1 ሄዋፐ ጉይያን፥ አበሴሎም ፓራ ጋርያ፥ ፓራቱዋነ ባረ ስንꬃን ዎጻናዉ እሻታሙ አሳቱዋ ጊግሴዳ። 2 አበሴሎም ዎንታ ጉራና ደንዲደ፥ ካታማ ፐንገ አፍያ ኦግያ ዶናን ኤቄ። ሞቱ ደእያ አይ አሳይነ ካትያ ስንꬃ ፕርዳዉ ዬዳ ዎደ፥ አበሴሎም ሄ ብታንያ ጼሲደ፥ “ኔን ሀቃ ካታማፐ ያድ?” ያጊደ ኦቼ። ሄ ብታኒ፥ “ታን ነ ቆማይ እስራኤልያ ዛራቱዋፐ እቱዋፐ ያድ” ያጊደ አዉ ዛሬ። 3 አበሴሎም አ፥ “በአ! ነ የዉ ሎአነ ሱረ፤ ሽን ካትያ ባጋፐ ነዉ ስስያዌ ባዋ” ያጌ። 4 አበሴሎም ጉጂደካ፥ “ታን እስራኤልያ ቢታን ፕርዳናዉ ሱንቴዳዋ ግዳርክታሻ! ሄዋ ግድንቶ፥ ሞቱ ዎይ የዉ ደእያ ኡባይ ታኮ ዪና፥ ታን አዉ ሱረ ፕርዳ ፕርዳና ሽን” ያጌ።

5 ኦንነ አኮ ዪደ አዉ ሆክያ ዎደ፥ አበሴሎም ባረ ኩሽያ የዲደ፥ ሄ ኡራ ኦይቂደ የሬ። 6 ፕርደታናዉ ካትያኮ ይያ እስራኤለቱዋ ኡባዉ አበሴሎም ሄዋዳን ሀኔዳ፤ ያቲደ እስራኤልያ አሳ ዎዛና አበሴሎም ዉኤዳ።

7 ኦይዱ ላይꬃፐ ጉይያን፥ አበሴሎም ካትያ፥ “ታን መꬍና ጎዳዉ ሺቄዳዋ ጋꬃናዉ ከብሮነ ጋድያ ባና። 8 ታን ነ ቆማይ ጋሹራ ጋድያን ሶርያ ቢታን ደኣደ፥ ‘ታና መꬍና ጎዳይ የሩሳላመ ጉየ አፍያዋ ግዶፐ፥ ከብሮነ ካታማን ታን መꬍና ጎዳዉ ጎይናና’ ያጋደ ሺቃ ኡታድ” ያጌዳ።

9 ካቲ አበሰሎማ፥ “ሳሮ ባ” ያግና፥ እ ደንዲደ ከብሮነ ካታማ ቤዳ።

10 ሽን አበሴሎም እስራኤልያ ዛራቱዋ ኡባኮ ቆሱዋን ኪታ የዲደ፥ “ማላካታ ፑና ህንተንቱ ስሴዳ ዎደ፥ ‘አበሰሎም ከብሮናን ካተቴዳ’ ያግተ” ያጌዳ። 11 አበሴሎም ጼስና፥ የሩሳላመፐ አናና እትፐ ቤዳ እማꬃቱ ላኡ ጼቱ አሳ፤ ሄ አሳቱ አይነ ኤረናን ጮ አሽከተꬃን ቤድኖ። 12 አበሴሎም ያርሹዋ ያርሺደ፥ ዳዊታ ዞርያ አክጾፌላ ጊሎ ካታማፐ ጼስሴዳ፤ ካትያ ቦላ ደንዴዳ ማቁ ጎቤዳ፤ አበሰሎማ ካልያዋንቱካ ጮራት ጮራት ቤድኖ።

13 እት ኪተቴዳዌ ዪደ ዳዊታ፥ “እስራኤልያ አሳ ዎዛናይ አበሰሎማኮ ስም ክቼዳ” ያጌዳ።

14 ሄዋፐ ጉይያን፥ ዳዊተ ባረናና እትፐ የሩሳላመን ደእያ ባረ ኦሳንቻቱዋ፥ “ደንድተ! ኑን ባቃቶይተ! ሄዌ ꬋዮፐ፥ ኑ ግዶፐ አይ አሳይነ አበሰሎማፐ ከስ አከና። ኑን ኤሌሊደ ባና ኮሼ፤ ሄዌ ꬋዮፐ፥ እ ኤሌል ዪደ ኑና ꬋይሳና፤ ኑ ካታማ ማሻን ቡሳካና” ያጌዳ።

15 ካትያ ኦሳንቻቱ አ፥ “ኔን ኑ ጎዳይ ካቲ ዶሬዳ ኡባባ ኑን ነ ቆማቱ ኦꬃናዉ ጊግ ኡቴዶ” ያጌድኖ።

16 ካቲ ከሲደ ቤዳ፤ አ ሶ አሳይ ኡባይ አናና እትፐ ቤዳ፤ ሽን ባረ ጎልያ ናጋናዳን ታሙ ባኮቱዋ አሼዳ። 17 ካቲ ከስና፥ አሳይ ኡባይ አናና ቤዳ፤ ካታማዉ ዉርሰꬃ ጎልያ ላንቂያን ኤቄድኖ። 18 አ ኦሳንቻቱ ኡባይ አፐ ስንꬃና ሳልፒደ አꬌድኖ፤ ኡንቱንታ ካሊደ ካትያ ናግያዋንቱ (ካልታዋቱነ ፓልታዋቱ) ሳልፔድኖ፤ ቃይ ኡንቱንታ ካሊደ ጋተ ካታማፐ ዬዳ ኡሱፑን ጼቱ አሳቱ፥ ካትያ ስንꬃና ሳልፒደ አꬌድኖ።

19 ካቲ ጋትያ እታያ፥ “ኔን ኑናና አያዉ ያይ? ጉየ ስማደ፥ ካትያ አበሰሎማና ደአሻ። ኔን አሳ ቢታ አሳ፤ ኔን በተ። 20 ኔን ሳኣ ዝኖ ያዳ፤ ታን ታ ሁጲያዉ ብያሳኣ ኤረናን ደኣደ፥ ኔና ሀቼ ዋታደ ታናና ዩሾ? ጉየ ስማ፤ ነ ጋደ አሳቱዋካ ኔናና አፋ። ጾሳይ ነዉ ኬኮነ አማነቶ!” ያጌዳ።

21 እታይ ካትያ፥ “መꬍና ጎዳይ ኤሮ! ታ ጎዳይ ካቲ ኤሮ! ታ ጎዳይ ካቲ ደእያ ሳኣን ሀቃን ግድናካ፥ እ ታዉ ሀይቆ ግድና፥ ፓጻ ግድናካ፥ ታን ነ ቆማይ ኔናና ደአና” ያጌዳ።

22 ዳዊተ እታያ፥ “ሎአ! ባደ ሳልፓ” ያጌዳ፤ ግታትያ እታይ ባረ አሳቱዋ ኡባናነ ባረ ሶ አሳ ኡባና ሳልፔዳ።

23 ሄ ኡባ አሳይ አꬍሽን፥ ሄ ጋደ አሳይ ኡባይ ባረንቱ ቃላ ꬎቂሲደ ዬኬድኖ፤ ካቲ ቀድሮና ሻፋ ፕኔዳ፤ አሳይ ኡባይካ ባዙዋ ስሚደ ቤዳ።

24 ቄስያ ጻዶቅካ ሄ ሳኣን ደኤ፤ ጾሳ ቃላ ጫቁዋ ታቦታ ቶክያ ሌዋቱካ አናና እትፐ ደኢኖ። አሳይ ኡባይ ካታማፐ ከስ ዉራና ጋካናዉ፥ ጾሳ ታቦታ ቢታን ዎꬅና፥ ቄስያ አብያታረ ያርሹዋ ያርሼዳ።

25 ሄዋፐ ጉይያን ካቲ ጻዶቃ፥ “ጾሳ ታቦታ ካታማ ጉየ አፋ። መꬍና ጎዳይ ታናን ናሸትያዋ ግዶፐ፥ ታና እ ዛረꬅ አሂደ፥ ባረ ታቦታነ ባረ ደእያ ሳኣ ላኤንꬁዋ በሳና። 26 ሽን እ፥ ታን ኔናን ናሸትከ ጎፐ፥ ‘እ ባረና ሎእያዋ ኦꬆ፤’ ታን ሀዋን ደአይ” ያጌዳ።

27 ቃይካ ካቲ ቄስያ ጻዶቃ፥ “ስሳ፤ ኔን ነ ናኣ አህማኣጻነ አብያታራ ናኣ ዮናታና አኬዳ ካታማ ሳሮ ባ። 28 ህንተንቱ ታና ኤርሳናዉ ቃላ ኪታና ጋካናዉ፥ ታን ዎራን ደእያ ሻፋ ፕኑዋን ደአሻና” ያጌዳ። 29 ሄዋ ድራዉ፥ ጻዶቅነ አብያታረ ጾሳ ታቦታ የሩሳላመ ጉየ አፌድኖ፤ ያን ደኤድኖ።

30 ሽን ዳዊተ ዬኪደ ዳብረ ዛይተ ፑደꬃ ከሴዳ። እ ካዮ ባረ ሁጲያ ጉሎት ኡቴዳ፤ እ መላ ገድያን ሀመቴዳ፤ አናና ደእያ አሳቱካ ጉሎት ዬኪደ ፑደꬃ ከሴድኖ። 31 አሳይ ዳዊታው፥ “አክጾፌልካ አበሰሎማና ማቀትያዋንቱ ግዶን ደኤ” ያጊደ ኦዴድኖ።

ዳዊተ፥ “አቤት መꬍና ጎዳዉ፥ አክጾፌላ ዞርያ ኤያተꬃዉ ላማ” ያጊደ ዎሴዳ።

32 ዳዊተ አሳይ ጾሳዉ ጎይንያ ሳኣ፥ ደርያ ሁጲያ ጋኬዳ ዎደ፥ አርክያ ሁሻይ ካዮ ባረ ማዩዋ ፔꬊደ፥ ባረ ሁጲያንካ ባና ቆሊደ፥ ዳዊታና ጋከታናዉ ዬዳ። 33 ዳዊተ አ፥ “ኔን ታናና ብያዋ ግዶፐ፥ ኔን ታዉ ቶኮ ከሳና። 34 ሽን ኔን ካታማ ጉየ ስማደ አበሰሎማ፥ ‘ካትያዉ፥ ታን ነ ቆማ ግዳና፤ ሀዋፐ ካሰ ነ አዉዋ ቆማ ግዴዳዋዳንካ ነዉካ ቆማ ግዳና’ ያጎፐ፥ አክጾፌላ ዞርያ ሀልሳደ ታና ማዳና። 35 ቄሳቱ ጻዶቅነ አብያታረ ኔናና ያን እትፐ ደአናዋ ግድክኖ? ኔን ካትያ ሶን ስስያዋ ኡባ ኡንቱንቶ ኦዳ። 36 ጻዶቃ ናኣ አህማኣጽነ አብያታራ ናኣ ዮናታን ያን ኡንቱንቱና ደኢኖ፤ ኔን ስስያዋ አያነ ኡንቱንቱ ቦላ ታዉ ኪታ” ያጌዳ።

37 አበሴሎም የሩሳላመ ገልሽን፥ ዳዊታ ላጊ ሁሻይካ ካታማ ጋኬዳ።