1 ሀዋንቱ ዳዊተ ዉርሰꬃን ሃሳዬዳ ቃላቱዋ።

8 ዳዊታ አሳቱዋ ምኖቱ ሱንꬃይ ሀዋፐ ካሊደ ጻፈቴዳ። ኡንቱንቱፐ ሄዛቱ ሎይꬅ ኤረቴዳዋንታ። ሄዛቱዋፐ ኮይሩ ታህክሞናፐ ዬዳ ዮሸብ-ባሸቤታ ጌተቴ፤ እ እት ገደ ኦላን ባረ ቶራን ሆስፑን ጼቱ አሳ ዎꬌዳ።

9 ሄዙ ምኖ አሳቱዋ ግዶን አ ካሊደ ደእያዌ አሆህያ ዶዶ ናኣ ኤልኣዛራ። እት ጋላስ እነ ዳዊተ ኦላዉ ሺቄዳ ፕልስጼማቱዋ ናሴድኖ፤ ሄዋፐ ጉይያን፥ እስራኤልያ አሳይ ጉየ ስሜዳ። 10 ሽን እ ባረ ሳኣን ምን ኤቂደ፥ አ ኩሺ ጻላሊደ፥ ማሻና ኦይቀታና ጋካናዉ፥ ፕልስጼማ አሳቱዋ ሾጬዳ። ሄ ጋላስ መꬍና ጎዳይ ዎልቃማ ጾኑዋ እሜዳ። ኦላይ ኤቂና፥ ኦላንቻቱ ኤልኣዛራኮ ስሚደ ዬድኖ፤ ሽን ኡንቱንቱ ሀይቄዳ ፕልስጼማቱዋፐ ኦላ ማዩዋ ቃሬድኖፐ አትና፥ ሀራባ ኦꬅበይክኖ።

11 አፐ ካልያዌ ቃይ ሃራራፐ ዬዳ አገ ናኣ ሻማ። እት ጋላስ ፕልስጼማ አሳቱ ምስሪ ኩም ኡቴዳ ሾይቃን ሺቄድኖ፤ እስራኤልያ አሳቱ ኡንቱንቱ ስንꬃፐ ባቃቴድኖ። 12 ሽን ሻም ሾይቃዉ ግዶ ባዙዋን ምን ኤቂደ ኦለቴዳ። ፕልስጼማ አሳቱዋ ሾጪደ ድፕ ኦꬄዳ። መꬍና ጎዳይ ዎልቃማ ጾኑዋ እሜዳ።

13 ካꬃ ጫካን ሀታሙ ምኖ አሳቱዋፐ ሄዛቱ ዳዊታኮ አዱላማ ካታማ ማታን ደእያ ጎንጎሉዋ ቤድኖ። ሄ ዎደ ፕልስጼማ ኦላንቻቱ ራፋይማ ዎምባን ሺቅ ኡቴድኖ። 14 ሄ ዎደ ዳዊተ ጌሱዋ ግዶን ደኤ፤ ፕልስጼማ ኦላንቻቱ ጭታይ ቃይ ቤታልሄመን ደኤ። 15 ዳዊተ ሃꬃ ኡሻናዉ አሞቲደ፥ “ቤተሌመ ካታማ ፐንግያ ላንቂያን ደእያ ፑልቱዋ ሃꬃፐ ታና ኦን ኡሻንዴሻ!” ያጌዳ። 16 ሄዙ ምኖ አሳቱ ፕልስጼማ ኦላንቻቱ ሞꬃ አꬊደ፥ ቤተሌመ ካታማ ፐንግያን ደእያ ፑልቱዋፐ ሃꬃ ዱቂደ ዳዊታዉ አሄድኖ። ሽን እ ኡሸናን እጼዳ፤ መꬍና ጎዳ ስንꬃን ትጊደ፥ 17 “አቤት መꬍና ጎዳዉ፥ ሀዋ ኡሻናዌ ታፐ ሃኮ! ሀ ሃꬃይ ባረንቱ ሸምፑዋ ሸነኮ ጊደ ጻሊደ ቤዳ አሳቱዋ ሱꬃ ግደኔ?” ያጊደ ኡሸናን እጼዳ።

ሀ ሄዙ ምኖ አሳቱ ሀዋ ኦꬄድኖ።

18 ጻሩይ ናኣ እዮኣባ እሻይ አብሻይ ሀታማቶ ካፑዋ፤ እ ሄዙ ጼቱ አሳቱዋ ባረ ቶራን ኦለቲደ ዎꬌዳ፤ ያቲደ እካ ሀራ ሄዛቱዋዳን ኤረቴዳ። 19 እ ሀታማቱዋፐ አꬊደ ቦንቼቴዳ አሳ፤ እ ኡንቱንቶ ካፑዋ ግዴዳ። ግዶፐነ፥ እ ሄ ሄዛቱዋ ፓይዱዋን ባዋ።

20 ቃይ ቃብጽኤላፐ ዬዳ ዮዳሄ ናአይ ባናይካ ምኖ አሳ። እ ምኖ ኦሳቱዋ ኦꬄዳ። እ ላኡ ኤረቴዳ ሞኣበ አሳቱዋ ዎꬌዳ። ቃይ ሻቻይ ዳርያ እት ጋላስ ኦላ ዱገ ገሊደ፥ ጋሙዋ ዎꬌዳ። 21 ቃይ ግብጼ ብታንያ እት ዎልቃማ ዎꬌዳ፤ ግብጼ ብታኒ ቶራ ኦይቄዳ፤ ሽን እ ዱላ ኦይቂደ አ ቦላ ቤዳ፤ አ ኩሽያፐ ቶራ ቦንቂ አኪደ፥ አ ቶራን አ ዎꬌዳ። 22 ዮዳሄ ናአይ ባናይ ሀዋንታ ኦꬄዳ። አ ሱንꬃይካ ሄ ሄዛቱዋዳን ኤረቴዳ። 23 እ ሀታማቱዋ ግዶን ዳሮ ቦንቼቴዳ፤ ሽን እ ሄዛቱዋ ፓይዱዋን ባዋ። ዳዊተ አ ባረና ናግያ ኦላንቻቶ ካፑዋ ከሴዳ።

24 ሄ ሀታማቱዋ ግዶን ደእያዋንቱ: ዮኣባ እሻ አሳሄላ፥ ቤተሌመፐ ዬዳ ዶዶ ናኣ ኤልሀናና፥ 25 ሀሮዳፐ ዬዳ ሻማነ ኤሊቃ፥ 26 ፓልጻ ያራ ግድያ ሄሌጻ፥ ታቆአፐ ዬዳ እቄሻ ናኣ እራ፥ 27 አናቶታፐ ዬዳ አብኤዘራ፥ ሁሻፐ ዬዳ ማቡናያ፥ 28 አሆሀ ያራ ግድያ ጻልሞና፥ 29 ናጾፋፐ ዬዳ ማህራያነ ባኣና ናኣ ሄሌባ፥ ቢንያማ ቢታፐ፥ ግብአፐ ዬዳ ርባያ ናኣ እታያ፥ 30 ፕርኣቶናፐ ዬዳ ባናያ፥ ጋኣሻ ዛንጋራ ማታፐ ዬዳ ህዳያ፥ 31 አራባፐ ዬዳ አብአልቦና፥ ባህሩማፐ ዬዳ አዝማዌታ፥ 32 ሻአልቦናፐ ዬዳ ኤልያህባ፥ ያሼና ናና፥ ዮናታና፥ 33 ሃራራፐ ዬዳ ሻማ፥ ሃራራፐ ዬዳ ሻራራ ናኣ አህኣማ፥ 34 ማእካፐ ዬዳ አሀሳባያ ናኣ ኤልፈሌጻ፥ ጊሎፐ ዬዳ አክጾፌላ ናኣ ኤሊኣማ፥ 35 ቃርመሎሳፐ ዬዳ ሄጽራ፥ አራባ ካታማፐ ዬዳ ፓአራያ፥ 36 ጾባ ካታማፐ ዬዳ ናታና ናኣ ይግኣላ፥ ጋዳፐ ዬዳ ባና፥ 37 አሞናፐ ዬዳ ጸለቃ፥ ጻሩይ ናኣ ዮኣባ ኦላ ሚሻ ቶክያ ባኤሮታፐ ዬዳ ናህራያ፥ 38 ያትራ ያራ ግድያ እራ፥ ያትራ ያራ ግድያ ጋሬባነ 39 ሂትያ ኦርዮና። ኡንቱንቱ ኡባና ሀታማነ ላፑና።