1 ዳዊተ ካተቴዳ ዎደ፥ ሄዙ ላይꬃ ኩመንꬃ ቢታይ ኮሻቴዳ። ሄዋ ድራዉ፥ ዳዊተ መꬍና ጎዳ ኦቼዳ፤ መꬍና ጎዳይ አ፥ “ሄዌ ሀኔዳዌ ሳኦላ አሳይ ጉሴዳ ሱꬃ ድራሳ፤ አያዉ ጎፐ፥ እ ጋባኦና አሳቱዋ ዎꬌዳ” ያጌዳ።

2 ሄዋ ድራዉ፥ ካቲ ጋባኦና አሳቱዋ ጼሲደ ሃሳይሴዳ። ጋባኦና አሳቱ እስራኤልያ ዛርያ ግድክኖ፤ ኡንቱንቱ አሞረ ቢታ አሳቱዋፐ አቴዳዋንታ። እስራኤላቱ ኡንቱንታ አሻናዉ ኡንቱንቱና ጫቀቴድኖ፤ ሽን ሳኦል እስራኤልያዉነ ይሁዳዉ ምሸቴዳ ድራዉ፥ ኡንቱንታ ኡባና ꬋይሳናዉ ዶሜዳ። ኢያሳ 9:3-15 3 ዳዊተ ጋባኦና አሳቱዋ፥ “ታን ህንተንቶ አያ ኦꬆ? መꬍና ጎዳ ቡዞ ቢታ ህንተንቱ አንጃና ማላ፥ ታን ህንተንቶ አያ አጮ?” ያጌዳ።

4 ጋባኦና አሳቱ ዛሪደ ካትያ፥ “ኑፐነ ሳኦላፐ ግዱዋን፥ ዎይ ኑፐነ ሳኦላ ጎልያ አሳፐ ግዱዋን ደእያ የዉ ዎርቃ ዎይ ብራ የዉዋ ግደና፤ ቃይ ኑን እስራኤልያ ግዶን እት ኡራነ ዎꬋናዉ ኑዉ ማታይ ባዋ” ያጌድኖ።

ዳዊተ ኡንቱንታ፥ “ያትና፥ ታን ህንተንቶ አያ ኦꬃናዉ ኮዪቴ?” ያጊደ ኦቼዳ።

5 ኡንቱንቱ ካትያ፥ “ሳኦል ኑና ꬋይሴዳ፤ ኑፐ አይ አሳይነ እስራኤልያ ዛዋን ሀቃንነ ፓጻ አተናዳን ማቀቴዳ። 6 ሄዋ ድራዉ፥ ሳኦላ ያራፐ ላፑን አቱማ አሳቱዋ ኑዉ አꬃደ እማ፤ መꬍና ጎዳይ ዶሪደ ካተዬዳ ሳኦላ ካታማን ግብአን መꬍና ጎዳ ስንꬃን ኑን ኡንቱንታ ካቃና” ያጌድኖ።

ካቲ ኡንቱንታ፥ “ታን ኡንቱንታ ህንተንቶ አꬃደ እማና” ያጌዳ።

7 ሳኦላ ናአይ ዮናታንነ ዳዊተ መꬍና ጎዳ ስንꬃን ጫቄዳ ጫቁዋ ድራዉ፥ ሳኦላ ናኣ ዮናታና ናኣ ማንፍቦሼታ ካቲ አሼዳ። 1 ሳሜላ 20:15-17፤ 2 ሳሜላ 9:1-7 8 ሽን ዳዊተ አታ ናታ ርጽፋ ሳኦላዉ የሌዳ ላኡ አቱማ ናና፥ አርሞናነ ማንፍቦሼታ፥ ቃይ ሳኦላ ናታ መራባ ማሆላ ካታማፐ ዬዳ ባርዝላያ ናኣ አድሪኤላዉ የሌዳ እቼሹ ናና አኬዳ። 1 ሳሜላ 18:19 9 ጋባኦና አሳቶ አꬂደ እሜዳ፤ ኡንቱንቱ ኡንቱንታ መꬍና ጎዳ ስንꬃን ደርያ ሁጲያን ካቄድኖ፤ ላፑናቱካ እትፐ ሀይቄድኖ፤ ካꬃ ጫካን፥ ባንጋ ጫካይ ዶምያ ዎድያን ኡንቱንታ ዎꬌድኖ።

10 አታ ናታ ርጽፋ ማቅያ አካደ፥ ዛላ ቦላ ባረዉ ሂጻዱ፤ ካꬃ ጫክያ አግናይ ዶምያ ጋላሳፐ ቢደ አሃቱዋ ቦላ እራይ ሳሉዋፐ ዎꬋናዋ ጋካናዉ፥ ጋላስ ሳሉዋ ካፎቱ ዎይ ቃማ ሳኣ ዶአቱ ቦቼናዳን ናጋዱ።

11 ሳኦላ ባካታ፥ አታ ናታ ርጽፋ ኦꬄዳዌ ዳዊታዉ ኦደቴዳ። 12 ዳዊተ ቢደ፥ ሳኦላ መቀꬃነ አ ናኣ ዮናታና መቀꬃ ጋላኣደን ደእያ ያቤሻ ካታማ አሳቱዋፐ አኬዳ። ፕልስጼማ አሳቱ ሳኦላነ አ ናና ግልቦአ ደርያን ዎꬊደ፥ ቤትሻና ጉታራን ካቄዳዋፐ ጉይያን፥ ሄ ጉታራፐ ጋላኣደን ደእያ ያቤሻ አሳቱ ቆሱዋን አኬድኖ። 1 ሳሜላ 31:8-13 13 ዳዊተ ሳኦላ መቀꬃነ አ ናኣ ዮናታና መቀꬃ ሄ ሳፐ አሄዳ፤ ቃይ ሱለቴዳ ላፑን አሳቱዋፐ መቀꬃካ ሺሼድኖ። 14 ሳኦላ መቀꬃነ አ ናኣ ዮናታና መቀꬃ ቢንያማ ቢታን ጸላአ ካታማን ደእያ አ አዉዋ ቂሳ ዱፉዋን ሞጌድኖ። ካቲ አዛዜዳዋ ኡባ ኡንቱንቱ ፖሌድኖ፤ ሄዋፐ ጉይያን፥ ኡንቱንቱ ሄ ቢታዉ ዎሴዳ ዎሳ ጾሳይ ስሴዳ።

15 ፕልስጼማ አሳቱዋናነ እስራኤልያ አሳቱዋና ላኤንꬁዋ ኦላይ ደንዴዳ፤ ዳዊተ ባረ አሳቱዋና ቤዳ። ፕልስጼማቱዋና ኦለቲደ ዳዊተ ዳቡሬዳ። 16 አዱሳ ምኖ አሳቱዋ ያራፐ ግድያ ይሽብባኖባ ግያ እት ብታኒ ደኤ፤ እ ኦይቄዳ ቶራይ ሄዙ ኪሎ ግራመነ ባጋ ዴጽያ፥ ናሃስያ ጌተትያ ብራታፐ ቆጸቴዳዋ፤ እ ኦራꬃ ማሻ ዳንጭ ኡቴዳ። ያቴዳዌ “ታን ዳዊታ ዎꬋና” ጌዳ፤ 17 ሽን ጻሩይ ናአይ አብሻይ ዳዊታ አሼዳ፤ ፕልስጼምያ ሾጪደ ዎꬌዳ። ሄዋፐ ጉይያን ዳዊታ አሳቱ ዳዊታ፥ “እስራኤልያ ጾምፒ ቶኤናዳን ኔን ላኤንꬆ ኡባካ ኑናና ኦላዉ ባካ” ያጊደ ጫቄድኖ። 1 ካታ. 11:36፤ ማዝ. 132:17

18 ሄዋፐ ጉይያን፥ ጎባ ጌተትያ ሳኣን ፕልስጼማ አሳቱዋና ኦላይ ኦለቴዳ፤ ሁሻፐ ዬዳ ስባካይ አዱሳ ምኖ አሳቱዋ ያራፐ ግድያ ሳፋ ዎꬌዳ። 19 ቃይካ ሄ ሳኣን ፕልስጼማ አሳቱዋና ሀራ ኦላይ ኦለቴዳ፤ ቤተሌመፐ ዬዳ ያኢራ ናአይ ኤልሀናን፥ ቶራ ቶማይ ሸማይንያ ዎንዳራሽያ ኬሻቶ፥ ጋተ ካታማፐ ዬዳ ጎልያዳ ዎꬌዳ።

20 ቃይካ ጋተ ካታማን ሀራ ኦላይ ኦለቴዳ። ሄ ሳኣን እት ዎጋ አዱሳ ብታኒ ደኤ። ሄ ብታንያዉ እት እት ኩሽያን ኡሱፑን ብራቱ፥ እት እት ገድያንካ ኡሱፑን ብራቱ፥ ኡባና ላታማነ ኦይዱ ብራቱ ደኢኖ። እካ አዱሳ ምኖ አሳቱዋ ያራፐ ግድያ አሳ። 21 ሄ ብታኒ እስራኤልያ ናሴዳ ዎደ፥ ዳዊታ እሻ ሻማ ናአይ ዮናታን አ ዎꬌዳ።

22 ሄ ኦይዳቱ ጋተ ካታማን ደእያ አዱሳ ምኖ አሳቱዋ ያራቱዋ። ኡንቱንታ ዳዊተነ አ አሳቱ ዎꬌድኖ።