1 ሽን ዉርሰꬃ ጋላስ ዋይስያ ዎዲ ያናዋ አኬካ። 2 አያዉ ጎፐ፥ አሳይ ባረና ሲቅያዋንታ፥ ሻሉዋ ሲቅያዋንታ፥ ጬቀትያዋንታ፥ አይያዋንታ፥ ቦርያዋንታ፥ ባረና የሌዳዋንቶ አዛዘተናዋንታ፥ ጋላተናዋንታ፥ ጌሻተꬃይ ባይናዋንታ፥ 3 ሲቁ ባይናዋንታ፥ ስገተናዋንታ፥ ዝግርሳንቻቱዋ፥ ባረና ናገናዋንታ፥ ኬከናዋንታ፥ ሎኦባ ዶሰናዋንታ፥ 4 ኡባ ኤርከ ግያዋንታ፥ ድርቢያዋንታ፥ ኦቶሩዋን ሱገትያዋንታ፥ ቃይ ጾሳፐ አꬂደ፥ እሻሉዋ ዶስያዋንታ ግዳና። 5 ኡንቱንቱ ጾሳዉ ጎይንያዋ ማላቲኖ፤ ሽን አ ዎልቃ ካዴድኖ። ሄዋንቱ ማላ አሳቱዋኮ ሺቆፓ።

6-7 አያዉ ጎፐ፥ ኡንቱንቱፐ እቱ እቱ አሳ ጎልያ ገሊደ፥ ናጋራይ ዴጼዳዋንታ፥ ዱማ ዱማ አሙዋን ሱገትያዋንታ፥ ኡባ ዎደ ታማሪደ፥ ቱማተꬃ ኤራ አካናዉ ሙለ ዳንዳይቤና ዳቡራንቻ ማጫዋንታ ባለꬂኖ። 8 ያኔስነ ያምባሬስ *ያኔስነ ያምባሬስ፦ ሀ ሱንꬃቱ ኤጫ ጫቁዋ ማጻፋን ባዋ። ሽን ጮራ አሳይ ግያ ቆፋይ፥ “ሀዋንቱ ሙሴ እስራኤልያ አሳ ግብጼፐ ከሲደ ካለꬃናዉ ቆፔዳ ዎደ፥ አናና ኤቀቴዳ ሙሩንያዋንታ” ያግያዋና። ከሳ 7:11፣ 12 ጼልተ። ሙሴ የዉዋ ጳልቆዋዳን፥ ሄዋዳን ቃይ ሀዋንቱ፥ ሱረ ቆፋይ ባይናዋንታ አማኑዋን ኩንዴዳዋንቱ፥ ቱማተꬃባ ጳልቂኖ። ከሳ 7:11 9 ሽን ያኔሳ ኤያተꬃይነ ያምባሬሳ ኤያተꬃይ ቃይ ቆንጬዳዋዳን፥ ኡንቱንቱ ኤያተꬃይካ አሳ ኡባዉ ቆንጫና ድራዉ፥ ኡንቱንቱ ካሰዋፐ አꬊደ ድጭክኖ።

10 ሽን ኔን ታ ትምርትያ፥ ታ ሀኖታነ ታ ቆፋ፥ ታ አማኑዋነ ታ ዳንዳያ፥ ታ ሲቁዋነ ታ ገንጩዋ፥ 11 ታ የደሳነ ታ ዋይያ በኣዳ። አንጾክያነ፥ እቆንዮነነ ልስጽራ ግያ ካታማቱዋን ታና ጋኬዳባነ ታን ዳንዳዬዳ የደሳ ኤራሳ። ጎዳይ ታና ሄ ኡባፐ አሼዳ። 12 ቱማተꬃን ክርስቶስ የሱሳን ጾሳ ማላቲደ ደአናዉ ዶስያ ኡባይ የደርሰታና። 13 ሽን ኢታ አሳቱነ ባለꬅያዋንቱ ሀራቱዋ ባለꬂደነ ባረንቱ ሁጰዉ ባሊደ፥ ካሰፐ ኢት ኢት ቢኖ።

14 ሽን ኔን ሄ ቱማተꬃ ኦፐ ታማሬደንቶነ ኤራደ፥ ኔን ታማሬዳዋንነ ኤሬዳዋን ምናደ ደአ። 15 ኔን ጉꬃ ናአተꬃፐ ዶማደ ክርስቶስ የሱሳ አማናደ፥ አቶተꬃይ ቤትያ አꬌዳ ኤራ እማናዉ ዳንዳይያ ጌሻ ማጻፋቱዋ ኤራዳ። 16-17 ጾሳ ማጻፋ ኡባን ጾሳ አያናይ ደኤ። ቃይ ሄ ማጻፋቱ ጾሳዉ ኦꬅያ አሳይ ኩመንꬃነ ሎኦ ኦሱዋ ኡባዉ ጊጌዳዋ ግዳና ማላ፥ ቱማተꬃ ታማርሳናዉ፥ ባላ ሴራናዉ፥ ባይዙዋ ሱርሳናዉነ ጽሎተꬃ ደኦ ዞርያ እማናዉ ማዲኖ።