1 እት ጋላስ ዳዊተ፥ “ዮናታና ድራዉ፥ ታን አዉ ኬካናዳን ሀኖ ጋካናዉ ሳኦላ ቃንꬃፐ አቴዳ አሳይ ደኢሻ?” ያጊደ ኦቼዳ። 1 ሳሜላ 20:15-17

2 ሄ ዎደ ጺባ ግያ እት ቆማይ ሳኦላ ሶን ደኤ፤ እ ዳዊታ ስንꬃ ያናዳን ጼሴድኖ፤ ዪና ካቲ አ፥ “ኔን ጺቤ?” ያጊደ ኦቼዳ።

እካ፥ “ኤ ታን ጺባ፥ ነ ቆማ” ያጌዳ።

3 ሄዋፐ ጉየ ካቲ አ፥ “ጾሳ ኬካተꬃ ታን ኬካናዳን፥ ሳኦላ ቃንꬃፐ ፓላሄዳ እት አሳይነ ባዌ?” ያጌዳ። 2 ሳሜላ 4:4

ጺብ ካትያ፥ “ዮናታና ናናቱዋፐ እቱ ሀኖ ጋካናዉ ደኤ፤ ሄ ናአዉ ላኡ ገደቱካ ስላ” ያጌዳ።

4 ካቲ፥ “እ ሀቃን ደኢ?” ያጌዳ።

ጺብ፥ “ሎዳባራ ግያ ሳኣን አምኤላ ናኣ ማክራ ሶን ደኤ” ያጌዳ።

5 ሄዋፐ ጉየ ካትያ ዳዊተ ኪቲደ፥ ሎዳባራፐ አምኤላ ናኣ ማክራ ሶፐ አህሴዳ።

6 ሳኦላ ናኣ ዮናታና ናአይ ማንፍቦሼተ ዳዊታኮ ዬዳ፤ ይ ጋኪደ፥ ዳዊታ ስንꬃን ጾነታድ ጊደ ግሴዳ።

ያትና፥ ዳዊተ አ፥ “ማንፍቦሼታ!” ያጊደ ጼሴዳ።

እ፥ “አቤ ታ ጎዳዉ፥ ታን ነ ቆማ” ያጌዳ።

7 ዳዊተ አ፥ “ያዮፓ፤ ነ አዉዋ ዮናታና ድራዉ፥ ታን ነዉ ኬካና። ነ አዉዋ አዉዋ ሳኦላ ጋድያ ኡባ ታን ነዉ ዛራና፤ ቃይ ኔን ኡባ ዎደ ታ ማሶፍያፐ ማና” ያጌዳ።

8 ሄዋፐ ጉየ ማንፍቦሼተ ላኤንꬁዋ ግሲደ፥ “ሀይቄዳ ካና ማላ ታና ኔን ዶሳደ ጼላናዉ፥ ነ ቆማይ ታን ኦኔ?” ያጌዳ።

9 ካቲ፥ ሳኦላ ቆማ ጺባ ጼሲደ፥ “ሳኦለዋነ ሳኦላ ሶ አሳዋ ግዴዳዋ ኡባ ታን ነ ጎዳ ናኣ ናአዉ እማድ። 10 ነ ጎዳ ናኣ ናአይ ማናዳን ኔን፥ ነ ናናይነ ነ ቆማቱ አዉ ጋድያ ጎሽተ፤ ዶልያ ካꬃ አዉ አህተ። ግዶፐካ፥ ነ ጎዳ ናኣ ናአይ ማንፍቦሼተ ኡባ ዎደ ታ ማሶፍያፐ ማና” ያጌዳ። ጺባዉ ታማነ እቼሹ አቱማ ናናይነ ላታሙ ቆማቱ ደኢኖ።

11 ጺብ ካትያ፥ “ኔን ታ ጎዳይ ካቲ ነ ቆማ አዛዜዳ ኡባባ ታን ነ ቆማይ ፖላና” ያጌዳ። ሄዋ ድራዉ፥ ማንፍቦሼተ ካትያ ናናቱዋፐ እቱዋዳን ካትያ ማሶፍያፐ ሜዳ።

12 ማንፍቦሼታዉ ሚካ ግያ ጉꬃ ናአይ ደኤ። ጺባ ሶን ደእያ አሳቱ ኡባቱ ማንፍቦሼታዉ ቆማ ግዴድኖ። 13 ማንፍቦሼተ ኡባ ዎደ ካትያ ማሶፍያፐ ምያ ድራዉ፥ እ የሩሳላመን ደኤ። አ ገዲ ላአቱካ ስላ።