1 ሄዋፐ ጉይያን፥ ካቲ ዳዊተ ፕልስጼማቱዋ ጾኒደ ሞዴዳ፤ ያቲደ መተግኣማ ግያ ካታማ ፕልስጼማ አሳቱዋ ኩሽያፐ ዎꬅ አኬዳ።

2 ቃይ ሞኣበ አሳቱዋካ ዳዊተ ጾኔዳ። ጋድያን እ ኡንቱንታ ግስሲደ ዎዶሩዋን ልኬዳ፤ ላኡ ዎዶሩዋን ልከቴዳ ኡባቱዋ ዎꬌዳ፤ ሄዘንꬆ ዎዶሩዋን ልከቴዳዋንታ ፓጻ አጌዳ። ያትና ሞኣበ አሳቱ ዳዊታዉ ሞደቲደ ጊራ ጊሬድኖ።

3 ራሆባ ናአይ፥ ጾባ ካቲ ሀዳድኤዘረ ኤፍራጺሳ ሻፋ ማታን ደእያ ባረ ዛዋ ዛር አካናዉ ቢደ፥ ዳዊታና ኦለትና፥ ዳዊተ አ ጾኔዳ። 4 ዳዊተ አ አሳፐ እት ሻአነ ላፑን ጼቱ ፓራአ አሳቱዋና ላታሙ ሻአ ገድያ አሳቱዋ ኦሞዴዳ። ዳዊተ ጋረቱዋ ጎቻናዉ ጼቱ ፓራቱዋ አሺደ፥ ሀራ ፓራቱዋ ኡባዉ ጋዱዋ ቃንጼዳ።

5 ዳማስቆ ካታማን ደእያ ሶርያ ኦላንቻቱ ጾባ ካትያ ሀዳድኤዘራ ማዳናዉ ዬዳ ዎደ፥ ዳዊተ ኡንቱቱፐ ላታማነ ላኡ ሻአቱዋ ዎꬌዳ። 6 ሄዋፐ ጉይያን፥ ዳዊተ ሶርያ ካዉተꬃንነ ዳማስቆ ካታማን ኦላንቻቱዋ ጌሱዋ መꬌዳ። ያትና ሶርያ አሳቱ ዳዊታዉ ሞደቲደ፥ ጊራ ጊሬድኖ። ዳዊተ ቤዳ ሳኣ ኡባን መꬍና ጎዳይ አዉ ጾኑዋ እሜዳ።

7 ሀዳድኤዘራ ኦላ ጋዳዋቱ ኦይቂያ ዎርቃ ጎንዳልያ ዳዊተ አኪደ፥ የሩሳላመ አሄዳ። 8 በጻሀነ በሮታያ ጌተትያ ሀዳድኤዘራ ካታማቱዋፐ ካቲ ዳዊተ ናሃስያ ግያ ብራታ ሎይꬅ ዳሩዋ አኬዳ።

9 ሀዳድኤዘራ ኦላንቻቱዋ ኡባ ዳዊተ ጾኔዳዋ ሀማታ ካቲ ቶእ ስሴዳ። 10 ሀዳድኤዘራ ኦለቲደ ጾኔዳ ድራዉ፥ አ ሀሹ ጋናዉነ ሳሮታናዉ ባረ ናኣ ዮራማ ካትያ ዳዊታኮ ኪቴዳ። አያዉ ጎፐ፥ ሀዳድኤዘረ ቶኣራ ኦለቲደ ጋምኤዳ። ዮራመ ዪደ ዎርቃፐ፥ ብራፐነ ናሃስያፐ መቴዳ ሚሻቱዋ ዳዊታዉ አሄዳ። 11-12 ካቲ ዳዊተ ሀ ሚሻቱዋ መꬍና ጎዳዉ ዱማይ ዎꬄዳ። ቃይ ዳዊተ ባረ ጾኔዳ ካዉተꬃቱዋፐ ኡባፐ፥ ሶርያፐ፥ ሞኣበፐ፥ አሞና አሳቱዋፐ፥ ፕልስጼማ አሳቱዋፐነ አማሌቃ አሳቱዋፐ አኬዳ ዎርቃነ ብራ ራሆባ ናኣ፥ ጾባ ካትያ ሀዳድኤዘረፐ አኬዳ ኦሞዱዋ ካሰዋዳንካ ጾሳዉ ዱማይ ዎꬄዳ።

13 ማጽንያ ዛንጋራን ታማነ ሆስፑን ሻአ ኤዶማ አሳቱዋ ዳዊተ ዎꬍ ስሜዳዋፐ ጉይያን፥ እ ሀይꬃቴዳ።ማዝ. 60 (ሁጲያ) 14 ዳዊተ ኤዶማ ቢታ ኡባን ኦላንቻቱ ጌሱዋ መꬌዳ፤ ያትና ሄ ቢታ አሳይ ኡባይ ዳዊታዉ ሞደቴዳ። ዳዊተ ቤዳ ሳኣ ኡባን መꬍና ጎዳይ አዉ ጾኑዋ እሜዳ።

15 ሄዋዳን ኦꬂደ፥ ዳዊተ እስራኤልያ ኡባ ቦላ ካተቴዳ፤ ባረ አሳ ኡባ ጽሎተꬃንነ ሱረ ፕርዳን አኬዳ። 16 ጻሩይ ናአይ ዮኣበ ኦላንቻቱ ጋዳዋ፤ አህሉዳ ናአይ ዮሳፌጸ ሀኔዳባ ጻፍያዋ። 17 አህጹባ ናአይ ጻዶቅነ አብያታራ ናአይ አብመሌክ ቄሳቱ ዋ፤ ሳራይ ቃይ ጻፍያ፤ 18 ዮዳሄ ናአይ ባናይ ካልታዋቱዋነ ፈልታዋቱዋ (ካትያ ናግያዋንቱ) ቦላ ካፑዋ። ዳዊታ አቱማ ናናይ ቄሳቱዋ።