1 ኦፍንꬃን፥ ካተቱ ኦላዉ ከስያ ዎደ፥ ዳዊተ ባረ አሳናነ እስራኤልያ ኦላንቻቱዋና ዮኣባ የዴዳ። ቢደ አሞና ቢታ ባይዜድኖ፤ ራባ ካታማ ዶዴድኖ፤ ሽን ዳዊተ የሩሳላመን ታኬዳ። 1 ኦዱዋ 20:1

2 እት ጋላሳ ኦማርስ ዳዊተ ባረ ግሱዋፐ ደንዲደ፥ ካትያ ጎልያ ቦላን ደምባዪደ ኦꬄዳ ሳኣን ሀመቴዳ፤ ቦላ ሜጨትያ እት ምሽራቶ በኤዳ፤ ሄ ምሽራታ ዳሮ ማላ ሎአ። 3 ዳዊተ አሳ ኪቲደ፥ አ ኦነንቶ ኦሽሴዳ፤ ሄ ምሽራታ፥ “ሀና ኤሊኣማ ናቶ ሂትያ ኦርዮና ማቻቶ በርሳቤሆ” ያጌዳ። 4 ዳዊተ አሳ ኪቲደ፥ እዞ ጼስስ አህሲደ፥ እዝና አቄዳ። ሄ ዎደ ሄ ምሽራታ ፒላይ ዪደ አꬍና፥ ጌዮ ሳና ደአዉ። ሄዋፐ ጉይያን፥ አ ባረ ሶ ስማደ ባዱ። 5 ምሽራትዉ ሻሃራይ አትና፥ ዳዊታኮ ኪታ የዳደ፥ “ታዉ ሻሃራይ አቴዳ” ያጋዱ።

6 ሄዋፐ ጉይያን ዳዊተ፥ “ሂትያ ኦርዮና ታዉ ሃ የዳ” ያጊደ እዮኣበዉ ኪቴዳ፤ እዮኣበ ኦርዮና ዳዊታዉ የዴዳ። 7 ኦርዮን ዪና ዳዊተ አ፥ “እዮኣበ አይ ማሌ? ኦላንቻቱካ አይ ማሌ? ቃይ ኦላይ ዋኒ?” ያጊደ ኦቼዳ። 8 ሄዋፐ ጉይያን ዳዊተ ኦርዮና፥ “ሶይ ባ፤ ባደ ሸምፓ አካ” ያጌዳ፤ ሄዋፐ ጉይያን ኦርዮን ካትያ ጎልያፐ ከሲደ ቤዳ፤ ካቲ ኦርዮናዉ አየንቶ እምያዋ አ ጌዱዋ የዴዳ። 9 ሽን ኦርዮን ሶ ቤናን ካትያ ጎልያ ድርሳ ፐንግያን ባረ ጎዳ ቆማቱዋ ኡባና ግስ አቄዳ።

10 “ኦርዮን ባረ ሶ ብቤና” ግያዋ ዳዊተ ስሴዳ፤ ኦርዮና፥ “ኔን ሃኮ ሳፐ ያዳ ግድኪ? ነ ሶ አያዉ ባበይኪ?” ያጊደ ኦቼዳ።

11 ኦርዮን ዳዊታ፥ “ታቦታይ፥ እስራኤልያ አሳይ፥ ይሁዳ አሳይ፥ ታ ጎዳ እዮኣብነ ታ ጎዳ አሳይ ደምባን ዱንካንያን ደኢኖ። ያትና ታን ዋናደ ሶ ባደ ሞ፥ ኡሾ፥ ቃይ ታ ማቻትና አቆ? ነ ሸምፑ ኤሮ! ታን ሀዋ ማላ ኦꬅከ” ያጊደ ዛሬዳ።

12 ሄዋፐ ጉየ ዳዊተ ኦርዮና፥ “እት ጋላሳ ሀዋን ጋምአ፤ ዎንት ኔና ጉየ የዳና” ያጌዳ፤ ኦርዮን ሄ ጋላስነ ዎንተꬃ ጋላስ የሩሳላመን ታኬዳ። 13 ዳዊተ ሾቢና፥ ኦርዮን አናና ሜዳነ ኡሼዳነ። ዳዊተ አ ማꬆዬዳ። ሽን ሄ ኦማርስ ኦርዮን ባረ ሶ ቤናን፥ ባረ ግሱዋ ሂጺደ፥ ባረ ጎዳ ቆማቱዋ ግዶን አቄዳ።

14 ዎንትና ጉራ ዳዊተ እዮኣባዉ ዳብዳቢያ ጻፊደ፥ ኦርዮና ቦላ የዴዳ። 15 ዳዊተ ዳብዳቢያን እዮኣባ፥ “ኦላይ ተኡዋ ዳርያ ሳኣን፥ ስንꬃ ባጋና ኦርዮና ዎꬃ፤ ሄዋፐ ጉይያን፥ እ ሾጨቲደ ሀይቃና ማላ፥ አ ማታፐ ክችተ” ያጌዳ።

16 እዮኣበ ሄ ካታማ ዶዲደ፥ ሞርክያ ኦላንቻቱዋፐ ምኖቱ ደእያ ሳኣ ኤሪደ፥ ኦርዮና ያን ዎꬄዳ። 17 ካታማ አሳቱ ከሲደ ዮኣባና ኦለትና፥ ዳዊታ ኦላንቻቱዋፐ አማራቱ ሀይቄድኖ፤ ሂትያ ኦርዮንካ ሀይቄዳ።

18 እዮኣበ ኦላን ሀኔዳባ ኡባ ዳዊታዉ ኪቴዳ። 19 ብያ ብታንያ እዮኣበ፥ “ኦላን ሀኔዳባ ኡባ ኔን ካትያዉ ኦዳ ዉርስሽን፥ 20 ኦን ኤሪ፥ ካቲ ሀንቁዋ ኤጽ ከሳና፤ ሀንቀቲደ ኔና፥ ‘ህንተ ኡንቱንቱና ኦለታናዉ ካታማኮ አያዉ ሎይꬅ ሺቄድቴ? ኡንቱንቱ ግምቢያ ጼራና ዎንዳፍያን ዱካናዋ ኤርበይክተየ? 21 ጌዶና ናኣ አብመሌካ ኦን ዎꬌዴ? ጋጭያ ማይድያ ግምቢያ ጼራና ዱገ ኦላደ፥ ተበጻ ግያ ሳኣን እት ማጫውና ዎꬋዱ ግደኬ? ያትና፥ ህንተንቱ ግምቢያኮ አያዉ ሺቄድቴ?’ ያጊደ ኦችያዋ ግዶፐ ኔን ካትያ፥ ‘ነ ቆማይ፥ ሂትያ ኦርዮንካ ሀይቄዳ’ ያጋ” ያጊደ አዛዜዳ። ዳና. 9:53

22 ኪተቴዳዌ ደንዲደ ብ ጋኪደ፥ እዮኣበ ባረና ኪቴዳዋ ኡባ ዳዊታዉ ኦዴዳ። 23 ብታኒ ዳዊታ፥ “ኑ ሞርከቱ ኑፐ ዎልቃ ሜድኖ፤ ኑናና ኦለታናዉ ካታማፐ ጋጻ ደምባ ከሴድኖ፤ ሽን ኑን ኡንቱንቱ ካታማ ፐንግያ ጋካናዉ፥ ጉየ ዛሪደ የደርሴዶ። 24 ሄዋፐ ጉይያን፥ ዎንዳፍያ ዱክያዋንቱ ግምቢያ ጼራና ነ ቆማቱዋ ቦላ ዱኬድኖ፤ ካትያ አሳቱዋፐ አማሬዳዋንቱ ሀይቄድኖ፤ ቃይ ነ ቆማይ፥ ሂትያ ኦርዮንካ ሀይቄዳ” ያጌዳ።

25 ዳዊተ ኪተቲደ ዬዳዋ፥ “ኔን እዮኣባ ሀዋዳን ያጋ፤ ‘ሀዎ ሀንቀቶፓ፤ አያዉ ጎፐ፥ ማሻይ እት ገደ ሀዋ፥ እት ገደ ቃይ ሀራ ዎꬌዳ፤ ካታማ ኦላደ ኦይቃናዉ ምና’ ያጋደ አ ምንꬃ” ያጌዳ።

26 ኦርዮና ማቻታ ባረ አስናይ ሀይቄዳዋ ስሴዳ ዎደ፥ አዉ ዬካዱ። 27 እዛ ካዮትያ ዎዲ ፖለቶዋፐ ጉይያን፥ ዳዊተ እዞ ባረ ሶ ኪቲደ አህሴዳ። እዛ አዉ ማቻቶ ግዳዱ፤ ያታደ አዉ አቱማ ናኣ የላዱ። ሽን ዳዊተ ኦꬄዳ ኪታይ መꬍና ጎዳ ስንꬃን ኢታባ ግዴዳ።