1 ጾሳ ሱንꬃይነ ኑ ትምርቲ ቦረተና ማላ፥ አይለተꬃ ሞርገ ምꬃ ግዶን ደእያዋንቱ ባረና ሞድያ ጎዳቶ ቦንቹ በስያዋ ኤርኖ። 2 አማንያ አሳ አይልያ ግዴዳዋንቶ ኡንቱንቱ ጎዳቱ ኡንቱንቶ እሻ ግድያ ድራዉ፥ ኡንቱንታ ካꬎፕኖ። ሽን ባረንቱ ኪታን ጎኤትያዋንቱ ኡንቱንቱ ሲቅያ አማንያዋንታ ግድያ ድራዉ፥ ኡንቱንቱ ካሰዋፐ አꬂደ ኦꬃናዉ በሴ።

ኔን ሀ የዋቱዋ ታማርሳናዉነ ኦዳናዉ በሴ። 3-4 ኦንነ ዱማ ትምርትያ ታማርስያዋ ግዶፐ፥ ቃይ ኑ ጎዳ የሱስ ክርስቶሳ ቱሙ ቃላናነ ኑ አማኑዋ ትምርትያና ጋከተና ኡራይ ዳሮ ኦቶረቴ፤ አይነ ኤረና። ቃይ ቃላ ቦላን ፓሉመታናዉነ ዋላቀታናዉ ኡንቱንቶ ጊገና ቆፋይ ደኤ። ሄዌ ቃናትያ፥ ፓሉማ፥ ቦርያ፥ ኢታ ስꬍያ ካለꬄ። 5 ቃይ ኡንቱንቱ ሁጲ ኦና። ቱማተꬃይ ባይና አሳቱዋናካ ፓሉማ ካለꬄ። ኡንቱንቱ ጾሳ ማላትያዋን ዱረታና ጊደ ቆፒኖ። ኔን ሄ አሳቱዋፐ ሻከታ።

6 ሽን ታዉ ደእያባይ ታዉ ግዳና ግያ ኡራ ጾሳ ማላትያዌ ዱረዬ። 7 አያዉ ጎፐ፥ ኑን ሀ አላምያ አይነ አህበይኮ፤ ቃይ አፐ አይነ አፎኮ። 8 ሽን ምያባይነ ማይያባይ ደኦፐ፥ ሄዌ ኑዉ ግዳናዋ። 9 ሽን ዱረታናዉ ኮይያዋንቱ ፓጭያንነ ጲርያን ገሊኖ፤ ቃይ ዳሮ አሳ ባሻዉነ ꬋዮ ጎች አፍያ ዳሮ ኤያነ ቆህያ አሙዋን ኩንዲኖ። 10 አያዉ ጎፐ፥ ሻሉዋ ሲቅያዌ ኢታተꬃ ኡባዉ ፑልቱዋ። እቱ እቱ ሄዋ አሞቲደ፥ አማኑዋፐ ባለቲደ፥ ዳሮ መቱዋን ባረንታ ቆሄድኖ።

11 ሽን ኔኖ፥ ጾሳ አሳዉ፥ ሄዋፐ ባቃታ። ጽሎተꬃ፥ ጾሳ ማላትያዋ፥ አማኑዋ፥ ሲቁዋ፥ ዳንዳያነ አሽከተꬃ ካላ። 12 አማኑዋ ባጽያ ሎይꬃ ባጸታ። ዳሮ አሳ ስንꬃን ሎኦ ማርካ ማርካታደ፥ ኔና ጾሳይ ጼሴዳ መꬍና ደኡዋ ኦይቃ። 13 ኡባባዉ ደኡዋ እምያ ጾሳ ስንꬃንነ፥ ቃይ ጰንጼናውያ ጵላጾሳ ጌተትያ ጋድያ ሞድያዋ ስንꬃን ሎኦ ማርካ ማርካቴዳ ክርስቶስ የሱሳ ስንꬃን ታን ኔና ሀዋ አዛዛይ። ዮሃ. 18:37 14 ኑ ጎዳ የሱስ ክርስቶስ ቆንጫና ጋካናዉ፥ ቅታይ ባይናንነ ቦሪ ባይናን ሄ አዛዙዋ ናጋ። 15 አ ቆንጨꬃ፥ እት ሱንꬃይ ደእያ አንጀቴዳ ጾሳይ፥ ካታቱዋ ካቲ፥ ጎዳቱዋ ጎዳይ፥ ባረ በስያ ዎድያን በሳና። 16 ሀይቀናዌ እት አ ጻላላ። ኦንነ አኮ ሺቃናዉ ዳንዳየና ፖኡዋን ደኤ። ኦንነ አ በእቤና፤ ቃይ በአናዉካ ዳንዳየና። ቦንቹነ መꬍና ዎልቃይ አዉ ግዶ። አመንእ።

17 ሀእ ሀ ዎድያን ዱረ ግድያዋንቱ ኦቶረተናዳንነ ቃይ ኑን ናሸታናዳን፥ ኡባባ ፓላህሲደ ኑዉ እምያ ደኡዋ ጾሳን አማነታናዋፐ አትን፥ አꬍያ ዱረተꬃን ኡንቱንቱ አማነተናዳን፥ ኡንቱንታ አዛዛ። 18 ኡንቱንቱ ሎኦባ ኦꬃናዳን፥ ሎኦ ኪታን ዱረታናዳን፥ ኬክያዋንታነ ሀራቱዋና ሻክ አክያዋንታ ግዳናዳን አዛዛ። 19 ሄዋ ያትያዋን ኡንቱንቱ ስንꬃዉ ባረንቶ ምኖ ባሶ ግድያ ሻሉዋ ባረንቶ ሺሽኖ። ሄዋፐ ጉይያን፥ ኡንቱንቱ ቱሙ ደኡዋ አካና።

20 ጽሞቶሳ፥ እት እት አሳይ ባላን ኤራተꬃ ግያ ኤያ ፓሉምያፐነ መላ ሃሳያፐ ባቃታደ፥ ነዉ እመቴዳ ሀዳራ ናጋ። 21 አያዉ ጎፐ፥ እቱ እቱ ኑዉ ኤራተꬃይ ደኤ ያጊደ፥ አማኑዋ ባሌድኖ።

ጾሳ አꬎ ኬካተꬃይ ህንተናና ኡባና ግዶ።