1 ዳዊተ ደርያ ሁጲያፐ ሄፍንꬃ ባጋና አꬍሽን፥ ጺባ ጌተትያ ማንፍቦሼታ ቆማይ አናና ጋከቴዳ፤ ላኡ ጼቱ ባሶ ኡክꬃ፥ ዎይንያ ቴራ ኡክꬃ ጼቱዋ፥ ባላስያ ቴራ ኡክꬃ ጼቱዋነ እት ኦጎሩዋ ዎይንያ ኤሳ ላኡ ሀረቱዋን ጫኔዳ። 2 ሳሜላ 9:9-10

2 ካቲ ጺባ፥ “ሀዋ አያዉ አሃድ?” ያጊደ ኦቼዳ።

ጺብ፥ “ሀረቱ ካትያ ሶ አሳይ ቶጋናዉ፤ ኡክꬃይነ ዱማ ዱማ አይፍያ አሳቱ ማናዳና፤ ቃይ ዎይንያ ኤሳይ ዎራን ዳቡርያዋንታ ኡሻናዉ” ያጌዳ።

3 ሄዋፐ ጉይያን ካቲ ጺባ፥ “ነ ጎዳ ናኣ ናአይ ሀቃን ደኢ?” ያጊደ ኦቼዳ።

ጺብ፥ “እ፥ ‘እስራኤልያ አሳይ ታ አዉዋ አዉዋ ካዉተꬃ ሀቼ ታዉ ዛር እማና’ ያጊደ የሩሳላመን ኡቴዳ” ያጌዳ። 2 ሳሜላ 19:26-27

4 ካቲ ጺባ፥ “በአ! ማንፍቦሼታዉ ደእያባይ ኡባይ ሀእ ኔሳ” ያጌዳ።

ጺብ፥ “ኤኖ ታ ጎዳዉ ካትያዉ! ታን ቢታን ጉፋናይ፤ ታን ኔና ናሸችያዋ ኦꬃና” ያጌዳ።

5 ካቲ ዳዊተ ባሁሪማ ጌተትያ ካታማ ዬዳ ዎደ፥ ሳኦላ ዳቦ ግድያ እት ብታኒ ሄዋፐ ከሴዳ። አ ሱንꬃይ ጌራ ናኣ ሽምአ። እ ዳዊታ ሸቂደ ከሴዳ። 6 ዳዊታ ቦላነ ካትያ ኦሳንቻቱ ቦላ ሹቻ ኦሌ፤ እ ሄዋ ኦꬅያ ዎደ፥ ኦላንቻቱ ኡባይነ ካትያ ናግያዋንቱ ኡሸቻናነ ሀድርሳና ካትያ ዳዊታ ዶድ ዎꬄድኖ። 7 ሽምእ ዳዊታ ሸቂደ፥ “ክቻ፤ ክቻ! ሀ ሱꬃ ጉስያዌ! ሀ ፓናዌ! 8 ኔን ሳኦላ ካዉተꬃ ዉኣደ ካተታዳ፤ ኔን ጉሴዳ ሳኦላ አሳ ሱꬃ ኡባ መꬍና ጎዳይ ነ ቦላ ዛሬዳ፤ ቃይ መꬍና ጎዳይ ካዉተꬃ ነ ናኣ አበሰሎማዉ ሼꬌዳ። ኔን ሱꬃ ጉሴዳ አሳ ግድያ ድራዉ፥ ኔን ꬋይያ ዎዲ ጋኬዳ” ያጌዳ።

9 ሄዋፐ ጉይያን፥ ጻሩይ ናአይ አብሻይ ካትያ፥ “ሀ ካና ባኩታይ ታ ጎዳ ካትያ አያዉ ሸቂ? ታን ባደ አ ቆꬍያ ሙጫይ” ያጌዳ።

10 ካቲ፥ “ህንተንቶ፥ ጻሩይ ናቶ፥ ህንተንታ ጋꬅያዌ አዬ? መꬍና ጎዳይ አ፥ ዳዊታ ሸቃ ያጌዳ ድራዉ እ ሸቂያዋ ግዶፐ፥ ‘ኔን አያዉ ሀዋ ኦꬃይ?’ ያጊደ ኦቻናዉ ዳንዳይያዌ ኦኔ?” ያጌዳ።

11 ሄዋፐ ጉይያን፥ ዳዊተ አብሻያነ ባረ ቆማቱዋ ኡባቱዋ፥ “ታ ናአይ፥ ታ አሹ፥ ታና ዎꬋናዉ ኮዬ፤ ያትና፥ ሀ ቢንያማ አሳይ ዎት አጊቴ! አ ቦቾፕተ፤ እ ባሽና ሸቆ! አያዉ ጎፐ፥ መꬍና ጎዳይ አ አዛዜዳ። 12 ኦን ኤሪ፥ መꬍና ጎዳይ ታ መቱዋ በኢደ፥ ታን ሀቼ አክያ ሸቃ ድራዉ ታዉ ኬካ ዛራነንቶነ” ያጌዳ።

13 ዳዊተነ አ አሳይ ኦግያ ኦይቂደ ቢኖ። ሽምእካ ደርያፐ ህን ባጋና፥ ዳዊታ ሄራና ቢደ አ ሸቄነ ሹቻ አ ቦላ ኦሌ፤ ባናካ አ ቦላ ላሌ። 14 ካቲነ አናና ደእያ አሳቱ ባረንቱ ብያሳኣ ዳቡሪደ ጋኬድኖ። ካቲ ያን ሸምፔዳ።

15 አበሰሎምነ እስራኤልያ አሳቱ ኡባይ የሩሳላመ ገሌድኖ፤ አክጾፌልካ ኡንቱንቱና እትፐ ደኤ። 16 ዳዊታ ላጊ አርክያ ሁሻይ አበሰሎማኮ ዪደ፥ “ካትያ ሸምፑ ጋምኦ! ካትያ ሸምፑ ጋምኦ!” ያጌዳ።

17 አበሴሎም ሁሻያ፥ “ኔን ነ ላግያ ሲቄዳ ሲቁ ሀዌካ? ነ ላግያና አያዉ ባበይኪ?” ያጌዳ።

18 ሁሻይ አበሰሎማ፥ “ቱይት! መꬍና ጎዳይነ ሀ አሳይ ቃይ እስራኤልያ አሳይ ኡባይነ ዶሬዳዎ ታን አቃና፤ ታን አናና አታና። 19 ሄዋፐካ ቃይ ታን ኦዉ ኦꬃኔ? አ ናአዉ ኦꬃናዉ በስክታየ? ታን ነ አዎ ኦꬄዳዋዳን ሀእ ነዉካ ኦꬃና” ያጌዳ።

20 አበሴሎም አክጾፌላ፥ “ኔን አነ ኑና ዞራ፤ ኑን አይ ኦꬃነ?” ያጌዳ።

21 አክጾፌል አበሰሎማ፥ “ካትያ ጎልያ ናጋናዉ አቴዳ ነ አዉዋ ባኮቱዋና ባደ ግሳ፤ ኔን ነ አዉዋ ሲꬍያን ጽንቄዳዋ እስራኤልያ አሳይ ኡባይ ስሳና፤ ኔናና እትፐ ደእያ ኡባቱዋ ኩሺ ሄዋን ምናና” ያጌዳ። 22 ካትያ ጎልያ ቦላን ደምባዪደ ኦꬄዳ ሳኣን፥ አበሰሎማዉ ዱንካንያ ቶሌድኖ፤ አሳይ ኡባይ ጼልሽን አበሴሎም ገሊደ፥ ባረ አዉዋ ባኮቱዋና ግሴዳ። 2 ሳሜላ 12:11-12

23 ሄ ጋላሳቱዋን አክጾፌል አ ዞሬዳ ዞርያ እት አሳይ ጾሳ ኦቺደ አክያ ዞርያ ማላ። ዳዊተነ አበሰሎምነ ላአቱካ አክጾፌላ ዞርያ ኡባ አኬዳዌ ሀዋዳና።