1 ዉርሰꬃን ኑናዳን ጾሳ ካልያዋንቶ፥ ጎዳ ቃላይ ህንተንቱ ግዶን፥ ኤለካ አካናዳንነ ቦንቼታናዳን፥ ኑዉ ጾሳ ዎስተ። 2 ቃይ አሳይ ኡባይ አማነና ድራዉ፥ ጾሳይ ኑና ናጋራንቻ አሳቱዋፐነ ኢታ አሳቱዋፐ አሻና ማላ፥ ኑዉ ዎስተ።

3 ሽን ጎዳይ አማንꬅያዋ፤ እ ህንተና መንꬃናነ ቃይ ኢታፐካ ናጋና። 4 ኑን ህንተና አዛዝያዋ ህንተንቱ ሀእ ኦꬅያዋነ ቃይ ስንꬃፐካ ኦꬃናዋ ጎዳይ ኑና ህንተዋን አማንꬄ።

5 ጎዳይ ህንተንቱ ዎዛና ጾሳ ሲቁዋኮነ ክርስቶስ እምያ ዳንዳያኮ ካለꬆ።

6 ኑናዳን ጾሳ ካልያዋንቶ፥ ህንተንቱ ኑፐ አኬዳ ዎጋ ካለናን አዛላ ደኡዋ ደእያ እሻ ኡባፐ ህንተንቱ ሻከታናዳን፥ ኑ ጎዳ የሱስ ክርስቶሳ ሱንꬃን ህንተና አዛዜቶ። 7 አያዉ ጎፐ፥ ኑን ህንተናና ደእያ ዎደ አዛልቤና ድራዉ፥ ህንተንቱ ኑዋዳን ሀኒደ ደአናዉ በስያዋ ህንተንቱ ህንተንቱ ሁጲያን ኤሪታ። 8 ኑን ህንተፐ ኦስነ ቶኩዋ ግደና ማላ፥ ቃማነ ጋላስ ዳቡሪደነ ጃሚደ ኦꬂደ ደኤዳዋፐ አትን፥ ኦፐነ ቁማ ጮ ምቦኮ። 9 ኑን ሄዋ ኦꬄዳዌ ህንተንቱ ኑዋዳን ሀኒደ ደአናዳን፥ ኑን ህንተንቶ ሌምሱዋ ግዳናዳፐ አትን፥ ሄዋ ህንተና ኦቻናዉ ኑዉ ማታይ ꬋይና ግደና። 10 አያዉ ጎፐ፥ ኑን ሀራይ አቶ ህንተናና ደኢደካ፥ “ኦꬃናዉ ኮየና ኡራይ ኦንነ ሞፖ” ያጊደ ህንተና አዛዜዶ።

11 አያዉ ጎፐ፥ አሳ የዉዋን ገልያዋፐ አትን፥ አይነ ኦናዋንቱ፥ አዛላ ደኡዋ ደእያ አማሬዳ አሳቱ ህንተንቱ ግዶን ደእያዋ ኑን ስሴዶ። 12 ኑን ሄዋንቱ ማላ አሳቱ ማራ ደኡዋ ደአናዳንነ ኦꬂደ ቁማ ማናዳን፥ ጎዳ የሱስ ክርስቶሳ ሱንꬃን አዛዜቶነ ዞሬቶ።

13 ሽን ህንተንቱ ኑናዳን ጾሳ ካልያዋንቶ፥ ሎኦ ኦሱዋ ኦꬃናዉ አዛሎፕተ። 14 ቃይ ኑን ሀ ዳብዳቢያን ኪቴዳ ኪታዉ አዛዘተና ኡራይ ኦንነ ደኦፐ፥ ሄ ኡራ አኬክተ። እ ዬላታና ማላ፥ አፐ ሻከትተ። 15 ሽን እሻዳን አ ሴርተፐ አትን፥ ሞርክያዳን ጼሎፕተ።

16 ሳሮተꬃ ጎዳይ ባረ ሁጲያን ህንተንቶ ኡባ ዎደነ ኡባ ባጋና ሳሮተꬃ እሞ። ጎዳይ ህንተናና ኡባና ግዶ።

17 ታን ጳዉሎስ፥ ሀ ሳሮታ ታ ኩሽያን ጻፋድ፤ ታ ዳብዳቢያ ኡባዉ ሀዌ ታ ፍርማ። ሀዌ ታን ጻፍያ ኦግያ።

18 ኑ ጎዳ የሱስ ክርስቶሳ አꬎ ኬካተꬃይ ህንተናና ኡባና ግዶ።