ጳዉሎስ
ጽሞቶሳዉ
ጻፌዳ ኮይሮ ኪታ
ገሉዋ
ጽሞቶሳ ጌተትያ፥ አማንያ ያላጋይ፥ ቄር ኢስያ ጌተትያ ሳኣን የለቴዳ። እ ባረ ዳይ ባጋና አይሁደ አሳ፤ ባረ አቡ ባጋና ቃይ ግሪከ አሳ። እ ጳዉሎሳና ኪታን እትፐ ዙፐትያ አሳ፤ ምሽራቹዋ ቃላ ኪታካ አናና ማደቲደ ኦꬅያዋ። ጳዉሎስ ጽሞቶሳዉ ጻፌዳ ኮይሮ ኪታይ ሄዙ አይፈ የዋቱዋን ሻከቴ።
ኡባፐ ካሰቲደ ሀ ኪታይ አማንያ አሳ ግዶን ደንዴዳ ዎርዶ ትምርትያባ ምንሲደ ኦዴ። ሀ እማꬃ ግዴዳ ትምርቲ አይሁዳ አሳቱዋ ቆፋፐ ባጋነ ሀራ አሳቱዋ ቆፋፐ ባጋ ኦይቄዳዋ፤ “ሀዌ ቤትያ አላሚ ናጋራን ሀምባላቸት ድጌዳዋ ግድያ ድራዉ፥ አሳይ አቶተꬃ ደማናዉ ዱማ ግዴዳ ጹራ ኤራተꬃ ኤራናዉ፥ እት እት ቁማቱዋ ሜናን አጋናዉነ ማችያ አከናንነ አስና ገለናን ደአናዉ ኮሼ” ያግያ ቆፋ ባሶ ኦꬂደ ኦይቄዳዋ። ሄዋ ቦላካ ጉጂደ አ ኪታይ አማንያ አሳ አይሱዋባነ ጎይኑዋ ዎጋባ ታማርስያ ትምርትያ፤ ሄዋዳንካ ቃይ አማንያ አሳ ካለꬅያዋንቱነ ኡንቱንታ ማድያዋንቱ አይ ማላ ኤሻና ደእያዋንታ ግዳናዉ በስንቶ ኦድያባ ኦይቄዳ። ዉርሰꬃን ጽሞቶስ የሱስ ክርስቶሳዉ ኦꬅያ ሎኦ ኦሳንቻ ዋኒደ ግዳናዉ ዳንዳይንቶነ ቃይ ዱማ ዱማ አማንያ አሳ ማባራ ስንꬃን አዉ ደእያ አዎተꬃዉ፥ ጳዉሎስ አ ዞሬዳ ዞርያ በኤቶ።
ሸምፓቱዋ ኡባቶ እመቴዳ ቃንꬃ ቆፋቱዋ
ገሉዋ 1:1-2
አማንያ አሳባነ ኡንቱንቱ ግዶን ኦꬅያ ጾሳ ኦሳንቻቱዋባ 1:3—3:16
ጽሞቶሳዉ አ ኦሶ እመቴዳ ትምርትያ 4:1—6:21
1
1 ኑና አሽያ ጾሳይነ ኑን በአና ጊደ ናሸቻን ናግያ የሱስ ክርስቶስ አዛዜዳ አዛዙዋዳን፥ የሱስ ክርስቶስ ኪቴዳዋ ግዴዳ ታን ጳዉሎስ፥ 2 አማኑዋ ባጋና ታ ቱሙ ናአዉ፥ ጽሞቶሳዉ ሀ ዳብዳቢያ ጻፋይ።
ዎርዶ ትምርትያፐ ናገቱሳ
ጾሳ ኑ አዉዋፐነ ኑ ጎዳ ክርስቶሳ የሱሳፐ አꬎ ኬካተꬃይ፥ ማሮተꬃይነ ሳሮተꬃይ ነዉ ግዶ።
3 ታን ማቅዶንያ ባደ ነዉ ጌዳዋዳን፥ ኔን ኤፈሶነን ጋምአና ማላ ኮያድ። እት እት አሳቱ ዎርዱዋ ትምርትያ ታማርሲኖ፤ ሄዋንቱ ታማርሰና ማላ፥ አግተ ጋደ ኦዳ። 4 ኡንቱንቱ ቶሳ ኦድያዋነ ባረንቱ ዛርያ ጋይርያዋ አጋናዳን ኦዳ። አያዉ ጎፐ፥ ሄዋ ማላባይ ፓሉማ ካለꬄ፤ ቃይ ጾሳ ቆፋ አማኑዋን ኤረትያዋ ኦꬅክኖ። 5 ሀ አዛዞ ዋና ቆፋይ ጌሻ ዎዛናፐ፥ ሎኦ ሱረ ዎዛናፐ፥ አሳይ በኦ ግያባይ ባይና አማኑዋፐ ቤትያ ሲቁዋ ደንꬃናሳ። 6 እት እት አሳቱ ሀዋ አጊደ፥ ማደና ሃሳያኮ ስሜድኖ። 7 ኡንቱንቱ አያ ሃሳይንቶነ ዎይ ባረንቱን አማነቲደ ኦድያባይ አየንቶ ኤርክኖ፤ ሽን ጾሳ ህግያ ታማርስያዋንታ ግዳናዉ ኮዪኖ።
8 አሳይ በስያዋዳን ህግያን ጎኤቶፐ፥ ህጊ ሎአ ግድያዋ ኑን ኤሬቶ። 9 እትባ አኬካናዉ ኮሼ። ህጊ ሎኦ አሳዉ መትቤና። ሽን ህግያ መንꬅያዋንቶ፥ አዛዘተናዋንቶ፥ ማካላንቻቶ፥ ናጋራንቻቶ፥ ጌሻተꬃይ ባይናዋንቶ፥ ቱናቶ፥ ባረንቱ ዳዮ ዎይ አባ ዎꬍያዋንቶ፥ ሸምፑዋ ዎꬍያዋንቶ፥ 10 ዎሹማናዉ ካጄልያዋንቶ፥ አቱማ አሳይ አቱማ አሳና ዎሹምያዋንቶ፥ አሳ ዛልእያዋንቶ፥ ዎርዳንቻቶነ ዎርዱዋን ጫቂያዋንቶ፥ ዎይ ቱሙ ትምርትያና ጋከተና አይ ኦሱዋ ግድናካ ኦꬅያዋንቶ ከሴዳ። 11 ሄ ቱሞ ትምርቲ አንጀቴዳ ጾሳይ ታን አዋያና ማላ፥ ታዉ ሀዳራ እሜዳ ቦንቾ ዎንጋላ ግዱዋን ደኤ።
ጳዉሎስ ጾሳዉ ሺሼዳ ጋላታ
12 ታን ኦꬅያ ኪታን ታዉ ዎልቃ እሜዳ ኑ ጎዳ ክርስቶሳ የሱሳ ጋላታይ። ታና ባረ ኦሳንቻ ሱንꬂደ፥ ታና ሄ ኦሶ በስያ አማነቶዋ ጊደ ፓይዴዳ ድራዉካ አ ጋላታይ። 13 ታን ሀዋፐ ካሰ አ ቦርያዋ፥ አ የደርስያዋነ ቱጋይያዋ ግዶፐነ፥ ታዉ ሀዋ እ ኦꬄዳ። ሽን ታን ኤረናን ኦꬄዳ ድራዉነ አማናቤና ድራዉ፥ ጾሳይ ታና ማሬዳ። 14 ቃይ ኑ ጎዳይ ዛዋይ ባይና ባረ አꬎ ኬካተꬃ ታ ቦላን ጉሲደ፥ ክርስቶሳ የሱሳ ባጋና ኑባ ግዴዳ አማኑዋነ ሲቁዋ ታዉ እሜዳ።
15 ክርስቶሳ የሱስ ናጋራንቻቱዋ አሻናዉ ሀ ሳኣ ዬዳ ግያ ሃሳያይ አማነቴዳዋነ አሳይ ኡባይ ቱማ ጊደ አካናዉ በስያዋ። ኡባፐ አꬍያ ናጋራንቻይ ታና። 16 ሽን መꬍና ደኡዋ አካናዉ አን አማናናዉ በስያ አሳዉ ታን ሌምሱዋ ግዳናዳን፥ ኡባፐ አꬍያ ናጋራንቻዉ ታዉ የሱስ ክርስቶሳ ዳሮ ዳንዳያዳን፥ ጾሳይ ታና ማሬዳ። 17 አይፍያን ቤተና መꬍና ጾሳዉ እቶ፥ መꬍና ካተዉ፥ መꬍናፐ መꬍና ጋካናዉ ጋላታይነ ቦንቹ ግዶ። አመንእ!
18 ታ ናኣ ጽሞቶሳ፥ ካሰ ነባ ትምቢትያ ኦዴዳዋዳን፥ ሄ ኦዴዳዋዳን ሎኦ ኦላ ኔን ኦለታና ማላ፥ ሀ አዛዙዋ ነዉ ሀዳራ እማይ። 19 አማኑነ ሎኦ ሱረ ዎዛናይ ነዉ ደኦ። እቱ እቱ ባረንቱ ሱረ ዎዛና የግ አጊደ፥ ላግያዌ ባይና ማርካቢ ባይያዋዳን፥ ባረንቱ አማኑዋ ባይዜድኖ። 20 ጾሳ ቦርያዋ አጋና ማላ፥ ሄዋ ታማራናዉ ታን ሴጻናዉ አꬃ እሜዳ ሄመነዮስነ እስክንድር ኡንቱንቱ ግዶን ደኢኖ።