22
ዳዊተ ጾን ስሚደ የጼዳ የꬃ
(ማዝ. 18)
1 መꬍና ጎዳይ አ ሞርከቱዋ ኡባ ኩሽያፐነ ሳኦላ ኩሽያፐ አሼዳ ጋላስ ዳዊተ መꬍና ጎዳዉ ሀ የꬃ የጼዳ።
2 “መꬍና ጎዳይ ታዉ ዎጋ ዛላ፤
ታን ኦላፐ ናገትያ ሚጻ፤
እ ታና አሽያዋ።
3 ታ ጾሳይ ታን አኮ ባቃትያ ታ ዎጋ ዛላ።
እ ታ ጎንዳልያ፤
እ ታና አሽያ ዎልቃማ።
እ ታን ቆሰታ አትያ ሳኣ፤
እ ታና ማካላንቻ አሳቱዋፐ አሼ።
4 ጋላታይ በስያ መꬍና ጎዳ ታን ጼሳይ፤
እ ታ ሞርከቱዋፐ ታና አሼ።
5 “ሀይቁዋ ቤታይ ታ ሄራን ስርመቴ፤
ባሻይ ድኡዋዳን ታና ሙኬዳ።
6 ዱፉዋ ዎዶሩ ታና ቃቻና ሀኔ፤
ሀይቁ ጲርያዳን ታና ኦይቄዳ።
7 ታና መቱ ኢስና መꬍና ጎዳ ጼሳድ፤
‘ታና ማዳ’ ጋደ ታ ጾሳዉ ዋሳድ።
እ ባረ ጌሻ ጎልያን ታ ኮሻ ስሴዳ፤
ታን ዋሴዳ ዋሱ አ ሀይꬃን ዎꬌዳ።
8 “ጾሳይ ሀንቀቴዳ ድራዉ፥
ቢታይ ዪቂዪቂደ ቃጼዳ፤
ደረቱዋ ጻጱ ጋጅ ጋጅ ኮኮሬዳ።
9 አ ሲꬍያፐ ሀንቁዋ ጩዋይ ጩዋቴዳ፤
አ ዶናፐ ምያ ታማ ላጩነ ጹግያ ቦንቁ ከሴዳ።
10 ሳሉዋ እ ጳልቂደ፥ ዱገ ዎꬌዳ።
ሄ ዎደ አ ገድያፐ ጋርሳና መꬌዳ ሻሪ ደኤ።
11 ቀፍያና ደእያ ኪታንቻቱዋን፥
ክሩበቱዋን ኡቲደ ፓሌዳ፤
ጫርኩዋ ቀፍያ ቦላን ቤቴዳ።
12 ባረና ꬉማን ካሜዳ፤
አ ዱንካኒ እራና መꬌዳ ሻርያ።
13 አ ስንꬃን ደእያ ዎልቃማ ፖኡዋፐ
ታማ ላጩ ከሴዳ።
14 “ቃይ መꬍና ጎዳይ ጉጉንꬃዳን ሳሉዋፐ ጉሜዳ።
ኡባፐ ꬎቂያ ጾሳይ ባረ ኮሻ ስሴዳ።
15 ባረ ዎንዳፍያ አዳ የዲደ፥
ባረ ሞርከቱዋ ላሌዳ።
ዋልቃንꬃ ፖኡዋ ኪቲደ፥
ኡንቱንታ የደርሴዳ።
16 መꬍና ጎዳይ ሴሬዳ ዎደነ፥
ሀንቀቲደ ፔኑቄዳ ዎደ፥
አባ ሃꬃይ ግሴዳ ቢታይ በቴዳ።
ቃይ ሳኣ ባሱካ ቆንጬዳ።
17 “ጾሳይ ቦላፐ ኩሽያ ዱገ የዲደ፥ ታና ኦይቄዳ፤
ጪማ ሃꬃፐ ታና ከሴዳ።
18 እ ታና ታ ዎልቃማ ሞርክያፐነ
ታና እጽያዋንቱፐ አሼዳ፤
አያዉ ጎፐ፥ ኡንቱንቱ ታዉ ሎይꬅ ዳሮ ዎልቃማ።
19 ታ ዋይያ ጋላስ፥
ኡንቱንቱ ታ ቦላ ደንዴድኖ፤
ሽን መꬍና ጎዳይ ታና ዘምፕስያዋ።
20 እ ታና አኮ ሳኣ ከሴዳ፤
ታናን ናሸቴዳ ድራዉ፥ ታና አሼዳ።
21 “ታ ጽሎተꬃዳን መꬍና ጎዳይ ታዉ ጭጌዳ፤
ታ ኩሽያ ጌሻተꬃዳን እ ታዉ ዛሬዳ።
22 ታን መꬍና ጎዳ ኦግያ ካላድ፤
ታን ታ ጾሳ አጋደ ዎራ ባበይከ።
23 ታን አ ህግያ ኡባ ናጋድ፤
አ ዎጋ ፖልያዋ አጋበይከ።
24 ታን አ ስንꬃን ሱረ ደኣድ፤
ታን ታና ናጋራፐ ናጋድ።
25 ሄዋ ድራዉ፥ መꬍና ጎዳይ ታዉ
ታ ጽሎተꬃዳንነ ታ ጌሻተꬃዳን ዛሬዳ።
26 “አቤት ጾሳዉ፥ አማነትያዋንቶ ኔን አማነትያዋ፤
ሱረቶ ኔንካ ሱረ።
27 ጌሻቶ ኔንካ ጌሻ፤
ሽን ጌላቶ ኔን ጭንጫ።
28 ባረንታ ዝቂስያዋንታ አሻሳ፤
ሽን ባረንታ ꬎቂስያዋንታ ዝቂሳናዉ ኔን ኡንቱንታ ጼላሳ።
29 አቤት መꬍና ጎዳዉ፥ ታ ጾምፒ ኔና፤
መꬍና ጎዳይ ፖእስና፥ ታ ꬉማይ ክቼ።
30 ነ ማዱዋን ታን ታ ሞርከ ኦላንቻቱ ቦላ ዎራጃይ፤
ታ ጾሳን ታን ኡንቱንታ ሚጻ ጼራና ጉፓ አꬋይ።
31 ጾሳ ኦጊ ሱረ።
መꬍና ጎዳ ቃላይ አማነትያዋ።
አኮ ባቃትያ ኡባቶ እ ጎንዳለ።
32 መꬍና ጎዳፐ አትና፥ ሀራ ጾስ ባዋ፤
ኑ ጾሳፐ አትና፥
ሀራ ዎጋ ዛል ባዋ።
33 ታዉ ዎልቃ እምያዌነ
ታ ኦግያ ሳሮ ኦꬅያዌ
ጾሳቴ።
34 እ ታ ገድያ
ገንእያ ገድያዳን ምንሴ። እብራ. 3:19
ታና ꬎቃ ግሹዋን ሳሮተꬃን ዎꬄ።
35 እ ታ ኩሽያ ኦላ ሜዘዬ፤
ሄዋ ድራዉ፥ ታን ታ ቀስያን፥
ናሃስያ ግያ ብራታ ዎንዳፍያን ዳፋደ ዱካይ።
36 “ታና አሽያ ነ ጎንዳልያ
ኔን ታዉ እማዳ፤
ነ ሎኦ ኦካይ ታና ግታዬ።
37 ታን ሀመትያ ሳኣ አሳሳ፤
ሄዋ ድራዉ፥ ታ ገዲ ሀልጽቤና።
38 ታ ሞርከቱዋ ታን የደርሳደ መንሬꬃድ፤
ታን ኡንቱንታ ꬋይሰናን ደኣደ ጉየ ስማበይከ።
39 ታን ኡንቱንታ ላኤንꬆ ደንደናዳን ሾጫድ፤
ኡንቱንቱ ታ ገድያን ኩንዴድኖ።
40 ኦላዉ ታና ዎልቃ ዳንጭሳዳ፤
ታናና ጋዳትያዋንታ ታዉ ጉልባትሳዳ።
41 ታ ሞርከቱዋ ታ ስንꬃፐ ጉየ ባቃትሳዳ፤
ታና እጽያዋንታ ታን ꬋይሳድ።
42 ባረንታ ማድያዋ ኮዬድኖ፤
ሽን ኦንነ ኡንቱንታ አሽቤና።
መꬍና ጎዳካ ኡንቱንቱ ጼሴድኖ፤
ሽን እ ኡንቱንቶ ኮይቤና።
43 ታን ኡንቱንታ ባናዳን ሊቅሳድ፤
ኦግያን ደእያ ኡርቃዳንካ ኡንቱንታ ድርጸሬꬃደ የꬋድ።
44 “ታ አሳ ማካላፐ ታና አሻዳ።
ካዉተꬃቱዋ ቦላ ሱንꬃደ፥ ታና ናጋዳ፤
ታን ኤረና አሳይ ታዉ ሞደቴዳ።
45 አላጋ ጋደ አሳይካ ታ ስንꬃን ጉልባቴ።
ኡንቱንቱ ታ ዋርያ ስሲደ፥
ታዉ አዛዘቲኖ።
46 ኡንቱንቱ ዎዛና ካሃ ባዪኖ።
ባረንቱ ናገትያ ሚጻፐ ኮኮሪደ ዪኖ።
47 “መꬍና ጎዳይ ደኤ! ጾሳይ፥
ታ ዎጋ ዛላይ ጋላተቶ።
ጾሳይ፥ ታና አሽያ ዛላይ፥
ꬎቁ ꬎቁ ጎ።
48 እ ታ ሀሉዋ ከስያ ጾሳ፤
ካዉተꬃቱዋ ታፐ ጋርሳና ዎꬅያዋ።
49 ታ ሞርከቱዋፐ ታና ከስ አክያዋ።
አቤት ጾሳዉ፥ ኔን ታናና ጋዳትያዋንቱ ቦላን
ታና ꬎቁ ꬎቁ ኦꬃሳ።
ማካላንቻ አሳቱዋፐ ኔን ታና አሻሳ።
50 ሄዋ ድራዉ፥ ታን
መꬍና ጎዳ ካዉተꬃቱዋ ግዶን ጋላታና፤ ሮመ 15:9
ታን ነ ሱንꬃካ ሳባና።
51 “ጾሳይ ባረ ካትያዉ
ጾኑዋ ቦላን ጾኑዋ እሜ።
ባረ ኦኬዳዎ፥ ዳዊተዉነ አ ዘረꬃዉ፥
አገና ሲቁዋ መꬍናዉ በሰ”
ያጊደ የጼዳ።