1 ኦንነ ዎሳ ጎልያ ካለꬅያዋ ግዳናዉ ኮዮፐ፥ ሎኦባ አሞቴዳ ግያ ሃሳያይ ቱማ። 2 ዎሳ ጎልያ ካለꬅያ ኡራይ ቦርሰናዋ፥ እት ማቻት ጻላላይ ደእያዋ፥ ባረና ሞድያዋ፥ ባረና ናግያዋ፥ ባረዉ በስያዋ ኦꬅያዋ፥ እማꬃ ሞክያዋ፥ ታማርሳናዉ ዳንዳይያዋ፥ ቲቶ 1:6-9 3 ማꬆተናዋ፥ አሽከተꬃፐ አትን ዋላቀተናዋ፥ ፓሉመተናዋ፥ ሻሉዋ ሲቀናዋ፥ 4 ናናይ አዉ አዛዘትያዋነ ቦንችያዋ፥ ቃይ ባረ ጎልያ አይሳናዉ ዳንዳይያዋ ግዳናዉ በሴ። 5 አያዉ ጎፐ፥ እት ኡራይ ባረ ጎልያ አይሳናዉ ዳንዳየናዋ ግዶፐ፥ ጾሳ አማንያዋንታ ዎት አይሳናዉ ዳንዳዪ?

6 ኦቶሩዋን ሱገቲድ፥ ጻላህያ ካፑ ጾሳ ፕርዳን ኩንዴዳዋዳን ኩንደና ማላ፥ ኦራꬃ አማኔዳ አሳ ግዳናዉ በሰና። 7 ጻላህያ ካፑዋ ቦርያንነ ጲርያን ገለና ማላ፥ ሄ ኡራይ ዎሳ ጎልያፐ ካረና ደእያ አሳን ናሸትያዋ ግዳናዉ በሴ።

8 ሄዋዳን ቃይ ዎሳ ጎልያ ማድያዋንቱ አሳይ ቦንችያዋንታ፥ ላኡ ዶና ሃሳየናዋንታ፥ ዳሮ ዎይንያ ኤሳ ኡሸናዋንታ፥ ሚሻዉ ያረተናዋንታ፥ 9 አማኑዋ ጹራ ጌሻ ዎዛና ቆፋን ናግያዋንታ ግዳናዉ በሴ። 10 ሄዋንቱ ካሰቲደ ፓጨታናዉ ኮሼ። ፓጭያ አꬎዋፐ ጉይያን፥ ዎሳ ጎለን ኦꬅያዋንታ ግዲደ ኦꬅኖ።

11 ሄዋዳንካ ቃይ ኡንቱንቱ ማቻቱ አሳይ ቦንችያዋንታ፥ ዝግረናዋንታ፥ ባረና ሞድያዋንታ፥ ኡባባን አማነትያዋንታ ግዳናዉ በሴ።

12 ዎሳ ጎልያ ማድያዌ እት ማቻት ጻላላይ ደእያዋነ ቃይ ባረ ናናነ ባረ ጎልያ ሎይꬅ አይስያዋ ግዳናዉ በሴ። 13 አያዉ ጎፐ፥ ዎሳ ጎልያ ማድያዋንታ ግዲደ፥ ሎኦ ኦሱዋ ኦꬅያዋንቱ ባረንቱ ሁጰዉ ዎልቃማ ቦንቹዋ ደሚኖ፤ ቃይ ክርስቶሳ የሱሳን ባረንቶ ደእያ አማኑዋ ሎይꬅ ጻሊደ ሃሳያናዉ ዳንዳዪኖ።

14 ታን ኔኮ ኤለካ ባና ጋደ ሀዋ ነዉ ጻፋይ። 15 ሽን ታን ቤናን ጋምኦፐ፥ ጾሳ ጎለን ኔን ዎታ ደአናዉ በስንቶ ኤራና ማላ ጻፋይ። ሄ ጎሊ ቱማተꬃዉ ቱሳነ ባሶ ግድያ ደኡዋ ጾሳ ዎሳ ጎልያ። 16 ኑ አማኑዋ ጹራይ ዎልቃማ ግድያዋ ኦንነ ስꬋናዉ ዳንዳየና።