1-2 ኑን ጾሳ ማላትያዋን፥ ጌሻተꬃ ኡባን፥ ሳሮተꬃንነ አሽከተꬃን ደአና ማላ፥ አሳ ኡባዉ፥ ካተቶነ ሱንꬃተꬃይ ደእያ ኡባቶ፥ ጾሳ ኦቻናዉ፥ ዎሳናዉ፥ ጋናታናዉነ ጋላታናዉ በስያዋ ኡባባፐ ካሰታደ ታን ኔና ኤርሳይ። 3-4 አሳይ ኡባይ አታናዳንነ ቱማተꬃ ኤራናዳን ኮይያ ኑና አሽያ ጾሳ ስንꬃን ሀዌ ሎእያባነ ናሸችያዋ። 5 አያዉ ጎፐ፥ እት ጾሳይ ደኤ፤ ጾሳፐነ አሳፐ ግዱዋን ግዲደ ጋናትያ እቱ ደኤ። ሄዌካ ክርስቶስ የሱሳ ግያ አሳ። 6 እ አሳ ኡባ ዎዛናዉ ባረና ኡባዉ እሜዳ። ጾሳይ ባረ ዎድያን አሳ ኡባ ዎዛናዉ ኮይያዋ በስያ ማርካይ ሀዋ። 7 ታን ጾሳ ቃላ ኦድያዋ፥ የሱስ ኪቴዳዋነ ቃይ አማኑዋንነ ቱማተꬃን አይሁዳ ግደና አሳ ታማርስያዋ ግዳደ ሱንቴዳዌ ሀዋሳ። ታን ዎርዶትከ፤ ቱሙዋ ሃሳያይ።

8 ሄዋ ድራዉ፥ ኡባ ሳን ደእያ አቱማ አሳይ ሀንቁነ ፓሉሚ ባይናን፥ ባረ ጌሻ ኩሽያ ፑደ ደንꬂደ፥ ጾሳ ዎሳናዳን፥ ታን ኮያይ።

9-10 ሄዋዳን ቃይ ማጫዋንቱካ በስያ ማዩዋ ያሻተꬃንነ ባረንታ ሞድያዋን ማይኖ። ጾሳዉ ያያይ ግያ ማጫ አሳ በስያዋዳን፥ ሎኦባ ኦꬅያዋናፐ አትን፥ ሁጲያ ሹሩባ ዳድያዋን፥ ዎርቃን ዎይ እንቁዋን፥ ዎይ ዳሮ አልኦ አፍላን ባረና አሌቂሶፕኖ።

11 ማጫዉና ኡባባን ሞደታደ፥ ጮኡ ጋደ ታማሩ። 12 ታን ማጫዉና ጮኡ ጋደ ደኡ ጋይፐ አትን፥ አቱማ አሳ ታማርሱነ ዎይ ኡንቱንቱ ቦላ አዎቱ ጊከ። 13 አያዉ ጎፐ፥ አዳም ኮይሮ መቴዳ፤ ሄዋና ጉየፐ መታዱ።ዶመꬃ 2:7፣ 21-22 14 ሄዋና ጭመታደ ጾሳ ህግያ መንꬃዱፐ አትን፥ አዳም ጭመትቤና። ዶመꬃ 3:1-6 15 ሽን ማጫዉና አማኑዋን፥ ሲቁዋን፥ ጌሻተꬃንነ ባረና ሞዳደ ደኦፐ፥ ናና የልያዋን አታና። *ናና የልያዋን አታና፦ ናና የልያዋን ናገታ ደአና ጉሳ።