1 “አበሰሎማዉ ካቲ ዬኬነ ዝላሌ” ያጊደ እዮኣባዉ ኦዴድኖ። 2 ኦላንቻቱ ኡባይ፥ “ካቲ ባረ ናአዉ ዬኬ” ግያዋ ስሴዳ ድራዉ፥ ሄ ጋላስ ኡንቱንቱ ኡባይ ጾኔዳ ጾኑ ዬኮ ላመቴዳ። 3 ኦላፐ ባቃቲደ ዬላቴዳ ኦላንቻቱዋዳን፥ አሳይ ሄ ጋላስ ዉኤቲደ ካታማ ገሌዳ። 4 ካቲ ባረ ዴሙዋ ጉሎቴዳ፥ ባረ ቃላ ꬎቂሲደ፥ “አየ ታ ናአዉ አበሰሎማ! አየ አበሰሎማ ታ ናአዉ! ታ ናአዉ!” ያጊደ ዝላሌዳ።

5 ሄዋፐ ጉይያን፥ እዮኣበ ሄ ጎልያ ቢደ ካትያ፥ “ነ ሸምፑዋ፥ ነ አቱማ ናናቱዋን ነ ማጫ ናናቱዋ ሸምፑዋ፥ ነ ማቼቻቱዋነ ነ ባኮቱዋ ሸምፑዋ ሀቼ አሼዳ ነ አሳ ኡባ ኔን ሀቼ ካዉሻዳ። 6 ኔና እጽያዋንታ ኔን ሲቃሳ፤ ኔና ሲቅያዋንታ ኔን እጻሳ። ነ ኦላንቻቱነ ኡንቱንቱ ካፓቱ ነዉ አያነ ግደናዋ ኔን ሀቼ ቆንጭሳዳ። ኑን ኡባይ ሀይቂና፥ አበሴሎም ሀቼ ፓጻ አቴደንቶ፥ ኔን ናሸታናዋ ታን በኣድ። 7 ሀእ ደንዳ! ካረ ከሳደ ነ አሳ ምንꬃ። መꬍና ጎዳይ ኤሮ! ኔን ከሳና ꬋዮፐ፥ ሀቼ ቃማ ኔናና እት አሳይነ አተና። ነ ያላጋተꬃፐ ሀቼ ጋካናዉ፥ ኔና ጋኬዳ ኢታ ኡባፐ ሀዌ ነዉ አꬍያ ኢታ ግዳና” ያጌዳ።

8 ካቲ ደንዲደ ግምቢያ ፐንግያን ኡቴዳ። “ካቲ ፐንግያን ኡቴዳ” ግያዋ አሳቱ ኡባይ ስሴዳ ዎደ፥ ካትያ ስንꬃ ዬድኖ።

ሄ ዎደ እስራኤልያ አሳቱ ኡባይ ባረንቱ ሶ ባረንቱ ሶ ባቃቴድኖ። 9 እስራኤልያ ዛራቱ ኡባይ እቱ እቱዋና ሀዋዳን ያጊደ ፓሉመቲኖ፤ “ካቲ ዳዊተ ኑና ኑ ሞርከቱዋ ኩሽያፐ አሼዳ፤ ኑና ፕልስጼማ አሳቱዋ ኩሽያፐ ዎꬅ አኬዳ፤ ሽን እ ሀእ አበሰሎማ ጋሱዋን ቢታ አጊደ ባቃቴዳ። 10 ኑ ቦላ ካተታናዳን ኑን ኦኬዳ አበሴሎም ኦላን ሀይቂክቼዳ። ያትና፥ ካትያ ጉየ አሀናዉ ህንተንቱ አያዉ ጮኡ ጌድቴ?” ያጌድኖ።

11 ካቲ ዳዊተ ቄሳቶ ጻዶቃዉነ አብያታራዉ ኪታ የዲደ፥ “ይሁዳ ጭማቱዋ ሀዋዳን ያግተ፤ ‘ዳዊተ ሀዋዳን ያጌ፤ “እስራኤልያ አሳይ ኡባይ ሃሳይያዌ ካትያ ጋኬዳ። ካትያ አ ጎልያ ዛር አሀናዉ ህንተንቱ አያዉ ሀራቱዋፐ ጉየ አቲቴ? 12 ህንተንቱ ታ እሻቱዋ፤ ህንተንቱ ታ አሾነ ታ ሱꬃ። ያትና፥ ካትያ ጉየ ዛር አሀናዉ ህንተንቱ አያዉ ሀራቱዋፐ ጉየ አቲቴ?” ያጌ’ ያግተ። 13 ቃይ አማሳዮዉካ፥ ‘ዳዊተ ኔና፥ “ኔን ታ አሾነ ታ ሱꬃ ግድኪ? ሀችፐ ዶምና፥ ታን ኔና እዮኣባ ሳኣን ታ ኦላንቻቶ ጋዳዋ ከሳና ꬋዮፐ፥ ጾሳይ ታና ዎꬎ!” ያጌ’ ያግተ” ያጌዳ።

14 ካትያ ሃሳያይ ይሁዳ አሳቱዋ ኡባ ዎዛና እቱዋ ኦꬂደ ማይዜዳ። ሄዋ ድራዉ፥ ኡንቱንቱ ካትያኮ ኪቲደ፥ “ኔንካ ነ አሳይ ኡባይካ ሃ ስምተ” ያጌድኖ። 15 ካቲ ስሚደ፥ ዮርዳኖሳ ሻፋ ጋካናዉ ዬዳ። ይሁዳ አሳቱ ካትያ ሞካናዉነ ዮርዳኖሳ ሻፋ ፕንꬃናዉ፥ ገልጋላ ግያ ሳኣ ዬድኖ።

16 ባሁሪማ ካታማፐ ዬዳ ቢንያማ ዛሪ፥ ጌራ ናአይ ሽምእ ዳዊታ ሞካናዉ ኤሌሊደ፥ ይሁዳ አሳቱዋና ቤዳ። 2 ሳሜላ 16:5-13 17 አናና ቢንያማ ዛረ ግዴዳ ሻአ አሳቱ፥ ሳኦላ ሶ ቆማይ ጺብ፥ አ ናናይ ታማነ እቼሻቱነ አ ቆማቱ ላታማቱ ደኢኖ። ኡንቱንቱ ካቲ ደእያ ሳኣ ዮርዳኖሳ ሻፋ ጃሚደ ቤድኖ። 18 ካትያ ሶ አሳ ፕንꬃናዉነ ካትያ ናሸችያዋ ኦꬃናዉ ፕኑዋና ፕኒደ ቤድኖ።

ጌራ ናአይ ሽምእ ዮርዳኖሳ ሻፋ ፕኔዳ ዎደ፥ ካትያ ስንꬃን ጉፋኒደ፥ 19 ሀዋዳን ያጌዳ፤ “ታ ባይዙዋ ካቲ አቶ ጎ። ታ ጎዳይ ካቲ የሩሳላመፐ ከስያ ጋላስ ታን ነ ቆማይ ባሌዳ ባላ ኔን ሀሳዮፓ። ሄዋ ነ ኡሉዋን ኦይቆፓ። 20 አያዉ ጎፐ፥ ነ ቆማይ ታን ናጋራ ኦꬄዳዋ ኤራይ፤ ሽን ኔና ታ ጎዳ ካትያ ሞካናዉ፥ ዮሴፎ ሶ አሳ ኡባፐ ኮይሮታደ ታን ሀቼ ያድ” ያጌዳ።

21 ሄዋፐ ጉይያን፥ ጻሩይ ናአይ አብሻይ፥ “ሽምእ መꬍና ጎዳይ ኦኬዳ ካትያ ሸቄዳ ድራዉ፥ እ ሀይቃናዉ በሰኔየ?” ያጌዳ።

22 ዳዊተ አብሻያ፥ “ህንተንቶ፥ ጻሩይ ናቶ፥ ህንተንታ ጋꬅያዌ አዬ? ህንተንቱ ሀቼ ታዉ ሞርከ ግዲቴ! ሀቼ እስራኤላን አይ አሳይነ ሀይቀና! ሀቼ እስራኤልያ ካቲ ታናቴ!” ያጌዳ።

23 ካቲ ሽምአ፥ “ኔን ሀይቃካ” ያጊደ አዉ ጫቄዳ።

24 ቃይ ሳኦላ ናአይ ማንፍቦሼተ ካትያ ሞካናዉ ዱገ ዎꬌዳ። ካቲ ቤዳ ጋላሳፐ ዶሚደ፥ እ ሳሮተꬃን ጉየ ስምያ ጋላስ ጋካናዉካ፥ ማንፍቦሼተ ባረ ገድያ ሜጭቤና፤ ባረ ቡቻ ሜድቤና፤ ቃይ ባረ ማዩዋካ ሜጭቤና። 2 ሳሜላ 9:1-13፤ 16:1-14 25 ማንፍቦሼተ ካትያና ጋከታናዉ የሩሳላመፐ ዬዳ ዎደ፥ ካቲ አ፥ “ማንፍቦሼታ፥ ኔን ታናና አያዉ ባበይኪ?” ያጊደ ኦቼዳ።

26 እ፥ “ታ ጎዳዉ ካትያዉ፥ ታን ነ ቆማይ ስላ ግድያ ድራዉ፥ ‘ታን ቶጋደ ካትያና ባናዳን ታ ሀርያ ኮራ’ ያጋድ። ሽን ታ ቆማይ ጺብ ታና ጭሜዳ፤ 27 ታና ነ ቆማ ታ ጎዳዉ ካትያዉ ዝግሬዳ። ኔን ታ ጎዳይ ካቲ ጾሳ ኪታንቻ ማላ፤ ሄዋ ድራዉ፥ ኔና ናሸችያዋ ኪተታ። 28 ታ አዉዋ አዉዋ አሳይ ኡባይ ሀራባ ግደናን፥ ታ ጎዳይ ካቲ በን ዎꬋናዉ በስያ አሳ፤ ሽን ታን ነ ቆማይ ነ ማዳፐ ምያዋንቱና ማናዳን ኔን ታዉ ሳኣ እማዳ። ያትና፥ ታን ሀዋፐ አꬍያዋ ካትያ ኦቻናዉ ታዉ አይባ ማታይ ደኢ?” ያጌዳ።

29 ካቲ አ፥ “ኔን ዳሮባ ሃሳያናዉ ኮሸና። ኔንነ ጺብ ጋድያ ሻክ አካና ማላ ታን አዛዛይ” ያጌዳ። 30 ማንፍቦሼተ ካትያ፥ “ታ ጎዳይ ካቲ ሳሮ ሶ ስማፐ አትና፥ ኡባባካ ጺብ አኮ” ያጌዳ።

31 ጋላኣድያ ባርዝላይ ካትያና እትፐ ዮርዳኖሳ ሻፋ ፕናናዉነ ያፐ አ ሞይዛናዉ ሮጋሊማ ግያ ሳፐ ዬዳ። 2 ሳሜላ 17:27-29 32 ባርዝላይ ላይꬃይ ሆስፑን ታሙዋ ግዴዳ ጭማ አሳ። እ ዳሮ ዱረ አሳ ግድያ ድራዉ፥ ካቲ ማህናይማ ካታማን ደእያ ዎደ፥ ካትያዉ ኮሽያዋ እሜዳ። 33 ካቲ ባርዝላያ፥ “ኔን ታናና የሩሳላመ ደንዳ፤ ታን ኔው ያን ኮሽያዋ እማና” ያጌዳ።

34 ሽን ባርዝላይ ካትያ፥ “ታን ሀዋፐ ስንꬃን ዳሮ ላይꬃ ደእከ፤ ያትና፥ ታን ካትያና የሩሳላመ አያዉ ቦ? 35 ታን ሀእ ሆስፑን ታሙ ላይꬃ አሳ፤ ታን ሀእ ኢታነ ሎኡዋ ሻካደ ኤራናዉ ዳንዳያይታ? ታን ነ ቆማይ ታ ምያዋነ ኡሽያዋ ማልኡዋ ሻካደ ኤራናዉ ዳንዳያይታ? አቱማዋንቱነ ማጫዋንቱ የጽያ የꬃ ታን ስሳናዉ ዳንዳያይታ? ያትና፥ ታን ነ ቆማይ ታ ጎዳዉ ካትያዉ አያዉ ጉጃ ቶኮ ግዶ? 36 ታን ነ ቆማይ ዮርዳኖሳ ሻፋ ፕናደ ኔና ላፋ ሞይዛና። ሽን ካቲ ታዉ ሄዋዳን ኩሸ ዛራናዉ አያዉ ኮሺ? 37 ታን ታ አዉዋነ ታ ዳይ ዱፉዋ ማታን ታ ካታማን ሀይቃና ማላ ስማይ። ታ ናአይ ክምሃም ሀዌሽ፤ ታ ጎዳና ካትያና እትፐ እ ቦ፤ ኔና ናሸችያዋ ኔን አዉ ኪተታ” ያጌዳ።

38 ካቲ፥ “ክምሃም ታናና ፕኖ፤ ኔና ናሸችያዋ ታን አዉ ኦꬃና። ቃይ ኔን ታና ኦችያዋ አያነ ታን ነዉ ኦꬃና” ያጌዳ። 39 ሄዋፐ ጉይያን፥ አሳይ ኡባይ ዮርዳኖሳ ሻፋ ፕኔዳ፤ ካቲካ ፕኔዳ። ባርዝላያ የሪደ አንጄዳ፤ ያትና፥ ባርዝላይ ባረ ሶ ስሜዳ።

40 ካቲ ፕኒደ ገልጋላ ብያ ዎደ፥ ክምሃምካ አናና እትፐ ቤዳ። ይሁዳ ኦላንቻቱ ኡባቱነ እስራኤልያ ኦላንቻቱዋፐ ባጋቱ ካትያና እትፐ ቤድኖ።

41 ሄዋፐ ጉይያን፥ እስራኤላቱ ኡባይ ካትያኮ ቢደ፥ “ኑ እሻቱ ይሁዳ አሳቱ ካትያነ አ ሶ አሳ አያዉ ዉኤድኖ? ቃይ አ አሳ ኡባና እትፐ ዮርዳኖሳ ሻፋ አያዉ ፕንꬄድኖ?” ያጌድኖ።

42 ይሁዳ አሳቱ ኡባይ እስራኤላቱዋ፥ “ካቲ ኑዉ ማታ ዳቦ ግድያ ድራዉ፥ ኑን ሀዋ ኦꬄዶ፤ ያትና፥ ህንተንቱ ሄዎ አያዉ ሀንቀትተ? ኑን ካትያ ቁማፐ አየንቶ ሜድኖየ? ዎይ ኑን አፐ አየንቶ ኑዉ አኬዶየ?” ያጌድኖ።

43 እስራኤልያ አሳቱ ይሁዳ አሳቱዋ፥ “ካትያፐ ታሙ ኩሺ ኑና ጋꬄ፤ ሄዋ ድራዉ፥ ዳዊታ ማታን ኑዉ ህንተፐ አꬎ ማታይ ደኤ! ያትና፥ ህንተንቱ ኑና አያዉ ካꬌድቴ? ኑ ካትያ ጉየ ዛሪደ አሀናዉ ካሰቲደ ሃሳዬዳዌ ኑና ግዶኮ?” ያጌድኖ።

ሽን እስራኤልያ አሳቱዋፐ ይሁዳ አሳቱ ሃሳያ ሎይꬅ ዎልቃንꬄድኖ።