1 ጻሩይ ናአይ እዮኣበ ካቲ ዳዊተ አበሰሎማ ላሞቴዳዋ ኤሬዳ። 2 ሄዋ ድራዉ፥ ዮኣበ ታቆአ ካታማ ኪቲደ፥ ያፐ እት ኤራንቻ ምሽራቶ አህሲደ እዞ፥ “ኔን ካዮትያ አሳዳን ሀና፤ ካዩዋ ማዩዋ ማያ፤ ሽጭስያዋ ኦከቶፓ፤ ዳሮ ዎደፐ ዶሚደ፥ ሀይቄዳ አሳዉ ካዮትያ ማጫ አሳዳን ሀና። 3 ያታደ ካትያኮ ባደ ሀ ቃላቱዋ አዉ ኦዳ” ያጌዳ። እዮኣበ አ ካትያዉ ኦዳናዋ እዝዉ ኦዴዳ።

4 ታቆአ ካታማ ምሽራታ ካትያኮ ቤዳ ዎደ፥ ቢታን ግሳ ጉፋናደ፥ “ካትያዉ፥ ታና ማዳርኪ!” ያጋዱ።

5 ካቲ እዞ፥ “ኔና አዬ መቴዳዌ?” ያጊደ ኦቼዳ።

እዛ፥ “ታን አስናይ ሀይቄዳ ማጫ አሳ። 6 ታዉ ነ ቆማትዉ ላኡ አቱማ ናናይ ደኢኖ። ኡንቱንቱ እቱ እቱዋና ደምባን ዋቴድኖ፤ ኡንቱንታ ሻካናዉ እት አሳይነ ꬋይና፥ እቱ የንኩዋ ሾጪደ ዎꬌዳ። 7 ሀእ ታ ዳቦቱ ኡባይ ታ ቦላ ደንዲደ፥ ‘ባረ እሻ እ ዎꬌዳ ድራዉ፥ ኑን አ ዎꬋናዳን ባረ እሻ ዎꬌዳዋ ኑዉ ሀማ፤ ያቲደ ኑን ላትያዋ ꬋይሳና ያጌድኖ።’ ያቶፐ፥ ኡንቱንቱ ታዉ ላታዉ አቴዳ እት ጺፋ ቶይሲኖ፤ ታ አስና ሱንꬃካ አ ዘረꬃ ቢታፐ ꬋይሲኖ” ያጋዱ።

8 ካቲ ሄ ምሽራቶ፥ “ነ ሶ ባ፤ ታን ነዉ አዛዛና” ያጌዳ።

9 ሽን ታቆአ ካታማ ምሽራታ ካትያ፥ “ታ ጎዳዉ ካትያዉ፥ ጎሚ ታናነ ታ አዉዋ ጎልያ አሳ ኦይቆ፤ ሽን ካቲነ አ ካዉተꬃ አራታይ ጌሻ ግዶ” ያጋዱ።

10 ካቲ ምሽራቶ፥ “ነ ቦላ ቃላ ቃትያ ኦናነ ታኮ አሀ፤ እ ኔና ላኤንꬆ ቦቼና” ያጌዳ።

11 ምሽራታ ካትያ፥ “ሱꬃ አችያዌ ባሻ ቦላ ባሻ ጉጀናዳንነ ታ ናኣካ ዎናዳን ካቲ መꬍና ጎዳ ባረ ጾሳ ሱንꬃን ታዉ ጫቆ” ያጋዱ።

ካቲ እዞ፥ “መꬍና ጎዳይ ኤሮ! ነ ናኣ ሁጲያ ብናናፐ እቱካ ቢታን ዎና” ያጌዳ።

12 ሄዋፐ ጉይያን፥ ምሽራታ ካትያ፥ “ታ ጎዳ ካትያዉ ታን እት ቃላ ሃሳያይ” ያጋዱ።

ካቲ፥ “ሃሳያ” ያጌዳ።

13 ሄ ምሽራታ ካትያ፥ “ያትና፥ ኔን ጾሳ አሳ ቦላ ሀዋ ማላ አያዉ ኦꬃዲ? ካቲ የደርሰዳ ባረ ናኣ ጉየ ዛርቤና ድራዉ፥ ባረ ሃሳዬዳ ቃላዉ ካቲ ባይዛንቻ ግደኔ? 14 ኑን ኡባይ ሀይቃና፤ ቢታን ጉኬዳ ሃꬃይ ስመናዋዳን፥ ኑን ላኤንꬆ ስሞኮ። ሽን ጾሳይ ቦሄቴዳ አሳይ ኡባካ ꬋየና ማላ፥ አዉ ኦግያ ጊግሴፐ አትና፥ እ ጮ ꬋያናዳን ኮየና።

15 “ታና አሳይ ያሽስያ ድራዉ፥ ታ ጎዳዉ ካትያዉ ታን ሀዋ ኦዳናዉ ሀእ ያድ። ታን ነ ቆማታ፥ ‘ታን ካትያዉ ሃሳያና፤ ኦን ኤሪ፥ ታን አ ቆማታ ኦችያዋ ካቲ ፖላነንቶነ፤ 16 ጾሳይ ኑዉ እሜዳ ላታፐ ታናነ ታ ናኣ ꬋይሳናዉ ኮይያ አሳ ኩሽያፐ ካቲ ስሲደ አሻነንቶነ’ ያጋደ ቆፓይ። 17 ቃይካ ታን ነ ቆማ፥ ‘ሎኡዋነ ኢታ ሻካናዉ ታ ጎዳይ ካቲ ጾሳ ኪታንቻ ማላ ግድያ ድራዉ፥ ታ ጎዳ ካትያ ቃላይ ታና ዎፕሶ። መꬍና ጎዳይ ነ ጾሳይ ኔናና ግዶ’ ያጋይ” ያጋዱ። 2 ሳሜላ 19:27

18 ካቲ ምሽራትዉ፥ “ታን ኔና ኦቻና ሀንያባ ዛሩዋ ኔን ታፐ ቆሶፓ” ያጌዳ።

ምሽራታ፥ “ታ ጎዳይ ካቲ ሃሳዮ” ያጋዱ።

19 ካቲ ምሽራቶ፥ “ሄዋን ኡባን እዮኣባ ኩሺ ኔናና ደኢ?” ያጊደ ኦቼዳ።

ምሽራታ፥ “ታ ጎዳዉ ካትያዉ፥ ነ ሸምፑ ኤሮ! ኔን ታ ጎዳይ ካቲ ሃሳዬዳ ኡባባፐ ኡሸቻ ዎይ ሀድርሳ ጋናዉ ዳንዳይያ እት አስካ ባዋ። ኤ፤ ሀዋ ታና አዛዜዳዌ፥ ታ ዶናን፥ ነ ቆማት ዶናን ሀዋ ዎꬄዳዌ ነ ቆማ እዮኣባ። 20 ሀእ ደእያ ሀኖታ ላማናዉ ነ ቆማይ እዮኣበ ሀዋ ኦꬄዳ። ጾሳ ኪታንቻዉ ደእያ አꬌዳ ኤራ ማላይ ታ ጎዳዉ ደኤ፤ ቢታን ሀንያዋ ኡባባ እ ኤሬዳ” ያጋዱ።

21 ካቲ እዮኣባ፥ “ዳሮ ሎአ! ታን ሀዋ ኦꬃና! ባ፤ ሄ ያላጋ ብታንያ አበሰሎማ አካደ ያ” ያጌዳ።

22 እዮኣበ ካትያ ስንꬃን ግስ ጉፋኒደ፥ ካትያ ሀዋዳን ያጊደ አንጄዳ፤ “ታ ጎዳዉ ካትያዉ፥ ነ ስንꬃን ናሸቴዳዋ ነ ቆማይ ሀቼ ኤሬዳ፤ አያዉ ጎፐ፥ ካቲ ባረ ቆማይ ኦቼዳዋ ስሴዳ” ያጌዳ።

23 ሄዋፐ ጉይያን፥ ዮኣበ ደንዲደ ጋሹራ ጋድያ ቢደ አበሰሎማ የሩሳላመ አክ ዬዳ። 24 ሽን ካቲ፥ “እ ባረ ሶ ባናዉ በሰ፤ እ ታ ዴሙዋ በኦፖ” ያጌዳ፤ አበሴሎም ባረ ሶ ቤዳ፤ ካትያ ዴሙዋካ በእቤና።

25 እስራኤልያ ኡባ ግዶን ማላ ሎኡነ አበሴሎማዳን ሳበቴዳ እት አሳይነ ባዋ። አ ሁጲያፐ ቢደ ገድያ ጹጉንꬃይ ጋካናዉካ አን ካꬍያባይ ባዋ። 26 እ ባረና ዴጽያ ዎደ ባረ ሁጲያ ብናና ቃንጽሴ፤ ባረ ሁጲያ ብናና ቃንጽስያ ዎደ ኡባን ሚዛንያን ዎꬂደ ማዛኔ፤ ካትያ ሚዛና ልክያን ላኡ ክሎነ ሄዙ ጼቱ ግራምያ ዴጼ። 27 አበሰሎማዉ ሄዙ አቱማ ናናይነ እት ማጫ ናታ የለቴድኖ፤ ማጫ ናት ሱንꬃይ ታማሮ፤ ሄ ናታ ማላ ሎኦ ማጫ አሳ ግዳዱ።

28 አበሴሎም ላኡ ላይꬃ ኩመንꬃ ካትያ ዴሙዋ በኤናን የሩሳላመን ደኤዳ። 29 “ታን ኔና ካትያኮ ኪታና ማላ፥ ታኮ ሃያ” ያጊደ አበሴሎም እዮኣባዉ ኪቴዳ፤ ሽን እዮኣበ ዬናን እጼዳ። ላኤንꬁዋካ ኪቴዳ፤ ሽን እዮኣበ አኮ ዬናን እጼዳ። 30 ሄዋፐ ጉይያን፥ አበሴሎም ባረ ቆማቱዋ፥ “ስስተ! ታ ጎሻ ማታን እዮኣባዉ ጎሻይ ደኤ፤ አዉ ሄዋን ባንጋይ ደኤ። ቢደ ታማ ኦይꬅተ” ያጌዳ። አበሰሎማ ቆማቱ እዮኣባ ባንጋ ታማ ኦይꬄድኖ።

31 ያትና፥ እዮኣበ ደንዲደ፥ አበሰሎማ ሶ ቢደ “ነ ቆማቱ ታ ባንጋ አያዉ ታማ ኦይꬄድኖ?” ያጌዳ።

32 አበሴሎም እዮኣባ፥ “ኔን ታን ኪትና ዬናን እጼዳ ድራሳ። ኔን ካትያኮ ባደ፥ ‘አበሰሎም ሀዋዳን ያጌ፤ “ታን ጋሹራ ጋድያፐ አያዉ ያድታ? ታን ሀኖ ጋካናስካ ያን ደኤዳዋ ግድንቶ ታዉ ሎአ ሽን” ያጌ’ ጋደ ታዉ ኦቻናዳን ኮያድ። ሀእካ ታን ካትያ ዴሙዋ በአናዉ ኮያድ፤ ታን ባይዛንቻ ግዶፐ፥ እ ታና ዎꬎ” ያጌዳ።

33 እዮኣበ ካትያኮ ቢደ፥ አበሴሎም ጌዳዋ ኦዴዳ። ካቲ አበሰሎማ ጼስስና አበሴሎም ሶ ገሊደ፥ ካትያ ስንꬃን ሳኣን ግሲደ ጎይኔዳ፤ ያትና፥ ካቲ አበሰሎማ የሬዳ።