1 ሀእ ኑናዳን ጾሳ ካልያዋንቶ፥ ኑ ጎዳ የሱስ ክርስቶሳ ዩሳባዉነ ኑን አናና ደአናዉ አኮ ሺቃናባዉ፥ 2 ትምቢትያ አሳይ ህንተንቶ ኦድያዋን ዎይ ሀራ አሳፐ ስሴዳ ቃላን፥ ዎይ ኦንነ ኑፐ ዬዳ ኪታዳን ሃሳይያዋን፥ “ጎዳ ጋላሳይ ጋኬዳ” ጊደ ህንተንቱ ኤለካ ዳጋመናዳንነ ዎዛና ባየናዳን፥ ኑን ህንተንታ ዎሴቶ። 3 ህንተንታ ኦንነ አይ ኦግያንነ ባለꬆፖ። አያዉ ጎፐ፥ ካሰቲደ ማካልያዌነ ቃይ ናጋራንቻይ፥ ባሻ ናአይ ቆንጨናን ደእሽን፥ ሄ ጋላሳይ ጋከና። 4 አሳይ ጎይንያ ኡባባነ አሳይ ጾሳ ግያ ኡባባ እ እጻና። እ ባረና ኡንቱንቱ ኡባፐ ꬎቁ ኦꬃና። ቃይ ሀራይ አቶ ጾሳ ጌሻ ጎልያ ገል ኡቲደካ፥ “ታን ጾሳ” ጋና።

5 ህንተንቱ ሀሳይክቴ? ታን ሄዋ ህንተንቶ ህንተናና ደኣደ ኦዳድ። 6 እ ባረ ዎድያን ያናፐ አትን፥ ሀእ ያናዋ አያይ አ ተቂንቶ፥ ህንተንቱ ኤሪታ።

7 አያዉ ጎፐ፥ ጹራ ግዴዳ ማካላይ ሀእ ኦꬄ፤ ሽን ሄ ተእያዌ ኦግያፐ ክቻና ጋካናዉ፥ እ ቆንጨና። 8 ሄዋፐ ጉይያን፥ ሄ ማካላንቻይ ቆንጭና፥ ጎዳይ የሱስ ባረ ዶና ፔኑዋን አ ዎꬋና። ቃይ የሱስ ባረ ላኤንꬆ ቦንቾ ዩሳን አ ሙለካ ꬋይሳና።ኢሳ. 11:4 9 ሄ ማካላንቻይ ሴጻና ኦሱዋን ዪደ፥ ዳሮ ዎልቃን ዎርዶ ማላታነ ማላልስያዋ ኦꬃና።ማቶሳ 24:24 10 ሄዋዳንካ፥ ቃይ ꬋይያ አሳቱዋ ዱማ ዱማ ኢታ ጭሙዋን ባለꬃና። ꬋይያዋንቱ አታናዉ ቱማተꬃ ሲቂደ አክቤና ድራዉ ꬋያና። 11-12 ሄዋ ድራዉ፥ ቱማተꬃ አማንቤና ኡባ አሳቱ፥ ናጋራ ኦꬅያዋን ናሸትያዋንቱ ኡባይ ፕርደታናዳንነ ዎርዶ ግድያባ አማናናዳን፥ ጾሳይ ዎልቃማ ባላ ኡንቱንቱ ግዶ የዳና።

13 ሽን ጎዳይ ሲቅያ ኑናዳን ጾሳ ካልያዋንቶ፥ ኑን ጾሳ ህንተንቱ ድራዉ፥ ኡባ ዎደ ጋላታናዉ በሴ። አያዉ ጎፐ፥ ጌሻ አያና ዎልቃንነ ቱማተꬃ ህንተንቱ አማንያዋን ህንተንታ አሻናዉ፥ ጾሳይ ህንተና ባይራዳን ዶሬዳ። 14 ጾሳይ ህንተንታ ኑን ህንተንቶ ኦዴዳ ኑ ምሽራቹዋ ቃላ ባጋና ጼሴዳዌ፥ ህንተንቱ ኑ ጎዳ የሱስ ክርስቶሳና እትፐ ቦንቼታናሳ። 15 ስም ኑናዳን ጾሳ ካልያዋንቶ፥ ምኒደ ኤቂተ፤ ኑን ህንተና ኑ ዶናን ግድና፥ ዎይ ኑ ዳብዳቢያን ግድና፥ ታማርሴዳ ዎጋ ኦይቂተ።

16-17 ኑ ጎዳ የሱስ ክርስቶስ ባረ ሁጲያን ቃይ ጾሳይ፥ ኑ አዉ ኑና ሲቂደ፥ ባረ አꬎ ኬካተꬃን ኑዉ መꬍና ዳንዳያነ ሎኦ ህዶታ እሜዳዌ፥ ቃይ ህንተንቱ ሎኦባ ኡባ ኦꬃናዳንነ ሃሳያናዳን፥ ህንተንቱ ዎዛና ምንሶነ መንꬆ።