12
ናታን አሄዳ ኪታነ ዳዊታ ናጋራ ፓጸꬃ
1 መꬍና ጎዳይ ናታና ዳዊታኮ ኪቴዳ፤ ናታን አኮ ዪደ፥ ሀዋዳን ያጌዳ፤ “እት ካታማን ላኡ አሳቱ ደኢኖ፤ ኡንቱቱፐ እቱ ዱረ፤ ቃይ እቱ ማንቁዋ። ማዝ. 51 (ሁጲያ) 2 ዱረ ብታንያዉ ዳሮ ዶርሳይነ ሚዛይ ደኤ፤ 3 ሽን ማንቆ ብታንያዉ እ ሻሚደ ሄምያ እት ዶርሳ ማራትፐ ሀራባይ አያይነ ባዋ። ሄ ዶርሳታ አናናነ አ ናናቱዋና ድጫዱ፤ እዛ አ ቁማፐ ማዉ፤ አ ዋንጫፐ ኡሻዉነ አ ክዉዋን ግሳዉ። ሄ ዶርሳታ አዉ ማጫ ናኣ ማላ።
4 “እት ጋላስ እት እማꬃይ ሄ ዱረ ብታንያ ሶ ዬዳ፤ ሽን ዱሪ ባረ ዶርሳፐ ዎይ ባረ ሚዛፐ አኪደ ሹኪደ፥ ባረ ሶ ዬዳ እማꬃ ሞካናዉ ኮይቤና። እ ሄ ማንቆ ብታንያ ዶርሳቶ አኪደ፥ ሄ ሶ ዬዳ እማꬃ ምዝያዋ ካꬄዳ” ያጌዳ።
5 ዳዊተ ሄ ዱረ ብታንያ ቦላ ሀንቁዋ ኤጽ ከሲደ ናታና፥ “መꬍና ጎዳይ ኤሮ! ሀዋ ኦꬄዳ ብታኒ ሀይቃናዉ በሰ። 6 ቃይ እ ሄ ዶርሳ ማራት ድራዉ ኦይዱ ኩሽያ አꬂደ ጭጋናዉ ኮሼ፤ አያዉ ጎፐ፥ ቃረታ ꬋዪደ እ ሄዋ ኦꬄዳ” ያጌዳ።
7 ናታን ዳዊታ፥ “ሄ ብታኒ ኔና! መꬍና ጎዳይ እስራኤልያ ጾሳይ ሀዋዳን ያጌ፤ ‘ታን ኔና እስራኤልያ ቦላ ኦካደ ካተያድ፤ ሳኦላ ኩሽያፐካ ታን ኔና አሻድ፤ 8 ታን ነ ጎዳ ጎልያ ነዉ እማድ፤ ነ ጎዳ ማጫ አሳቱዋካ ነ ክዉዋን የጋድ፤ እስራኤልያ ጎልያ አሳነ ይሁዳ ጎልያ አሳ ታን ነዉ እማድ። ሀዌ ኡባይካ ጉጾፐ፥ ታን ነዉ ሀራካ ጉጃ እማና ሽን። 9 ሀዋ ማላ ኢታባ አ ስንꬃን ኦꬃደ፥ አያዉ መꬍና ጎዳ ቃላ ካꬋዲ? ሂትያ ኦርዮና ማሻን ዎꬋዳ፤ ያታደ አ ማቻቶ ነዉ አካዳ። ኤ፥ አሞና አሳቱዋ ማሻን አ ዎꬋዳ። 10 ኔን ታና ካꬋደ፥ ሂትያ ኦርዮና ማቻቶ ነዉ አኬዳ ድራዉ፥ ነ ዛርያፐ ማሻይ ኡባካ ሻከተና’ ያጌ።
11 “ሄዋ ድራዉ መꬍና ጎዳይ፥ ‘ታን ነ ሶ አሳ ግዶፐ ነ ቦላ ኢታባ አሀና፤ ነ ማቻቱዋ ኔን ጼልሽን ደንꬃደ፥ ነዉ ማታትያ ኡራዉ እማና፤ ሴታ ጋላሳን ሄ ብታኒ ነ ማጫ አሳቱዋና ግሳናዋ። 2 ሳሜላ 16:22 12 ኔን ሄዋ ጌማን ኦꬃዳ፤ ሽን ታን ሀዋ ሴታ ጋላስ እስራኤልያ አሳ ኡባ ስንꬃን ኦꬃና’ ያጌ” ያጌዳ።
13 ዳዊተ ናታና፥ “ታን መꬍና ጎዳ ቦላ ናጋራ ኦꬃ ክቻድ” ያጌዳ።
ናታን፥ “መꬍና ጎዳይካ ነ ናጋራ አቶ ግ ድጌዳ፤ ኔን ሀይቃካ። 14 ኔን ሀዋ ኡዳደ፥ መꬍና ጎዳ ሞርከቱ አ ካꬋናዳን ኦꬄዳ ድራዉ፥ ነዉ የለቴዳ ናአይ ሀይቃና” ያጌዳ።
15 ናታን ባረ ሶ ቤዳዋፐ ጉይያን፥ ኦርዮና ማቻታ ዳዊታዉ የሌዳ ናኣ መꬍና ጎዳይ ሾጭና እ ሀርጌዳ። 16 ዳዊተ ሀ ናአዉ ጾሳ ዎሴዳ፤ ዳዊተ ካꬃ ሜናን ጾሜዳነ ባረ ሶ ገሊደ፥ ቃማ ቃማ ቢታን ግስ አቄዳ። 17 አ ሶ ጭማቱ አ ቢታፐ ደንꬃናዉ አ ማታን ኤቄድኖ፤ ሽን ቢታፐ ደንደናን እጼዳ፤ እ ኡንቱንቱና ቁማ ምቤና።
18 ላፑንꬃ ጋላስ ናአይ ሀይቄዳ። ዳዊታ ቆማቱ ናኣ ሀይቁዋ ኦዳናዉ ያዬድኖ፤ “ናአይ ፓጻ ደእሽን ኑን ዳዊታ ሃሳይሴዶ፤ ሽን ስሰናን እጼዳ። ያትና፥ ናአይ ሀይቄዳዋ ኑን አዉ ዋቲደ ኦዳናዉ ዳንዳየቶ? ኦን ኤሪ፥ እ ባረና ቆሀነንቶነ” ያጌድኖ።
19 ባረ ቆማቱ እቱ እቱዋና ሳሱከትያዋ ዳዊተ በኤዳ ዎደ፥ ቄር ናአይ ሀይቄዳዋ ኤሬዳ። ዳዊተ ኡንቱንታ፥ “ቄር ናአይ ሀይቄዴ?” ያጊደ ኦቼዳ።
ኡንቱንቱ፥ “ኤ ሀይቄዳ” ያጌድኖ።
20 ዳዊተ ቢታፐ ደንድ ኤቄዳ። ሜጨቲደ፥ ኦከቲደነ ባረ ማዩዋ ላሚደ፥ መꬍና ጎዳ ጎልያ ገሌዳ፤ ጎይኔዳ። ሄዋፐ ጉይያን ባረ ሶ ቢደ፥ ቁማ ኦችና ኡንቱንቱ አ ስንꬃ አꬄድኖ፤ ቁማ ሜዳ።
21 አ ቆማቱ አ፥ “ኔን ሀዋዳን አያዉ ሀናድ? ናአይ ፓጻ ደእሽን ጾማዳነ ዬካዳ፤ ሽን ናአይ ሀይቂና ደንዳደ፥ ቁማ ማዳ!” ያጌድኖ።
22 ዳዊተ ኡንቱንታ፥ “ናአይ ፓጻ ደእሽን ታን ጾማድነ ዬካድ፤ አያዉ ጎፐ፥ ‘ኦን ኤሪ፥ መꬍና ጎዳይ ታና ማርና፥ ናአይ ፓጻነንቶነ’ ያጋደ ቆፓድ። 23 ሽን ናአይ ሀእ ሀይቂና፥ ታን አያዉ ጾሞ? ታን ናኣ ጉየ ዛራና ዳንዳያይታ? ታን አኮ ባናፐ አትና፥ እ ታኮ ስመና” ያጌዳ።
24 ሄዋፐ ጉይያን፥ ዳዊተ ባረ ማቻቶ በርሳቤሆ ምንꬄዳ። ዳዊተ ኢኮ ገሊደ እዝና አቄዳ፤ ያትና፥ አ አዉ አቱማ ናኣ የላዱ፤ ናኣ ሶሎሞና ሱንꬄዳ፤ መꬍና ጎዳይ ሄ ናኣ ሲቄዳ። 25 መꬍና ጎዳይ ናኣ ሲቄዳ ድራዉ፥ ናኣ “ይዲድያ” ጊደ ሱንꬃና ማላ፥ ትምቢትያ ኦድያ ናታና ቦላ ኪቴዳ።
ዳዊታ መቱዋነ ቱጋ
(2 ሳሜላ 12:26—20:26)
ዳዊተ ራባ ካታማ ኦሊደ ኦይቄዳ
(1 ኦዱዋ 20:1-3)
26 ሄ ዎደ ዮኣበ አሞናቱዋ ካታማ ራባ ኦለቲደ፥ ካትያ ጌሱዋ ኦይቄዳ። 27 እዮኣበ ዳዊታኮ ኪታ የዲደ፥ “ታን ራባ ካታማ ኦላደ፥ ሃꬃ ዱቂያ ሳኣ ኦይቃድ። 28 ሄዋ ድራዉ፥ አቴዳ ኦላንቻቱዋ ሺሻደ ካታማ ኦላደ ኦይቃ። ሄዌ ꬋዮፐ፥ ታን ካታማ ኦይቃይ። ያቶፐ፥ እ ታ ሱንꬃን ጼገታና” ያጌዳ።
29 ዳዊተ ባረ ኦላንቻቱዋ ኡባ ሺሺደ፥ ራባ ካታማ ቢደ፥ ኦለቲደ ኦይቄዳ። 30 ኡንቱንቱ ካትያ ካላቻካ አ ሁጲያፐ አኬዳ። ሄ ዎርቃ ካላቻይ ሀታማነ ኦይዱ ኪሎ ግራምያ ዴጼ፤ አ ግዶን አልኦ ሹቻይ ደኤ። ሄ ካላቻ ዳዊታ ሁጲያን ዎꬄዳ። ካታማፐ ሎይꬅ ዳሮ ኦሞዱዋ ዳዊተ ኦሞዲደ አሄዳ። 31 ሄ ካታማ አሳ ያፐ ከሲደ፥ ማጋዝያን፥ ብራታ ሻልክያንነ ብራታ ካልታን ኦꬃናዳን ኦꬄዳ፤ ቃይ ኡንቱንታ ኡርቃፐ ጹብያ መꬋናዳን ኦꬄዳ። አሞናቱዋ ካታማቱዋ ኡባን ደእያ አሳ እ ሄዋዳን ኦꬄዳ። ሄዋፐ ጉይያን፥ ዳዊተነ አ ኦላንቻቱ ኡባይ የሩሳላመ ስሜድኖ።