1 ጭማ አሳ ነ አባ ቦንችያዋዳን ቦንቻፐ አትን፥ ቶቾፓ። ያላጋቱዋ ነ እሻዳን፥ 2 ቃይ ጭማ ማጫ አሳ ነ አቲዳን፥ ያላጋ ማጫ አሳ ነ ምቻቲዳን፥ ኩመንꬃ ጌሻተꬃን ቦንቻ።

3 ባረ ጻላላ ግዴዳ ቱሙ አምኤቱዋ ቦንቻ። 4 ሽን አምአትዉ ናናይ ዎይ ናና ናናይ ደኦፐ፥ ሄ ናናይ ጾሳ ማላትያዋ ባረንቱ ሶይ አሳ በስያዋንነ ቃይ ሄዋ ኦꬅያዋን ባረንታ የሌዳዋንቱ ኩሽያ ዛርያዋ ታማርኖ። አያዉ ጎፐ፥ ሄዌ ጾሳ ናሸችያዋ።

5 አያ ማዱካ ባይና ባረ ደእያ ቱሙ አምአታ ጾሳይ እማና ጋደ ናሸቻን ናጋ ኡታዱ። ቃይ ጋላስነ ቃማ ጾሳይ እዞ ማዳና ማላ፥ ዎሳዉነ ኦቻዉ። 6 ሽን ባረና እሻልስያ አምአታ ፓጻ ደኦፐካ፥ እዛ ሀይቃድጋዱ። 7 ቃይ ኦንነ ኡንቱንታ ቦረና ማላ፥ ሀ አዛዙዋ እማ። 8 ሽን ባረንቱዎ ቃይ ኡባፐ አꬂደ፥ ባረ ሶይ አሳዉ ቆፐና ኡራይ ኦናነ ግዶፐ፥ ሄዌ ባረ አማኑዋ ካዴዳዋ። አማነና አሳፐካ አꬊደ አዉ ኢታ።

9 ኡሱፑን ታሙ ላይꬃይ ኩምቤና አምአት ሱንꬃ ማዝጎብያን ጻፎፓ። ሄዋ ቦላን ቃይ እዛ እት አስናፐ ሀራ ገላቤናዉኖ ግዳናዉ ኮሼ። 10 ናና ድችያዋን፥ እማꬃ ሞክያዋን፥ ጌሻቱዋ ገድያ ሜጭያዋን፥ ዋየቴዳ አሳ ማድያዋን፥ ሎኦ ኦሱዋ ኡባ ካልያዋን፥ ሀ ሎኦ ኪታ ኪተትያዋን ኤረቴዳዉኖ ግዳናዉ በሴ።

11 ሽን ያላጋ አምኤቱዋ የኮንቱ ሱንꬃና ጋꬃ ጻፎፓ። አያዉ ጎፐ፥ ኡንቱንቱ ባረንታ፥ አስና ገላ ገላ ግያ ዎደ፥ ክርስቶሳ አጋናዋንታ። 12 ኮይሮ አማኑዋ ካꬌዳ ድራዉ፥ ኡንቱንቱ ፕርደታና። 13 ሄዌ ባይናን ኦሱዋ ꬋዪደ እት ጎልያፐ ሀራ ጎልያ ዩዪደ፥ ሀመትያዋ ሳላላ ግደናን፥ ባረንቶ በሰናባ ሃሳዪደ፥ ዝግርሳነ የዉዋን ጮ ገልያዋ ታማሪኖ። 14 ሄዋ ድራዉ፥ ኑ ሞርከቱ ኑ ቦላ ሃሳይያ ኢታባ ደመና ማላ፥ ያላጋ አምአቱ አስና ገሊደ፥ ናኣ የሊደ፥ ባረንቱ ጎልያ አይሳና ማላ ዞራይ። 15 አያዉ ጎፐ፥ ሀዋፐ ካሰ አማሬዳ አምአቱ ሴጻና ካላናዉ አጊደ ጉየ ስሜድኖ።

16 አማንያ ምሽራትዉ ሀቃንካ ዳቦ አምአቱ ደኦፐ፥ እዛ ኡንቱንታ ማዳናዉ በሴ። አማንያ አሳቱ ማዱ በስያ ቱሙ አምኤቱዋ ማዳና ማላ፥ ኡንቱንቱ አማንያዋንቶ ቶኮ ግዶፕኖ።

17 ሎይꬅ ሄምያ ጭማቱ፥ ቃይ ኡባፐ አꬂደ፥ ቃላ ኦድያዋንነ ታማርስያዋን ዳቡርያዋንቱ፥ ዳኮ ቦንቹዋ አካናዉ በሲኖ። 18 አያዉ ጎፐ፥ ጾሳ ማጻፋይ፥ “ኡዱማን ካꬃ የꬍያ ቦራ ዶና ቃቾፓ” ቃይ፥ “ኦሳንቻይ ባረ ድርጉዋ አካናዉ በሴ” ያጌ። ዛረ. 25:4፤ ማቶሳ 10:10፤ ሉቃሳ 10:7

19 ላኡ ዎይ ሄዙ ማርካይ ባይናን፥ ዎሳ ጎልያ ጭማ ሞትያዋ ስሶፓ። ዛረ. 17:6፤ 19:15 20 ሀራቱ ያያና ማላ፥ ናጋራ ኦꬅያ ኡባቱዋ አሳ ኡባ ስንꬃን ሴራ።

21 ኔን አይነ አሳ ዴሙዋ ጼለናን፥ እቱዋ እቱዋፐ ዱማየናን ሀ አዛዙዋ ናጋና ማላ፥ ጾሳንነ የሱስ ክርስቶሳን ዶረቴዳ ኪታንቻቱዋ ስንꬃን ኔና ታን ዞራይ። 22 ኦ ቦላንነ ኤሌላደ ነ ኩሽያ ዎꬆፓ። ሀራቱዋ ናጋራን ገሎፓ። ኔና ጌሻተꬃን ናጋ።

23 ኔን ኡባ ዎደ ሳከትያ ድራዉነ ነ ኡሉዋ ድራዉ፥ ጉꬃ ዎይንያ ኤሳ ኡሻፐ አትን፥ ሃꬃ ጻላላ ኡሾፓ።

24 እት እት አሳቱዋ ናጋራይ በአናዉ ቆንጨ፤ ኡንቱንቱ ናጋራይ ኡንቱንታ ፕርዳናዉ ኡንቱንቱፐ ስንꬃዉ አꬌ። ሽን ሀራቱ ናጋራይ ጉየፐ ቆንጬ። 25 ሄዋዳንካ፥ ሎኦ ኦሱካ ቆንጬ። ቆንጭቤናባ ግዶፐነ፥ ጌማናዉ ዳንዳየና።