂደ ዎꬄድኖ፤ ዳዊተ ጹግያ ያርሹዋነ እትፐተꬃ ያርሹዋ መꬍና ጎዳዉ ያርሼዳ። 18 ዳዊተ ጹግያ ያርሹዋነ እትፐተꬃ ያርሹዋ ያርሽያዋ ፖሌዳዋፐ ጉይያን፥ ኡባፐ ዎልቃማ መꬍና ጎዳ ሱንꬃን አሳ አንጄዳ። 19 እስራኤልያ አሳዉ ኡባዉ፥ ማጫዎ አቱማዎ ሁጲያን ሁጲያን እት እት ኮምፖ ኡክꬃ፥ እት እት ሙጾ አሹዋካ ዎይንያ ቴራ መላፐ ኑከቴዳ እት እት ኡክꬃ ግሼዳ። ሄዋፐ ጉይያን አሳይ ኡባይ ባረ ሶ ባረ ሶ ስሜዳ። 1 ኦዱዋ 16:43

20 ዳዊተ ባረ ሶ አሳ አንጃናዉ ሶ ስሜዳ ዎደ፥ ሳኦላ ናታ መልኮላ አ ሞካናዉ ከሳደ፥ “ሹፉሮ አሳቱ ካሎ ሀመትያዋዳን፥ ሀቼ እስራኤልያ ካቲ ባረ ቆማቱዋ ማጫ ቆማቱዋ ስንꬃን ካሎቲደ፥ አያ ቦንቼቴደ!” ያጋዱ።

21 ዳዊተ፥ “ነ አዉዋፐነ አ ሶ አሳፐ አꬂደ፥ ባረ አሳ እስራኤልያ ካለꬃናዳን ታና ዶሬዳ መꬍና ጎዳ ስንꬃን ዱራድ። ታን መꬍና ጎዳ ቦንቻናዉ ዱርያዋ አግከ። 22 ታን ሀዋፐ አꬃደ ብሮካ ታና ቶቻና፤ ታን ታ ሁጲያ ዝቂ ኦꬃና። ሽን ኔን ጌዳ ማጫ ቆማቱዋ ስንꬃን ታን ቦንቼታና” ያጌዳ።

23 ሄዋ ድራዉ፥ ሳኦላ ናታ ሚካላ ሀይቃና ጋካናዉ፥ ናኣ የላበይኩ።