1 እት እት አሳይ ዉርሰꬃ ዎድያን አማኑዋ አጋናዋ ጌሻ አያናይ ቆንጭያን ኦዴዳ። ኡንቱንቱ ዎርዶ አያናቶ አዛዘታና፤ ቃይ ጻላሀቱዋ ትምርትያ ካላና። 2 ሀዋ ማላ ትምርቲ፥ ትላ ዎዛና ታማን ቦንቄዳ ብራታን ጉዴዳዋዳን ዶንጭሌዳ ዎርዶ አሳቱዋ ባጋና ዬዳ።

3 ሀዋንቱ ማላ አሳቱ አክያዋነ ገልያዋ ቃይ እት እት ቆሞ ካꬃ ምያዋ ድጊኖ። ሽን አማንያዋንቱነ ቱማተꬃ ኤርያዋንቱ ጾሳ ጋላቴዳዋፐ ጉይያን ማና ማላ፥ ጾሳይ ካꬃ መꬌዳ። 4 አያዉ ጎፐ፥ ጾሳይ መꬌዳባይ ኡባባይካ ሎአ። ጾሳ ጋላቲደ አኮፐ፥ ኦለትያዌ አያይነ ባዋ። 5 አያዉ ጎፐ፥ ሄ ኡባባይ ጾሳ ቃላንነ ዎሳን አንጀቴዳዋ።

6 ሄዋ ድራዉ፥ ኔን እሻቱዋ ሄዋ ሀሳይስያዋ ግዶፐ፥ አማኑዋነ ኔን ካሌዳ ሎኦ ትምርትያ ቃላን ኤቆፐ ኔን ክርስቶስ የሱሳዉ ሎኦ ኦሳንቻ ግዳናሳ። 7 ሽን አማንያ አሳዉ ሎኤና ሃሳያፐነ ቃይ ጭማ ማጫ አሳ ቶሳፐ ባቃታ። ቃይ ጾሳ ማላትያዋን ኔና ሎህሳ። 8 አያዉ ጎፐ፥ አሳይ ባረ ቦላ ምንስያዌ ላፋ ጎኤ። ሽን ጾሳ ማላትያዋን ሎህስያዌ ሀእካ ስንꬃፐካ ደኡዋ እማና ግያ ድራዉ፥ ኡባባዉካ ጎኤ። 9 ሀ ሃሳያይ አሳይ ኡባይ አካናዉ በስያ ቱሙ ሃሳያ። 10 ኑን ሄዋ ደማናዉ ዳቡሬቶነ ሎይꬅ ኦꬄቶ፤ ሄዎ ኑን ህዶታ ዎꬄዳዌ አሳ ኡባ፥ ኡባፐ አꬂደ፥ አማንያዋንታ አሽያ ደኡዋ ጾሳ።

11 ሀዋ አዛዛነ ታማርሳ። 12 ኔን ያላጋ ግድያ ድራዉ፥ ኔና ኦንነ ካꬎፖ። ሽን አማንያዋንቶ ነ ሃሳያን፥ ሀኖተꬃን፥ ሲቁዋን፥ አማኑዋንነ ጌሻተꬃን ሌምሱዋ ግዳ። 13 ታን ያና ጋካናዉ አሳዉ ጾሳ ማጻፋ ናባብያዋን፥ ጾሳ ቃላ ኦድያዋንነ ታማርስያዋን ምና። 14 ትምቢትያ ኦድያዋንቱ ሃሳይናነ ጭማቱ ባረንቱ ኩሽያ ነ ቦላ ዎꬅና፥ ኔን አኬዳ፥ ኔናን ደእያ ጌሻ አያና እሙዋ ቶቾፓ።

15 ነ ድቻይ አሳ ኡባዉ ቆንጫና ማላ፥ ሄዋ ምንሳ ቆፓ። ሀዋ ኡባ ዎደ ኦꬃ። 16 ነ ሁጲያነ ነ ትምርትያ ናጋ። ኔን ሄዋ ኦꬆፐ፥ ኔናነ ኔን ግያዋ ስስያዋንታ አሽያ ድራዉ፥ አገናን ኦꬃ።