1 ቢንያማ ዛረ ግድያ ቢክራ ናአይ ሸባአ ጌተትያ እት ሾር ባይና ብታኒ ያን ደኤ። ሄ ብታኒ ማላካታ ፑኒደ፥ “ኑን ዳዊታና አክያ ኤጻይ ባዋ! እሰያ ናኣና ኑን ላታናባይ ባዋ! እስራኤልያ አሳቶ፥ ኡባይካ ህንተንቱ ሶ ህንተንቱ ሶ ገልተ!” ያጌዳ። 1 ካታ. 12:16፤ 2 ኦዱዋ 10:16 2 እስራኤልያ አሳቱ ኡባይ ዳዊታ አጊደ፥ ቢክራ ናኣ ሸባኣና ቤድኖ። ሽን ይሁዳ አሳቱ አማነቲደ፥ ዮርዳኖሳፐ የሩሳላመ ጋካናዉ፥ ባረንቱ ካትያ ካሌድኖ።

3 ዳዊተ ባረ ሶ የሩሳላመ ስሜዳ ዎደ፥ ካትያ ጎልያ ናጋናዉ አሼዳ ታሙ ባኮቱዋ አክ አፊደ፥ እት ጎለን ናግስ ዎꬄዳ፤ ኡንቱንቶ ኮሽያዋ እሜዳ፤ ሽን እ ኡንቱንቱና አቅቤና። ኡንቱንቱ ሄ ጎለን ናገቲደ፥ ባረንቱ ሀይቁዋ ጋላሳይ ጋካናዉ አምእያዳን ደኤድኖ። 2 ሳሜላ 16:22

4 ሄዋፐ ጉይያን ካቲ አማሳ፥ “ይሁዳ አሳ ኡባ ሄዙ ጋላሳን ታዉ ጼሳደ ሺሻ፤ ያታደ ኔንካ ነ ሁጲያዉ ኡንቱንቱና ሺቃ” ያጌዳ። 5 አማስ ይሁዳ አሳቱዋ ጼሳናዉ ቤዳ፤ ሽን ካቲ አዉ ኬሬዳ ጋላሳፐ ጋምኤዳ።

6 ዳዊተ አብሻያ፥ “ሀእ ቢክራ ናኣ ሸባእ አበሰሎማዋፐካ አꬂደ ኑና ቆሀናዋ። ነ ጎዳ ቆማቱዋ አካደ ኔን አ ቃታማ ካላ። ሄዌ ꬋዮፐ፥ እ ግምበቴዳ ካታማቱዋ ደሚደ ኑፐ ከስ አካና” ያጌዳ። 7 እዮኣባ አሳቱ፥ ካትያ ናግያዋንቱነ ምኖ ኦላንቻቱ ኡባይ አብሻያና ቢክራ ናኣ ሸባአ የደርሳናው የሩሳላመፐ ከሲደ ቤድኖ።

8 ኡንቱንቱ ቢደ ጋባኦናን ደእያ ዎጋ ዛላ ጋክያ ዎደ፥ አማስ ኡንቱንቱና ጋከታናዉ ዬዳ፤ እዮኣበ ኦላ ማዩዋ ማይ ኡቴዳ፤ ባረ ጼሳን ማሻ ሾኩዋና አꬅ ዎꬄዳ ሳቂያ ዳንጬዳ። እ ስንꬃዉኮ ታንግሽን፥ ሄ ማሻይ ሾኩዋፐ ከስ አኪደ ዎꬌዳ።

9 እዮኣበ አማሳ፥ “ታ እሻዉ፥ ኔን ሳሮ ደአይ?” ያጌዳ፤ እዮኣበ አማሳ የራናዉ ባረ ኡሸቻ ኩሽያን አ ቡቻ ኦይቄዳ። 10 ሽን አማስ እዮኣባ ሀድርሳ ኩሽያን ደእያ ማሻ በእቤና፤ ሄዋ ድራዉ፥ አፐ ናገትቤና። እዮኣበ አ ኡሉዋ ጫዲደ፥ አ ማራጭያ ቢታን ቆቆፌዳ፤ ላኤንꬁዋ ጫደተናንካ አማስ ኤለካ ሀይቂ ባሼዳ።

ሄዋፐ ጉይያን፥ እዮኣብነ አ እሻ አብሻይ ቢክራ ናኣ ሸባአ ቃታማ ካሌድኖ። 11 እዮኣባ አሳቱዋፐ እቱ አማሳ አሀ ማታን ኤቂደ፥ “እዮኣባ ዶስያዌነ ዳዊተዋ ግድያዌ ኦንነ እዮኣባ ካሎ” ያጌዳ። 12 አማስ ኦግያ ግዶ ባጋን ኩንዲደ፥ ባረ ሱꬃን ባዪደ ግሴዳ። ኦላንቻቱ ኡባይ ዪደ፥ ሄ ሳኣን ኤቄዳዋ ሄ ብታኒ በኤዳ ሳናካ አማሳ አሃ ኦግያፐ ጋጻ ሾይቃዉ ጎች የጊደ፥ አ ቦላ ማዩዋ ኦሌዳ። 13 አማሳ ኦግያፐ ድጌዳዋፐ ጉይያን፥ ቢክራ ናኣ ሸባአ ፓና ካላናዉ ኦላንቻቱ ኡባይ እዮኣባና ቤድኖ።

14 ሸባእ እስራኤልያ ዛራቱዋ ኡባ ቢታና አꬊደ፥ አቤል-ቤትማእካ ግያ ካታማ ጋኬዳ። ቤራቱዋ ቢታና አꬍሽን፥ አሳይ ኡባይ ሺቂደ አ ካሌዳ። 15 እዮኣባና ደእያ አሳቱ ኡባይ ጋኪደ፥ ሸባአ አቤል-ቤትማእካ ካታማን ዩይ አꬊደ ዶዴድኖ። ኡንቱንቱ ካታማ ግምቢያን ዘምፕሲደ ቢታ ዶሬድኖ። ቃይ እዮኣባና ደእያ አሳቱ ኡባይ ግምቢያ ኮላናዉ ቦክኖ። ኡንቱንቱ ቦክሽን፥ 16 ካታማፐ እት ኤራንቻ ምሽራታ ኡንቱንታ ጼሳደ፥ “ስስተ! ስስተ! ቢደ፥ እዮኣባ ጼግተ። ታን አዉ ኦድያባይ ደኤ” ያጋዱ። እ ምሽራትኮ ቢና አ፥ 17 “ኔን እዮኣቤ?” ያጋደ ኦቻዱ።

እ፥ “ኤ፥ ታና” ያጌዳ።

ምሽራታ አ፥ “ታን ነ ቆማታ ግያዋ ስሳ” ያጋዱ።

እዮኣበ፥ “ታን ስሳይ” ያጌዳ።

18 ምሽራታ እዮኣባ፥ “በን ዎደ አሳይ ‘አቤላ ካታማፐ ነ ኦሻዉ ዛሩዋ ደማ’ ያጌ፤ ሄዋን የዉ ዉሬ። 19 እስራኤልያ ግዶን ሳሮ ደእያ አማነትያ አሳይ ኑና። እስራኤልያ ቢታን ደእያ አየ ካታማ ኔን ባይዛናዉ ማላሳ። ኔን መꬍና ጎዳ ቡዞ ቢታ አያዉ ꬋይሳናዉ ኮያይ?” ያጋደ ሃሳያዱ።

20 እዮኣበ እዞ፥ “ሄዌ ታፐ ሃኮ! ባይዝያዌ ዎይ ꬋይስያዌ ታፐ ሃኮ! 21 የዉ ሄዋ ግደና፤ ኤፍሬማ ገዝያፐ ቢክራ ናኣ ሸባአ ጌተትያ እት ብታኒ ካትያ ዳዊታ ቦላ ባረ ኩሽያ ደንꬄዳ። ሄ ብታንያ ታዉ ሼꬍተ፤ ያቶፐ፥ ታን ካታማፐ ባና” ያጌዳ።

ምሽራታ እዮኣባ፥ “አ ሁጲ ግምቢያ ጼራና ነዉ ኦለታና” ያጋዱ።

22 ሄዋፐ ጉይያን፥ ምሽራታ ባረ ኤራ ዞርያና አሳ ኡባኮ ባዱ። ሄዋ ድራዉ፥ አሳይ ቢክራ ናኣ ሸባአ ቆꬍያፐ ሁጲያ እዮኣባዉ ኦሌዳ። ያትና፥ እዮኣበ ማላካታ ፑኔዳ፤ አሳይ ኡባይ ካታማፐ ከሲደ፥ ባረ ሶ ባረ ሶ ቤዳ፤ እዮኣበ ካትያኮ የሩሳላመ ስሜዳ።

23 እዮኣበ እስራኤልያ ኦላንቻቱ ኡባዉ ጋዳዋ፤ ዮዳሄ ናአይ ባናይ ዳዊታ ናግያ ኦላንቻቱ ካፑዋ። 24 አዶንራም ዎልቃን ጮ ኦꬅያዋንቱ ካፑዋ፤ አህሉዳ ናአይ ዮሳፌጸ ሀኔዳባ ጻፍያዋ። 25 ሱስ ዋና ጻፍያ፤ ጻዶቅነ አብያታረ ቄሳቱ ዋ። *ሱስ፦ እብራዌꬁዋን “ሻዋ” ጌተቴ፤ ሀ ብታኒ እብራዌꬁዋን ኦይዱ ዱማ ዱማ ሱንꬃን ጼሰቴ። 26 ያኢራ ካታማ አሳ ግድያ እርካ ዳዊታዉ ቄሳቱዋ።